Mpattuxa aka muulupale ookikhaliherya omusuwela oratteene

Kinnuwale oParis, oFrança. Anamuyari aka ni atthu anceene, khiyaakupali wiira Muluku ookhala. Nto ni miyo nkaakupali. Oskola kiixuttihiwe wiira itthu sootheene siroothatuwa. Mwaha waivaavo, nkaakupali wiira ookhala opattunxe itthu sootheene. Yoowiixuttiha ela yaakhala ntoko wiira ti yeekeekhai, nto nkoona oreerela otokosa wiira kisuwele moota okumi opacenrye aya.

Khiivo etiini yaasivela anamuyari aka. Awo yuupuwela wiira vaakhanle wiira Muluku ookhala, moolumwenkuni khisaarowa wiiraneyaka itthu soohiloka nave atthu khiyaarowa ohaawaka. Nave-tho, okhala wiira kaaniweha itthu soohiloka saapakiwa ni atthu ale yeettela etiini, nto nkoona oreerela okupali wiira ookhala Muluku oophenta. Eyo yaanikiiriha waatheya atthu ale yaakupali wiira Muluku ookhala.

Masi nenna-va, kinnikupali wiira Muluku ookhala ni onnikikhapelela, hata ikwaha sikina kuupuwelaka wiira nkirina efaita. Vano kiniphavela wooleelani etthu ekikhalihenrye oturuka muupuwelo aka ni moota kiwenrye aka okhalana okumi wooloka.

Okathi kaarina aka iyaakha 19, kaahithanliwa wiira kakhale toropa ni kaahithamihiwa elapo aka kiroihiwaka elapo ya oGuiana Francesa, wAmérica do Sul. Miyo nkaatonko wuupuwela wiira elapo ele yooloka, muhoolo yaamuturuka okumi aka.

Kirina ene iyaakha 20, kaahitthikela elapo ya oParis. Kiri ene elapo ele, okhuma Segunda mpakha Namathanu, kaanivara muteko munceene nave wuumalani wa esumana, kaanirowa nfestani ni ohapaliwa. Masi nkaahakalala. Okhala wiira opuha onikumiheriwa ni olumwenku ola wa Satana, khahiyo weekeekhai. Kaahoona wiira atthu khiyaaroromeleya, yaaninyokhana mwaha wookhala a iraasa soovirikana, ni atthu anceene yaanihaawa. Nave kaanaaweha hata atthu ale ahitthenke etthu, ahaawaka. Kaanixanka okathi kaaweha aka atthu apakaka itthu sinihonona elapo. Kaaniphavela olokiherya itthu masi nkaawerya. Nto kaahuupuwela otthikela wAmérica do Sul.

KUUPUWELA WIIRA OKHALA MUTAKHWANI WAAMUKIPHWANYIHA OHAKALALA

Kaahitthikela oGuiana Francesa, kinarowa okhala muttetthe yoowo kaasuwenle aka okathi kaari aka toropa. Kuupuwela wiira kaamuhakalalaka kikhalaka mutakhwani, kipahaka isuruma ni kihiwehaka itthu soohiloka siiraneya oParis. Masi nuuvira okathi vakhaani, kaahitthikela opaka itthu simosa-ru kaapaka aka khalai. Kaanivara muteko munceene okhuma Segunda mpakha Namathanu, nto wanikisa wa esumana kaanirowa nfestani.

Okathi ole, ookhala mutthu mmosa aakivahale Biibiliya. Kaahipacerya omusoma kuupuwelaka wiira kamphwanya malakiheryo, yaarowa okikhaliherya okhala mutthu ooloka. Masi nkaiwexexa etthu kaasoma aka.

Kaahikhalana apatthani aka, nave yaawo yaikoha nthowa naya apinaatamu ari aya valaponi. Awo yaahithaama muttetthe yaakhala aya anarowa okhala mutakhwani. Nto yaahivaha opuro owo nsina noowi “muttetthe woowiiraana”.

Waahikisivela okhala naawo mutakhwani, mwaha woowi naanihakalala ni itthu vakhaani ni naari ootaphuwa. Naanipaka itthu ntoko naaphavela ahu nave khuuvo aanileela etthu yoopaka. Hiyo naavenya nuumala nsuwa okhuma ni naarowa orupa nuumala wiila. Naanaala soolya sahu, naanirumiha muusika saanisivela ni naanipaha isuruma. Naanikhapelela opuro naakhala ahu nave naanikawana itthu naaphwanya ahu. Hiyo naalya makukhu ni ifuruta okhala wiira khinaaphavela wiiva inama. Hiyo khinaiwelela malamulo a kuvernu, ni ikwaha sikina naanipaka itthu saakhoottihiwa ni nlamulo akhala wiira saamuniphwanyiha mureerelo, ni khisaarowa waakumiherya mixankiho atthu akina.

Hiyo naaphavela wiira olumwenku okhale woowiiraana ntoko opuro ole naakhala ahu. Opuro ole naakhala ahu, ootheene naamulikana, maana khuuvo ammantari mukhwa awe ni naanireerelana murima. Masi naahoona wiira mwaha woopakaka itthu sinnisivela paahi, naanipaka itthu soohiloka. Nuuvira okathi, naahoona wiira naahikhalana mixankiho seiyo yaarina aya atthu akina. Muttetthe ole, akina yaakhanle mahiku vakhaani, akina isumana vakhaani, nave akina miyeeri vakhaani. Masi miyo kaakhanle iyaakha piili.

Okathi ole kaakhala aka mutakhwani, kaahoona wiira elapo yookhalana itthu sootheene sooloka nimpirisari ahu. Nihiku nimosa, kaahilakela okontari inuku sa paphaya. Masi nkaawenrye omaliha okhala wiira khisaareere. Nto kaahiikoha so: Xeeni elapo ennivaha aya itthu sinceene sooreera? Vaakhala ntoko wiira ookhala mutthu aalokihenrye empa yooreera ohela-mo itthu sootheene sooloka wiira atthu onaaphenta awe akhaleke-mo. Nto kaahoona wiira elapo kekhumelenle mekhaya paahi. Ookhala mutthu opattunxe. Masi ti pani opattunxe elapo ninkhala ahu? Okathi ole, kaahoona wiira ookhala Mpattunxe. Masi nkaamusuwela.

Miyo, nkaahiyale omusoma Biibiliya. Masi ekwaha ela, kaaphavela ophwanya etthu Muluku oniphavela awe wiira kipakeke. Nto kaahipacerya ovekela ni opaka esinaale ya kruxi hata kahaasuwela etthu yaataphulela aya. Vano kaahipacerya wiikoha vakhala wiira nsina na mutthu opattunxe itthu sootheene ti Yah, mwaha woowi kaaniiwa nsina nlo okathi niipa ahu isipo etakhwa ele naakhala ahu.

MOOTA KIMUSUWENLE AKA TIITHI AKA OOVAHA, YEHOVA

Kinoona wiira okathi ole kaapacenrye aka ovekela, Mpattuxa aahoona wiira kaaphavela omusuwela. Mpatthani aka mmosa muthiyana aakhala opuro ole naakhala ahu, aahikumana ni Namoona a Yehova misionaario iihaniwa Michel. Nto aahinvaha eliivuru eni Poderá Viver Para Sempre no Paraíso na Terra.a Okathi kaasoma aka eliivuru ele, saanikisivela vanceene itthu kiixutta aka! Kaahihakalala nuumala wiixutta wiira kanwerya okhala mahiku ootheene valaponi, nuumala okhala Eparayiisu. Eyo ti etthu kaaphavela aka, okhala elapo yooloka, ya murettele kiri ene ni atthu kinaaphenta aka nihilipelelaka okhwa. Nto kaaniphavela okhala mpatthani a Mpattuxa oovaha, yoowo oniphavela onivaha okumi wooloka muhoolo.

Kaanisuwela wiira kaahaana opaka marukunuxo mookumini mwaka, masi wiira kipake eyo kaahaana okhaliheriwa ni atthu akina. Nto kaahinvekela mpatthani aka ole muthiyana, wiira okikhaliherye olavula ni Michel.

Nihiku kaalavunle aka ni Michel, owo aahikilattula wiira kimurowele konkereesu aarowa opakiwa oMatoury, ekapitaali ya oCayenne. Wiira mutthu ophiye opuro ole aarowa opakiwa konkereesu, aahaana weetta ikiloomo 240. Okathi ole kaahikhalana ikharari soorakama ni ereru yoohasuwasa. Kaahiwara ekamiseeti yuulupale ni ekaalasa ya ekoore rooxa yeeyo yaarina iteseenyu sinceene. Moohicikha moota kaari aka, anna ni arokora yaahikikhaliherya orowa okonkereesuni, yaahikivaha opuro woomaka ni yaahikivaha yoolya. Ophenta ni ovaha wa Anamoona a Yehova, waahikikhaliherya okupali wiira koophwanya ekeekhai.

Okonkereesuni, yaahithokoreriwa yoolepa ya 1 Timootheyo 5:8. Yoolepa ela, yaahitthokiheriwa wiira tiithi ooloka tuule onivaha emusi awe itthu sinaathowa. Kaahiixutta wiira Yehova onnivarihela muteko malakiheryo ala ni khula okathi onnaakhapelela arumeyi awe. Nto kaahoona wiira kahela nipuro noopacerya omukokhorela Yehova, nkaarowa oxankaka ni itthu kiniphavela aka, mwaha woowi Yehova aamukikhapelelaka. Kaahoona wiira eyo ekeekhai, okathi kaaweha aka moota Yehova aamukhapelela awe Michel. Okhala wiira Michel aanihela nipuro noopacerya omukokhorela Yehova, owo aahikhalana itthu sootheene aapirisari awe ni aanihakalala.

Okathi kiixutta aka itthu sinceene mbiibiliyani, kaahoona wiira kaahaana opaka marukunuxo mookumini mwaka. Nto kaahihiya ompaha soona ni isuruma. Nihiku nle, kaahimukuxa soona ni isuruma kaahalanne aka kirowa kariha ni nkaatthikenle-tho opaha. Nto kaahipacerya orowela mithukumano. Nihiku na mithukumano, kaahinvekela munna mmosa wiira okimetthe ikharari, nto nihiku nenle owo aahikimettha niri ene Empa ya Omwene.

Nuuvira isumana vakhaani, kaahikhuma muttetthe ole kaakhala aka oGuiana oFrancesa, kinarowa oFrança. Nuumala ophiya, kaahiphwanya Empa ya Omwene, ni kaahitthikela osomihiwa Biibiliya. Anamuyari aka yaahoona wiira kaahipaka marukunuxo manceene. Kaahihiya ompaha soona ni isuruma, kaahihiya ohapaliwa, ni kaahihiya orowa ifesta seiyo atthu anceene anirumeela aya wiira apake itthu soohiloka. Anamuyari aka yaahihakalala mwaha miyo woopaka marukunuxo awo, masi khisaasivenle sookupali saka. Enamuna kaarumeelale aka wiira kaalaleerye, khiyaalonke. Nto kaahoona wiira kaahaana waareerela murima ni waattittimiha, okathi kinaaleela aka atthu akina voohimya sa Yehova.

Kipatisiwe mwaakha wa 1996. Kaahinvekela Yehova wiira kikhale misionaario ntoko Michel. Kaahoona wiira ele yaari enamuna yooloka ya omuxukhurela Yehova.

TIITHI AKA YEHOVA OOKIVAHA ITTHU SINCEENE SOOLOKA

Muloko aka, kaahimusuwela murokora ookisivela oniihaniwa Claudine. Owo aanikhalela nthiti olaleerya ni ikomentaario sawe saanooniherya wiira aanimphenta vanceene Yehova. Nnaamwi aakisivenle, wanipacerya kaaphavela osuwela akhala wiira aaniphavela okhala misionaaria. Kaahoona wiira Claudine aaniphavela! Nto kaahimuthela Abril mwaakha wa 2000.

Mwaakha waattharelana, naahipacerya orumeela ntoko mapioneero rekular. Nuuvira okathi, naahithanla wiixutta nttaava Mandarin nenlo ninlavuliwa ni atthu anceene a oChina, wiira nikhaliheryeke ekurupu yaattamenle muloko ahu. Khivaakhweyale para miyo wiixutta nttaava nle. Kaahaana wiixutta wuupuwela ntoko anuupuwela aya atthu a oChina ni waavya manera oolavula kaalaleeryaka wiira atthu asiveliweke. Ohimya ekeekhai, nkiixuntte olavula saana nttaava nle. Masi koomananiha wiixutta mpakha vawenrye aka. Nto nooviriha okathi woohakalaliha niri ene ni anna ni arokora a oChina. Ohiya paahi okhala mareeliho, okathi kaari aka ni anna ale wookikhaliherya wiixutta moota woovara miteko kaarowa aka ovahiwa muhoolo.

SAAHIKIPHWANYA MIXANKIHO

Iyaakha iya sootheene sivinre, kaahikhalana mixankiho. Mwa ntakiheryo, nnaamwi kaavara muteko wa Yehova ni waakhaliherya anna ni arokora kuupuwela wiira nkaapaka itthu sinceene. Miyo kaaphavela wiira myaha kaalavula aka saahaana okhala sooreera vanceene ni soovara murima, nto kaaniviriha okathi munceene kilokiheryaka. Hata vaari siiso, ikwaha sinceene kaaniriipiwa murima mwaha woowi nkaahakalala ni ele kaawerya aka opaka. (Mus. 7:16) Masi kaahaana wiixutta wiira Yehova Tiithi oophenta, owo khonlipelela wiira khaninrowa ofalyariki, masi onnihakalala ni itthu ninwerya ahu opaka.

Kiri ene ekapitaali ya oFrança, oParis, kaahithanliwa wiira kikhale mutokweene a esirkwitu ooranttela. Masi koona wiira kaahitepa okhala mmiravo ni nkaasuwela itthu sinceene wiira kikhale mutokweene a esirkwitu. Kaahiixutta wiira nikhaliheriwaka ni ikuru soowaarya sa Yehova, nnoowerya opaka itthu sinceene ovikana iye ninwerya ahu opaka mekhihu.

Masi kaahikhalana muxankiho mukina. Okhuma onamwane aka, kaahikhalana oretta onimwiiriha mutthu orettheela, oniihaniwa hiperidrose. Oretta owo waakiiriha otepa orettheela mmatatani. Okathi kaaxanka aka, oretta ola waanitepa. Mwa ntakiheryo, okathi yoole kaalavula aka mwaha wa asempeleeyani aahiiso konkereesu. Masi okathi kanvekela aka Yehova wiira okikhaliherye okhala oomaaleleya, orettheela iwo waanivukuwa. Nnaamwi oretta ola ohimala-manle, masi vaavo kinimuroromelaka Yehova, kinnikhala oomaaleleya ni nkinitepexa orettheela.

Mooreera murima, Yehova oonivaha eparakha naaphavela ahu ya okhala mamisionaario, mwaakha wa 2011. Hiyo naathanleliwe opacerya muteko wa omisionaario elapo ya oNova Caledónia, ekurupu ya ilhas do Pacífico, yeeyo erakamelanne ni oParis etthu yoowiiraka ikiloomo 16 000. Nuumala okhala misionaario, naahaana wiixutta itthu sinceene isya. Mwa ntakiheryo, naahaana olimalela soolya isya, ntoko macookhwa, inyaami ni kharaka. Naahaana ovenya oxaaka, mwaha wa wiipa muthupi ni owuwa wa alapwa. Naahaana wiixutta inamuna isya sa waalavuliha atthu. Okhala wiira atthu a esisiro ele khanaakhula ni moolumo masi anaakhula ni maitho.

Yehova oonikhaliherya ni miteko naavahiwa ahu mmutthenkesoni. Mwa ntakiheryo, naahikhala mamisionaario ni noorumeela obeteeli. Nave-tho, noorowela Eskola ya Anamalaleerya a Omwene vano ninvara muteko wa osirkwiitu. Khula muteko nivahiwe ahu, nooweha ikuru soowaarya sa Yehova sinikhaliheryaka. Masi kihiixutta wiira nnaamwi kirina ene oretta ole wa orettheela ni ikwaha sikina kuupuwelaka wiira nkirina efaita, Yehova onnikikhaliherya ovara muteko awe. Tivonto, kinninvekela Yehova ni murima aka wootheene, wiira okikhaliherye ovara muteko awe. Nnaamwi vahikhweyaka para miyo olavula nipuro niri atthu anceene, masi kikhaliheriwaka ni Yehova kinniwerya waalipiha ni waavaha malakiheryo anna ni arokora nnaaxukurya ahu.

Hata saaniphwanya mixankiho iya sootheene, Claudine khaahiyale okikhaliherya. Owo onnikipixera murima, onnikikhaliherya khula yoothanleliwa ninvahiwa ahu ni onnikhalela nthiti olaleerya. Owo khoniixinliha mwaha wa itemperatura sooviha sa esisiro ele aahiiso okathi nimpirisari ahu okhuma muloko mmosa nirowaka muloko mukina, wiilimaleliha mapuro masya ni atthu akina.

Konkereesu oopacerya kaamurowenle aka, kaahiixutta wiira Yehova, yoowo ori Mpattuxa Muulupale, okathi wootheene onnaakhapelela arumeyi awe. Okhala wiira kinnihela nipuro noopacerya omukokhorela Yehova, owo ookivaha mareeliho manceene mookumini mwaka. Yehova ookikhaliherya owiiwelela makhulupale a kuvernu ni okhala mutthu oowiiyeviha. Koohiya weetta ni apatthani yaawo ahineettela malamulo a mbiibiliyani, masi Yehova ookivaha apatthani eekeekhai ni oororomeleya. Nave Yehova ookivaha mwaaraka yoowo onikikhaliherya vanceene. Nto kinnilipelela okathi kinrowa aka okhalaka mahiku ootheene elapo esya, yeeyo Yehova onrowa awe onivaha itthu sootheene sooreera. — Mar.10:​29, 30.