Nivaheke efaita “eparakha ya onvarela muteko [Muluku] nihoovaka etthu”

1. Zakariya aahimmye wiira Yohani aarowa opaka exeeni?

OKATHI Zakariya ni Elizabeti yuuluvanle aya, mwa mwiiriirya Yehova aahaakhaliherya omuyara mwaana mwaamulopwana, yoowo aihaniwa Yohani. Atthu ootheene yiiwale mwaha ola, yaaniikoha so: “Khino mwaana ola annuwa onrowa okhala exeeni?” (Luka 1:57-66) Yehova aahimuruma Zakariya waakhula nikoho nla. Zakariya aahitthokiherya wiira Yohani aamwaakhaliherya atthu ottharuwa itampi saya, wiira awerye omutthara Mesiya yoowo aarowa orwa. (Am. 3:7; Luka 1:67-79) Masi Zakariya, aahilavula itthu sikina, ohiya paahi iye Yohani aarowa awe opaka.a Itthu Zakariya aalavunle awe siirela mpantta eprofesia yaarowa wiiraneya muhoolo ni sinninihela muhina hiyo. Vaavo ninrowa ahu owehaka itthu aalavunle awe, nnimwiixutta iponto tthaaru: 1) Eparakha ya woopoliwa, 2) Eparakha ya ovara muteko wa Muluku ni 3) Muteko nivahiwe ahu wa olaleerya.

EPARAKHA YA WOOPOLIWA

2. a) Ntoko onooniherya awe Luka 1:67-73, Muluku aaleihenrye exeeni atthu awe? b) Ti pani ori “moopoli oowerya” oniromoliwa Luka 1:69?

² Mmusome Luka 1:67-73. Muluku aahileiherya wiira aarowa owoopola atthu awe. Masi aarowa owoopola sai? Zakariya aahimmye so: “[Yehova] oonikumiherya moopoli oowerya, okhumme nloko na Davidi”. (Luka 1:69) Nto “moopoli oowerya” aarowa okhala Mesiya. Ayuda a okathi wa Zakariya yaanilipelela orwa wa Mesiya. Nave yaanisuwela wiira aarowa okhala a nloko na Abrahamu ni a emusi ya Davidi. (Maph. 22:17, 18; Math. 22:42) Xeeni Yehova ohalaka omuruma Zakariya wiira omulaleye moopoli ole oowerya? Mwaha woowi, orwa wa Mesiya waanitepa waattamela! Sivirale ene myeeri 6, mwali mmosa aihaniwa Maria aahimuyara Yesu. Nlaikha Gabriyeli naahihimya wiira aarowa wiihaniwaka “mwaana a Muluku” aarowa okhala mwene a “ehice ya Davidi, tiithi awe.” (Luka 1:30-35) Okathi aarina awe iyaakha 30, Yesu aahipatisiwa. Okathi owo, aahithanliwa ni ikuru soowaarya ni aahikhala Mesiya. (Math. 3:16, 17) Tthiri iya saari soowiiraneya soovara murima!

3. Ayuda yaarowa woopoliwa mmatatani mwaawani?

³ Ayuda a okathi ole, yaanipirisari woopoliwa. Masi yaarowa woopoliwa mmatatani mwa awani ni mwaha wa xeeni? Zakariya onnaakhula nikoho nla, ohimyaka so: “Onoopole mmatatani mwa awanani ihu ni ootheene ale anninyokha.” (Luka 1:71) Niireke Yesu anwoopola ayuda mmatatani mwa ahooleli a oRoma yaawo yaahaaxa vanceene? Nnaari. Masi, ayuda yaapirisari woopoliwa mmatatani mwa ole onikumiherya ohaawa, Satana. (Ahep. 2:14, 15) Satana taawiiriha ayuda ohaawa. Nave toniwiiriha apinaatamu ohaawa, aakhalihaka ipottha sa etampi ni okhwa. Yaahikhala etthu ekina yaawiiriha ayuda ale opirisariki woopoliwa. Okhala wiira khiyaawerya otthara moomalela Nlamulo na Moise, Biibiliya onihimya wiira awo yaari “ootakhaliwa”. (Arom. 3:20; Akal. 3:10, 13) Tivonto, ayuda yaanipirisari etthu Yehova aaleihenrye awe, omurumaka Zakariya, eyo piiyo, woopoliwa, “aleveleliwaka itampi saya.” — Luka 1:77.

4. Xeeni nimpirisari ahu woopoliwa olelo-va?

⁴ Xeeni nimpirisari ahu woopoliwa olelo-va? Moolikana ni ayuda a okathi wa Yesu, olelo-va na ipottha sa etampi ni okhwa. (Arom. 5:12) Nave, Satana ni malaikha awe ootakhala tanikumiherya mixankiho sinaaphwanya apinaatamu. Awo anneererya oniiriha wiira nihiye omwiiwelela Yehova ni omurumeela. Awo anniwiiriha “ale anninyokha” eyo piiyo, atthu yaale ahinisiveliwa moota nimukokhorela ahu Yehova, onilupattha. Tivonto, ninnipirisari woopoliwa mmatatani mwa awanani ahu awo.

5. Yesu onnoopola sai itampi?

⁵ Nrowe niwehe moota Yesu onnoopola awe mwaha wa etampi. Okathi Yesu aari awe valaponi, aahiwiixuttiha atthareli awe, moota woomurumeela Yehova ntoko oniphavela awe. Nuumala-vo, Yesu aahivaha okumi awe ntoko mukuttho, “wiira ootheene ale anooniherya omwaamini yoowo, ahipwetexiwe, masi akhalane okumi woohimala.” (Yoh. 3:16; Math. 20:28) Nave ninnimananiha opaka ele Yesu aahimyale awe, sa moota woomukokhorela Yehova ntoko oniphavela awe. Okhala wiira nlelo na atthu oottheka, nto nihaana onvekela Yehova wiira onilevelele okathi nimpaka ahu etampi. Orumeelaka mukuttho wa Yesu, mooreera murima Yehova onneemererya moota nimmukokhorela ahu. (1 Yoh. 2:1, 2) Mwa inamuna iyo, Yesu onninoopola itampi, onikhaliheryaka oleveleliwa itampi sahu wiira naphwanye okumi woohimala.

6. Yesu onrowa opaka exeeni ntoko mwene a “ehice ya Davidi”? (Nwehe eteseenyu.)

⁶ Yesu onrowa onoopola sai moomalela mwaha wa itampi ni okhwa, Satana ni malaikha awe ootakhala ni “ale anninyokha”? Okhuma mwaakha wa 1914, Yesu onnilamulela wiirimu, “ehice ya Davidi, tiithi awe.” (Luka 1:32, 33) Moohipisa, Yesu, ale oothanliwa 144 000 ni malaikha, anrowa waapwetexa apinaatamu ootheene yaawo ari awanani a Muluku okathi wa Harmagedoni. Okathi wa iyaakha 1000 sa olamulelo wa Kristu, Yesu onrowa waahihimuxa alipa-ookhwa nave amukhaliherya Yesu, ale oothanliwa 144 000, anrowa waakhaliherya apinaatamu ohikhalana etampi. (Yoh. 5:28; Wis. 22:1, 2) Nto saavira iyaakha 1000, awo anoomaliha etampi ni okhwa. (1 Akor. 15:26, 55-57) Nuumala-vo, Yesu ni ale 144 000 anrowa ompwetexa Satana, malaikha ootakhala ni apinaatamu ootheene animukhaliherya Satana. (Wis. 20:7-10) Ootheene ale ahinrowa ohiya omuroromela Yehova anrowa omurumeela yena ahirina etampi ni ahilipelelaka okhwa. Nave khuuvo onrowa waalupatthaka! Ninrowa omuttottopelaka Muluku ahu mahiku ootheene ni ovaha efaita “etthu yootepa oreera ovahale awe, yeeyo ehiniwerya ahu otthokiherya.” Eyo enihela muhina eparakha nirina ahu ya woopoliwa ni Yesu Kristu. — 2 Akor. 9:15.

EPARAKHA YA OVARA MUTEKO WA MULUKU

7. Eparakha xeeni Yehova onivahale awe? (Luka 1:74, 75)

⁷ Mmusome Luka 1:74, 75. Mwaha wa mukuttho Yesu ovahale awe, nookhalana “eparakha ya onvarela muteko [Yehova] nihoovaka etthu”, ntoko Zakariya aahimyale awe. Nninvarela sai muteko Yehova? Ninninvarela muteko Yehova okathi yoole ninlaleerya ahu, ovekela, omusoma Biibiliya ni omukokhorela okathi wa mithukumano sa mmulokoni, asempeleeya ni konkereesu. Nave ninninvarela muteko Yehova okathi ninkhaliherya ahu miteko sa obeteeli, oteka ni okhapelela isalau sa omwene ni isalau sa asempeleeya.

8. Itthu xeeni nihinoova ahu?

⁸ Onitaphulela exeeni onvarela muteko Yehova “nihoovaka etthu”? Yoopacerya, hiyo khannoova okhwa. Mwaha woowi noosuwela wiira ninrowa okhalaka mahiku ootheene, nto hiyo khaninrumeela okathi ahu ni ikuru sahu nipakaka itthu sinnisivela paahi. Ohiya-vo, ninnihela nipuro noopacerya muteko nninvarela ahu Yehova. Hata ale annilupattha anoopopihaka oniiva, hiyo khannoova ni khanihiya omurumeela Yehova. Khannihiya ororomeleya wa Yehova, okhala wiira ninnisuwela wiira nakhwa vale, Yesu onoonihihimuxa. (Yoh. 6:39, 40) Ya nenli, khannoova wiira Yehova onooninyanyala mwaha wookhala anatampi. Nikupaliki wiira Yehova onniniphenta, ninnimusiveliha ni onoonilevelela itampi sahu orumeelaka mukuttho wowoopola wa Yesu. — 1 Yoh. 4:9, 10.

9. Etthu xeeni enaaxankiha anna ni arokora akina?

⁹ Anna ni arokora akina, vannaaxankiha okupali wiira Yehova onneemererya muteko aninvarela aya. Awo anuupuwela wiira kharina efaita ni khaniphentiwa ni Yehova, woonasa wene mwaha wa itthu soohiloka siwiiranenle khalai. Aahiiso awo anuupuwela wiira Yehova khaalevelenle itampi apanke aya khalai, nnaamwi anvekenle ene wiira aalevelele ni akhaliheriwe ene ni axitokweene. Akhala wiira munuupuwela siiso, etthu xeeni mukhanle anyu oopaka?

10-11. Exeeni nikhanle ahu oopaka, akhala wiira ninniriipiwa murima aahiiso oxanka nuupuwelaka wiira Yehova khonniphenta, mwaha wa itampi sahu sa khalai? Nvahe ntakiheryo.

¹⁰ Nrowe nthokorerye ntakiheryo nimosa. Akhala wiira mutthu ohinta mwetto, owo ohaana orowa wa meetiku. Nto vaavo meetiku onilokiherya awe mwetto owo, onnimuleela mutthu owo wiira ohaana opaka esersiisiyu. Nuuvira okathi mweetto owo onnikhalana ikuru ni mutthu owo onniwerya weetta. Etthu xeeni mutthu onireerela awe opaka, uupuwelaka wiira khonrowa otthikela weetta? Owo ohaana omuroromela meetiku ni ohihiya opaka esersiisiyu. Nuuvira okathi mutthu owo, pooti openuwa onawerya weetta aahiiso otthimaka.

¹¹ Mwa enamuna emosa-ru, akhala wiira munniriipiwa murima mwaha wa itampi sanyu sa khalai ni munnixanka, mmuroromeleke Yehova. Okhala wiira onnisuwela eyo, mwaha wa oreera murima ni omoriwa wawe ikharari, Yehova onnoophentani vanceene ni ohooleveleleni itampi sanyu, maana omuruma Yesu wiira owoopoleni. (Yoh. 1:16, 17; Arom. 3:23, 24; 1 Yoh. 3:19, 20) Mpakeke ele Yehova onooleelaweni para mukupali wiira ohoolevelelani. Mwa ntakiheryo, muhihiye ovekela, omusoma Biibiliya ni orowela mithukumano. (Esal. 1:2; 1 Ates. 5:17; Ahep. 10:25) Ntoko siisaale onivira aya okathi wiira mutthu ontale mweetto openuwe, nave onoovira okathi wiira mutthikele okupali wiira Yehova onnoophentani. Masi mukupaliki wiira munootthikela. Tivonto, muhikhulumuwe ni muhihiye omuroromela Yehova. Nave muhihiye opaka itthu sinlipiha ompatthani anyu ni Yehova. (Afil. 3:16) Nave-tho, mmuxukhureleke Yehova mwaha woowi onnoovahani ikuru seiyo sinookhaliheryani ohihiya omurumeela. Ootheene ahu, nihihiye omuxukhurela Muluku ni Kristu, yaawo anivahale eparakha ya ovara muteko wa Muluku nihoovaka etthu!

MUTEKO NIVAHIWE AHU WA OLALEERYA

12. Yohani Mpatiza aalokihenrye sai iphiro sa Yehova? (Luka 1:76-79)

¹² Mmusome Luka 1:76-79. Zakariya aahimuleela mwanawe ole ohimyaka so: “Munoorowa ohoolo wa Yehova, wiira mwalokiherye iphiro sawe”. Moolumo ale a Zakariya yiiraneyale sai ni Yohani Mpatisa? Yaahiiraneya, okhala wiira nuumala Yohani wunnuwa, owo anikhalela nthiti olaleerya. Yohani aahaaleela ayuda wiira yaahaana ottharuwa itampi saya, opatisiwa ni omweemererya Mesiya yoowo aarowa orwa. Nuumala Yohani ompatisa Yesu, owo aahimuhimya okhala ole othanliwe ni Yehova oriki: “Mmooneke! Ola ti Mwaapwittipwitthi a Muluku, yoowo onttipiha itampi sa moolumwenkuni!” Nave Yohani ahaatumererya awiixutti awe wiira yaahaana omutthara Yesu, yoowo aari Mesiya. — Yoh. 1:29, 34-36, 40, 41.

13. Moolumo a Zakariya oowi orwa wa Mesiya onlikana ni “nsuwa ninkhuma voosisu” yaataphulela exeeni?

¹³ Yohani aahimananiha vanceene opaka etthu ya efaita yuulupale, olaleya wiira Yesu aari Mesiya. Mwaha wa xeeni? Moovarihana ni Zakariya, orwa wa Mesiya waalikana ni “nsuwa ninkhuma voosisu”. Eyo enooniherya wiira, itthu saamuturukeya vanceene mwaha wa orwa wa Mesiya! Veekeekhai, ihapari iya saari soohakalaliha nto yaanipirisari atthu anceene olaleya, ohiya paahi Yohani. Nto tani yaarowa omukhaliherya Yohani olaleya muhupi ole onoopola ikumi sa atthu?

14. Muteko xeeni wa faita Yesu ni awiixutti awe yaavara aya? (Yesaya 61:1, 2)

¹⁴ Yesu aahilaleya ihapari iyo isya. Owo aahimaleliha moolumo a Zakariya, yaawo aahimyale wiira aamoorwa ole “onrowa waamwaleela atthu akilanthe mweepiphini vamuuttutthini woowiiva.” Yesu aaniwoonela othunku ni aaniphavela waakhaliherya ale yaahaaxiwa ni atthu akina. Yesu aahaalaleerya ihapari soolipiha ni aahaaleela “mwaakha wa oreera murima wuulupale wa Yehova”. (Mmusome Yesaya 61:1, 2; Luka 4:16-21) Nave aanikhalela nthiti olaleya ohimyaka so: “Omwene wa wiirimu ori vakhiviru.” Hata vari siiso, owo aanisuwela wiira muteko owo waahaana ovariwa ni atthu anceene. Tivonto, aahatreinari awiixutti awe wiira alaleyeke ihapari iyo. — Math. 4:16, 17; 10:7; 28:19, 20.

15. Xeeni ninreerela ahu okhalelaka nthiti olaleya ihapari sooreera olelo-va, ovikana khalai?

¹⁵ Okhala wiira na awiixutti a Yesu, hiyo ninnivaha efaita muritti nrina ahu wa olaleya muhupi wa Yehova yoowo onoopola ikumi. Tthiri olaleya mukuttho wa Yesu ni Omwene wa Muluku, wookhalana efaita yinceene olelo-va ovikana khalai. Mwaha wa xeeni? Mwaha wa etthu enrowa wiiraneya muhoolo. Moohipisa-va, anrowa okhumelela “maxakha maalupale, ahinakhumelele okhuma woopaceryani wa olumwenku”. (Math. 24:21) Okathi owo, atthu anceene anoowiriyana ihapari sooreera ni opacerya omurumeela Yehova, maana animuupuwelaka itthu anrowa aya wiixutta. Nto Yesu, ale oothanliwa 144 000 vamosa ni malaikha, anrowa owana ni awanani ootheene a Muluku. Vano ale animukokhorela Yehova anrowa woopoliwa wiira yakhaleke mparayiisu. (Math. 25:34; Wis. 16:16; 19:19) Tthiri ti va faita olaleya ihapari sooreera olelo-va! — Math. 24:14; Mar. 13:10.

16. Etthu xeeni mulakenle anyu opaka? (Nwehe ifootu.)

¹⁶ Moolumo a Zakariya ari Luka 1:68-79, anninuupuxerya itthu 3 sinnisivela vanceene. Itthu sene tiiya: Eparakha ya woopoliwa, eparakha ya ovara muteko wa Muluku nihoovaka etthu ni muteko nivahiwe ahu wa olaleya ihapari sooreera. Niireke munnaamini mukuttho wa Kristu ni moomuleiherya Yehova wiira munrowa omurumeelaka mahiku ootheene? Niireke munnivaha efaita eparakha murina anyu ya omurumeela Yehova? Akhala wiira munnivaha efaita, mukhaleleke nthiti eparakha murina anyu ya olaleya “mwaakha wa oreera murima wuulupale wa Yehova.” Mulaleyeke ihapari sooreera sa “nihiku Muluku ahu onrowa awe wunla ikuhu” ni nihiku Omwene wa Muluku onrowa awe waapwetexa awanani ootheene ni wiiriha elapo okhala Eparayiisu. Tivonto, nrowe naalattule atthu ootheene animphenta Muluku wiira akhale ni hiyaano ni “nikhale oororomeleya ni a xariya ohoolo wawe, mahiku ahu ootheene.” — Luka 1:74, 75.