Niireke mwaanisuwela?

Okathi wa aisarayeli, muteko xeeni waavariwa vamukhora va epooma?

VAMUKHORA va epooma, khahiyo paahi waarumeeliwa para okela muhina mwa epooma. Okhala wiira atthu anceene yaanivira opuro ole, waari opuro waavariwa miteko sa khula nihiku. Biibiliya onniromola ikwaha sinceene nuulumo noowi mikhora sa epooma nave onnihimya miteko saavariwa opuro owo.

Ikwaha sinceene, atthu yaanithukumana vamukhora va epooma. Nuulumo na eheeperi noowi mukhora, khahiyo paahi ninhimmwa nipuro yaavira aya atthu wiira akele mpooma. Nave-tho, anihimmwa mapuro a waattamela vamukhora, atthu yaateka aya mixaxa saya. Mapuro makina, waari nipuro nuulupale weiwo atthu anceene yaakumana aya.— Neh. 8:1.

Atthu anceene yaanimweetta nakoso waattamela vamukhora wa ipooma. Mikhora sikina sa oYerusalemu, saahivahiwa masina aya, ntoko mukhora wa ihopa ni mukhora wa ipwittipwitthi. Woonasa wene saahivahiwa masina awo, moovarihana ni itthu saatumihiwa opuro owo. — Sof. 1:10; Yoh. 5:2.

Atthu akina yaanivaanela myaha sa nakoso ni myaha sikina waattamela vamukhora wa epooma. Ottharaka nlamulo, Abrahamu aahiiwanana ni atthu akina, vamukhora va epooma owehiwaka ni atthu anceene. Nave Boazi aahipaka etthu emosa-ru. (Maph. 23:10-15, 17, 18; Rut. 4:1, 10) Atthu akina yeetta mukwaha, yaanirupa vamukhora va epooma akhala wiira khuuvo mutthu aarowa owaakhela owannya awe. (Aph. 19:15-21) Nave atthu akina yaanirwa vamukhora wa epooma wiira yawiriyane itthu siiraneyale niinaano. — 2 Sam. 18:24, 25.

Alipa-oophuka, yaaniphuka milattu waattamela vamukhora wa epooma. Awo yaaniphuka ohoolo wa atthu akina, wiira atthu awo yiiwe itthu sootheene siiraneyale ni yoothanla ya alipa-oophuka awo. (Otum. 21:18-20) Okhala wiira naari nipuro noowaatta atthu, woonasa wene alipa-oophuka yaanipaka soothanla mwa xariya. Nuumala alipa-oophuka opaka yoothanla, ale yaakhaliherya yaanimwiiriha mutthu owo etthu aaphwanela awe moovarihana ni nlamulo. (Otum. 25:2) Alipa-oophuka, yaahaana waavaha ntakiheryo nooloka atthu akina ni waakhaliherya okhalana mweettelo wooloka. — Otum. 16:18-20; Yoobi 29:7, 11-17.

Ari ene vamukhora wa epooma, alopwana oowaamini yaanaatumererya aisarayeeli ohihiya omuroromela Yehova. Maprofeta ni arumeyi akina a Muluku, yaanilaleya muhupi wa Yehova vamukhora wa epooma, maana yaanisuwela wiira atthu anceene yaanikhala opuro ole. (1 Mam. 22:10; Yer. 17:19, 20) Mwa ntakiheryo, Yehu aahilaleya vamukhora va epooma wiira Yehova aahimaliherya muhupi aahimyale awe wiira aamwaahukhumu atthu a etthoko ya Akhabi. (2 Mam. 10:8-10) Mwene Ezekiya, aahaathukumanya makhulupale a anakhotto vamukhora wa epooma wiira aatumererye omuroromela Yehova. — 2 Wah. 32:6-8.

Biibiliya onihimya wiira “ankhili eekeekhai” annikhuwela ni nsu noowiiwanyeya, nave nsu naya ninniiwanyeya “vamikhora va epooma”. (Mir. 1:20, 21) Wisarayeli wa khalai, vamukhora va epooma, alopwana oororomeleya yaanivaha miruku sooloka ni yaanipaka soothanla attharaka exariya. Olelo-va, ankhili a Yehova alempwale mbiibiliyani. Nto olumwenku wootheene arumeyi a Yehova annimurumeela Biibiliya wiira yaakhaliherye atthu waaphwanya ankhili eekeekhai.