Yehova ookikhaliherya okhala mutthu ooloka

Saahikhala itthu sinceene kaawehale aka opuro ole, masi etthu yaatempe okivara murima yaari atthu yaavara muteko opuro ole. Yaahikhala anna amiravo ni arokora imwali, yaawo yaavara muteko munceene ni wookhulumula. Masi awo yaanihakalala ni yaari ooxukhuru hata yahaaxukhureliwa ni ottottopeliwa mwaha wa muteko yaavara aya. Ntakiheryo naya, nookikhaliherya okhala mutthu oowiiyeviha okathi kinivara aka miteko sa Muluku.

Iyaakha iye sivinre, Yehova ookikhaliherya okhala mutthu ooloka okathi kinivaraka aka muteko awe. Masi mukihiye kooleeleni moota kiixuntte aka ekeekhai okathi kaari aka etiini Budista.

KIRI ENE MMIRAVO KAANIMWAAVYA MULUKU EEKEEKHAI

Miyo kiyariwe ni kinnuwale oChicago, Illinois wEstados Unidos. Hiyo niyariwe axexe, miyo kipacenrye oyariwa. Anamuyari aka yaahikhuma oJapão arowaka oChicago akupaliki wiira yaphiya wEstados Unidos yaamuthaaciri. Anamuyari ahu yaapavela wiira nisome vanceene ni nithaaciri.

Anamuyari ahu yaanikhalela nthiti weettela etiini Budista. Maama aka annuwale etthoko yaari etemplo ya etiini Budista. Paapa awe ni axirokora awe maama aka anli, yaari makhulupale a etiini Budista. Okathi kaari aka mwaana, amusi aka yaanivaha efaita yinceene etiini Budista. Okathi kaaphiyaka owaani nuumala otthika oskola, etthu yoopacerya kaapaka aka, waari opaha nsenso ni ovaha musoro ni maasi elatarato ya muluku Buda. Nto khula eDomingo, naanirowa etemplo ya muluku Buda ni naaniipela elatarato yuulupale yaalikana ni muluku Buda, yeeyo yaapakiwe ni eweero.

Kinnuupuwela wiira, okathi kaarina aka iyaakha 7 vaavo kaawehaka elatarato ele naarina ahu owaani, kaaniikoha so: Etthu xeeni enrowa okiiraneela kakhwa vale? Etiini Budista keetta aka, kiixuttihiwe wiira nuumala okhwa kaarowa okhala munepa. Nto kaahisuwela wiira nihiku nlo, okumi aka wammala. Miyo, kaarowa opakeya munepa, masi nkaarowa opuhaka itthu siniiraneya ni okumi wa valaponi va. Nto kaahiriipiwa murima vanceene! Moowaakuveya miyo kaahixanka vanceene ni nkaarina nlipelelo.

Okathi kaarina aka iyaakha 15 kaahoona wiira soolema ni itthu naapaka ahu etiini Budista, khisaarina efaita. Nto kaahoona wiira yookhala etthu yaakihaleela mookumini mwaka. (Math. 5:3) Vamurimani vaka, kaanisuwela wiira ookhala Muluku eekeekhai, Oowerya Sootheene, nto miyo kaaniphavela omusuwela Muluku owo. Kaanisuwela wiira Biibiliya, anwerya waakhula makoho kaarina aka voohimya sa Muluku, okumi ni okhwa. Nto kaahimuthuma Biibiliya oorumeeliwa Versau King James okathi wa efesta ya etiini Budista, nnaamwi okhala wene okathi wa efesta eyo yahaatumihiwa abiibiliya!

Okathi kaarina aka iyaakha 17 vaavo keetta aka mphironi ni mwalapwa aka, munna mmosa aihaniwa Wilson Bashou, aahirwa ovaanela ni miyo. Owo aahikikoha so: “Kiireke nyuwo munnisuwela etthu Muluku onileiherya awe opaka muhoolo?” Nikoho nle, naahiniiriha ovaanela vanceene voohimya sa Biibiliya. Munna Wilson aahimusoma Wiisuupulula 17:1 ni aahikikoha so: “Maasi manceene, yaawo okilaathenle awe muthiyana namararuwa anitaphulela exeeni?” Miyo nkaawenrye waakhula. Nto owo aahisoma eversiikulu 15, yeeyo enooniherya wiira maasi manceene anihimmwa atthu. Miyo kaahihakalala osuwela wiira Anamoona a Yehova annirumeela iversiikulu siri mbiibiliyani wiira atthokiherye iversiikulu sikina sooxankiha. Kihinatthi okhuma, munna Wilson aahikivaha eliivuru A Verdade Que Conduz a Vida Eterna. Eliivuru ele erina ekoore asuuli yooturuka okumi aka.

Nuumala ovira mahiku 10, miyo kaahirowela mithukumano Empa ya Omwene ekwaha yoopacerya. Miyo nkinikhala-khala kiliyalaka enamuna kaakheliwaka saana muthukumano ole. Okhuma nihiku nle, miyo nkihiyale orowela mithukumano. Nto munna Wilson aahipacerya okisomiha Biibiliya. Saanikisivela vanceene itthu kaixutta aka mbiibiliyani nto ikwaha sikina naaniviriha iwoora 8 nimusomaka Biibiliya. Anamuyari aka yaahixanka, nto yaahipacerya okikhoottiherya omusoma Biibiliya. Nto vaavo kaatepaka wiixutta, eyo yaanikikhaliherya woona wiira itthu kaixutta aka saari seekeekhai. Miyo kipatisiwe mwaakha wa 1983.

OHIYA OSOMA WUNIVERSITAATI PARA OKHALA PIONEERO

Okathi kaapatisiwe aka, kiira kimusomaka metisina wuniversitaati yoosuweliwa vanceene. Anamuyari aka yaahiimananiha vanceene wiira kiwerye orowa osoma wuniversitaati. Miyo kanwerya ohihiya osoma wuniversitaati, masi etthu kaaphavelexa aka waari onvaha Yehova etthu yootepexa oloka ni ovara muteko awe wa okathi wootheene.

Paapa aka aahikileela so: “Vakhala wiira munoohiya osoma wuniversitaati, kinoowoomolani vate vaka va.” Miyo kaahiriipiwa murima vanceene ni nkoona etthu yoopaka. Kaanaaphenta vanceene anamuyari aka, ni nkaaphavela waanyoonyiha. Nuumala-vo, miyo kaahikhuma owaani kirowa nivate na wuniversitaati ohiyu, kinaweha itheneeri ni kinanvekela Yehova kiriki: “Xontte Yehova mukikhaliherye opaka yoothanla yooloka.” Nuumala othanla ohiya osoma wuniversitaati, paapa aka aaahikileela wiira kaahaana okhuma owannyawe. Nuumala-vo, kaahimulikarela munna Wilson kimuleela etthu yaakiiranenle, nto mooreerela murima aahikivekela wiira nakhaleke hoothe empa aakhala awe. Nto kaahikuxa mireerelo saka sootheene kihela mpastani kinawela ekaaro kinarowa okhala ni Wilson. Kinnuupuwela wiira okathi ole kaahikhala oomaaleleya vanceene. Maana kaahisuwela wiira kaahipaka yoothanla yooloka.

Miyo kaari ntoko mwaapalame okhumme mukeeloni! Vano kaari ootaphuwa wiira kinvareleke muteko Yehova okathi wootheene. Nto kaahipacerya orumeela ntoko pioneero mwaakha wa 1984.

Iyaakha sootheene sivinre kirumeelaka ntoko pioneero rekulaari, Yehova aahikikhaliherya okhalana mikhalelo sooloka ntoko ovilela. Nihiku nimosa, saahikhala itthu saakhanle ookiiriha ohirowa olaleerya. Maana kaahixanka mwaha woowi khaakhanle mutthu kaakhanle aka oorowana olaleerya makaaripi ole. Masi hata vaari siiso, kaahirowa. Nuumala ovira iwoora piili kilaleeryaka, kaahithanla wiira nipuro nookiserya kaarowa aka olaleerya yaarowa okhala epereetiyu yaakhaliwa. Miyo kaahikhulumuwa, kaari meekhaka ni vaakhala ntoko wiira yaahala orupa epula. Nto kaaniikoha so: Kiireke kihaana ohiya olaleerya wiira kirowe owaani? Nuumala-vo, okathi keetta aka antaari a neeraru kiwelaka iskatta, kaahinweha mmiravo mmosa a oFilipina. Miyo kuupuwela wiira khaarowa okiwiriyana. Masi kaahiiwoka vanceene! Kaahipacerya omusomiha Biibiliya mmiravo ole, muhoolo mwaya aahipatisiwa okhala Namoona a Yehova.

WIIXUTTIHIWA ITTHU SA EFAITA EBETEELI YA OBROOKLYN

Saahivira iyaakha piili kikhalaka empa emosa ni munna Wilson. Nto mwaakha wa 1985 kaahilattuliwa wiira karumeeleke eBeteeli ya oBrooklyn. Ntoko kihimyale aka wanipacerya, kaathanleliwe muteko wa ohela ikaapa iliivuru. Nihiku nimosa, vaavo kaavara aka muteko ni maakina mamosa, kaahifalyari kihonona ikaapa sinceene sa iliivuru. Nto anna yaahikitumererya wiira kaahaana omuleela itthu sootheene siiraneyale munna aahoolela etepartamento ya ohela ikaapa. Nto kaahimutthokiherya munna ole masi yookhala etthu emosa kahaamulenle aka. Mooreerela murima, munna aahoolela etepartamento ele aahikivaha miruku oriki: “Ti vooreera okathi wootheene mutthu onifalyari awe ovekela musammaha.” Nihiku nle kaahiixutta efaita erina aya weemererya ifaalya saka ni ovekela wiira “kileveleliwe.”

Nave, kittharaka ntakiheryo na anna oowuuluvala a emusi ya oBeteeli, kaahiixutta wiira ti vooreera waakhaliherya atthu akina. Nihiku nimosa, munna Milton Henschel yoowo aari a Nikhuuru Noolamulela, aahikilaathi vamosa ni hiyo wiira nalmosari. Nihiku nle khiyaareere atthu orefeitooriyu, nto anna yaaserviri eyoolya yaavara muteko khula okathi. Miyo ni amiravo akina naanilavula vathi-vathi niixinlihaka wiira eyoolya yampisihiwa. Ohilavunle etthu, munna Henschel aahivenya onarowa okhaliherya oruuhaka maasi ooviha, iparatho, iphaawu ni manteeka. Nto nkinikhala-khala kiliyalaka wiiyeviha wa munna Henschel. Wiiyeviha iwo waahikuupuxerya moota Yesu aakhaliherya awe arummwa. — Yoh. 13:​3-5.

“MWAAHAANA WIIXUTTA NTTAAVA NA OJAPÃO!”

Mwaakha wa 1987, kaahikhuma kirowaka oJapão nto kaahihakalala nuumala oweha wiimananiha ni wiiyeviha wa anamalaleerya a elapo ele. Miyo kaaniphavela waakhaliherya ovara muteko woolaleerya, masi nkaixuntte olavula nttaava na oJapão. Murokora mmosa a oBeteeli oniihaniwa Michiko Oda, aahikiwehexexa, ni onahimya wiira: “Mwaahaana wiixutta nttaava na oJapão!” Nto kaahipacerya wiixutta. Miyo nkaasuwela wiira miruku iye kaavahiwe aka saamuturuka okumi aka.

Nuuvira miyeeri vakhaani, kaahithaamela muloko mukina waalavuliwa nttaava na oJapão wiira kakhaliherye, oNova York. Wiixutta nttaava na oJapão, waahikikhaliherya wuncererya muteko kaavara aka para Yehova. Mwaakha wa 1989, kaahimurowela konkereesu ekwaha yoopacerya a nttaava na oJapão, oLos Angeles, oCalifornia. Konkereesu ole, aahikhala pioneera mmosa yoowo aakisivenle vanceene iirela mpantta edrama, aihaniwa Miwako Onami.

Mwaakha wa 1992, kaahimuthela nto naahikhalana eparakha ya ovara muteko hoothe eBeteeli ya oBrooklyn. Miwako mutthu oophenta nave khula okathi ori oolikana ene para waakhaliherya atthu akina. Ntakiheryo nawe, nookikhaliherya waathokorerya saana atthu akina. Miwako eperesenti kivahiwe aka ni Yehova nave khula okathi onnikitteeliha murima.

OVARA MUTEKO EBETEELI YA OJAPÃO NI OKHALA MAPIONEERO

Nuuvira okathi, anamuyari awe Miwako yaawo yaakhala oJapão, yaahiwereiwa vanceene. Nto anna yaahinireerela murima yaahineemererya othaamela eBeteeli ya oJapão wiira nawaattamele anamuyari awe Miwako ni wiira niweryeke waakhaliherya. Nto naahiphiya oJapão mwaakha wa 1999.

Anna a emusi ya oBeteeli ya oJapão yaahinaakhela ni naahilimalela makhalelo ahu masya. Anna ni arokora a oJapão toovaha ni toowaakhela aletto, nto kitakihaka mikhalelo saya kihiixutta itthu sinceene. Awo annikhalela nthiti ovara muteko ni anivara moowiiraana. Nave awo, anivara muteko ntoko ekurupu. Moota xeeni? Ekultuura ya oJapão, atthu annivaha efaita vanceene ovara muteko ni atthu akina, ohiya ovara muteko mekhawe ophavelaka wooniwa. Ntakiheryo naya nooloka nookikhaliherya okhala mutthu oowiiyeviha okathi kinivara aka muteko ni atthu akina. Nave nookikhaliherya ohakalala ni muteko kinivara aka maana kinnikhaliherya wiira yiiraneye ele Yehova oniphavela awe.

Okhala wiira naari a ikultuura soovirikana ikwaha sikina kaanixanka okathi kaaweha aka anna ale avaraka muteko moovirikana ni moota kaalimalenle aka. Nto kaahaana wiixutta okhala oopixa murima ni ohaakuvela waavaanyiha. Nuuvira okathi, kaahilokiherya muupuwelo aka ni kaahoona wiira Yehova onnikhaliherya soothanla sootheene, seiyo sinipakiwa atthariwaka malakiheryo a mutthenkeso awe. Tthiri Yehova toniiriha muteko weetta saana.

Ikwaha sinceene okisivela olikanyiha muteko kaavahiwa aka oBeteeli ni muteko aavahiwe awe profeta Moise. Yehova aahimukhaliherya Moise okhala mutthu oomaala iyaakha iye 40 aarumeela awe ntoko makampusi. Okathi aari awe wExiitu, Moise aahiixutta itthu sinceene ntoko kiixuntte aka wuniversitaati, kihinatthi orowa oBeteeli. Mwaha wa wiixutta itthu sinceene, waahikiiriha okhala oowiixinnuwiha ni oowiiroromela. Masi oBeteeli kaahixuttihiwa okhala oowiiyeviha ni omuroromela Yehova. Ntoko siisaale Yehova ampixenrye awe murima Moise ni omwiixuttiha, iyaakha iya sootheene Yehova onnikipixerya murima ni onnikiixuttiha.

Naahaakhapelela anamuyari awe Miwako mwa iyaakha 24, mpakha okhwa. Okathi ole wooxankiha naanaalikarela amamawe Miwako, naanaroiha ospitaali nave naanaalikarela mameetiku. Nto amamawe Miwako, yiihaniwa Masako, yaahiwereiwa vanceene ahinawerya ovenya ni weetta. Vaanimuxankiha vanceene Masako orowela mithukumano sootheene ni olaleerya. Isumana sookiserya sa okumi awe, Masako eetta orumeelaka ekhatera ya maroota. Masi hata aarina mixankiho iyo sootheene, omphenta wawe Yehova khiwaavukuwale. Owo aanihakalala vanceene okathi aawiixuttiha awe ekeekhai atthu akina. Ntakiheryo nawe na omurumeela Yehova moohakalala hata samphwanya mixankiho, nookivara murima nto kiniphavela otthara.

Mwaakha wa 2024 naahaakhela marukunuxo maalupale. Nuuvira iyaakha 30 nivaraka muteko oBeteeli, naahithanliwa wiira nakhale mapioneero. Olelo-va, ninrumeela ntoko mapioneero espesiyaale eyiilya ya Okinawa. Nave nookhalana eparakha ya olaleerya imusi sinikhala waattamela ekwartelo ya atoropa. Itthu niixuttihiwa ahu oBeteeli soonikhaliherya waakuva olimale yoothanleliwa ahu esya. Hiyo ninniimananiha otthara eprokaraama ni orumeela oratteene okathi nikhalelaka nthiti olaleerya. Yehova oonireeliha onivahaka anaskola a Biibiliya yaawo ari ntoko amusi ahu. Vano ninniweha efaita erina aya waaphenta atthu akina. Khula nihiku, miyo ni Miwako, ninnimuxukhurela Yehova mwaha wa yoothanleliwa ahu.

KOOLAKELA OHIHIYA WIIXUTTIHIWA NI YEHOVA

Nnaamwi amusi aka ahikilupatthaka vanceene, masi awo khanimurumeela Yehova. Ntoko Yesu oleihenrye awe, ale yaahiyale amusi aya wiira akhale awiixutti awe, animwaphwanya anna ni arokora anceene, yaawo anrowa okhala ntoko amusi aya. (Mar. 10:​29, 30) Eyo ti etthu ekiiranenle. Nto nkiniwerya okontari imusi sa olumwenku wootheene seiyo sikiphentale ni okithokorerya ntoko mmusi aya.

Nlelo kookhalana eliivuru ele A Verdade Que Conduz a Vida Eterna, yeeyo munna Wilson aakivahale awe. Okathi kiniwehaka eliivuru ele ya ekoore asuuli, kinnuupuwela moota Yehova okireerenle awe murima okeemereryaka okhala murumeyi awe. (1 Wah. 28:9) Nto nkinihiya wiixuttihiwa ni Yehova, nave koolakela waakhaliherya atthu akina wiixutta ekeekhai yeeyo eniphwanyiha okumi woohimala.