Mwaakuveleke ophuka mixankiho
NIIREKE ookhala munna aahiiso murokora oopakenleni etthu yoohiloka, nuumala-vo ompatthani anyu ni yena ohononeya? Wiira ompatthani anyu ni munna aahiiso murokora owo ohimala-male, nyuwo muhaana waakuvela ophuka muxankiho owo ni okhalana moonelo wooloka.a
Mwa ntakiheryo, wiira nikhuva na mutthu niphweeyale nitthikele okhala saana ni ohoona owereya, nihaana waakuveliwa olokiheriwa. Masi, napiseriwa olokiheriwa mutthu owo onrowa otepaka woona owereya. Nave natepa opiseriwa nikhuva nlo pooti ohikolari ni mutthu owo pooti orakala.
Ntoko siisaale nimpirisari aya waakuveliwa olokiheriwa nikhuva niphweeyale, nihaana waakuvela ophuka mixankiho sahu wiira ompatthani ahu ni atthu akina ohihononeye. Naahiire siiso, ninrowa otepaka woona owereya mwaha wa ompatthani ahu omala-manle. Nave pooti ohitthikela-tho okhala apatthani. Yesu aahimmye so: “Mwaakuveleke ophuka mwaha ni ole orina anyu mulattu.” (Math. 5:25) Tivonto, nvaaneleke ni mpatthani anyu ni mmuleeleke mooreerela murima moota munoonela anyu. Ikwaha sikina, pooti oxankihaka opaka eyo. Mwaha wa xeeni? Nrowe niwehe iponto piili.
Yoopacerya, nyuwo pooti ohiphavelaka ovaanela wiira mulokiherye ompatthani anyu, mwaha woowi khamuniphavela olavula mwaha owo.b Nrowe niwehe ntakiheryo na mbiibiliyani na Evodia ni Sintikhe, yaawo yaahiiwanana. Vanikhala ntoko wiira ohiiwanana wa Evodia ni Sintikhe waahiviriha okathi munceene, maana murummwa Paulo yoowo aari ottaiwene, niire so, oRoma aahiiwa. Nto murummwa Paulo aahaatumererya athiyana ale wiira yaahaana otthikela okhala apatthani. (Afil. 4:2) Vakhala wiira yaamooniherya wiiyeviha, ovaanela mooreerelana murima ni olevelelana ni murima wootheene yaamutthikela okhala apatthani.
Ya nenli, woonasa wene nyuwo pooti olipelelaka wiira mutthu mukina onimoorwa wooleelani wiira ohootthekelani. Masi muhiliyale wiira yoolakela anyu ophavela otthikela okhala apatthani ohiya omusuwela tani orina erasau ni ohirina erasau. Meetiku onilokiherya nikhuva wiira nitthikele ntoko naari aya, yoolakela awe khahiyo osuwela itthu sootheene siirihale nikhuva nlo ophweeya. Mwa enamuna emosa-ru, okathi muniphuka anyu muxankiho anyu ni mpatthani anyu, muhiphaveleke osuwela ti pani orina erasau ni ohirina. Ohiya-vo, musuweleke wiira etthu ya efaita ompatthani anyu ni mphaveleke ottikiherya ntoko waari aya.
Biibiliya onihimya so: “Muhihiye nsuwa nikelaka nlelo munanariwe ene.” (Aef. 4:26) Vakhala wiira ookhala munna aahiiso murokora oonyoonyihaleni wala muhiniiwanana nyu, nvaanele olelo vaava wiira muttikiherye ompatthani murina anyu. Akhala wiira munimwaakuvela ophuka mixankiho sanyu, eyo enimookhaliheryani okhalana wiiraana omosa-ru ni “murettele onniiriha wiiraana.” — Aef. 4:1-3.
a Vakhala wiira munna aahiiso murokora oonyoonyihana ni mukhwaawe masi muxankiho owo mwaamukhaani, awo ahaana ovaanela ni olevelelana mukina ni mukhwaawe. (Math. 5:23, 24) Masi akhala wiira muxankiho owo muulupale, awo pooti waavekela nikhaliheryo axitokweene. (Math. 18:17) Masi awo ahaana opaka eyo nuumala otthara malakiheryo ari Matheyo 18:15, 16.
b Vakhala wiira munna aahiiso murokora ooninyoonyiha, masi nlelo naapatthani, hiyo pooti othanla ohilavula-tho mwaha owo. — Mir. 26:20.