Mwaakhaliheryeke akina omusuwela Yehova

1. Munikhala sai okathi muninweha anyu naskola anyu a Biibiliya okelaka vahoolo?

MUNOONELA sai okathi muninweha anyu naskola anyu a Biibiliya opaceryaka orowela mithukumano, okomentari, aaleelaka atthu etthu oniixutta awe ni okathi onithanla awe wiivahererya wa Yehova Muluku? Moohaanyiherya, munnihakalala vanceene! Okhala wiira Yehova tonimukhaliherya naskola a Biibiliya okela vahoolo, nto owo tonireerela ovuwihiwa. — 1 Akor. 3:​5-9; 3 Yoh. 3, 4.

2. Yehova oniphavela wiira anaskola a Biibiliya akhalane osuwela xeeni? (1 Timootheyo 2:​3, 4)

² Muluku “oniphavela wiira atthu a makhalelo ootheene yoopowe ni akhalane osuwela weekeekhai.” (Mmusome 1 Timootheyo 2:​3, 4.) Tivonto, Yehova oniphavela wiira atthu amusuwele oratteene ni asuwele itthu opanke awe ni iye onrowa awe opaka muhoolo. (Yer. 9:24) Eyo enitaphulela wiira mutthu ohaana okhalana osuwela weekeekhai. Onitaphulela exeeni okhalana “osuwela weekeekhai”? Khonitaphulela osuwela itthu vakhaani paahi voohimya sa Muluku. Musomi mmosa onitthokiherya wiira, osuwela weekeekhai, onitaphulela osuwela itthu “sinimwiiriha mutthu owo wiimananiha wiira omwaattamele Muluku.” Okathi naskola a Biibiliya onimusuwela awe oratteene Yehova, osuwela iwo onnimwiiriha opaka marukunuxo mookumini mwawe. Nave osuwela iwo onnimwiiriha mutthu owo okhalana nlipelelo na “okumi woohimala”. — Yoh. 17:3.

3. Mwaha ola, ninrowa waakhula makoho xeeni?

³ Yehova oonivaha eparakha ya waakhaliherya atthu akina wiira amusuwele. Mwaha ola, ninrowa othokorerya makoho ala anittharelana: Xeeni anaskola a Biibiliya anireerela aya omusuwela oratteene Yehova? Ninrowa waakhaliherya sai osuwela mikhalelo sa Yehova? Ninrowa waakhaliherya sai weettela itthu anisuwela aya voohimya sa Yehova?

MWAAKHALIHERYEKE ANASKOLA A BIIBILIYA OMUSUWELA YEHOVA

4. Moovarihana ni Marko 12:​30, yoolakela ahu tiivi naamusomihaka mutthu Biibiliya?

⁴ Yesu aahimyale wiira yooruma yuulupalexa tiila: Omphenta Yehova ni murima ahu wootheene, okumi ahu wootheene, muupuwelo ahu wootheene ni ikuru sahu sootheene. (Mmusome Marko 12:30.) Tivonto, anaskola a Biibiliya, ahaana omusuwela Yehova wiira amphenteke. Hiyo nimphavela wiira anaskola ahu a Biibiliya apatisiweke mwaha wa omphenta Yehova, ohiya mwaha wa ophavela okhala apatthani ahu, apatthani a anna ni arokora aahiiso mwaha wa osiveliwa paahi ni itthu aniixutta aya. Yoolakela ahu yuulupale okathi nimmusomiha ahu mutthu Biibiliya, nimphavela wiira omusuwele ni omphenteke Yehova.

5. Akhala wiira naskola anyu a Biibiliya onomphentaka Yehova, eyo enrowa omwiiriha opaka exeeni?

⁵ Okathi mutthu nimmusomiha ahu Biibiliya onimusuwela awe ni omphenta Yehova, owo onrowa ophavelaka omwiiwelela. Yesu aahooniherya wiira mutthu ole onimphenta Muluku, onoophavelaka omwiiwelela. Owo aahimmye so: “Masi, wiira olumwenku osuwele wiira miyo kinnaaphenta Atiithi, kinniira siisaale Atiithi akirumme aya.” (Yoh. 14:31) Tivonto, omutakihaka Yesu, naskola yoole onimphenta Yehova ni murima wootheene, onrowa ophavelaka omwiiwelela ni khonrowa ohiya omuroromela. — 1 Yoh. 5:3.

6. Omusuwela Yehova onrowa omukhaliherya sai naskola anyu a Biibiliya okathi onipaka awe soothanla? Nvahe ntakiheryo.

⁶ Anaskola a Biibiliya animusuwela oratteene Yehova, vanimwaakhweela opaka soothanla sooloka. Mwa ntakiheryo, mutthu oniphavela okhala motorista, khoniixutta weettiha ekaaro osomaka paahi isinaali ni opaka isaami. Owo ohaana oviriha iwoora sinceene oterenariki weettiha ekaaro. Nuuvira okathi, onoowehaka moota ekaaro eneetta aya mwa inamuna soovirikana okathi oneettiha awe. Mwa enamuna emosa-ru, naskola a Biibiliya, onoowerya omusuwela Yehova ohiya mwaha wa itthu oniixutta awe paahi, masi okathi oniweha awe moota okumi awe onikhala aya vaavo oneettela awe itthu oniixutta awe. Nave okathi onitepa awe omusuwela Yehova ni oweha moota onikhaliheriwa awe ni Tiithi awe a wiirimu, eyo enoomukhaliherya opakaka soothanla sooloka mookumini mwawe.

7. Omusuwela Yehova waamukhalihenrye sai Yosefe opaka yoothanla yooloka?

⁷ Omusuwela Yehova, waahimukhaliherya Yosefe okathi mwaara a Potifari aaphavela awe orupa ni yena. Okhuma enamwane awe, Yosefe aanisuwela wiira nuumala Yehova ompattuxa Adamu, owo anvahale muthiyana mmosa paahi aihaniwa Eva. Nave aahiiwa etthu yaamwiiranenle mulopwana aaphavela omukuxa mwaarawe Abrahamu, yoowo aihaniwa Sara. (Maph. 2:24; 20:​3, 6) Itthu iyo saahimukhaliherya Yosefe osuwela moota Yehova onoonela awe ekasamento ni orupihana. Okhala wiira Yosefe aanimusuwela Yehova, eyo yaahimukhaliherya omukhootta mwaara a Potifari ni omuleela wiira: “Nto vaniweryaneya sai miyo opaka etthu ela yootakhala, ni omutthekela Muluku?”. (Maph. 39:​7-9) Yosefe aanisuwela etthu enimusivela ni ehinimusivela Yehova. Nave aanisuwela wira etthu ele yammuriipiha murima Muluku. Tivonto, Yosefe aahipaka yoothanla yooloka. Akhala wiira nnimwaakhaliherya anaskola ahu a Biibiliya omusuwela oratteene Yehova ni osuwela itthu sinimusivela ni sihinimusivela, eyo enimwaakhaliherya opaka soothanla sinimusivela.

NWIIXUTTIHEKE OMUSUWELA ORATTEENE YEHOVA

8. Munrowa orumeela sai eliivuru Okumi Woohimala!, wiira mmukhaliherye naskola anyu omusuwela oratteene Yehova?

⁸ Munrowa omukhaliherya sai naskola anyu a Biibiliya omusuwela oratteene Yehova? Yehova aahimukhaliherya Yoobi omusuwela oratteene, okathi ampakenle awe makoho yaavikana 50! (Yoobi 38:1–41:34) Nave-tho, hiyo nihaana waapakela makoho anaskola ahu a Biibiliya. Makoho ari eliivuru Okumi Woohimala!, apakeliwe wiira yaakhaliheryeke anaskola a Biibiliya okela vahoolo ni omusuwela oratteene Yehova. (Nwehe ekaaxa eni: “Makoho annikhaliherya wiixuttiha.”) Tivonto, murumeeleke makoho awo wiira mmukhaliherye naskola anyu a Biibiliya omusuwela oratteene Yehova.

9-10. a) Ninrowa waakhaliherya sai anaskola ahu, omusuwela oratteene Yehova okathi animusoma aya Biibiliya? (Yakobo 5:11) b) Moovarihana ni yoowiiraneya ya Daniyeli, makoho xeeni naskola anyu okhanle awe oowiikoha?

⁹ Vaavo nimpacerya ahu omusomiha mutthu Biibiliya, ninnimutumererya wiira ohaana omusomaka Biibiliya khula nihiku.a Ninrowa waakhaliherya sai anaskola ahu wiira atepeke omusuwela Yehova okathi animusoma aya Biibiliya? Hiyo pooti waaleela anaskola ahu a Biibiliya wiira, okathi animusoma aya Biibiliya ahaana wuupuwela etthu emwiirihale Yehova oruma olempwa iversiikulu iyo, ni ophavela oweha moota iversiikulu iyo sinaakhaliherya aya osuwela mikhalelo sawe. Nwehe moota mwiixutti Yakobo aapanke awe eyo, okathi aalavula awe yoowiiraneya ya Yoobi. Yakobo kholavunle paahi mukhalelo wa Yoobi, eyo piiyo, ovilela wawe, masi-tho, oolavula mikhalelo sa Yehova, eyo piiyo, ophenta wawe wuulupale ni omoriwa wawe ikharari. — Mmusome Yakobo 5:11.

¹⁰ Naakhaliheryeke anaskola ahu a Biibiliya woona moota soowiiraneya siri mbiibiliyani sinooniherya aya itthu sinimusivela ni sihinimusivela Yehova. Mwa ntakiheryo, pooti wiira naskola ahu a Biibiliya owehale ekaaxa eni: “Mpacerye omusoma Biibiliya”, eri eliivuru Okumi Woohimala!. Nto onanileela wiira othanlale osoma yoowiiraneya ya Daniyeli oriheliwe ene munlittini na akharamu. Hiyo pooti omutumererya naskola ahu wuupuwelela makoho ala: Xeeni Yehova ohalaka omoopola Daniyeli? Yoowiiraneya ela enikiixuttiha exeeni voohimya sa etthu enimusivela Yehova? (Dan. 6:​10, 22) Nave-tho, hiyo pooti omutumererya wiikoha so: Exeeni yaawiiranenle atthu ale yaamoothenrye Daniyeli? Yoowiiraneya ela enikiixuttiha exeeni voohimya sa etthu enimusivela Yehova? (Dan. 6:​4, 5, 24) Nuumala-vo, nimutumereryeke naskola ahu wuupuwelela itthu sikina oniixutta awe voohimya sa Yehova ni yoowiiraneya eyo. — Dan. 6:​26, 27.

11. Ninrowa omukhaliherya sai naskola ahu woona wiira yoosoma awe ya Biibiliya yoovaha enikhuma wa Yehova?

¹¹ Ninnihakalala vanceene okathi nninweha ahu naskola ahu ottottelaka mureerelo itthu oniixutta awe ni yoosoma awe ya Biibiliya. Masi nihaana omukhaliherya woona wiira itthu oniixutta awe sinikhuma wa Yehova, yoowo ori Mwiixuttihi Muulupalexa. (Yes. 30:​20, 21) Naskola ahu, pooti onixukhurela ni onittottopela mwaha wa moota nnimwiixuttiha ahu. Khahiyo ti vootthekeya naskola ahu onixukhurela. Masi okathi wootheene, nihaana omukhaliherya woona wiira ohaana omuxukhurela Yehova, yoowo onniixuttiha itthu sootheene.

MWAAKHALIHERYEKE WEETTELA ITTHU ANIIXUTTA AYA

12-13. Omusuwela Yehova onimukhaliherya sai naskola okathi onisoma awe yoowiiraneya ya mbiibiliyani ohiniiwexexa awe saana? (Nwehe efootu.)

¹² Wiira nittottele mureerelo osuwela weekeekhai, nihaana weettela itthu niixuntte ahu. Ninrowa waakhaliherya sai anaskola ahu weettela itthu yiixuntte aya? Enamuna yoopacerya, ori waakhaliherya woona wiira okathi anisoma aya soowiiraneya sa mbiibiliyani sinaavila wiiwexexa, awo ahaana wuupuwelela itthu anisuwela aya voohimya sa Yehova. Mwa ntakiheryo, okathi anisoma aya sa moota Yehova aaphukenle awe atthu, awo pooti wiikoha etthu yaamwiirihale Yehova waapwetexa atthu akina ni khuhaapwetexa akina. Nto munrowa omukhaliherya sai naskola anyu okhalana moonelo wooloka voohimya sa mwaha owo?

¹³ Mmutumereryeke naskola anyu wuupuwelela itthu iixuntte awe voohimya sa Yehova. Mwa ntakiheryo, pooti omutumererya wiikoha so: Yehova oniwoonela sai atthu? (2 Ped. 3:9) Itthu xeeni Yehova opanke awe wiira onoopole nnaamwi niri ene anatampi? (Aef. 2:​4, 5) Niireke Yehova onnaapuniri atthu ahipanke etthu yoohiloka? Niireke Yehova khonaapuniri atthu yaale anireerela opuniriwa? (Okhu. 34:​6, 7) Ikwaha sikina, Biibiliya khonihimya khula etthu enimwiiriha Yehova opaka yoothanla emosa. Masi hiyo khanimpirisari osuwela itthu iyo sootheene. Mwaha wa xeeni? Mwaha woowi hiyo ninnimusuwela Muluku ahu ni ninnikupali wiira okathi wootheene onipaka itthu mwa xariya.

14. Munrowa omukhaliherya sai naskola anyu, akhala wiira khoniiwanana ni munna aahiiso murokora?

¹⁴ Nwehe enamuna ya nenli enrowa omukhaliherya naskola a Biibiliya weettela itthu iixuntte awe. Muupuwele wiira naskola anyu a Biibiliya oopacerya orweela mithukumano, masi ookhala munna aahiiso murokora ohiniiwanana awe saana. Woonasa wene munna aahiiso murokora owo, oopaka etthu emuriipihale murima naskola anyu. Mmutumereryeke naskola anyu oweha moota Yehova onaathokorerya awe anna ni arokora. Mwa ntakiheryo, pooti omutumererya wiikoha so: Exeeni Yehova opanke awe enooniherya wiira onnaaphenta anna ni arokora? (Yoh. 3:16) Yehova onoonela sai okathi onaaweha awe arumeyi awe akhalaka oowiiraana? (Esal. 133:1) Onoonela sai okathi onniweha niimananihaka wiira nihihonone wiiraana iwo? (2 Akor. 13:11) Mmukhaliherye naskola anyu woona wiira Yehova onnihakalala, okathi onniweha awe niimananihaka oweha mikhalelo sooreera sa anna ni arokora ohiya ifaalya saya.

15-16. a) Okathi oniphavela awe opaka yoothanla yuulupale, naskola a Biibiliya onrowa omutakiha sai Yesu? (Yohani 8:29) b) Marianne aamukhalihenrye sai naskola awe a Biibiliya opaka yoothanla yooloka? (Nwehe efootu.)

¹⁵ Enamuna ekina, ori omukhaliherya naskola anyu a Biibiliya weettela itthu iixuntte awe okathi onipaka awe soothanla suulupale. Nyuwo pooti opacerya omooniherya naskola anyu muru 35 wa eliivuru Okumi Woohimala!, yoowo oni: “Moota woopaka soothanla sooloka”. Masi ankhi vakhala wiira naskola anyu oovekela ni ootokosa mwaha owo, hata vari siiso, ohinasuwela etthu yoopaka? Woonasa wene, oophwanya iversiikulu sinceene sa mbiibiliyani, masi ohinasuwela tiivi sinivarihana ni mwaha awe. Nto nyuwo pooti omukhaliherya wuupuwela ntakiheryo na Yesu. Exeeni yaamukhaliherya Yesu opaka soothanla sooloka? Yesu aahimmye so: “Okathi wootheene kinnivara itthu sinimusivela [Tiithi aka].” (Mmusome Yohani 8:29.) Pooti omutumererya naskola anyu wiikoha so: Kirumeelaka itthu kiphwannye aka okathi kaatokosa aka, exeeni kiixuntte aka voohimya sa Yehova ni exeeni enrowa omuhakalaliha? Mmukhaliherye naskola anyu woona wiira yoothanla yooloka tenrowa omuhakalaliha Yehova.

¹⁶ Muthiyana mmosa a oChile, yoowo aamusoma Biibiliya, aahaana opaka yoothanla yuulupale. Amusi awe, yaamutumererya wiira eemererye muteko yoowo waaliviwa musurukhu munceene, masi waarowa omukhoottiheryaka orowela mithukumano. Murokora yoowo aamusomiha Biibiliya oniitthaniwa Marianne, onihimya so: “Kaahimutumererya wuupuwelela moota Yehova aarowa awe woonela yoothanla awe. Niireke aarowa osiveliwa aahiiso oriipiwa murima? Nave kaahimutumererya wiira onvekele Yehova omuleelaka muxankiho awe ni oone moota aarowa awe omwaakhula. Nto muthiyana ole aahikhootta muteko ole ni moohipisa, aahiphwanya muteko mukina waamweemererya orowela mithukumano.” Moone wiira Marianne, khaamuleelale naskola awe etthu yoopaka, masi aamutumerenrye wuupuwelela itthu aasuwela awe voohimya sa Yehova. Eyo yaahimukhaliherya naskola ole olipiha ompatthani aarina awe ni Marianne, masi otepexa wene, olipiha waataana aarina awe ni Yehova. Olavulaka sa naskola awe, Marianne onihimya so: “Ohiixutta wiira Yehova onnaakhapelela ale animuhela nipuro noopacerya.”

MAREELIHO ANROWA AYA OPHWANYA ALE ANIMUSUWELA ORATTEENE YEHOVA

17. Etthu xeeni ya faita nimphavela ahu wiira anaskola ahu a Biibiliya yiixutte?

¹⁷ Anaskola ahu, anniixutta itthu sinceene sooreera okathi nnaasomiha ahu Biibiliya. Mwa ntakiheryo, awo anniixutta mbiibiliyani itthu ntoko, etthu eniiraneya nuumala mutthu okhwa, etthu emwiirihale Yesu okhwa ni ele Omwene wa Muluku onrowa aya opaka. Awo anniixutta itthu sinceene sinivarihana ni mutthenkeso. Itthu sene tiiya: Annisuwela wiira sinnikhala mithukumano, annisuwela wiira mmulokoni annikhala axitokweene ni annisuwela wiira aakhala anna aniirela mpantta Nikhuuru Noolamulela. Masi nimphavela wiira anaskola ahu asuwele itthu sikina ohiya paahi iye niromonle ahu. Nave etthu yootepexa okhalana efaita, nimphavela wiira amusuwele oratteene Yehova.

18. Mareeliho xeeni aniphwanya aya ale animusuwela Yehova?

¹⁸ Nookhalana eparakha yuulupale ya owiixuttiha atthu akina wiira amusuwele Yehova! Hata olelo-va, atthu yaale animusuwela Yehova ni animurumeela, annihakalala vanceene. (Esal. 25:​12-15) Muhoolo, atthu ootheene animusuwela “Muluku eekeekhai”, Yehova onimwaavaha okumi woohimala. (1 Yoh. 5:20) Masi aakhala mareeliho makina nikhanle ahu oowaakhela niinaano-va. Biibiliya onihimya wiira ootheene ale animusuwela ni animphenta Yehova, annisuweliwa ni Muluku. (1 Akor. 8:3) Tthiri Muluku Oowerya Sootheene onninoona ni onninthokorerya ntoko apatthani awe. Tivonto, nookhalana mareeliho manceene mwaha wa omusuwela Muluku mmosa-ru eekeekhai!