MOOLUMO OOPACERYA
Munoowerya wuncererya oolipa wanyu murima!
1-3. Yesu aahimmye wiira: “Nvenye, nrowe.” Xeeni moolumo ala anooniherya aya wiira aari oolipa murima?
MULOPWANA mmosa aahilavula moolumo yooniherya wiira aari oolipa murima. Owo aahimmye so: “Nvenye, nrowe.” Woonasa wene, nyuwo pooti wiikohaka wiira, xeeni moolumo awo anooniherya wiira aari oolipa murima? Nrowe niwehe waakhuliwa waya, nimusuwelaka mutthu aalavunle ni etthu yaamwiirihale olavula moolumo awo. — Math. 26:46.
“Nvenye, nrowe.”—Math. 26:46
2 Yesu taalavunle moolumo ale, aaleelaka awiixutti awe. Nave khahiyo yaari ekwaha yoopacerya. (Yoh. 14:31) Ekwaha ela yaari yoovirikana, ni ikwaha sikina Yesu aalavunle awe moolumo ale. Waari ohiyu, ni owo aari oxarti ya oXeseemani, waattamela oYerusalemu. Yesu aanisuwela wiira alopwana yaakunxe ikopo, ispaata, yaanaattamela opuro ole. Nave owo aanisuwela wiira yaaphavela omwiiva. Yesu saarowa omphwanya mixankiho seiyo sikhanle omphwanya khula pinaatamu. Nave owo aanisuwela wiira aarowa weehereriwa mekhawe.
3 Yesu anwerya wiitthana malaikha, wiira amukhapelele, masi owo khaapanke eyo. (Math. 26:53) Masi etthu aapanke awe, waari waaleela awiixutti wiira: “Nvenye, nrowe.” Masi yaarowa orowa woowi? Awo yaarowa opuro waari ekurupu ele ya alopwana yaakunxe ispaata. Nnaamwi aasuwela wiira aamutthukiwa, ammaniwa ni aamwiiviwa Yesu aahirowa opuro ole. Exeeni yamwiirihale opake eyo? Okhala wiira aanimphenta Tiithi awe ni awiixutti awe.
4-5. Ninrowa wooniherya sai olipa murima ntoko Yesu? Xeeni vari aya vooloka opaka eyo?
4 Tthiri Yesu aari mulopwana oolipa murima. Niireke nyuwo mwa mwiixutti a Yesu? Vakhala wiira ti siiso, nyuwo mwa mutthu oolipa murima. Makristau eekeekhai aahaana okhala oolipa murima. Mukhalelo ola, wookhalana efaita yinceene okhala wiira ninkhala mahiku ooxankiha.
5 Enamuna xeeni ya olipa murima Yesu oonihenrye awe? Olipa murima weekeekhai, khonitaphulela ohiikhapelela, ohoova etthu, nnakhala wuupuwela wiira mutthu owo khoniweriwa. Wiira mutthu okhale oolipa murima, khonipirisari okhala oowali wiira ooniherye wiira mutthu oowerya. (Esal. 11:5) Ohiya-vo, olipa murima etthu ehinooneya, yeeyo ennikhaliherya opaka ele Muluku oniphavela awe, hata okathi wooxankiha aahiiso woowoopiha.
Munoowerya otakiha olipa murima wa Yesu!
6. Moolumo Yesu aaleelale awe awiixutti awe, annilipiha sai okathi nnoona ahu wiira khanihiyo oolipa murima?
6 Nyuwo pooti wiikohaka so: Kiireke kinoowerya wooniherya olipa murima ntoko Yesu okathi kinilupatthiwa aka? Akhala wiira ikwaha sikina munnoova, muhiliyale wiira omutakihaka Tiithi awe, Yesu khonoovekelani opaka etthu muhinwerya anyu. (Esal. 103:14; Yoh. 14:9) Mwa ntakiheryo, ohiyu ole oxarti ya oXeseemani, Yesu aahaavekela awiixutti awe wiira ahirupe, masi awo khiyaapanke ele yaahimmye awe. Mooreerela murima Yesu aahaahimeerya wiira: “Murima onniphavela tthiri, masi erutthu teri yootteettheya”. (Math. 26:41) Yesu aanisuwela itthu arummwa ale yaawerya aya ni yahaawerya aya. Nave onnisuwela itthu muniwerya anyu ni muhiniwerya anyu.
7-8. Yesu aalipihale sai awiixutti awe?
7 Yesu aanooniherya wiira aanaaroromela awiixutti awe. Nkahaya muupuwele moota awiixutti ale yaalimpe aya nuumala omwiiwa Yesu aahimeeryaka wiira: “Mulipihe murima! Miyo kooxintta olumwenku”. (Yoh. 16:33) Moolumo ala anooniherya wiira Yesu aanisuwela wiira awiixutti awe, yanwerya okhala oolipa murima ntoko yena. Nto ti yeeyo yiiraneyale. Ikwaha sinceene Yesu aanirumeela moolumo oowi “mulipihe murima!” wiira aalipihe ni waamaaliha atthu. Mwa ntakiheryo, owo aahilavula moolumo awo ni mulopwana yoowo ahaawerya weetta, ni aahimuleela wiira itampi sawe sooleveleliwa. (Math. 9:2) Owo aahirumeela moolumo mamosa-ru wiira ommaalihe muthiyana yoowo anvonihale awe eretta yootepa woopiha. (Math. 9:22) Aahirumeela moolumo awo wiira aalipihe awiixutti awe, vaavo yoova aya okathi wa epheyo yuulupale. (Math. 14:27) Nave, aahirumeela moolumo awo para ommaaliha Paulo okathi ekurupu ya aphuki ootakhala yaaphavela aya omwiiva. — Mit. 23:9-11.
8 Mwa enamuna emosa-ru, Yesu onninilipiha olelo-va. Owo oniphavela wiira mulipeke murima, maana onnisuwela wiira munoowerya. Nave Yehova onimoovahani etthu munipirisari anyu wiira mukhale oolipa murima.
Biibiliya onoonikhaliherya wuncererya olipa wahu murima
9. Biibiliya onnikhaliherya sai wuncererya olipa wahu murima?
9 Okhala wiira onniniphenta, Yehova ooruma olempwa mbiibiliyani matakiheryo manceene, anrowa onikhaliherya wuncererya olipa wahu murima. Ninniphwanya soowiiraneya sa alopwana ni athiyana anceene, a iyaakha soovirikana ni yaarina mixankiho soovirikana, yaawo yoonihenrye olipa murima. Ootheene aya yaari atthu ntoko hiyo, siisaale aari awe profeta Eliya. (Yak. 5:17) Okhala wiira yaayariwe arine ene etampi, saanaaphwanya mixankiho ntoko hiyo, nave sookhala itthu yahaawerya aya. Nave saanaakhumelela itthu soowoopiha. Hata vaari siiso, amutakihaka Yesu awo yaahivilela. Awo yaahooniherya olipa murima, nave ntakiheryo naya ninninikhaliherya olelo-va.
10-11. Eliivuru ela enrowa wookhaliheryani sai, nave munrowa orumeela sai? (Nwehe ekaaxa eni: “Moota woorumeela eliivuru ela, okathi wa yoosoma ya omwaneene aahiiso omulompa Muluku vatthokoni.”)
10 Eliivuru ela epakiwe wiira yookhaliheryeni wuncererya olipa wanyu murima. Okathi ninrowa ahu othokoreryaka ikapiitulu okhuma 1 mpakha 54 sa eliivuru ela, munooweha wiira Yehova aahaakhaliherya apinaatamu oottheka ntoko nyuwo, okhala oolipa murima. Nto okathi munisoma anyu khula yoowiiraneya, mpeskisariki oratteene wiira mwaasuwele saana atthu aniromoliwa. Mwiira siiso, munimwaasuwela alopwana ni athiyana yaawo yaari oolipa murima.
11 Ninkupali wiira ntakiheryo naya nnimookhaliheryani wuncererya olipa wanyu murima, wiira nvilele mahiku ala ookiserya ni ooxankiha. (2 Tim. 3:1) Khula nihiku muupuweleke yooleiherya ya Yehova, eni: “Miyo nkinikhala-khala koohiyakani, nave nkinikhala-khala koonyanyalakani”. Ntoko murummwa Paulo olempe awe, moolumo ala anoonikhaliherya okhala oolipa murima. Nave nnoowerya ohimya wiira: “Yehova tonikikhaliherya. Miyo nkinrowa woova etthu”. — Ahep. 13:5, 6.