Ekarta ya Nikhuuru Noolamulela

Anna ni arokora oophentiwa:

Moolumo Yesu aaroihale awe muloko a wEsimirna, aahimmye so: “Muhooveke itthu munrowa anyu ohaawa.” (Wis. 2:10) Ele Yesu aahimmye sa ohoova, ennivareleya muteko para hiyo ninkhala “nihiku na Apwiya”. (Wiis. 1:10) Moohaanyiherya, ninkhala mahiku “ooxankiha ni oowoopiha”. Nave noosuwela wiira atthu a Muluku a olumwenku wootheene, sinnaaphwanya mixankiho sineehererya waamini ni olipa waya murima. Nto, ninnihakalala woowehani nyuwo anna ni arokora oophentiwa, muhihiyaka omuroromela Yehova, nnaamwi soophwanyakani mixankiho! — 2 Tim. 3:​1-5.

Masi etthu xeeni enrowa onikhaliherya ohihiya okhala oororomeleya ni oolipa murima? (Ahep. 10:39) Opaka eyo khahiyo etthu yookhweya, okhala wiira sinoorowa oniphwanya mixankiho ntoko onyokhiwa ni olupatthiwa. Masi hata vari siiso, hiyo noopaka yoothanla ahu. Nnaamwi niri ene atthu oowoova, hiyo noothanla moolipa murima, okhala mpantta wa Yehova ni opaka itthu sooloka. Etthu xeeni enrowa onikhaliherya?

Nuulumo na Muluku, nnimookhaliheryani wiira mukhale oolipa murima. Mbiibiliyani aakhala matakiheryo manceene a alopwana ni athiyana, yoonihenrye mukhalelo ola. Eliivuru ela, elokiheriwe wiira enikhaliherye osoma matakiheryo awo ni wuupuwelela. Okathi munisoma anyu soowiiraneya mpakaka nivekelo, muupuweleke mukhalelo anyu ni mixankiho sinoophwanyani nenna-va, aahiiso, woonasa wene iye sinrowa woophwanyani muhoolo. Nto muupuweleke moota Yehova onrowa awe wookhaliheryani wiira mukhale oolipa murima. Ohiya-vo, muupuweleke moota waamini wa alopwana ni athiyana awo, onrowa aya owiirihani okhala oolipa murima wiira:

Mwiiweleleke soothanla Yehova onipaka awe. (Yak. 3:17) Pooti wiira Yonathani uupuwela wiira aamukhala mwene nipuro na paapa awe, aihaniwa Sawuli. Masi nuumala Yehova omukhootta Sawuli ni omuthanla mmiravo Davidi wiira okhale mwene aattharelana, Yonathani aahooniherya ororomeleya ni olipa murima, okhaliheryaka ni murima awe wootheene ele Yehova aathanlale awe.

Mwaakiherye malamulo a Yehova. (Ahep. 11:​32-34) Hananiya, Mixayeli ni Azariya, yaahikhootta okokhorela elatarato, ahiphavelaka ohiya waamini waya. Nnaamwi opaka eyo, yaataphulela wiira yaamwiiviwa.

Mulavuleke ekeekhai. (Math. 22:16) Nkahaya mmuupuwele Saulo a oTarso, yoowo aalavunle ekeekhai omuhimyaka Yesu, aaleelaka atthu yaale aaroromela awe wiira yammukhaliherya para waalupattha atthareli a Yesu.

Ninlompa wiira eliivuru ela yookhaliheryeni wuncererya waamini ni olipa wanyu murima. (Esal. 27:14) Yehova oreelihe wiimananiha onipaka anyu wiira mwaakhaliherye atthu a vatthokoni vanyu, anna ni arokora a mmulokoni, waakiherya Omwene wa Muluku moolipa murima!