“Owo onnikikhaliherya”

HATA aari mmiravo, mwiixutti a Yesu aihaniwa Marko aari mutthu oolipa murima. Okathi Yesu aavariwe awe, otthukiwa ni okuxiwa ni atoropa, arummwa ootheene yaahitthyawa. Masi, Biibiliya onnimulavula “mmiravo mmosa”, yoowo aalimpe murima wiira omutthare Yesu. Masi atthu akina yaahinweha mmiravo ole, nto yaaphavela onvara. Masi, owo aahihiya nlaya nawe na eliinyu, “otthyawa ohiwanre etthu.” Evanxeelyu ya Marko paahi tenilavula yoowiiraneya ela. Tivonto, atthu anceene anikupali wiira mmiravo ole aari Marko.

Marko, yoowo aasuweliwa-tho okhala Yohani aakhala ni maama awe oYerusalemu. Vanikhala ntoko wiira maama awe Marko aari mutthu oothaaciri. Nuumala Yesu wiiviwa, muloko wa oYerusalemu waathukumana owannyawe maama awe Marko. Nto Pedru aatthyawenle etthoko ya maama awe Marko, nuumala okumihiwa mukhatteya ni nlaikha. Eyo enooniherya wiira Marko aanaasuwela awiixutti ni arummwa anceene a Yesu. Nto ottharaka ntakiheryo naya, Marko aahiixutta okhala mutthu oolipa murima.

Mwaakha 46, Baarnaba, yoowo aari mmusi awe Marko, yaahirowa oYerusalemu ni murummwa Paulo. Nto awo yaahoona okhala etthu yooloka omwiixuttiha Marko. Tivonto, okathi yaatthikela aya wAntiyokiya, awo yaahimukuxa Marko. Nuuvira mwaakha mmosa, Paulo ni Baarnaba yaahinvekela Marko wiira aahoole mukwaha aya wa omisionaario! Moolipa murima, owo aaheemererya orowa naawo wiira okhale “namakhaliherya aya” mamisionaario ale.

Vaapirisari olipa murima wiira Marko aahoole mamisionaario ale, maana okathi ole yaari etthu yooxankiha ni yoowoopiha weetta mukwaha. Muhoolo mwaya, Paulo aalempe wiira mikwaha sinceene eettale awe aahikumana “itthu soowoopiha mmuro, . . . alatarau, . . . mpooma, moothakoni, [ni] mphareya”. (2 Akor. 11:26) Okhala wiira aamukhaliherya Paulo ni Baarnaba, alopwana yaawo yaarina miritti sinceene mmutthenkesoni, pooti wiira Marko aahikhalana miteko sinceene soovara. Niireke aanuupuwela wiira khaawerya ovara miteko iyo sootheene? Biibiliya khonihimya. Etthu ninsuwela ahu ti yoowi, okathi yaaphiyale aya oPanfiilia, Marko aahimuhiya Paulo ni Baarnaba onatthikela owannyawe oYerusalemu. Woonasa wene, eyo yaahaanyoonya alopwana ale, otepexa wene murummwa Paulo.

Nuumala ovira okathi munceene, Paulo ni Baarnaba yaahuupuwela opaka mukwaha aya wa nenli wa omisionaario. Nto Baarnaba aaniphavela otthikela omukuxa Marko. Masi, Paulo khaaphavela wiira Marko aatthare. Woonasa wene, Paulo uupuwela wiira khivaareerela otthikela omuroromela Marko. Vano, okhala wiira khiyaawerya wiiwanana, “Paulo ni Baarnaba, yaahinyakulihana vanceene, khivalaana.” Nto Baarnaba aahimukuxa Marko, onarowa olaleerya oKiipero. Vano Paulo aahimukuxa mutthu mukina onarowa olaleerya mittetthe sikina.

Pooti wiira eyo yaahimuriipiha murima Marko. Ohiya paahi omunyoonyiha murummwa Paulo, yoowo aamuttittimiha awe vanceene, Marko aahiwiiriha apatthani ale aalupale ovalaana. Niireke wiivaha nthowa, oriipiwa murima ni onyoonyiheya waahimwiiriha Marko ohiya ovara muteko wa Yehova? Nnakhala vakhaani!

Marko khaahiyale wiimananiha wiira aakhaliherye anna ni arokora. Nto mwaakha 60 mpakha 61, otthukweliwe ene mukhatteya oRoma, Paulo aahilepa ekarta ohimyaka wiira Marko aari ni yena. Nave Paulo aahimmye wiira Marko aanimulipiha vanceene. Muhoolo mwaya, mwaakha 62 ni 64, murummwa Pedru aahimuhimya Marko okhala mwanawe. Vanikhala ntoko wiira Marko aaheetta mukwaha woorekama orowaka oBabiloonia wiira amulipihe murummwa Pedru, yoowo uuluvanle. Tthiri, ninnikupali wiira Marko aahimulipiha vanceene murummwa Pedru! Nave Pedru aahirumeela okathi ole wiira omuleele Marko itthu sinceene aixuttale awe okathi aari awe ni Yesu. Nto okathi Marko aalepa awe Evanxeelyu awe, woonasa wene oRoma, owo aahilepa itthu sinceene aaleeliwe awe ni Pedru.

Marko onniromoliwa ekwaha yookiserya mbiibiliyani, ekarta Paulo aamulepenle awe Timootheyo. Okathi owo, Paulo aatthukweliwe mukhatteya, nto aahinvekela Timootheyo wiira orowe amuxukurye ni aarowaka omukuxe Marko. Mwaha wa xeeni? Paulo aahimmye so: “Okhala wiira owo onnikikhaliherya muteko wa Muluku.” Tthiri Timootheyo ni Marko yaaniphavela vanceene orowa omuxukurya mpatthani aya ole wiira yammaalihe mahiku ale ookiserya a okumi awe. Hata samphwanyale mixankiho sinceene okathi aavara awe muteko wa Muluku, Marko aahilipa murima wiira aakhaliherye anna ni arokora. Nto, Yehova aanimphenta vanceene mmiravo ole oolipa murima.

Musome yoowiiraneya ela mbiibiliyani, soolepa sinittharelana:

• Marko 14:​50-52

• Miteko 13:​2-5, 13; 15:​36-40

• Akolosi 4:​10, 11

• 2 Timootheyo 4:11

• 1 Pedru 5:13

Nikoho para ovaanela:

Marko oonihenrye sai olipa murima?

Mutokose itthu sikina

1. 1. Etthu xeeni enniiriha ohimya wiira Marko aayariwe emusi yoothaaciri? (Owehaweha 15/03/2010 epaax. 6 etti. 6 mpakha epaax. 7 etti. 1)

   Mwaakhule va

2. 2. Etthu xeeni yaahela muhina Marko okhala “namakhaliherya” a Baarnaba ni Paulo? (Miteko 13:5; Owehaweha 15/03/2010 epaax. 7 etti. 5)

   Mwaakhule va

3. 3. Marko aaheetta mikwaha sinceene. Mapuro xeeni aarowale awe? (Owehaweha 15/03/2010 epaax. 8 itti. 6-8) A

   Mwaakhule va

   

4. 4. Nvahe ntakiheryo nnooniherya wiira itthu Marko olempe awe Evanxeelyu awe, aaleeliwe ni murummwa Pedru. (Owehaweha 01/02/2008 epaax. 26 etti. 1)

   Mwaakhule va

Muupuwelele itthu mwiixuntte anyu

• Marko khaatonko ovahiwa eparakha yookhala murummwa aahiiso profeta. Masi, moowiiyeviha waanimusivela waakhaliherya atthu akina. Olelo-va, ninrowa waakhaliherya sai atthu akina?

  Mwaakhule va

• Mwa okathi vakhaani, Marko aahiperteri eparakha aarina awe ya ovara ni murummwa Paulo. Hata vaari siiso, owo khaahiyale ororomeleya. Ninrowa otthara sai ntakiheryo na Marko naperteri iparakha sahu? B

  Mwaakhule va

  

• Munrowa otakiha sai olipa murima wa Marko?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni ele Yehova oniphavela awe?

  Mwaakhule va

• Yoowiiraneya ela, etthu xeeni mwiixuntte anyu nuumala osuwela wiira Marko oothanliwa wiira alamuleleke ni Kristu wiirimu?

  Mwaakhule va

Mwiixutte itthu sikina

Etthu xeeni enooniherya wiira Evanxeelyu ya Marko khenlikana ni Ivanxeelyu sikina? Nwehe eviitiyu eni:

Masu oopacerya a eliivuru ya Marko (3:18)

Murumeeleke ntakiheryo na Marko wiira nwiixuttihe aniinyu oweha mareeliho anikhumelela, mwaha wa ohihiya omurumeela Yehova. Musome mwaha oni:

“Marko khaahiyale ororomeleya” (Owehaweha 01/02/2008 ipaax. 24-26)