53 PAULO
“Kinooleelani wiira mulipihe murima”
NUUMALA murummwa Paulo okhala mukristau, Yesu aahimuleela wiira aamuhaawa vanceene mwaha woolaleya ihapari sooreera. Niireke eyo yaahiiraneya? Aayo! Nuumala ovira iyaakha 20, okathi yoowo Paulo aalepenle awe akorinto epaphelo ya nenli, owo aahimmye wiira: “Koomaniwa ikwaha soohikontareya ni ikwaha sinceene kaahala vakhaani okhwa.” Nave Paulo aahisama mphareya ikwaha 3. Vano ekwaha emosa aasamme awe mphareya, owo aahikhala nihiku nimosa ni ohiyu omosa ephareya eriyari. Masi, ntoko ninrowa ahu oweha, iyaakha vakhaani muhoolo mwaya, owo aahitthikela osama mphareya.
Paulo aahiviriha iyaakha piili oKesareya otthukweliwe ene mukhatteya, mwaha woowi namalamulela a elapo ele aaphavela okunyariwa. Okathi namalamulela mukina aapacenrye awe olamulela, Paulo aahivekela wiira aphukeliwe ni Seesari. Nto Paulo ni maperesu makina yaahiwelihiwa mpakitini. Awo yaawehawehiwa ni komantanti a atoropa aihaniwa Julio. Nto yaahipacerya weetta mukwaha wooxankiha vanceene wa ikiloomo 3.000 arowaka oRoma. Vano apatthani awe anli, yaahimutthara oRoma. Apatthani awe awo aari Luka, “munnihu oophentiwa, yoowo ori meetiku” ni Aristarko. — Akol. 4:14.
Okathi pakiti ole aaphiyale awe oMira, wAsia Menor, Julio aahaakumiha maperesu pakiti ole aahela pakiti a wExiitu, yoowo aakunxe yoolya ni aarowa wItaalia. Okhala wiira epheyo khiyaakhanle saana, awo yeetta vakhaani-vakhaani. Eliivuru ya Miteko, Luka onnihimya ikwaha piili wiira pakiti ole eetta ni “mixankiho”. Okathi pakiti ole eemenle awe opuro wiihaniwa Iportu Sooreera wiira olipelele epheyo omaala, Paulo aahoona wiira khahiyo waari okathi wooreerela weetta ni yakhuma opuro ole samwaaphwanya mixankiho sinceene.
Moolipa murima, Paulo aahimuleela Julio wiira ahikhume opuro ole. Nave aahimuleela wiira yakhuma opuro ole samwaaphwanya mixankiho sinceene ni itthu saamuhononeya. Mooriipiha murima, Julio khaatthanre miruku sa Paulo, masi aatthanre miruku sa atthu akina. Nto yaahivikaniha mukwaha ole. Masi Julio aamuriipiwa murima, mwaha wa yoothanla aapanke awe. Luka ohimmye wiira “yaahoopa epheyo yuulupale”, nto “pakiti aanikakhiwa vanceene”. Mwa okathi vakhaani paahi, epheyo ele yaahipakeya sikolooni. Yaahivira mahiku manceene, epheyo ele etepaka waamana ni ikuru. Nto wiira pakiti ole oveye, ale yaamweettiha yaahirihela mikhoyi soolemela mmaasini ni miritti sikina. Nto yaahivira mahiku manceene ahilyaka etthu. Nuuvira isumana piili arina ene muxankiho ole, Luka ohimmye wiira nlipelelo nootheene yaarina aya noowi yaamoopowa, naahipacerya omala-mala.
Okathi Paulo aarowa awe oRoma ntoko peresu, vaavo yaakhumelenle aya epheyo yuulupale mphareya, owo aahaakhaliherya atthu woopola ikumi saya
Vano muxankiho ole waanitepa. Nto Paulo aahaaleela wiira: “Kinooleelani wiira mulipihe murima”. Nave moottharelana aahaaleela oriki: “Khuuvo mutthu mmosa a nyuwo onrowa okhwa, masi pakiti paahi tonrowa ohononeya.” Okathi atthu akina yaamweettiha pakiti yuupuwela aya wiira yaahala ophiya etthaya yoowuuma, awo yaahirihela mmaasini ekalawa yaamukhaani. Masi Paulo aahaaleela wiira atthu anceene yaamookhwa vakhala wiira khiyaarowa okhala mpakitini mme. Nto atoropa ale yaahikwasa mikhoyi sa ekalawa ele ahinatthi atthu akina okela-mo.
Oxaaka, Paulo aahaamaaliha atthu ale ni aahaatumererya olya etthu. Nave aahaaleela wiira “khuuvo a nyuwo onrowa omora nnakhala ekharari emosa mmuru mwawe”. Nuumala-vo, Paulo aahimuxukhurela Yehova ohoolo wa atthu ootheene. Nuumala olya, atthu ale yaahimurihela tiriku ootheene mmaasini. Paulo aahaakhaliherya atthu ale okhala oolipa murima. Luka ohimmye wiira “ootheene aya yaahilipiha murima”. Mmeeloni mwaya voosiisu, pakiti ole aahiphara vamihaavani, ohinattikinyeya. Nto mawimpi yaanimana onapwexakaseya. Hata vari siiso, ele Paulo aahimyale awe yaahiiraneya, maana “ootheene aya yaahiphiya vatthayani, ari ene akumi.”
Masi awo yaari woowi? Awo yaahoona wiira yaari esisiro ya oMalta. Moohipisa, Paulo ni apatthani awe yaahipacerya olaleerya. Nave Muluku aahimukhaliherya Paulo opaka miiriirya. Nto atthu a esisiro ele, yaahimuxukhurela vanceene Paulo ni yaahinvaha itthu saamuthowa yena ni apatthani awe.
Paulo khaatonko ohiya okhala oolipa murima. Nto nuumala ovira miyeeri vakhaani aahiphiya oRoma. Ori ene elapo ele, aahiviriha iyaakha piili otthukweliwe ene mukhatteya ni olipeleliwaka ni toropa mmosa. Hata aari mukhatteya, Paulo khaahiyale olaleerya ni olepa ikarta wiira aalipihe axinnawe. Nuumala okhuma mukhatteya, Paulo aanirumeela otaphuwa wawe wiira olaleerye. Masi nuumala ovira iyaakha vakhaani, Paulo aahitthikela otthukweliwa mukhatteya. Masi ela yaarowa okhala ekwaha yookiserya otthukweliwa mukhatteya. Vanikhala ntoko wiira, nuumala ovira okathi vakhaani, Paulo yoowo aari mulopwana oororomeleya ni oolipa murima aahiiviwa ni aroma. Masi Paulo khoova wiiviwa. Owo aahimuhimya naakhwa okhala “nwanani ookiserya” ni aanisuwela wiira Yehova onrowa omaliha okhwa. (1 Akor. 15:26) Okathi wooreerela Yehova aarowa onvaha ele aamuleihenrye awe omutthuvela, eyo piiyo, okumi ohinikhwa wiirimu, orumeelaka ntoko mwene ni namukuttho hoothe ni Yesu Kristu.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Paulo oonihenrye sai olipa murima?
Mutokose itthu sikina
1. Paulo aanisuweliwa-tho okhala Saulo. Xeeni vaamusivela aya vanceene wiitthaneliwa nsina noowi Paulo? (Owehaweha 01/03/2008 epaax. 12 itti. 4-5)
2. Okathi Paulo aatthikenle awe oTarso ni aaronwe awe wAntiyokiya, saahivira iyaakha 9, seiyo aahimmye awe okhala iyaakha soomaaleleya. Mixankiho xeeni samphwanyale iyaakha iyo? (Owehaweha 15/07/2000 ipaax. 26-27, ekaaxa, itti. 3-4)
3. Paulo aahimmye wiira vaamuloka ohirowa wItalia okathi ene yoole. Niireke iyo saari miruku sooloka? (Mit. 27:9, 10; Owehaweha a Atthu Otheene N.o 5 2017 epaax. 9 itti. 3-4) A
Efootu A: Pakiti aakuxa marotta a okathi wa arummwa, aalikana ni ole Paulo anwenle awe orowaka oMira
4. Xeeni atthu a oMalta yaahimmye aya wiira Paulo aari “nawiive”? (Mit. 28:4; Owehaweha 1/10/2015 epaax. 9 itti. 5-6)
Muupuwelele itthu mwiixuntte anyu
Paulo ahaalela atthu yaari mpakitini wiira Muluku anwoopola, ni khuuvo mutthu yaarowa “omora nnakhala ekharari emosa mmuru mwawe.” (Mit. 27:22, 34) Yoowiiraneya ela enniixuttiha exeeni sa ele Yehova oniwerya awe opaka? Enrowa wookhaliheryani sai okathi woolaleerya?
Nuumala Paulo opaka nivekelo, atthu ootheene “yaahilipiha murima”. (Mit. 27:35, 36) Okathi xeeni mavekelo ahu anrowa waalipiha atthu akina? B
Efootu B
Munrowa otakiha sai olipa murima wa Paulo?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni ele Yehova oniphavela awe?
Yoowiiraneya ela, etthu xeeni mwiixuntte anyu nuumala osuwela wiira Paulo oothanliwa wiira alamuleleke ni Kristu wiirimu?
Mwiixutte itthu sikina
Nwehe moota apakiti yaarina aya efaita okathi wa Paulo, wiira alaleye ihapari sooreera ilapo sikina. Musome mwaha oni:
“Itthu soowoopiha mphareya” (Owehaweha 15/03/1999 ipaax. 29-31)
Axitokweene anrowa otthara sai ntakiheryo na Paulo na ovilela ni waakhaliherya atthu akina? Nwehe eviitiyu eni:
Mwaatakiheke ale anaakhela itthu sileiheriwe mwaha wa opixa murima — Paulo (3:22)