51 BAARNABA
“Ole onaalipiha akina”
NUUMALA ovira iyaakha 3 Saulo okhanle ene mukristau, owo aahitthikela oYerusalemu wiira aawehe makristau yaakhala elapo ele. (Akal. 1:15-19) Vano, Saulo aanaathokorerya ntoko axinnawe ni axirokorawe. Masi makristau awo yaamuthokorerya okhala mutthu aalupattha ni ootakhala murima. Vanikhala ntoko wiira, makristau anceene khiyaakupali wiira Saulo aahirukunuxa murima awe. Masi mulopwana mmosa aahimoonela othunku ni aahilipa murima wiira omukhaliherye. Nto mulopwana owo aihaniwa Baarnaba.
Makristau a oYerusalemu yaanoova omukhaliherya Saulo a oTarso, masi moolipa murima Baarnaba aahirowa omukhaliherya
Ekwaha yoopacerya oniromoliwa awe mbiibiliyani, Baarnaba onihimmwa okhala Yosefe. Nuumala Pentekoositi a 33, Yosefe aahitumiha ematta awe, nto musurukhu ene aahivaha wiira akhaliheriwe makristau othoiwa. Owo aanisuweliwa okhala mutthu ooreera murima ni aamaliha atthu akina. Tivonto, arummwa yanvahale aya nsina noowi Baarnaba, nenlo nintaphulela “ole onaalipiha akina.” Vano, mwaakha wa 36, Baarnaba aahooniherya olipa murima omwaakhelaka Saulo oYerusalemu. Biibiliya onihimya wiira: “Baarnaba aahirwa omukhaliherya Saulo, ni aahimuroiha wa arummwa.”
Okhuma okathi ole, Saulo ni Baarnaba yaahikhala apatthani aalupale. Okathi Saulo aari awe oYerusalemu, owo aanikhalela nthiti olaleerya, nto ayuda yaaphavela omwiiva. Vano, anna a oYerusalemu yaahimuruma Saulo orowa elapo ya oTarso weiwo aayariwe awe. Nuumala ovira iyaakha 9, anna yaahimuthanla Baarnaba wiira aakhaliherye makristau a niinaano a wAntiyokiya wa oSiiria. Owo aahiwerya waalipiha anna ni arokora a elapo ele, maana “aari mulopwana ooreera murima ni aahisareya ikuru soowaarya ni aahikhalana waamini woolipa.” Elapo ya wAntiyokiya yaahikhala atthu anceene, yaaphavela wiiwa ihapari sooreera. Nto Baarnaba aanipirisari okhaliheriwa. Eyo yaahimwiiriha Baarnaba orowa oTarso omwaavya Saulo wiira amukhaliherye. Nto awo yaahikhala apatthani aalupale yaavara vamosa muteko woolaleerya. Nave yaahikhaliherya otthokiha muteko, wookhaliheriwa makristau oohaawa.
Vano Saulo, yoowo aasuweliwa okhala Paulo, aahiwela ekalawa onapacerya muteko awe wa omisionaario ni Baarnaba. Awosa yaapirisari olipa murima wiira avare muteko owo. Mwa ntakiheryo, ari ene wIkonio, ayuda akina yaaphavela waavonya maluku mpakha owiiva. Tivonto, mwa miruku Paulo ni Baarnaba yaahitthyawela oListra. Nuumala ophiya, atthu a oListra yuupuwela wiira Paulo ni Baarnaba yaari amuluku! Masi ayuda akina yaakhuma wAntiyokiya ni wIkonio, yaahirowa oListra wiira yaawoke atthu wiira amulupattheke Paulo ni Baarnaba. Nto ele yaaphavela aya yaahiraneya! Maana, atthu a oListra yaahinvonyakasa maluku Paulo ampurulela ota wa epooma yuupuwelaka wiira aahikhwa. Nuumala osuwela ele yaamukhumelenle, makristau a oListra yaahirowa onweha. Nto okathi yaamurukurenrye aya, Paulo aaheemela onarowa opooma. Nkahaya muupuwele moota Baarnaba aahakalanle awe okathi aawehale awe wiira Paulo aari mukumi! Mmeeloni mwaya, awo yaahikhuma oListra. Nuuvira okathi vakhaani, awo yaahitthikela oListra wiira yaalipihe anna ni arokora. Tthiri awo yaahooniherya olipa murima!
Nnaamwi saaphwanyale mixankiho sinceene, Paulo ni Baarnaba yaahikhalana soowiiraneya soohakalaliha. Masi yaahikhumelela etthu emosa, yeeyo yaawiirihale onyakulihana. Etthu xeeni? Okathi yailokiherya aya wiira yeette mukwaha aya woolaleerya, Baarnaba aaniphavela omukuxa mmusi awe aihaniwa Marko. Masi Paulo khaaphavela, mwaha woowi Marko aahaatthyawa okathi yaalaleerya aya oPanfiilia. Vano, Baarnaba aanithipelela omukuxa Marko, masi Paulo aathipelela wiira ohimukuxe. Nto “Paulo ni Baarnaba, yaahinyakulihana vanceene, khivalaana.”
Niireke Baarnaba aarowa othipelela onanariwa aahiiso ammulevelela Paulo? Baarnaba aapirisari olipa murima wiira opake etthu yooloka ohiya othipelela onanariwa. Yoowiiraneya ele, ennooniherya wiira okathi nihiniiwanana ahu ni munna aahiiso ni murokora, pooti ophavelaka onanariwa, omulavula voohiloka aahiiso ohiya orowela mithukumano. Nto vanipirisari olipa murima wiira nihipake eyo. Ohiya-vo, nihaana wiimananiha omulevelela munna aahiiso murokora owo, wiira nimusiveliheke Yehova.
Nnaamwi Paulo ni Baarnaba yaanyakulihanne, awo khiyeemerenrye etthu eyo ewiirihaka ohiya omurumeela Yehova. Ninnihimya siiso, okhala wiira Baarnaba aahimukuxa Marko onarowa waapaka awiixutti oKiipero. Vano Paulo ni Siila yaahirowa olaleerya epantte ekina. Nto Yehova aahimukhaliherya olipiha miloko ni waalaleerya atthu ihapari sooreera.
Niireke Paulo ni Baarnaba yaahikhalana mathowa vamurimani? Nnaari. Ninnisuwela eyo, mwaha woowi ikarta Paulo olempe awe, onnimulavula saana Baarnaba. Mwa ntakiheryo, okathi aalepenle awe Akorinto, Paulo aahimyale wiira Baarnaba aanivara muteko para ophwanyeke musurukhu wiira yiikhapeleleke ohiya waaxankiha anna ni arokora. (1 Akor. 9:6) Nave Paulo khaathipelenle onanariwa ni Marko. Ekarta emosa aalempe awe, owo aahaaleela anna ni arokora wiira amuthokorerye saana “Marko, mmusi awe Baarnaba.” (Akol. 4:10, 11) Biibiliya khonihimya akhala wiira Paulo ni Baarnaba yaahitthikela olaleerya hoothe, masi ompatthani aya khiwaamanle. Nave Baarnaba khaahiyale olaleya ihapari sooreera ni waalipiha atthu akina. Nave-tho, okathi aavara awe muteko ni Marko, owo aanimwiixuttiha omurumeela Yehova ni waakhaliherya anna ni arokora. Muru onittharelana, ninrowa othokorerya olipa murima wa Marko.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Baarnaba oonihenrye sai olipa murima?
Mutokose itthu sikina
1. Nlamulo aavahiwe awe Moise naahimya wiira alevi khiyaarowa ovahiwa etthaya wIsarayeli. Nto Baarnaba, yoowo aari mulevi aawenrye sai okhalana ematta? (Mmr. 18:20; Mit. 4:36, 37; Owehaweha 15/04/1998 epaax. 20 etti. 4, enoota)
2. Xeeni Baarnaba aihaniwa awe murummwa? (Mit. 14:14; Perspicaz vol. 1 “Baarnaba” etti. 3)
3. Ari ene oKiipero, Paulo ni Baarnaba yaahimulaleerya mulopwana aihaniwa Sergio Paulo. Nto niireke Luka, yoowo olempe eliivuru ya Miteko aahimya ekeekhai vaavo aalempe awe wiira Sergio Paulo aari “kuvernatoro”? (Mit. 13:7, 12; Perspicaz vol. 1 “oKiipero” etti. 6) A
Bank of Cyprus Cultural Foundation Collection
Efootu A: Musurukhu wa maluku a okathi wa Klaudio, vaavo Baarnaba ni Paulo yaarowale aya oKiipero. Musurukhu owo onnimooniherya kuvernatoro aalamulela esisiro ele
4. Xeeni atthu a oListra yaamwaakhenle aya Paulo ni Baarnaba ni mikuttho? (‘Mulaleyeke oratteene omwene wa Muluku’ epaax. 109 ekaaxa)
Muupuwelele itthu mwiixuntte anyu
Ninrowa otakiha sai oreera murima ni ovaha wa Baarnaba?
Vanikhala ntoko wiira Baarnaba taatthokihale mukwaha woopacerya wa omisionaario wa Paulo. Masi muhoolo mwaya, Paulo aahivahiwa iparakha sinceene onvikana Baarnaba. Hata vari siiso, Baarnaba khaamukhalela nrima Paulo. Okathi xeeni nikhanle ahu ootthara ntakiheryo na Baarnaba? B
Efootu B
Munrowa otakiha sai olipa murima wa Baarnaba?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni ele Yehova oniphavela awe?
Yoowiiraneya ela, etthu xeeni mwiixuntte anyu nuumala osuwela wiira Baarnaba oothanliwa wiira alamuleleke ni Kristu wiirimu?
Mwiixutte itthu sikina
Paulo ni Baarnaba yaahikhala apatthani aalupale nnaamwi yaari atthu a mikhalelo soovirikana. Nto ompatthani aya onniixuttiha exeeni? Musome mwaha oni:
“Niireke munoophuka ohiiwanana wira mukumiherye murettele?” (Owehaweha 06/2017 ipaax. 28-32)
Eviitiyu ela, nwehe moota anna animutakiha aya Baarnaba ni Paulo okathi ahiniiwanana aya.