32 ELISEYO
“Khoo Yehova, xontte, mutthukule maitho awe”
PROFETA ELISEYO ni murumeyi awe yaari oDotani, epooma yeeyo yaarukureriwe ni miyaako ni yaaphwanyaneya oxepani. Epooma eyo yaari opuro woottukhuwa ni yaahirukureriwa ni ixiri seiyo saakhapelela. Nihiku nimosa voosiisu, okathi murumeyi a Eliseyo aavenyale awe okhumela ota, aahiwoona anakhotto a oSiiria ni ikhavalo ni ikaaro sa ekhotto yaawo yaaphiyale ohiyu arukurenrye ene epooma. Anakhotto awo ootheene ni ikaaro saya sa ekhotto yaamwaavya mulopwana mmosa paahi, profeta Eliseyo. Oxankale ene vanceene, murumeyi owo aahitthimaka orowaka omuleela profeta Eliseyo, itthu aawenhe awe.
Ela khahiyo yaari ekwaha yoopacerya Eliseyo oopopihiwa awe. Siira sivinre ene iyaakha vakhaani, vaavo Yehova aamurumme awe profeta Eliya wiira omuthanle Eliseyo ni omwiixuttihe wiira muhoolo mwaya omuranttele. Okathi Akhabi aalamulela awe, Eliseyo aavara hoothe ni Eliya. Nto awo yaahiweha itthu sootakhala saapakiwa ni mwene Akhabi, pwiyamwene Yezabeli ni mwanaya aihaniwa Akhaziya. Ootheene aya yaanaanyokha maprofeta a Yehova ni yaaphavela owiiva. Okathi yeetta aya evaanelaka, mootutuxerya yaahikhumelela ekaaro ya mooro ni ikhavalo sa mooro, nto Eliya aahiwela wiirimu okuxiwaka ni epheyo. Woonasa wene Eliseyo khaamonne-tho mpatthani awe ole, maasi owo khaahiyale ovara muteko yoowo waavariwa ni Eliya. Eliseyo taahoolela maprofeta a Yehova wiira omala-malihe okokhoreliwa Bayaali wIsarayeli. — 2 Mam. 2:15.
Yehova aahinvaha Eliseyo owerya wiira opake miiriirya sinceene. Mwiiriirya mmosa Eliseyo aapanke awe waari ompenuxa Naamani, xeefi aanakhotto ni murumeyi a Beni-Hadadi mukhulupale a oSiiria. Masi ohiya mwene ola omuxukhurela Eliseyo, owo khaahiyale waaruma anakhotto awe orowa opwetexa oYerusalemu. Yehova khaahiyale omuleela Eliseyo opuro anakhotto a Beni-Hadadi yaarowa aya otuphela. Nto Eliseyo, aanimuleela mwene a wIsarayeli opuro yaarowa aya owaniwa ekhotto. Onanariwe ene, mwene a oSiiria aahaakoha arumeyi awe wiira: “Tani a hiyo ori mpantta wa mwene a wIsarayeli?” Mmosa a arumeyi awe aahimuhimeerya wiira: “Khuvo a hiyo, pwiyaka mwene! Eliseyo, profeta ori wIsarayeli, tonimuleela mwene a wIsarayeli itthu pwiyaka onilavula awe okwartu wawe”. Nuumala Beni-Hadadi osuwela wiira Eliseyo aari oDotani, aahaaruma alopwana awe wiira yanvare profeta owo.
Eliseyo ni murumeyi awe, vanikhala wiira yaahirukureriwa ni anakhotto ale anceene ni yaari mukhatteya, masi Eliseyo aanisuwela etthu murumeyi awe ahaasuwela awe
Murumeyi a Eliseyo taapacenrye waaweha anakhotto a oSiiria, siiso murumeyi owo aahimuhimeerya Eliseyo wiira: “Nootakhaliwa, Pwiyaka! Ninrowa opaka exeeni?” Eliseyo aahoona wiira murumeyi awe aanoova tivo, ammaalihale awe ohimyaka so: “Muhoove!” Moottharelana, Eliseyo aahihimya moolumo yaawo annilipiha mpakha olelo-va, ani: “Okhala wiira ale ari ni hiyo khareere waatta waavikana ale arina aya”. Woonasa wene, murumeyi ole aahitikinihiwa ni ele Eliseyo aahimmye awe. Vaaweryaneya sai alopwana anli okhala oowaatta waavikana anakhotto anceene? Vano, Eliseyo aahinvekela Yehova oriki: “Khoo Yehova, xontte, mutthukule maitho awe wiira ooneke”.
Moowaakuveya Yehova aahaakhula nivekelo nle. Owo aahimukhaliherya murumeyi ole waaweha anakhotto a Yehova arukurenrye ene opuro ole. Anakhotto awo yaari oowaatta, oowerya waavikana anakhotto aapinaatamu. Biibiliya onihimya wiira okathi ene yoowo, murumeyi owo aahoona “muttetthe wa omiyaakoni osareyale ene ikhavalo ni ikaaro sa ekhotto, saamurukurenrye Eliseyo.”
Anakhotto a oSiiria khiyaawehale anakhotto ale a Yehova. Anakhotto ale a oSiiria yaahaattamela epooma ele wiira anvare Eliseyo. Masi Eliseyo aahinvekela Yehova wiira owiirihe atthu ale ohoona. Eyo khentaphulela wiira Yehova aakhunenle maitho aya wiira ahooneke, ohiya-vo, eyo enitaphulela wiira awo khiyaasuwela etthu yiiraneya opuro yaari aya. Eliseyo aahaaleela wiira aamwaahoola epooma aari awe mulopwana yaamphavela aya. Owo aahaahoola oSamariya weiwo waarakamenle oYerusalemu etthu yowiiraka ikiloomo 16. Nto okathi yaaphiyale aya oSamariya Eliseyo aahinvekela Yehova wiira otthukule maitho aya. Nuumala Eliseyo ovekela, awo yaahoona wiira yaari eriyari ya oSamariya. Mwene a wIsarayeli aaphavela owiiva anakhotto awo, masi Eliseyo aahaamorela ikharari ni aahimuleela mwene wiira aavahe eyoolya anakhotto ale oSiiria nuumala-vo, atthikeleke owaani. Nuumala anakhotto a oSiiria ophiya owaani, Biibiliya onihimya wiira: “khiyaatthikenle-tho elapo wa wIsarayeli.”
Eliseyo aanisuwela wiira anakhotto a Yehova yaari vakhiviru vawe. Iyaakha sinceene saavinre omukokhorelaka Yehova, Eliseyo aahisuwela wiira Yehova ni malaikha ari oolikana ene wiira yaakhaliherye arumeyi awe oororomeleya. Osuwela eyo yaahimukhaliherya Eliseyo okhala mutthu oolipa murima. Nave-tho, Yehova onoonikhaliherya okhala atthu oolipa murima, ntoko aamukhalihenrye awe Eliseyo.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Eliseyo oonihenrye sai olipa murima?
Mutokose itthu sikina
1. Etthu xeeni Eliseyo aapanke awe nuumala othanliwa ni Yehova wiira okhale profeta? Eliseyo oonihenrye sai wiira aari mutthu ooxukhuru nuumala othanliwa wiira okhale profeta? (1 Mam. 19:19-21; Perspicaz vol. 1 “Eliseyo” etti. 2) A
Eteseenyu A
Eteseenyu A
2. Xeeni Eliseyo aavekenle awe Eliya “ipantta piili” sa ikuru soowaarya? (2 Mam. 2:9; Owehaweha 01/11/2003 epaax. 31)
3. Exeeni ennikupaliha wiira Yehova khaakhunenle maitho a anakhotto a oSiiria wiira ahooneke? (Perspicaz vol. 1 “Ohiwerya woona” etti. 6)
4. Miteko xeeni Eliseyo aavanre awe nuumala okhala profeta? (Perspicaz vol. 1 “Eliseyo” itti. 27-28)
Muupuwelele itthu mwiixuntte anyu
Osuwela wiira khula okathi anakhotto a Yehova ari vakhiviru, onoolipihani sai? B
Efootu B
Ootheene ahu ninrowa waalipiha sai atthu akina, ntoko Eliseyo aamulipihale awe murumeyi awe?
Munrowa otakiha sai olipa murima wa Eliseyo?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni ele Yehova oniphavela awe?
Etthu xeeni kiniphavela aka omukoha Eliseyo nuumala ohihimuxiwa?
Mwiixutte itthu sikina
Anna anivahiwa yoothanleliwa esya aniixutta exeeni ni ntakiheryo na Eliseyo? Nwehe eviitiyu eni:
Mwaattittimiheke anna apacenrye khalai ovara miteko sa Muluku (4:48)
Nrowe nuupuwelele itthu sikina saamwiiranenle Eliseyo. Musome mwaha oni:
“Eliseyo aahiweha ikaaro sa ekhotto sa mooro — ankhi nyuwo?” (Owehaweha 15/08/2013 ipaax. 28-30)