Aahimukhapelela mwene aathanliwe ni Yehova

YEHOYADA, aari namukuttho muulupale aavara muteko otemplo oYerusalemu. Muteko awe waari waakhaliherya atthu omukokhorela Yehova ntoko oniphavela awe. Masi opaka eyo khahiyo vaari vookhweya, okhala wiira yaahikhala atthu anceene yaakokhorela amuluku eethiru ni yaapaka itthu sootakhala.

Etthu yaawiiriha opaka itthu sootakhala, waari mwaha wa muthiyana mmosa aitthaniwa Ataliya. Anamuyari awe yaari mwene Akhabi ni pwiyamwene Yezabeli, yaawo yaalamulela wIsarayeli. Awo yaari ootakhala vanceene mpakha Yehova ohimya wiira aamwaamala-maliha atthu a nloko nle nootheene. Nnaamwi Ataliya aatheliwe ni mwene a oYuda, owo aaninyokha okokhorela weekeekhai. Nuumala iyawe okhwa, mwanawe aahipacerya olamulela ntoko mwene, masi Yehova aahiruma wiira iiviwe. Nuumala-vo, Ataliya aahiikhaliha mwene a oYuda. Masi khahiyo ti etthu Yehova aaphavela awe, okhala wiira Yehova aathanla paahi alopwana wiira alamuleleke. Nave alopwana awo yaakhuma nloko na Davidi. Nto nuumala okhala mwene a wIsarayeli, Ataliya aaniwiiva atthu ootheene yaareerela okhala mamwene. Ataliya aahiruma wiira axisulwaawe yiiviwe, okhala wiira mmosa a yaawo aamukhala mwene aattharelana a wIsarayeli.

Yehoyada aamuthenle Yehoxeba, yoowo-tho aasuweliwa okhala Yehoxabathi a emusi ya mwene. Yehoyada ni mwaarawe, khiyaasiveliwe oweha emusi ya Davidi emalama-lihiwaka. Okhala wiira Yehova aahihimya wiira osuulu wa Davidi waarowa olamulelaka mahiku ootheene! (2 Sam. 7:​12, 13) Yehoxeba aahilakela omukhapelela ole aarowa ohalana omwene, mwaana ahaaphiyerihale eyaakha emosa. Moolipa murima, owo aahimoopola mwaana ole omukuxaka moohisuweliwa, omukumihaka mpaani mwa mwene. Owo aahimukuxa mwaana ni ole aarowa omukhapelelaka onvahererya iyawe Yehoyada namukuttho muulupale. Yehoyada aahimukuxa mwaana ole omwiipithiha ekwaartu ya muhina wiira ohiiviwe ni Ataliya.

Mwa iyaakha 6, Yehohada aahimwiipithiha Yowasi mpaani mwa Muluku ni aahimukhapelela wiira ohiiviwe. Moohaanyiherya saari iyaakha sooxankiha, okhala wiira Ataliya aanipaka sootheene aawerya awe wiira okhapelele omwene awe. Nuumala omwiipithiha mmiravo ole mwa iyaakha 6, moolipa murima Yehohada aahipaka etthu ekina, owo aahaalattula maxeefi 5 oororomeleya a anakhotto aahimeerya esiiri ele yuulupale, oriki: Ookhala mmiravo a emusi ya Davidi, yoowo onrowa okhala mwene a wIsarayeli. Okathi Yehoyada aahoolela awe efesta ya okhalihiwa mwene, aahaaruma maxeefi awo wiira yaaruuhe atoropa 500 wiira yeemele mapuro ooreerela, muhina ni waattamela etemplo, nave aahaaleela atoropa awo wiira amurukurerye mwene khula mpantta, khula mmosa okunxe ene ikaruma sawe sa ekhotto. Mwaha wa ohakalala, atthu a Isarayeli yaanikhuwela ni yaanopa makuphi, okathi Ataliya aawiiwale awe, moowaakuveya owo aahitthimakela otemplo.

Ataliya aahiphiya vate va etemplo. Niinaano-ru, owo aahisuwela etthu yiiraneya ni aahimananiha okhoottiherya wiira Yowasi ohikhale mwene. Ataliya aahikhuwela oriki: “Koorukunuweliwa! Koorukunuweliwa!” Ataliya aahikhalana nthowa mwaha wa etthu ele yootakhala aapanke awe. Hata aapanke eyo, owo aanilipelela okhaliheriwa ni atthu akina ni wiira ohihiye okhala mwene. Masi owo aamwiiwoka, maana Yehoyada aari mutthu oolipa murima. Yehoyada aahaaruma atoropa wiira amukuxe pwiyamwene ole ootakhala ni amukumiherye ota wa etemplo. Nto awo yaahimukumiherya Ataliya ota, nuumala-vo, yaahimwiiva. Yehova aahihimya khalai ene wiira: “Atthu ootheene a etthoko ya Akhabi animookhwa.” (2 Mam. 9:8) Pooti wiira Ataliya aari mutthu ookiserya okhwa a etthoko ya Akhabi ni Yezabeli.

Nuumala Ataliya okhwa, Yehoyada aahipaka-tho etthu ekina yaarina efaita yuulupale. Owo aahaakhaliherya atthu ni mwaana ole aathanliwe wiira okhale mwene. Awo yaahimuleiherya Yehova wiira khiyaarowa ohiya ororomeleya. Moottharelana, owo aahiruma wiira epwexakasiwe etemplo ya Bayali ni iiviwe namukuttho yoowo aavara muteko mutemplo. Nuumala-vo, Yehoyada aahiimananiha omwiixuttiha Yowasi wiira okhale mwene ooloka ni oororomeleya. Okathi Yehoyada aari awe mukumi, Yowasi aanimuroromela Muluku. Nuumala-vo, Yehoyada aahikhwa orina ene iyaakha 130. Owo aavithiwe mahiye mamosa-ru yaavithiwa aya mamwene yaalamulela oYerusalemu. Eyo yaari yoottittimiheya, maana okhala wene namukuttho khaavithiwa mahiye mamosa-ru yaavithiwa aya mamwene.

Mooriipiha murima, nuumala Yehoyada okhwa, Yowasi aahihiya omuroromela Muluku. Makhulupale ootakhala a oYuda, yaahimwiiriha opacerya okumiherya okokhorela woohiloka. Okathi Yowasi aattaruxiwe awe ni maprofeta, owo aahikhootta waawiriyana. Profeta mmosa anvanhe miruku aari mwaana a Yehoyada, aihaniwa Zakariya. Owo aahaakoha atthu, etthu yaawiiriha ohiiwelela malamulo a Yehova. Nuumala wiiwa eyo, Yowasi aahinanariwa ni aahiruma wiiviwa Zakariya. Masi Zakariya khaahiyale okhala oolipa murima mpakha okhwa wawe, ntoko siirale awe paapa awe. Nuuvira iyaakha sinceene, Yesu Kristu aahihimya wiira Zakariya aari mulopwana a xariya. Yehova ni Yesu, khonikhala-khala oliyalaka olipa murima wa alopwana ni athiyana oororomeleya.

Musome yoowiiraneya ela mbiibiliyani, soolepa sinittharelana:

• 2 Mamwene 11:​1-21; 12:​1, 2

• 2 Wahala 22:​10-12; 23:​1-21; 24:​1, 2, 7, 15-22

• Matheyo 23:35

Nikoho para ovaanela:

Yehoyada oonihenrye sai olipa murima?

Mutokose itthu sikina

1. 1. Asomi anihimya exeeni sa “makwarta kariyana” yaamukhalihenrye Yehoyada omwiiva Ataliya? (2 Mam. 11:​4, 19; Perspicaz vol. 1 “Anakhotto kariyana”)

   Mwaakhule va

2. 2. Yaathoonyerya exeeni “eroolu yaarina nlamulo na Muluku”, yeeyo Yehoyada anvaherenrye awe Yowasi? (2 Mam. 11:12; Owehaweha 01/02/1991 epaax. 31 itti. 5-6) A

   Mwaakhule va

   

3. 3. Xeeni Yowasi ohalaka ohimya wiira elokiheriwe empa ya Yehova? (2 Wah. 24:​4-7, 11-14; Perspicaz vol. 2 “Yehoyada” n.^o 1 etti. 5)

   Mwaakhule va

4. 4. Zakariya aari mwaana a Yehoyada. Nto xeeni Yesu ohalaka omwiitthana okhala mwaana a Barakiya? (“Nwehe enoota ya Bíblia de estudo eri Matheyo 23:35 eni “Mwaana a Barakiya”)

   Mwaakhule va

Muupuwelele itthu mwiixuntte anyu

• Woonasa wene Yehoyada aarina iyaakha sinivikana 100 okathi aamwiipithihale awe Yowasi. Moota xeeni ntakiheryo nawe nnaalipiha aya arumeyi oowuuluvala a Yehova? (Esal. 92:​12, 14) B

  Mwaakhule va

  

• Okathi Yowasi anwiriyanne awe Yehoyada, itthu saahimweettela saana. Amiravo aniixutta exeeni?

  Mwaakhule va

• Munrowa otakiha sai olipa murima wa Yehoyada?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni ele Yehova oniphavela awe?

  Mwaakhule va

• Etthu xeeni kiniphavela aka omukoha Yehoyada nuumala ohihimuxiwa?

  Mwaakhule va

Mwiixutte itthu sikina

Anamwane aniixutta exeeni ni ntakiheryo na Yowasi, sa okhalana ephoole okathi anaathanla aya apatthani? Musome mwaha oni:

“Yowasi aahihiya omukokhorela Yehova mwaha wa apatthani oohiloka” (Owehaweha 01/04/1999 itti. 24-25)

Etthu xeeni nniixutta ahu ni Yehoyada sa ovaha musurukhu ahu wiira nikhaliherye omwene? Musome mwaha oni:

“Soovaha sinimuhakalaliha Muluku” (Owehaweha 01/11/2005 itti. 26-27)