Owo aahilipa murima okathi wa mixankiho

MWAHA wa mixankiho samphwanya, muthiyana ole uupuwela wiira khaawehiwa. Masi niireke khuuvo aaweha itthu saamukhumelela? Niireke khuuvo aamuthokorerya? Owo aari naamukhweli ni aahikhalana mwaana. Wisarayeli, athiyana yaarina muxankiho ntoko yena, yaahikhala malamulo a Muluku yaawo yaakhapelela anaamukhweli ni ikwaasuni. Masi yena khahiyo aari mwisarayeli. Owo aakhala oSarefati, epooma ya oSiidoni. Mwene a oSiidoni aari Ethibayaali. Woonasa wene aari namukuttho a muluku muthiyana, aihaniwa Astoreti. Okokhoreliwa muluku ola waahela muhina inamuna sootheene sa mweettelo woohiloka ni wootakhala. Nkuupuwelani moota vaari aya vooxankiha muthiyana ole naamukhweli okhala variyari va atthu awo. Ntoko niwenhe ahu, muthiyana ole aahaana ovilela etala, okhala wiira muttetthe ole waahikhalana muxankiho wa ohirupa epula. Nto yena pooti wiira aaniikoha so: Etthu xeeni enrowa okiiraneela miyo vamosa ni mwanaka?

Muthiyana owo aanipaka aawerya awe wiira ophwanye eyoolya para yena ni mwaana awe wiira ahikhwe etala. Masi khula okathi itthu saamutepa oxankiha. Vaakhala ntoko wiira awo yaamookhwa etala.

Yehova aanimphenta ni aaniweha wiira aahikhalana efaita. Nnaamwi aakhala elapo atthu yaakokhorela aya amuluku eethiru, muthiyana owo aanikupali wiira Yehova tori Muluku eekeekhai. Pooti wiira, yena aahiixutta sa Yehova ni aahitikinihiwa ni moota aakhapelela awe atthu awe. Nuuvira eyaakha ekonto emosa, Yesu aahihimya wiira Yehova aahiweha waamini wa muthiyana ole, etthu yeeyo yaari yoovirikana ni ele aaweha nawe atthu awe oohiroromeleya. Masi etthu xeeni Muluku a wIsarayeli yaarowa awe omwiirela muthiyana ole a elapo ekina? Yehova aahimureeliha mwa enamuna yootikiniha.

Yehova aahimuruma profeta awe Eliya orowa oSarefati ni aahimuleela wiira muthiyana naamukhweli a elapo ele aamunvaha eyoolya okathi ole wootheene wahaarupa aya epula. Nuumala profeta ole ophiya, aahinweha muthiyana wuntakasaka ikhuni wiira apattihe mooro, mooreerela murima owo aahinvekela etthu yookhweya, oriki: “Xontte, mukiruuhele maasi kiwurye”. Nnaamwi ahaatonko onweha Eliya, muthiyana owo aahirowela maasi. Woonasa wene muthiyana ole aahisuwela wiira Eliya aari murumeyi a Yehova, mwaha wa moolumo awe ooreerela murima, moota aalavula awe, aahiiso nlaya nawe na oprofeta. Okathi ole pooti wiira Eliya aanuupuwela so: “Kiireke ola muthiyana yoole Yehova omuhimmye awe?” Nto Eliya aahimuxonttela onvekelaka etthu emosa, eyo piiyo, epetaaso emosa ya ephaawu.

Nuumala-vo, muthiyana ole naamukhweli aahimutthukulela murima oriki: “Ntoko siisaale Yehova, Muluku anyu onikhala awe”. Mwaha wa moolumo ala, muthiyana ole aahooniherya wiira animwaamini Muluku eekeekhai, “Muluku mukumi”. (Yer. 10:10) Vano muthiyana ole aahimuleela Eliya wiira khaarina ephaawu. Etthu aarina awe, waari otthu vakhaani yoowo waari mmurinkini muulupale ni makhura vakhaani yaawo yaari mmurinkini mwaamukhaani. Owo aarowa opattiha mooro wiira olokiherye etthu para yena ni mwanawe. Nuumala-vo, muthiyana ole ahimmye so: “Ninrowa olya yeeyo, nuumala-vo nikhweeke”.

Pooti wiira etthu Eliya ahimmye awe, yaahimutikiniha vanceene naamukhweli ole. Owo aahimmye so: “Muhoove etthu”. Eliya aawenrye sai omuleela wiira ohoove etthu variki muthiyana ole ni mwanawe yaarowa okhwa moohipisa? Hata ahiiwexexa, yena aninwiriyana. Eliya aahimuleela ele Yehova aamuleihenrye awe muthiyana ole. Vakhala wiira muthiyana ole ampaka ephaawu yaamukhaani yoovilikeya wiira onvahe profeta ole, Yehova ammureeliha. Owo aamwiiriha wiira khula okathi okhaleke otthu ni makhura mmurinkini mwaya. Nto mwaha waivaavo, muthiyana ole ni mwanawe yaamukhalanaka eyoolya, okathi ole wootheene yahaarupa aya epula.

Okathi ole, waamini wa muthiyana ole waaheehereriwa. Niireke anwerya oleva eyoolya awe arina awe wiira onvahe profeta a Yehova? Woonasa wene muthiyana ole aanisuwela wiira Yehova ootoko opaka itthu sootikiniha owiirelaka atthu awe. Nto onvaha yoolya muthiyana ole ni mwanawe, khiyaarowa okhala etthu yoovila. Masi niireke muthiyana ole anwerya wiiwelela? Biibiliya onihimya wiira : “Muthiyana owo aahirowa opaka ntoko saahimeeriwe awe ni Eliya.”

Yehova aahimureeliha vanceene muthiyana ole. Mwa mwiiriirya, khiyaamala makhura ni otthu mmurinkini. Nave Eliya vamosa ni emusi ya naamukhweli ole, yaanikhalana eyoolya mpakha ovira mahiku ale yahaarupa aya epula. Nave Yehova, aahipaka-tho etthu yootepa otikiniha para muthiyana ole naamukhweli. Okathi mwanawe naamukhweli ole aawereiwale awe mpakha okhwa, Yehova aahimurumeela Eliya wiira omuhihimuxe mmiravo ole. Ola mutthu oopacerya ohihimuxiwa oniromoliwa mbiibiliyani. Moohaanyiherya, mwiiriirya ola waahincererya olipa murima wa naamukhweli ole. Nave ntakiheryo nawe ninnaalipiha arumeyi a Yehova mpakha olelo-va.

Musome yoowiiraneya ela mbiibiliyani, soolepa sinittharelana:

• 1 Mamwene 17:​8-24

• Luka 4:​25, 26

Nikoho para ovaanela:

Muthiyana naamukhweli oonihenrye sai olipa murima?

Mutokose itthu sikina

1. 1. Etiini ya atthu a oSiidoni, yaari sai? Nave moota xeeni yaathwelelihale aya aisarayeli? (Perspicaz vol. 2 “Siidoni, atthu a oSiidoni” etti. 5) A

   Mwaakhule va

   

   Penta Springs Limited/Alamy Stock Photo

2. 2. Ethibayaali ni mwene Akhabi aari mutthu ni xeeni awe? (Perspicaz vol. 1 “Ethibayaali”)

   Mwaakhule va

3. 3. Muttetthe aakhala awe muthiyana ole naamukhweli oSarefati, atthu yaamukokhorela muluku muthiyana aitthaniwa Astoreti. Nto soolema xeeni sa muttetthe ole sikhanle mpakha olelo? (Nvenye! 22/11/1993 epaax. 13 itti. 1-4)

   Mwaakhule va

4. 4. Woonasa wene, etthu xeeni yaamwiirihale muthiyana naamukhweli omukoha Eliya oriki: “Mwaarwenle okuupuxerya soottheka saka, ni omwiiva mwanaka?” (1 Mam. 17:18; Owehaweha 15/02/2014 epaax. 15 itti. 4-5) B

   Mwaakhule va

   

Muupuwelele itthu mwiixuntte anyu

• Yehova aahinweha muthiyana naamukhweli a oSarefati, nnaamwi aakhala epooma yeeyo atthu yaamukokhorela aya Bayaali. Eyo enniixuttiha exeeni sa Yehova? Nave niwooneleke sai atthu a muttetthe ahu? (Miteko 10:35)

  Mwaakhule va

• Anna akina annivilela muxankiho wa othoiwa musurukhu. Waamini ni olipa murima wa muthiyana naamukhweli a oSarefati oniwiixuttiha exeeni anna awo? C

  Mwaakhule va

  

• Munrowa otakiha sai olipa murima wa muthiyana naamukhweli a oSarefati?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni ele Yehova oniphavela awe?

  Mwaakhule va

• Etthu xeeni kiniphavela aka omukoha muthiyana naamukhweli a oSarefati nuumala ohihimuxiwa?

  Mwaakhule va

Mwiixutte itthu sikina

Ntoko muthiyana naamukhweli a oSarefati, ninrowa wooniherya sai wiira waataana wahu ni Yehova ti wuulupale ovikana mireerelo? Musome mwaha oni:

“Weemereriwa ni Muluku onnoopola okumi” (Owehaweha 15/02/2011 ipaax. 13-17)

Nwehe moota nikhanle ahu ookupali wiira Yehova onniweha itthu ninvara ahu hata sikhalaka saamukhaani. Musome mwaha oni:

“Niireke Yehova onniweha ele munivara anyu?” (Owehaweha 01/05/2003 ipaax. 28-31)