“Muluku aka ti Yehova”

NTOKO siisaale nihinlipelela ahu okukutteya musulu ahikhanle meeku anooniherya wiira enoorupa epula, yoowiiraneya ya Eliya ennikhumelela mbiibiliyani mootutuxerya. Okhuma woopaceryani, olamulelo wa mahimo 10 a wIsarayeli, khula mwene aaranttela aakhala ootakhala. Akhabi aari mwene a neethanu nenli, masi para Yehova owo aari ootepa otakhala waavikana mamwene ootheene aaranttenle awe. Owo aahimuthela muthiyana a elapo ekina, yoowo aari ootepa otakhala aihaniwa Yezabeli. Akhabi aakokhorela ilatarato, masi mwaarawe aari ootepa otakhala, maana aanaatumererya atthu omukokhorela muluku Bayaali, okokhorela weiwo waahela muhina waapaha anamwane ntoko mukuttho. Masi nihiku nimosa, Eliya aahirowa wa Akhabi wiira amuleele ophukela wa Yehova.

Mukwaha Eliya weettale awe, khahiyo waari wookhweya. Owo aahaana okhuma muttetthe wa omiyaakoni wa oXileyaadi ni orowa oSamariya, epooma yoolipihiwa weiwo Akhabi aatenke awe empa awe yuulupale. Empa eyo yaihaniwa “empa ya maino a etthepo.” Woonasa wene, yaihaniwa siiso mwaha wa oreera waya. (1 Mam. 22:39) Nkamuupuwelani Eliya, owanre ene nlaya nawe na manri, esintu, okelaka empa ele yooreera, wiira amuleele mwene wiira muluku awe khaarina owerya nnakhala vakhaani! Exeeni yaarowa wiiraneya vaakhanle wiira Yezabeli aari ni mwene? Moohaanyiherya owo aamunanariwa mwaha wa muhupi wa Eliya. Akhabi ni Yezabeli yaanikupali wiira muluku aya Bayali aahikhalana owerya wa wiiriha orupa epula. Masi moolipa murima, Eliya aahaaleela wiira muluku aya khaarowa owerya waakhaliherya. Yehova aamwiiriha ohirupa epula elapo ele yootheene. Sanvira iyaakha sinceene ehirupaka epula, mpakha murumeyi a Yehova, Eliya olaleya-tho wiira yaamurupa epula!

Eliya aawenrye sai olipa murima wiira olaleye muhupi ole? Waakhuliwa wa nikoho nla oniphwanyaneya ni moolumo yena aalavunle awe. Owo aapacenrye olavula oriki: “Ntoko siisaale Yehova Muluku a Isarayeli onikhala awe, yoowo kinimurumeela aka”. Nuulumo na eheeperi nitaphuleliwe noowi: “Yoowo kinimurumeela aka”, nintaphulela “yoowo kineemela aka ohoolo wawe”. Ekeekhai wiira okathi ole, Eliya eemenle ohoolo wa mwene oowerya, yoowo aari pinaatamu. Masi owo aanisuwela wiira mweekeekhai, mwaha wa omurumeelaka Yehova, Eliya eemenle ohoolo wa mwene ooweryexa a olumwenku wootheene. Vaakhala ntoko wiira Akhabi ni Yezabeli yaari oowoopiha ni oowerya, masi naalikanyiha ni Yehova, awo khahiyo yaari etthu. Moohaanyiherya owo moonelo wooloka onniiriha olipa murima!

Khahiyo yaari ekwaha yeela paahi Eliya oonihenrye awe olipa murima okathi anvarela awe muteko Yehova. Owo aahooniherya olipa murima okathi aiwelenle awe yooruma ya Yehova yoowi aahaana wiipitha mukhukuni okathi wa etala ni okathi woothowa maasi. Mukhukuni mme owo aalipa ni anakhuku wiira amuruuhele yoolya, ni wiira owurye maasi, aalipa ni muro mwaamukhaani. Nave owo aahooniherya olipa murima okathi Yehova aamurumme awe orowa omukhaliherya muthiyana naamukhweli oohaawa, yoowo aari oowaamini. Opaka eyo khahiyo yaari etthu yookhweya, okhala wiira muthiyana ole naamukhweli aakhala oSilo, elapo yeeyo paapa awe Yezabeli aalamulela awe. Nave Eliya aahooniherya olipa murima okathi aaxinttale awe maprofeta 450 a Bayali omwaako Karmelo ni aahooniherya wiira Yehova paahi tori Muluku eekeekhai. Moohaanyiherya, Eliya aakhala okathi wa yootaphulela ya nsina nawe: “Muluku aka ti Yehova”.

Masi Eliya aari “mutthu ntoko hiyo”, nto okathi mukina aanoova. (Yak. 5:17) Nuumala Yehova opaka miiriirya omwaako Karmelo, Akhabi khaattharunwe, nto Yezabeli aahiruma wiiviwa Eliya. Owo aahipacerya woova ni aahitthyawa wiira oopole okumi awe. Oriipiwe ene murima vanceene, Eliya aahimuleela Yehova wiira aaphavela okhwa ni khaarina efaita ailikanyiha ni amuhavinre awe. Hata vari siiso, Yehova aahinwiriyana moopixa murima. Nuuvira okathi, Eliya aahimuleela Muluku ikwaha piili wiira aixoona okhala mekhawe, aanoova nave muteko aavanre awe waari wa mahala. Yehova aahimulipiha profeta ole omuleelaka wiira yaahikhala atthu anceene oororomeleya ntoko yena. Nave-tho Muluku aahimuleela wiira aahikhalana efaita yuulupale ni wiira aahikhalana muteko munceene aarowa awe ovara muhoolo. Yehova aahimuthanla namakhaliherya wiira eetteke ni Eliya. Nave aahinvekela wiira omwiixuttihe wiira okhale profeta.

Nuumala eyo wiiraneya, Eliya aahirowa okumana ni namakhaliherya owo aitthaniwa Eliseyo. Oowanli aya, khiyaahiyale omukokhorela Yehova ni olaleya muhupi awe okathi ole wooxankiha. Eliseyo aahimukhaliherya profeta ole aasuwela itthu sinceene, nave aahiixutta itthu ni yena. Okhaliheriwaka ni Yehova, Eliya aahitthikela okhala mutthu oolipa murima okumi awe wootheene.

Musome yoowiiraneya ela mbiibiliyani, soolepa sinittharelana:

• 1 Mamwene 16:​29-33; 17:​1-10a; 18:1–19:21

• 2 Mamwene 3:11

Nikoho para ovaanela:

Eliya oonihenrye sai olipa murima?

Mutokose itthu sikina

1. 1. Xeeni anakhuku yaari aya ooreerela para onvaha yoolya Eliya? (Perspicaz vol. 1 “Nakhuku” etti. 5) A

   Mwaakhule va

   

   Lior Kislev

2. 2. Miiriirya xeeni Eliya aapanke awe? (Perspicaz vol. 1 “Eliya” n.º 1 etti. 11)

   Mwaakhule va

3. 3. Omwaako Karmelo, Eliya aahaaruma alopwana wiira asarihe maasi muxepani. Alopwana awo yaaphwanya woowi maasi awo variki okathi ole yahaarupa epula? (Eliivuru para atthu ootheene epaax. 17 etti. 3) B

   Mwaakhule va

   

   Todd Bolen/BiblePlaces.com

4. 4. Naathoonyerya exeeni nlaya na oprofeta na Eliya, nave xeeni aavonyenrye awe mmakhatani mwa Eliseyo? (Owehaweha 01/02/2014 epaax. 12 etti. 3)

   Mwaakhule va

Muupuwelele itthu mwiixuntte anyu

• Nuupuwelaka moota Yehova aamoonela awe Eliya, etthu xeeni ekhanle ahu oopaka wiira anna yooneke okhweya olavula ni hiyo okathi anikhulumuwa aya? (1 Mam. 19:​1-18) C

  Mwaakhule va

  

• Eliya aaniphavela omwiixuttiha Eliseyo wiira ovareke muteko ntoko yena. Ninrowa otakiha sai moonelo awe okathi ninwiixuttiha ahu atthu akina ni waavaha iparakha?

  Mwaakhule va

• Munrowa otakiha sai olipa murima wa Eliya?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni ele Yehova oniphavela awe?

  Mwaakhule va

• Etthu xeeni kiniphavela aka omukoha Eliya nuumala ohihimuxiwa?

  Mwaakhule va

Mwiixutte itthu sikina

Nwehe eviitiyu yoovara murima yeeyo enooniherya moota Yehova aamulipinhe awe Eliya wiira owerye ovara muteko awe. Nwehe eviitiyu eni:

Maprofeta: Aanivaha ntakiheryo na opixa murima— Eliya (1:19)

Etthu xeeni amiravo aniixutta aya ni olipa murima wa Eliya oonihenrye awe omwaako Karmelo? Musome mwaha oni:

“Mwaakiheryeke okokhorela weekeekhai!” (Mpantta oni: “Miteko sa omusoma Biibiliya” siri va jw.org)