Aahimurumeela Yehova “okumi awe wootheene”

MWENE ASA, woonasa wene aahituthuwa okathi aawehale awe anakhotto anceene a wEthiyopia, amanke ene oYuda, yiilokihenrye ene wiira awane ekhotto. Yehova aahaaruma atthu awe ikwaha sinceene orowa owana ekhotto, masi khiyaatonko okumana anakhotto anceene ntoko ala. Anakhotto ale ootupa yaari emilyau emosa, etthu yoowiiraka ikwaha piili waavikana anakhotto a mwene Asa. Nto Asa aarowa wooniherya sai olipa murima, okathi ole wooxankiha?

Ela khahiyo yaari ekwaha yoopacerya Asa aapirisari awe wooniherya olipa murima. Sihinatthi iyaakha 10, okathi aapacenrye awe olamulela oYuda, Asa aahooniherya mikhalelo soolikana ni iye taata awe aarina awe, mwene Davidi. Ntoko taata awe, Asa aaphavela omuhakalaliha Yehova. Asa aahiiyeviha ni aahaawiriyana maprofeta, Odedi ni mwaana a Odedi aihaniwa Azariya. Asa aahooniherya olipa murima okathi aalokihenrye awe itthu soohiloka, seiyo saapakiwa okathi Salomooni aamurukunuwenle awe Yehova. Mwa ntakiheryo, owo aahaamala-maliha anamararuwa a mutemplo ni aahipwexakasa ilatarato atthu yaakokhorela aya.

Asa aahilokiherya itthu soohiloka saapakiwa ni emusi awe. Piipi awe Asa aihaniwa Maaka aahikhalana okhulupale woottittimiheya ntoko pwiyamwene a oYuda. Owo aahipaka elatarato yoowuuliha muru, yeeyo yaatumererya atthu orupihana woohiloka. Asa kheemererya wiira itthu soohiloka saapakiwa ni emusi awe, sikhale sa efaita ovikana ororomeleya wawe wa Yehova. Owo aahimwaakha piipi awe opwiyamwene ni aahipaha elatarato eyo. Yehova aahihakalala ni itthu iye Asa apanke awe, nto mwaha waivaavo, khiyaawaniwe-tho ekhotto oYuda mwa iyaakha 10. Masi nuumala-vo, anakhotto a wEthiyopia yaahirowa otuphela oYuda. Yehova amukhalihenrye sai Asa?

Okathi Asa awenhe awe oxepani wa oYuda ni oweha muttitthi muulupale wa anakhotto a wEthiyopia, etthu yoopacerya apanke awe waari onvekela Yehova wiira omukhaliherye. Nkuupuwelani anakhotto awe moota yoonenle aya nuumala omwiiwa Asa ovekelaka oriki: “Yehova, ekeekhai wiira awanani ahu khareere, ni hiyo khanrina owerya, masi eyo khahiyo etthu para nyuwo. Khoo Yehova Muluku ahu, munikhaliherye, okhala wiira nnoororomelani nyuwo, nave nihoorwa owana ni muttitthi ola wa atthu niroromelaka nsina nanyu. Xontte Yehova, nyuwo mwa Muluku ahu. Muheemererye wiira mutthu onikhwa okhale oowerya woovikanani nyuwo”. Vannooneya wiira Yehova aahisiveliwa vanceene owiriyana nivekelo nla naapakiwe ni murima wootheene. Owo aahiweha wiira Asa aamulikana ni Yonathani, mwaana a mwene Sawuli. Oowanli aya yaanisuwela wiira anakhotto anceene khahiyo etthu para Yehova. (1 Sam. 14:6) Nikhaliheriwaka ni Yehova, hiyo nookhalana anakhotto anceene, nave ninniwerya oxintta okhottoni.

Asa aahaahoolela alopwana awe okhottoni. Nto etthu xeeni yiiraneyale? Biibiliya onihimya wiira awanani ale, “yaahixinttiwa vaalupale ohoolo wa Yehova ni ohoolo wa anakhotto awe.” Khuuvo mmosa a anakhotto ale ooponwe.

Nuumala-vo, Asa khaahiyale waatumererya atthu wiira amukokhoreleke Yehova. Atthu anceene a omwene a mahimo 10 a wIsarayeli, yaahithaamela oYuda. Nto atthu awo yaahitthikela omukokhorela Yehova etemplo yaari oYerusalemu. Asa aahipaka muthukumano muulupale yoowo waarowa owiiriha atthu ootheene a oYuda omurumeelaka Yehova moororomeleya. Masi, Asa aahipaka itampi suulupale.

Okathi mwene a wIsarayeli aahimmye awe wiira aamutuphela oYuda, Asa khanvekenle Yehova wiira omukhaliherye. Owo anvanhe musurukhu mwene a oSiria wiira omutuphele Isarayeli. Okathi Yehova aamurumme awe profeta aihaniwa Hanani wiira amukhaliherye, Asa aahinanariwa vanceene ni aahimurihela profeta owo mukhatteya. Nuumala wuuluvala, Asa aahiwereiwa vanceene, masi khamphavenle Yehova, ohiya-vo owo aaphavenle mameetiku. Vannooneya wiira waamini wa Asa waahivukuwa.

Yehova, Tiithi oopixa murima vanceene. Biibiliya onnilavula itthu vakhaani sa iyaakha 41 sa olamulelo wa Asa, oriki: “Murima wa Asa waari ni Yehova mahiku ootheene a okumi awe.” Yoowiiraneya ya Asa, enninuupuxerya wiira Yehova onnaaphenta ale animphenta. Nave-tho, enniniixuttiha wiira nihikhala-khale niliyalaka itthu sootheene Yehova siniirenle awe. Akhala wiira nnoovilela nimurumeelaka Yehova okumi ahu wootheene, nnimuncereryaka olipa murima ni omwaamini wahu Yehova!

Musome yoowiiraneya ela mbiibiliyani, soolepa sinittharelana:

• 1 Mamwene 15:​8-24

• 2 Wahala 14:1–16:14

Nikoho para ovaanela:

Asa oonihenrye sai olipa murima?

1. 2. Mwaana a Hanani yoowo aasuwela otaphulela itthu ooniheriwa awe ni Muluku aari aani? Moota xeeni aatakihale awe olipa murima wa paapa awe? (Perspicaz vol. 1 “Hanani” n.º 2)

   Mwaakhule va

2. 3. Nnaamwi Asa aapanke itampi, exeeni yooniherya wiira “murima wa Asa waari ni Yehova mahiku ootheene a okumi awe”? (1 Mam. 15:14; Owehaweha 03/2017 epaax. 19 itti. 5-6)

   Mwaakhule va

3. 4. Opattihiwa mooro omasikhoni, khahiyo yaari yoolema eriyari ya aisarayeli. Nto xeeni Biibiliya onihimya awe wiira “waahipattihiwa mooro munceene omasikhoni” wa Asa? (2 Wah. 16:14; Owehaweha 01/12/2005 epaax. 20 etti. 5)

   Mwaakhule va

Muupuwelele itthu mwiixuntte anyu

• Moolumo yaaleeliwe awe ni profeta Azariya, yaahimwiiriha Asa waalipiha atthu wiira etthikele omukokhorela Yehova. Nto nyuwo munrowa waalipiha sai atthu akina? B

  Mwaakhule va

  

• Asa aahimuroromela Yehova wiira aaxintte anakhotto anceene, masi muhoolo mwaya aahaaroromela atthu wiira owane ni anakhotto vakhaani. Nto eyo enniixuttiha exeeni voohimya sa omuroromela Yehova mwa itthu sootheene sinvara ahu? (Mir. 3:​5, 6)

  Mwaakhule va

• Munrowa otakiha sai olipa murima wa Asa?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni ele Yehova oniphavela awe?

  Mwaakhule va

• Etthu xeeni kiniphavela aka omukoha Asa nuumala ohihimuxiwa?

  Mwaakhule va

Mwiixutte itthu sikina

Akhala wiira elapo munikhala anyu munnimukokhorela Yehova mootaphuwa, munrowa orumeela sai okathi owo wa murettele ntoko Asa iiraawe? Musome mwaha oni:

“Mukhalaneke ankhili okathi wa murettele” (Owehaweha 09/2020 ipaax. 14-19)

Nwehe moota ntakiheryo na Asa ninrowa aya onilipiha okathi sinniphwanya aya mixankiho. Musome mwaha oni:

“Munoophwanya mareeliho mwaha wa miteko sanyu” (Owehaweha 15/08/2012 ipaax. 8-10)