27 MEFIBOXETI
Owo kheemerenrye mixankiho simukhulumulaka
MEFIBOXETI aari musulwaawe mwene oowerya ni mwaana a mulopwana oolipa murima ni oororomeleya. Mooriipiha murima, okathi aarina awe iyaakha 5, okumi awe waahiturukeya moomalela, saahimphwanya mixankiho sinceene. Taata awe aihaniwa Sawuli, aahivulalihiwa okathi wa ekhotto ni aahiixiiva. Paapa awe aihaniwa Yonathani, aahiiviwa nihiku nimosa-ru nenle na ekhotto. Okathi muthiyana aamukhapelela Mefiboxeti aasuwenle awe itthu saakhumelenle, aahoova ni aahimukuxa mwaana ole onatthyawa. Okathi muthiyana ole aatthyawa awe, mwaana ole aahimora. Owo aahoona owereya vanceene metto soomiili ni aahirakala oneetta ni mileta okumi awe wootheene.
Nnaamwi samphwannye mixankiho sinceene, Mefiboxeti aanixukhurela ni itthu aarina awe. Okathi omosa, Mefiboxeti aakhala owannyawe mwisarayeli mmosa aitthaniwa Makiri. Nuuvira okathi, mwene Davidi aahuupuwela etthu aamuleihenrye awe mpatthani awe amphenta awe, Yonathani wiira aamwaakhapelela atthu a etthoko awe. (1 Sam. 20:14-17) Moowaakuveya, mwene Davidi aahiruma wiitthaniwa Mefiboxeti.
Mefiboxeti aanoova, okhala wiira, aari a emusi ya mwene Sawuli. Niireke mwene Davidi amphavela omwiiva Mefiboxeti mwaha wookhala a osuulu wa mwene ootakhala? Hata vari siiso, owo aahiiwelela ni aahirowa wa mwene. Davidi aahimureerela murima Mefiboxeti ni aahimuttikiherya imatta sootheene sa taata awe aihaniwa Sawuli. Owo aahincererya oriki: “Khula okathi munrowa olyaaka vameesa vaka”. Otikinihiwe ene, Mefiboxeti aahimukoha mwene etthu yaamwiiriha omuthokorerya mwa enamuna ele mulopwana ahaarina efaita. Nave aahiilikanyiha ni mwalapwa ookhwa ene!
Mefiboxeti aarakanle okhuma enamwane awe ni amusi awe ootheene yaahikhwa. Nuuvira okathi aahirukunuweliwa ni aahithokoreriwa moohixariya
Masi, nuuvira okathi, itthu saahitthikela omuxankiha Mefiboxeti. Absalomi mwaana a Davidi, aahimurukunuwela paapa awe mpakha mwene owo otthyawa oYerusalemu. Murumeyi a Mefiboxeti, Siba, aahirowa omukhaliherya mwene Davidi, masi aahimuhiya pwiya awe ottuli. Mefiboxeti aari oorakala, nto khaawenrye omuhoola Davidi. Masi aahiweha itthu aakhanle awe oopaka wiira ooniherye ororomeleya ni oriipiwa murima mwaha wa itthu iye saamukhumelela Davidi. Owo aahihiya omettha ereru, ntoko alopwana saalimalenle aya okathi woowunla. Nuumala Absalomi oxinttiwa, Davidi aahitthikela oYerusalemu ni murettele. Masi Davidi aahinanariwa ni Mefiboxeti. Mwaha wa xeeni?
Okathi Siba aaronwe awe omukhaliherya mwene Davidi, owo aahimootherya Mefiboxeti. Siba aahootha omuleelaka Davidi wiira Mefiboxeti khaaroromeleya ni aahanle oYerusalemu okhala wiira aaphavela okhala mwene. Nkahaya muupuwele moota Davidi oonenle awe! Wiira ohivinre okathi munceene Davidi orukunuweliwe ene, ohiya paahi ni mwanawe, masi ni mpatthani awe, yoowo aamuroromela awe ni anvaha miruku. Woonasa wene, ti etthu yaamwiirinhe okupali wiira aahirukunuweliwa-tho ni Mefiboxeti. Nuumala-vo, Davidi aahimuleela Siba wiira aahaana okuxa imatta sootheene sa Mefiboxeti aahiyeriwe awe ni taata awe, Sawuli.
Okathi Mefiboxeti aasuwenle awe wiira Siba aahimootherya, owo aahirowa okumana ni mwene Davidi wiira omutthokiherye etthu yiiraneyale. Davidi aahimutumererya Mefiboxeti wiira ohimye etthu yaamwiirinhe ohirowa ni mwene. Mefiboxeti aahimuupuxerya mwene Davidi wiira mwaha wa orakala, owo khaawerya weetta ni aaroowokiwa ni Siba. Woonasa wene, Davidi aahikupali ele aaleeliwe awe ni Mefiboxeti, okhala wiira owo aahooniherya oriipiwa murima mwaha woowi khaamentthe ereru awe. Niireke mutthu aaphavela okuxa omwene, aamukhalana mukhalelo ntoko owo wa Mefiboxeti? Hata vaari siiso, Davidi aahinanariwa vanceene ni khaaphavenle-tho onwiriyana Mefiboxeti. Nuumala-vo, Davidi aahimuttikiherya imatta sawe Mefiboxeti, masi ohiya sootheene. Nave owo aahimuleela Mefiboxeti wiira aahaana okawana imatta iye ni Siba, imatta seiyo saari sa taata awe aihaniwa Sawuli.
Khivaarowa oreerela okawana yoohiyeriwa awe ni murumeyi aamoothenrye ni aamurukunuwenle! Woonasa wene vaamukhweya Mefiboxeti onanariwa. Okhala wiira okathi mutthu onithokoreriwa awe moohixariya, ti vookhweya onanariwa ni ophavela omuttikiherya etthu yoohiloka iireliwe awe. (Otum. 19:18, 19) Tthiri vanipirisari olipa murima. Eyo ti etthu Mefiboxeti aapanke awe. Moolipa murima, Mefiboxeti khaawehexenxe mixankiho sawe, masi aahiweha etthu ya faita aakhanle awe oopaka, eyo piiyo, waalevelela atthu akina ni ophavela okhaliha murettele. Nto yoothanla xeeni Mefiboxeti aarowa awe opaka?
Moowiiyeviha, Mefiboxeti aahimuhimeerya mwene wiira: “Mmuhiyeryeke Siba ohalaneke yootheene, okhala wiira vano pwiyaka mwene ootthikela owannyawe ni murettele”. Vannooneya wiira Mefiboxeti aaninvaha efaita yinceene mwene yoowo aathanliwe ni Yehova. Nnaamwi ootheriwe ni aakhiwe imatta sawe, eyo khiyaamwiirinhe Mefiboxeti ohiya okhala oohakalala ni ohiya omurumeela Yehova moororomeleya. Hata Mefiboxeti ahaatonko owana ekhotto, owo aahooniherya okhala oolipa murima waavikana anakhotto anceene!
Musome yoowiiraneya ela mbiibiliyani, soolepa sinittharelana:
Nikoho para ovaanela:
Mefiboxeti oonihenrye sai olipa murima?
Mutokose itthu sikina
1. Ohinatthi Mefiboxeti oroweliwa ni Davidi, owo aakhala “owannyawe Makiri”. Niireke eyo enitaphulela wiira Makiri aari mulopwana oororomeleya ni aawaakhela aletto? (2 Sam. 9:3, 4; Perspicaz vol. 2 “Makiri” n.º 2 epaax. 294)
2. Xeeni Mefiboxeti ailikanyiha awe ni “mwalapwa ookhwa”? (2 Sam. 9:8; Perspicaz vol. 1 “Mwalapwa” etti. 5) A
PhotoStock-Israel/Photodisc via Getty Images
Eteseenyu A: WIsarayeli wa khalai, alapwa yaathokoreriwa ntoko inama sa mwiikho seiyo saalya khula etthu yaaphwanya aya
3. Mukhalelo wa Mefiboxeti onnikupaliha sai wiira owo khaaphavela wiikhaliha mwene? (Owehaweha 15/02/2002 epaax. 14 etti. 11, enoota) B
Eteseenyu B: Etthu xeeni woonasa wene Yonathani aamulenle awe Mefiboxeti sa ole Yehova aamuthanlale awe wiira okhale mwene?
4. Moota xeeni Yehova aamureelinhe awe Mefiboxeti nuumala wootheriwa ni Siba? (Perspicaz vol. 2 “Mefiboxeti” n.o 2 etti. 3)
Muupuwelele itthu mwiixuntte anyu
Atthu anceene anniriipiwa murima aahiiso sinnaaphwanya mixankiho sikina, anna a mmulokoni ahiniwerya aya osuwela. Ntakiheryo na Mefiboxeti ninrowa waamaaliha sai?
Nuumala wiiwa itthu vakhaani paahi, Davidi aahinvaha mutthu mukina imatta sa Mefiboxeti. Exeeni eniixutta ahu ni moota vari aya voowoopiha opaka etthu moowaakuveya nihisuwenle itthu sootheene siiraneyale? C
Efootu C
Munrowa otakiha sai olipa murima wa Mefiboxeti?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni ele Yehova oniphavela awe?
Etthu xeeni kiniphavela aka omukoha Mefiboxeti nuumala ohihimuxiwa?
Mwiixutte itthu sikina
Nwehe moota nikhanle ahu oomutakiha Mefiboxeti, okathi nnoona ahu wiira nithokoreriwe moohixariya. Musome mwaha oni:
Mwaha wa mweettelo aya awo yaahikumiherya murettele — Mefiboxeti (3:25)
Akhala wiira mwaana oniixoona ohikhalana efaita, anamuyari anrowa orumeela sai ntakiheryo na Mefiboxeti wiira amukhaliherye? Musome mwaha oni:
“Niireke mootoko wiixoona ohikhalana efaita?” (Owehaweha 01/06/2011 ipaax. 26-27)