Aahimaliha muxankiho mwa miruku

ABIGAYILI aahikhalana muxankiho muulupale mwaha wa alopwana anli yaananariwe. Mulopwana mmosa aari iyawe, Nabali. Mulopwana owo aari mulolo, oowali ni khaarina niphento. Vano mukina aari Davidi. Owo aari mulopwana ooreera murima, murumeyi oororomeleya a Yehova ni aarowa okhala mwene a wIsarayeli. Masi Nabali aahimwiiriha Davidi onanariwa. Nto mwaha wa mweettelo wa Nabali, alopwana ootheene a etthoko awe yaanoova wiiviwa. Abigayili aari muthiyana aarina ankhili ni ooreera. Owo aapirisari olipa murima ni opaka etthu wiira omalihe muxankiho mwa miruku.

Murumeyi awe Abigayili, aahimuleela wiira Davidi aanirwa ni anakhotto awe 400 akunxe ene ikaruma sa ekhotto, wiira yamwiive Nabali “ni atthu ootheene a etthoko awe”. Nto Abigayili aahisuwela wiira moohipisa yaamukhumelela etthu yootakhala. Davidi aahinvekela eyoolya Nabali. Yooveka eyo khahiyo yaari yoowaatta. Davidi ni arumeyi awe yaari ntoko exiri yaakhapelela amakampusi ni ipwittipwitthi sa mulopwana ole oothaaciri. Moororomeleya, Davidi aanaakhapelela atthu a wIsarayeli wiira ahitupheliwe ni alatarau. Nnaamwi mwene Sawuli aamulupattha ni aaphavela omwiiva ohitthenke etthu. Masi, okathi Davidi aarumme awe arumeyi awe mwa nttittimiho orowa onvekela eyoolya Nabali, mulopwana owo aahimuruwana. Nave aahimuhimya Davidi okhala mulopwana aamutthyawa patarau awe!

Murumeyi a Nabali aahisuwela wiira khivaareerela omuleela Nabali mwaha ole. Ohoonaka etthu yoopaka, owo aahimuleela Abigayili, ohimyaka so: “Tthiri owo mulopwana ohirina efaita, nave khuuvo onwerya olavula nuuwo”. Masi murumeyi ole aanisuwela wiira Abigayili aari oovirikana ni iyawe ni wiira aamunwiriyana, nave ampaka etthu moowaakuveya. Abigayili aarowa opaka exeeni?

Abigayili khaaxankale, masi aanisuwela wiira aahaana opaka etthu moowaakuveya. Moohipisa aahikuxa eyoolya yinceene, aareya apuuru ni arumeyi awe wiira ahooleke, yanvahe Davidi ni alopwana awe. Owo aahanle ottuli onwenle ene puuru awe. Nave khaamulenle etthu iyawe, Nabali, maana aanisuwela wiira ammukhoottiherya opaka etthu yooloka.

Okhuruwelaka ephiro yoowiipitheya ya omiyaakoni, Abigayili aahimphwanya Davidi ni alopwana awe. Moowaakuveya, owo aahikhuruwa vapuuruni vawe, onarowa opuro aari Davidi. Nuumala-vo, aahikokhora ohoolo wa Davidi, onanvekela wiira onwiriyane. Mwaha wa Abigayili okhala mutthu oowiiyeviha, eyo yaahimwiiriha Davidi onwiriyana.

Abigayili aahisuwela wiira Davidi aahikhalana mathowa ooloka wiira onanariwe okhala wiira iyawe aahipaka etthu yoohiloka. Nuumala-vo, Abigayili aahimuupuxerya Davidi wiira aahikhalana waataana wooloka ni Yehova. Yehova khaarowa ohakalala onweha Davidi orumeelaka matata awe wiira owiive alopwana yahaatthenke etthu. Nave-tho aahimuleela wiira Yehova khaarowa ohiya omuthanla mutthu a emusi ya Davidi wiira okhale mwene a wIsarayeli ni wiira Yehova aamwaapwetexa awanani ootheene a Davidi. Moohaanyiherya, Abigayili aanisuwela wiira Muluku aahimuthanla Davidi wiira okhale mwene aattharelana a wIsarayeli.

Moolumo a ankhili ni ooreera a Abigayili, yaahimwiiriha Davidi okhala oomaaleleya. Owo aahimmye so: “Ottottopeliwe Yehova, Muluku a Isarayeli, yoowo oorummeni orwa okumana ni miyo olelo!” Davidi aahimuttottopela Abigayili mwaha wookhala muthiyana ooloka. Nave moowiiyeviha, aaheemererya miruku sawe. Owo aahimmye so: “Miyo koowiiwani muhimmye anyu, kinimwiira siiso”.

Nabali khaasuwenle etthu yiiraneyale. Ohiyu ole, aahipaka efesta yuulupale owannyawe, nto iira “o wuryaka ntoko aaphavela awe”. Abigayili khaamulenle etthu mpakha mmeeloni mwaya voosiisu olipelelaka wiira eviinyu emuukuluwe, nnaamwi aarowa onanariwa. Nuumala-vo, owo aahimuleela itthu sootheene siiraneyale. Niireke Abigayili aalipelela wiira Nabali aamunanariwa vanceene mpakha ommana? Akhala wiira owo uupuwela siiso, khahiyo ti etthu yiiraneyale. “Nto murima wa Nabali waahikhwa, owo aahuuma ntoko nluku.” Nuuvira mahiku oowiiraka 10, “Yehova aahimwiiriha Nabali okhwa”. Muluku aahimuhukhumu Nabali mwaha wa okhootta omukhaliherya Davidi, yoowo Yehova aamuthanlale awe wiira okhale mwene a wIsarayeli. Ele Yehova aapanke awe, yaahimphwanyiha mareeliho manceene Abigayili, okhala wiira aatheliwe ni mulopwana ootakhala.

Yehova aahikhalana mareeliho manceene wiira onvahe Abigayili. Okathi Davidi aasuwenle awe wiira Nabali aahikhwa, owo aahimuleela Abigayili wiira aaphavela omuthela, vano Abigayili aaheemya. Nuuvira okathi, Davidi aahikhala mwene oopacerya a oYuda, nuumala-vo aahikhala mwene a wIsarayeli wootheene. Nto owo ni Abigayili yaahimuyara mwaana. Ekwaha emosa, Abigayili aahivariwa ni awanani a Muluku. Masi moohipisa, iyawe yoowo amphenta vanceene aahirwa omoopola. Vano Abigayili aahitheliwa ni mulopwana aamukhapelela ni aamuttittimiha.

Musome yoowiiraneya ela mbiibiliyani, soolepa sinittharelana:

• 1 Samuweli 25:​1-43; 30:​1-6, 16-20

Nikoho para ovaanela:

Abigayili oonihenrye sai olipa murima?

1. 3. Xeeni Nabali aapirisari awe waaxukhurela anakhotto a Davidi mwaha wa omukhaliherya? (Mutakiheke waamini waya ipaax. 77-78 itti. 9-10) B

   Mwaakhule va

   

   Hanan Isachar/Alamy Stock Photo

2. 4. Exeeni Abigayili uupuwela awe, okathi aahimmye awe wiira okumi wa Davidi waamusukiwa ni Yehova Muluku mmurupani mwa okumi? (1 Sam. 25:29; Perspicaz vol. 2 “Ekumi” etti. 45)

   Mwaakhule va

Muupuwelele itthu mwiixuntte anyu

• Alopwana oothela aniixutta exeeni ni ntakiheryo na Davidi yoowo aatthanre miruku sa Abigayili? C

  Mwaakhule va

  

• Arokora atheliwe ni mulopwana ohinimurumeela Yehova aniixutta exeeni ni ntakiheryo na Abigayili?

  Mwaakhule va

• Munrowa otakiha sai olipa murima wa Abigayili?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni yoolakela ya Yehova?

  Mwaakhule va

• Etthu xeeni kiniphavela aka omukoha Abigayili nuumala ohihimuxiwa?

  Mwaakhule va

Mwiixutte itthu sikina

Mukristau otheliwe aahiiso omuthenle mutthu ohinimurumeela Yehova, etthu xeeni okhanle awe oopaka wiira olipiheke ekasamento awe?

Ekasamento — ti ya mahiku ootheene (4:30)

Abigayili aahimukhaliherya Davidi okhala oomaaleleya. Nwehe moota mukhanle anyu oomaaleleya okathi mutthu onipaka awe etthu enoonyoonyani aahiiso enooveehani.

“Mutthu orina ankhili khonaakuva onanariwa” (Owehaweha 01/12/2014 ipaax. 12-13)