25 DAVIDI
Aahilipa murima wiira opake etthu yooloka
DAVIDI aamakela otthyawa-tthyawa. Owo oomoliwa ni mwene Sawuli, yoowo aamuroromenle ni aamuthanlale wiira oteexeke eskuutu awe, nuumala-vo aahimukhaliha xeefi a anakhotto. Masi vano, Sawuli aaphavela omwiiva Davidi. Muluku aahimuleiherya Davidi wiira aarowa okhala mwene a wIsarayeli, masi owo iira iipithaka moothakoni, wiira okhapelele okumi awe ni okumi wa anakhotto aarina awe oowiiraka 600.
Sawuli aahikhala mwene ootakhala. Owo aanimukhalela nrima ni aaphavela omwiiva Davidi. Nnaamwi ahaamwiivale, Sawuli khaahiyale omulupattha. Nto Davidi iipinthe oZiifi, masi alopwana a epooma ele yaahinvirikanya ni yaahimuleela mwene Sawuli ekwaha ya nenli opuro Davidi iipinthe awe. Nuumala osuwela eyo, Sawuli ni anakhotto awe yaahirowa opuro iipinthe awe Davidi.
Davidi aarowa opaka exeeni? Wanipacerya, Davidi aahaaruma alopwana wiira yasuwele opuro aari awe Sawuli. Nnaamwi anakhotto a Sawuli yaavikana 3.000, Davidi khoovale nnakhala vakhaani. Ohiya-vo, waari okathi yoowo mwene Davidi aalempe awe so: “Moone! Muluku tonikikhaliherya; Yehova ori ni ale anikikhaliherya.” (Esal. 54:4, muru) Nto, Davidi aaniphavela orowa nuuhiyu, opuro aamanke awe Sawuli. Owo aahaakoha alopwana anli aarina awe oriki: “Tani onrowa ni miyo”?
Vano Abixayi, musulwaawe Davidi, aahiivahererya orowa ni yena. Owo aari nakhotto oolipa murima, masi ikwaha sikina khoona othunku. Okathi Davidi ni Abixayi yaaphiyale aya opuro aamanke awe Sawuli, yaaphwannye atthu ootheene arupaka. Mweekeekhai, Yehova aahiwiiriha alopwana ootheene orupa. Mwene Sawuli iira orupaka, ohikhanle mutthu aamukhapelela, nivaka nawe ohomenle ene vathi, waattamela waamuru wawe.
Niireke Davidi ammwiiva Sawuli? Vaari vookhweya opaka eyo! Okhala wiira Davidi khaarowa-tho olupatthiwaka ni Sawuli ni aamukhala mwene. Mwa moonelo wa Abixayi, Davidi khaapirisari wuupuwela vanli. Owo aahimmye so: “Olelo Muluku ohoovahereryani mmatatani mwanyu nwanani anyu. Xontte, mukihiye kimuhomele vathi ni nivaka ekwaha emosa paahi, nkinrowa omuhoma ikwaha piili”.
Davidi aanuupuwela oratteene ekwaha yoopacerya aakhanle awe oomwiiva Sawuli. Okathi aari awe woothakoni wa wEni-Gedi, Sawuli aahikela nikhuku aari awe Davidi. Okhala wiira Sawuli khaasuwenle wiira Davidi aari nikhuku nenne, nto ole waari okathi wooreerela wiira Davidi omwiive nwanani awe ole. Davidi khaapanke eyo. Owo aathikinle paahi oponta wa nlaya na Sawuli. Nnaamwi Davidi aapanke etthu eyo yaamukhaani, murima awe waanimphukela. Owo aahiriipiwa murima mwaha wa ohimuttittimiha mwene aathanliwe ni Yehova.
Ohiyu ole, khahiyo vaari vookhweya para Davidi, omuleela Abixayi wiira ohimwiirihe etthu yootakhala Sawuli. Nave Davidi aahisuwela wiira Abixayi aamutthyawa Sawuli. Moohaanyiherya, alopwana ootheene a Davidi yaanoona opisa omala olupatthiwa. Hata vaari siiso, Davidi khaamwiivale Sawuli. Owo aahimuttaruxa Abixayi ni aahimuleela wiira aahaana okhala oopixa murima. Davidi aahimuleela Abixayi etthu yaarowa omwiiraneela Sawuli ohoolo, oriki: “Yehova mwaneene onoomwiiva, aahiiso nnoophiya nihiku onrowa awe okhwa, wala onoorowa okhottoni akhwele weiwo.” Nto, Davidi aahincererya oriki: “Mwaha woomuttittimiha Yehova, miyo nkinkhala-khala kimwiirihaka etthu yootakhala ole othanliwe ni Yehova!”
Davidi aahikhanyereriwa wiira omwiive Sawuli. Owo aapanke exeeni?
Davidi aanisuwela wiira Yehova amphuka muxankiho ole okathi wooreerela. Ntoko enihimya aya eliivuru ya Esaalimu, omuhimyaka Yehova, Davidi aalempe so: “Owo onimwaaliva awanani aka ni itthu sootakhala aniira aya”. (Esal. 54:5) Nto, Davidi ni Abixayi yaahiwela vasulu va mwaako waattamenle nipuro nne. Davidi aahimukhuwelela Sawuli ni atoropa awe. Owo aahaapwapwela atoropa ale mwaha wa ohimukhapelela mwene aya. Nave Davidi aahimukoha Sawuli nthowa naya aaviriha awe okathi awe omulupatthaka, maana aahimmye wiira, aalikana ni etothomwa. Sawuli aahuuliwa muru ni aaheemererya wiira aahipaka etthu yoohiloka okathi aahimmye awe so: “Tthiri, koopaka itthu ntoko mulolo ni koottheka vaalupale”.
Niireke Sawuli aahihiya omulupattha Davidi? Davidi aanisuwela wiira khivaareerela omuroromela Sawuli wiira aamuturuka muupuwelo awe. Owo aahitteeliwa murima mwaha woomuhakalaliha Yehova ni moolipa murima othanla opaka etthu yooloka. Nuuvira okathi, Yehova aahimureeliha murumeyi awe oolipa murima ni oororomeleya mwa inamuna ahaalipelela awe.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Davidi oonihenrye sai olipa murima?
Mutokose itthu sikina
1. Nnaamwi Abixayi aapaka itthu ohuupuwenle ni ahaarina othunku, owo oonihenrye sai olipa murima okathi aawaakinhe awe arumeyi a Yehova ni omukhaliherya Davidi? (Perspicaz vol. 1 “Abixayi” itti. 3-5)
2. Mwaha wa xeeni Davidi ailikanyinhe awe ni ekhwali ya mmiyaakoni? (1 Sam. 26:20; Perspicaz vol. 2 “ekhwali” etti. 4) A
Ekaterina Kolomeets/stock.adobe.com
Eteseenyu A
3. Xeeni Davidi aapirisari awe opixa murima? (Owehaweha 08/2017 epaax. 6 itti. 14-15)
4. Moota xeeni Davidi ahaahiyale awe wiiwelela malakiheryo a Yehova, hata nuuvira iyaakha sinceene? (Owehaweha 09/2021 epaax. 10 etti. 8) B
Eteseenyu B
Muupuwelele itthu mwiixuntte anyu
Nnaamwi Sawuli aapaka itthu soohiloka, Davidi aanittittimiha okhulupale awe. Ninrowa omutakiha sai Davidi ni moota nnaathokorerya ahu:
anamuyari ahu? C
Efootu C
makhulupale a kuvernu? D
Efootu D
axitokweene a mmulokoni? E
Efootu E
Davidi aahiweha etthu yaarowa omuhakalaliha Yehova, nave moolipa murima aahithanla opaka etthu yooloka. Woonasa wene, okathi xeeni ninreerela ahu olipa murima wiira nipake etthu yooloka?
Munrowa otakiha sai olipa murima wa Davidi?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Davidi nuumala ohihimuxiwa?
Mwiixutte itthu sikina
Nwehe moota yoowiiraneya ela enrowa aya wookhaliheryani. Nwehe eviitiyu eni:
Musuweleke wiira ole omphenta — onnivilela itthu sootheene (1:29)
Anamwane aniixutta exeeni ni ntakiheryo na Sawuli, yoowo wanipacerya aari oowiiyeviha ni oowiihiiha, masi nuuvira okathi onakhala mutthu oowiixinnuuha?
“Mwene Sawuli” (Ekartau ya Biibiliya eri va jw.org)