Owo aahimuxintta mulopwana a ikuru

OWEHEXEXAKA nxepa na wElahi, Davidi aahinweha mulopwana a ikuru: aitthaniwa Goliyati! Mulipa-aakuxa nikula na wiixaakihana na Goliyati, aari oorakama, masi Goliyati aari ootepexa orakama ni a ikuru. Orakama wawe waari imeeturu 2.90, nto hata mutthu ori ene ottaiwene, vaaniweryaneya oweha orakama wawe. Ohiya paahi okhala oorakama vanceene, masi-tho aahikhalana ikuru. Anamunceene yaanimoova ni yaaniixoona okhala acikhaani yailikanyiha ni Goliyati. Okathi Davidi anwehale awe Goliyati, owo khoovale, masi aahikhalana moonelo mukina waamwiirinhe okhala oovirikana ni atthu ale.

Davidi ohinatthi onweha Goliyati, profeta Samuweli aahimuthanla Davidi ni aahimuleela wiira, muhoolo mwaya aarowa okhala mwene aattharelana a wIsarayeli. Okhuma okathi ole Davidi aathanliwe awe, ikuru soowaarya sa Yehova saahinvaha owerya woopaka itthu sootikiniha. Mmiravo ole aasuweliwa ntoko “nakhotto oolipa murima ni oowerya”, nnaamwi nlelo aari mmiravo para okhala nakhotto. Nihiku nimosa, paapa awe Davidi, Yese, aahimuruma Davidi orowa okhottoni wiira aawehe axuulupale awe, okhala wiira yaari anakhotto a nloko na Isarayeli. Okathi ole vanikhala wiira Davidi aari mmiravo.

Okathi Davidi aaphiyale awe nxepa na wElahi, owo aahiweha wiira mpantta mmosa yaari anakhotto aisarayeli, nave mpantta mukina yaari anakhotto afilisti. Masi okhala wiira aisarayeli yaaniwoova afilisti, anakhotto ale a ikurupu soopiili yaahiviriha isumana sinceene ari ene opuro ole awehanaka. Nuumala-vo, Davidi aahimwiiwa Goliyati okhuwelaka ni aaveehaka aisarayeli. Davidi khaawerya okupali wiira Goliyati yoowo aakokhorela amuluku eethiru, anveeha Yehova! Davidi aahaakoha alopwana yaamwaattamenle wiira: Mulopwana onrowa omwiiva nfilisti ole ni omaliha wuuliwa muru wa atthu a Isarayeli, onrowa ovahiwa exeeni? Muulupale awe Davidi, Eliyabi, aahinanariwa vanceene nuuwo ophavelaka osuwela etthu yaamwiiriha orowa okhottoni. Masi Davidi khaahiyale waakohererya ni waalipiha anakhotto akina.

Mwene Sawuli aahileeliwa itthu Davidi aahimyale awe ni aahiruma wiitthaniwa. Davidi aaheererya omulipiha mwene Sawuli, omuhimeeryaka so: “Muhikhulumuwe [aahiiso, muhoove] mwaha wa nfilisti ole [Goliyati]”. Davidi aahiivahererya wiira awane ni Goliyati. Woopaceryani, Sawuli khaamweemerenrye Davidi orowa, okhala wiira aakupali wiira aamwiiviwa. Masi Davidi aahimutthokiherya mwene Sawuli itthu sootikiniha aapanke awe okhaliheriwaka ni Yehova. Mwa ntakiheryo, owo aahimwiiva kharamu ni mwaamunama oniihaniwa ursu, okathi aatuphela awe ipwittipwitthi sa paapa awe. Mwene Sawuli aahikupali ni aahimweemererya Davidi orowa owana ni Goliyati. Aahinvahererya soowara sa ekhotto ni espaata awe. Okhala wiira Davidi khaalimalenle owara ikuwo iye sa ekhotto, owo aahirula ohalana paahi ekopo awe ni fiska awe mmatatani.

Okathi aaphiyale awe oxepani, Davidi aaheemela omuro, ottotta maluku 5 oovilikeya. Nuumala-vo, owo aahirowa nipuro naawaniwa ekhotto, oneetta orowaka ohoolo wa Goliyati. Okathi Goliyati anwehale awe Davidi orwaaka, aahipacerya okhuwela ni omutheya mwaha woorwa owana okunxe ene “ekopo”. Woonasa wene, Goliyati aahimya ekopo Davidi eettana awe, okathi aakhapelela awe ipwittipwitthi. Pooti wiira, Goliyati khanwehale fiska, ekaruma yeeyo yaari mmatatani mwa Davidi ni yaarowa omukumiherya mixankiho. Siiso, nfilisti owo “aahimutakhaliha Davidi ni nsina na amuluku awe” ni aahileiherya waavaha murutthu awe axipalame a musulu ni inama sa mutakhwani.

Davidi aahimwaakhula nfilisti ole oriki: “Nyuwo munikirweela mukunxe ene espaata ni mavaka manli, masi miyo kinoorweelani ni nsina na Yehova a anakhotto, Muluku a anakhotto a Isarayeli, yoowo onveehale anyu.” Moolumo ale a Davidi, yaanooniherya wiira Yehova taamukhaliherya okhala oolipa murima. Owo khailikanyiha ni nfilisti ole. Davidi aahiweha wiira Goliyati khaarina owerya onvikana Yehova! Nave aanikupali wiira ammuxintta ni wiira anakhotto a afilisti yaamuxinttiwa.

Davidi aahipacerya otthimaka orowaka opuro aari awe Goliyati. Moowaakuveya, Davidi aahikumiha nluku nimosa mmurupani mwawe, ovonya omurumeelaka fiska. Vakhala wiira Goliyati aahinweha fiska okathi ene yoole, owo aahipisa opaka etthu wiira onfintari. Davidi aahivonya nluku ni ikuru, nto nluku nno naahikela vayuuci va Goliyati. Nfilisti owo aahimora “onaweha vathi.” Davidi aahitthimakela aamorenle awe nfilisti ole, okumiha ekatana awe, omwiikittha muru. Nuumala-vo, woova wa anakhotto a wIsarayeli waahimala. Moolipa murima, alopwana awo yaahipacerya okhuwela ni waatuphela afilisti. Atthu a Muluku yaahaaxintta awanani aya nihiku nle. Ntakiheryo na mmiravo Davidi, naahaakhaliherya okhala oolipa murima, nave-tho olelo-va, ntakiheryo nno ninninikhaliherya.

Musome yoowiiraneya ela mbiibiliyani, soolepa sinittharelana:

• 1 Samuweli 16:​13, 18, 19; 17:​1-54

Nikoho para ovaanela:

Davidi oonihenrye sai olipa murima?

Mutokose itthu sikina

1. 1. Atthu xeeni akina a emusi ya Davidi yoonihenrye olipa murima? (Math. 1:​5, 6; Luka 3:​31-38; Owehaweha 01/10/2012 epaax. 24 etti. 3)

   Mwaakhule va

2. 2. Etthu xeeni enooniherya wiira yoowiiraneya ela ti yeekeekhai? (Owehaweha 05/2016 epaax. 13) A

   Mwaakhule va

   

   Courtesy of Israel Antiquities Authority

3. 3. Okathi Davidi aari awe makampusi, okumi awe waari sai? (Owehaweha 01/09/2011 epaax. 27 itti. 1 mpakha epaax. 28 etti. 1) B

   Mwaakhule va

   

   Todd Bolen/BiblePlaces.com

4. 4. Atthu akina yuupuwela exeeni sa Davidi? (Owehaweha 03/2021 epaax. 3 etti. 6; Perspicaz vol. 1 “Eliyabi” n.^o 4 etti. 1)

   Mwaakhule va

Muupuwelele itthu mwiixuntte anyu

• Ntakiheryo na Davidi ninrowa wookhaliheryani sai, owanana . . .

  • woova wanyu? C

    Mwaakhule va

    

  • miyuupuwelo soohiloka?

    Mwaakhule va

• Olipa wanyu murima onrowa waakhaliherya sai atthu akina? (1 Sam. 17:​50-53)

  Mwaakhule va

• Munrowa otakiha sai olipa murima Davidi oonihenrye awe?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni yoolakela ya Yehova?

  Mwaakhule va

• Etthu xeeni kiniphavela aka omukoha Davidi nuumala ohihimuxiwa?

  Mwaakhule va

Mwiixutte itthu sikina

Nsipo nna para anamwane, nwehe etthu yaamwiirinhe Davidi okhala mulopwana oolipa murima. Nwehe eviitiyu eni:

Kimphavela omutakiha — Davidi (2:35)

Itthu xeeni anna akhanle aya oopaka yaaphavelaka ottittimihiwa ni atthu akina? Musome mwaha oni:

“Amiravo — munrowa owerya sai ororomeliwa ni atthu akina”? (Owehaweha 03/2021 ipaax. 2-5 itti. 1-11)