18 GIDEYONI
Aari oolipa murima ni oowiiyeviha
MUTTHU oolipa murima, ohaana okhala oowiiyeviha. Akhala wiira mutthu oolipa murima khonikhalana ephoole, eyo pooti omwiirihaka okhala mutthu oowiiroromela. Gideyoni aari oolipa murima ni oowiiyeviha. Owo aakhala okathi aisarayeli yaatthikenle aya ohimwiiwelela Yehova. Nto, Yehova aahaahiya atthu a oMidiyani atuphelaka elapo ya wIsarayeli, waahaaxa atthu ni ohonona imatta saya. Wiira ophwanyeke yoolya, Gideyoni aahaana olipa murima ni ohihiya waala ipyo. Masi okhala wiira aari oowiiyeviha, owo aanepettha etiriku opuro woowiipitheya, mulittini aathimpe awe vamwala. Owo aanipaka eyo woonasa wene wiira ehikuxiwe ni atthu a oMidiyani, woonasa wene.
Makhalelo aisarayeli yaanitepa oxankiha, nto yaahimuxonttela Yehova wiira aakhaliherye. Omurumeelaka profeta, Muluku aahihimya etthu yaamwiiriha ohiya waakhapelela. Nuumala-vo, Yehova aahiruma nlaikha wiira nimuthanle Gideyoni wiira owoopole atthu awe. Gideyoni aahiveka wooniheriwa esinaale. Nlaikha naaheemererya. Mwa mwiiriirya, aahikumiherya mooro yoowo waapanhe mukuttho Gideyoni aalokihenrye awe. Nuumala-vo, nlaikha naahirowa. Ohiyu ene yoole, Yehova aahilavula ni Gideyoni wiira aapwexakase altaari a Bayaali ohela muhina mwiri yaapanke aya atthu a oMidiyani wiira akokhoreleke. Tivonto, Gideyoni aahaana omuteka altaari ni onvaha mukuttho Yehova. Gideyoni aahiiwelela, okhala wiira owo aanimoova paapa awe ni alopwana a epooma ele. Owo aahilakela opaka etthu Yehova aamurumme awe. Wiira ohikhale mutthu aarowa onweha, owo aavanre muteko owo ohiyu.
Nuuvira okathi vakhaani, atthu a oMidiyani, a wAmaleeki ni maloko yaakhumme mpantta onikhuma nsuwa, yaahaathukumanya anakhotto aya wiira yawane ni aisarayeli. Atthu awo yaahisareya ntoko waatta wa isoope, elapo yoowaataleya ya oYeziriyeli. Eettihiwaka ni ikuru sa Yehova, Gideyoni aahaaruma anamitthaka wiira yaaleele atthu a maloko makina a wIsarayeli wiira amukhaliherye. Ekwaha ela, yena aahooniherya wiiyeviha onvekelaka Yehova isinaale piili, para okupali wiira Yehova ammukhaliherya. Moopixa murima, Yehova aaheemererya. Ohiyu ene yoole, Gideyoni aahipweha esapala vathi. Nto Yehova aahiiriha onaana esapala ele, masi etthaya khuhala yuumale ene. Ohiyu waattharelana, Yehova aahiiriha esapala ele wuuma nnaamwi etthaya yaari yoonaana.
Anakhotto a Gideyoni yaari vakhaani, masi hata vaari siiso, Yehova aahimmye wiira khiyaareere waatta
Nuumala oweha wiira Yehova aahimwaakhula, Gideyoni aahaathukumanya anakhotto awe vakhaani oowiiraka 32.000, wiira awane ni anakhotto oowiiraka 135.000. Okathi aisarayeli yaamanke aya opuro aniphattuwa maasi a oHarodi, Yehova aahimuleela Gideyoni wiira anakhotto awe khiyaareere waatta. Gideyoni aahaaleela anakhotto ootheene yoova, wiira atthikeleke owaani. Masi anakhotto 10.000 yaahihala. Hata vaari siiso, Yehova aahihimya wiira anakhotto ale nlelo khiyaareere waatta. Yehova aahimuleela Gideyoni wiira aawehawehe okathi yaarowa aya owuryaka maasi. Nave aahimuleela Gideyoni wiira ale yaarowa owuryaka maasi akhoromme ene, yaahaana otthikela owaani. Owo aarummwale waathanla paahi ale yaawurya, masi okathi omosa-ru yaawehawehaka awanani aya. Nto Gideyoni aahalanne anakhotto 300 paahi!
Moolipa murima, Gideyoni aahirowa owana ni anakhotto ale 300 aahalanne awe. Nto Yehova aahimooniherya Gideyoni wiira nlelo aari ni yena. Owo aahimuleela Gideyoni wiira ovolowe muttetthe wa awanani awe ohiyu. Opuro ole, Gideyoni aahimwiiwa nakhotto a oMidiyani ohimyaka ele aalohale awe wiira aisarayeli yaamurowa oxintta. Moolumo ale a Yehova, yaahimwiiriha Gideyoni okupali wiira aamuxintta. Owo aahitthikela opuro yaari anakhotto awe, onaaleela moota yaarowa aya owana ekhotto ele. Ohiyu yoole, Gideyoni ni anakhotto awe yaahirukurerya muttetthe wa awanani aya. Okathi Gideyoni aavanhe awe esinaale, awo yaahirumiha malope aya ni yaahipwexakasa mirinki suulupale saarina mithuko. Nuumala-vo, yaahikhuwela ariki: “Ekhotto ti ya Yehova ni ti ya Gideyoni!” Mwaha wa onyakula wa malope ni mirinki saapwexiwa, saahiwiiriha awanani aya oweha wiira yaahirukureriwa ni otupheliwa. Anakhotto a oMidiyani yaahituthuwa, enatthyawasa! Nto, Yehova aahiwiiriha awanani awo wiivanana yaawo-ru. Anakhotto 15.000 paahi ti yooponwe okhala wiira yaahitthyawa.
Nuumala-vo, Gideyoni aahaatthimakela ale yaatthyanwe. Wookiseryani, owo aahaavara awanani awe, owiiva mamwene aya. Nave-tho, aahaahukhumu atthu yaale yaakhoottale waakhaliherya anakhotto awe, yaavahaka yoolya okathi yaaronwe aya owana ni awanani a Yehova. Nto, aisarayeli yaahiphavela omukhaliha mwene Gideyoni, masi moowiiyeviha Gideyoni aahikhootta, oriki: “Yehova tonrowa woolamulelakani”. Yehova aahimutthuvela mwaha wa wiiyeviha ni olipa wawe murima. Okathi wootheene Gideyoni aari awe mukhulupale a wIsarayeli, elapo ele khiyaatthikenle-tho owaniwa ekhotto. Nto Gideyoni aahikhala iyaakha sinceene. Murummwa Paulo aahimuhela muhina Gideyoni, okathi alempe awe elista ya alopwana ni athiyana yaarina waamini woolipa. — Ahep. 11:32.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Gideyoni oonihenrye sai olipa murima?
Mutokose itthu sikina
1. Moolohani mwawe, nakhotto a oMidiyani aahiweha “ephaawu”. Exeeni yooloha eyo yaavarihana aya ni anakhotto a Gideyoni? (Aph. 7:13; Perspicaz vol. 1 “Esevaata” etti. 7)
2. Xeeni oruma wa malope 300, waatutunxe aya anakhotto a oMidiyani anapacerya wiivanana yaawo-ru? (Perspicaz vol. 1 “Nnyaka (nlope)” etti. 3) A
Eteseenyu A: Nnyaka na epwittipwitthi yoolopwana, naarumeeliwa ntoko nlope para ovaha esinaale aahiiso waalopola atthu
3. Gideyoni ni anakhotto awe yaarowa opaka exeeni, wiira yaaxintte atthu a oMidiyani? (Owehaweha 15/10/2004 epaax. 16 itti. 9-10) B
Eteseenyu B: Gideyoni aahiwoomola atthu a oMidiyani etthu yoowiiraka ikiloomo 80, mpakha oYogoboha (orakama wa ikiloomo sene khonisuweliwa saana)
4. Etthu xeeni ennikupaliha wiira yoowiiraneya ela ya mbiibiliyani ti yeekeekhai? (Owehaweha 15/04/2005 epaax. 32)
Muupuwelele itthu mwiixuntte anyu
Gideyoni aahaahoolela anakhotto a Muluku wiira yaaxintte atthu a oMidiyani. Hata vari siiso, owo khaahiyale okhala oowiiyeviha ni olavula ni atthu akina mooreerela murima. (Aph. 8:1-3) Ahooleli a itthoko ni axitokweene, anrowa omutakiha sai Gideyoni okathi atthu akina ahinisiveliwa aya ni yoothanla apanke aya?
Okathi xeeni nimpirisari ahu okhala oolipa murima ni oowiiyeviha? C
Efootu C
Munrowa otakiha sai olipa murima wa Gideyoni?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Gideyoni nuumala ohihimuxiwa?
Mwiixutte itthu sikina
Munrowa omutakiha sai Gideyoni, okathi munaakhela anyu iparakha mmutthenkesoni mwa Yehova? Musome mwaha oni:
“Atthu oowiiyeviha tarina ankhili” (Owehaweha 01/08/2000 ipaax. 16-18 itti. 11-15)
Murumeele yoowiiraneya ela ya mbiibiliyani, wiira mwaakhaliherye aniinyu omuroromela Yehova. Musome mwaha oni:
“Yehova aahimulipiha Gideyoni” (Matakiheryo a myaha sa mbiibiliyani mwaha 13)