16 BARAKI NI DEEBORA
“Tthiri kinoorowa ni nyuwo”
OKUMI wa aisarayeli waari wooxankiha ni woowoopiha. Nloko nle naahimurukunuwela Yehova. Ntoko aahimenrye awe, Yehova aahiwiiriha awanani aya waatuphela ni waahaaxa. Owo aahaavahererya mmatatani mwa Yabini, mwene a oKanaani. Xeefi a anakhotto aari mulopwana ootepa otakhala yoowo iitthaniwa Siisera. Owo aanaahoolela anakhotto ni aahikhalana ikaaro 900 sa ekhotto.
Saahivira iyaakha 20, anakhotto a Siisera yaahaaxaka vanceene aisarayeli. Okathi Siisera aatuphela awe epooma ya aisarayeli, aahikhalana ovara imwali ni otuphela. Mwaha waivaavo, vaanoopiha ni vaanixankiha weettakasa istaraata suulupale ni mittetthe saamukhaani, maana atthu yaahithaama. Anakhotto vakhaani aisarayeli ti yaarina ikaruma sa ekhotto wiira aweryeke wiixaakihana.
Okathi ole, aahikhala muthiyana oolipa murima iitthaniwa Deebora, yoowo aari profeta a Yehova. Owo aaniphuka milattu soovila seiyo atthu a wIsarayeli yaamuruhela aya. Yehova aahimurumeela Deebora wiira onvahe miruku mulopwana iitthaniwa Baraki, yoowo aamuthanlale awe wiira okhale mukhulupale ni wiira owoopole atthu awe. Nkahaya muupuwele moota Baraki aatikinihiwe awe, nuumala Deebora onvaha malakiheryo a Yehova wiira aathukumanye anakhotto 10.000 ni aaroihe omwaako Tabori! Yehova ammukhaliherya Baraki wiira omuxintte Siisera ni anakhotto awe.
Niireke Baraki aari mulopwana oowiixinnuwiha? Niireke aahinanariwa nuumala ovahiwa malakiheryo ni muthiyana? Nnakhala vakhaani. Owo aahimmye wiira aamurowa omwaako Tabori, vakhala wiira Deebora ammuhoola. Masi eyo khenooniherya wiira owo khaamuroromela Yehova. Okhala wiira nuuvira okathi, murummwa Paulo aahilepa nsina na Baraki, elista awe ya alopwana ni athiyana yaarina waamini woolipa. (Ahep. 11:1, 2, 32) Mweekeekhai, Baraki aahooniherya waamini okathi anvekenle awe Deebora orowa ni yena vamosa ni alopwana akina. Baraki aanisuwela wiira Deebora aarummwale ni Yehova, nave aaniphavela okhaliheriwa ni Yehova mpakha vaaweryaneya aya. Deebora aari oolipa murima ni aaheemererya orowa, okathi aahimmye awe so: “Tthiri kinoorowa ni nyuwo”. Owo aahimuleela Baraki wiira aamuxintta ekhotto ele. Baraki khahiyo taarowa omwiiva Siisera nnakhala mulopwana mmosa a anakhotto ale. Muluku aarowa onvaha eparakha ele muthiyana.
Moohipisa, Baraki aahipaka ele Yehova anvekenle awe. Owo aahaalattula alopwana ni aahaathukumanya anakhotto 10.000 ootupa. Nnaamwi alopwana ale yaarina ikaruma vakhaani sa ekhotto, Baraki aahaavaha malakiheryo a moota woowana. Owo aahaathukumanya anakhotto awo vasulu va mwaako Tabori. Mutthu ori ene mwaako ole woovilikeya, aaniwerya oweha moothakoni mwa oYezireyeli. Nave orakama wa mwaako owo waarina etthu yoowiiraka imeeturu 562. Ari ene vamwaako, Deebora, Baraki ni alopwana ale oothanliwa, yaaniwerya onweha Siisera ni anakhotto awe yaattamelaka.
Nto Baraki aarowa opaka exeeni? Vaakhanle wiira Baraki uupuwenle ntoko anakhotto akina, woonasa wene owo ammulipelela Siisera ni anakhotto awe waattamela omwaako Tabori. Vaavo anakhotto a Siisera yaarowa aya weererya owela mwaako, vaarowa okhala vookhweya anakhotto a Baraki waaxintta awanani aya. Ohiya opaka eyo, Baraki aahisuwela wiira ekhotto ele khahiyo yaari yawawe, masi Yehova taarowa owana. Tivonto, owo aapanke ele Deebora aamuhimenrye awe. Omurumeelaka Deebora, Yehova aahimuleela Baraki wiira aatuphele anakhotto a Siisera! Moolipa murima, Baraki ni anakhotto awe yaahikhuruwa vamwaako, anaatthimakela awanani aya wiira yaatuphele, nnaamwi yaarina ikaaro sa ekhotto soowoopiha!
Mphuki ni profeta muthiyana yaahimuxintta xeefi a anakhotto ootakhala
Vaakhanle wiira yaari ekhotto pure, anakhotto a Baraki yaamuxinttiwa. Masi Yehova aahiweha olipa waya murima ni aahaakhaliherya. Yehova aahiwiiriha anakhotto a Siisera ohiiwanana ni otuphelana yaawo-ru. Yaahipacerya orupa epula yinceene. Mwaha wa epula ele, muttetthe ole woowaataleya wa oYezireyeli waahisareya mattophe. Nto mwaha wa mattophe awo, ikaaro sawe sa ekhotto saahiphara. Ahiweryaka oweha moota woowaatuphela aisarayeli ni ikaaro saya sa ekhotto, anakhotto awo yaahipacerya owana ni wiivanana yaawo-ru. Anakhotto ootheene a Siisera yaahikhwa. Masi exeeni yaamwiiranenle Siisera?
Siisera aahiwerya otthyawa mwentto, okhuma muttetthe ole yaasareyale aya mattophe, mpakha ophiya etthaya yoowuuma. Mwaha wa woova, aahitthyawa wiira ohiiviwe, aahiya anakhotto awe akhwaaka. Nto Baraki aahimutthimakela. Okathi owo, Yehova iira owehaka itthu sootheene ni aanisuwela etthu aarowa awe omwiiriha Siisera.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Baraki ni Deebora yoonihenrye sai olipa murima?
Mutokose itthu sikina
1. Okathi wa Siisera, okumi wa aisarayeli waari sai? (Owehaweha 01/08/2015 epaax. 13 etti. 1)
2. Xeeni Deebora ohiniheliwa awe muhina elista ya aphuki 12 yaalamulela ohinatthi profeta Samuweli? (Owehaweha 01/06/1986 epaax. 31 itti. 6-8)
3. Moota xeeni Deebora aari awe “maama a wIsarayeli”? (Aph. 4:4, 5; 5:7; Owehaweha 01/08/2015 epaax. 13 etti. 2) A
Eteseenyu A
Eteseenyu A
4. Deebora ni Baraki yaaphavela ohimya exeeni okathi yiipale aya wiira “itheneeri saahiwana” ni Siisera? (Aph. 5:20; Owehaweha 15/01/2005 epaax. 25 etti. 5)
Muupuwelele itthu mwiixuntte anyu
Moowiiyeviha, Baraki aaheemererya okhaliheriwa ni muthiyana oororomeleya. Munna onrowa otthara sai ntakiheryo na Baraki? B
Efootu B
Xeeni Deebora aapirisari awe olipa murima wiira omuhoole Baraki? Okathi xeeni ninreerela ahu olipa murima ntoko Deebora?
Munrowa otakiha sai olipa murima wa Baraki ni Deebora?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kinrowa aka omukoha Baraki ni Deebora nuumala ohihimuxiwa?
Mwiixutte itthu sikina
Muupuwelele moota yoowiiraneya ela ennikupaliha aya wiira Yehova, onnivaha efaita muteko nninvarela ahu. Musome mwaha oni:
“Mpakeke ele muniwerya anyu wiira munvuwihe Yehova!” (Owehaweha 04/2017 ipaax. 28-32)
Ntakiheryo na Baraki ni Deebora ninniixuttiha exeeni sa okhala atthu arina ankhili, oororomeleya ni okhala oowiiwelela? Musome mwaha oni:
“Mwaha wa Waamini Wawe, Baraki Aahaaxintta Anakhotto Ootupa” (Owehaweha 15/11/2003 ipaax. 28-31)