Aahixintta yooweeha

OKATHI aari awe mmiravo, Yosefe aaniphentiwa vanceene ni paapa awe aihaniwa Yakobe ni aanikhaliheriwa ni Yehova Muluku awe. Masi niireke eyo entaphulela wiira Yosefe khaarina mixankiho? Nnaari. Mwa ntakiheryo: Owo aaninyokhiwa vanceene ni axinnawe. Okathi axinnawe yoonale aya wiira Yakobe aanimuthokorerya vanceene Yosefe waavikana anaawe akina, awo yaahipacerya omukhalela nrima ni yaahipacerya omuhasula Yosefe. Okathi Yehova aamwiirinhe awe Yosefe oloha, weiwo wooniherya wiira muhoolo amusi awe yaarowa wuurama ohoolo wawe, axinnawe yaahitepa omunyokha.

Okathi Yosefe aarina awe iyaakha 17, Yakobe aahinvekela weetta mukwaha woorakama, aarowa awe oviriha mahiku manceene eettaka, wiira aawehe axinnawe yaari ene akumi. Nuumala Yosefe waaphwanya axinnawe, awo yaahinvara ni yaahimurihela mweehimeni yahaakhanle maasi. Yosefe aahaaxonttela, masi awo khiyammorenle ikharari! Nnaamwi wanipacerya yuupuwela omwiiva, awo yaahoona wiira yaahaana omutumiha, yaatumiheryaka alipa a nakoso yaavira opuro ole. Muhoolo mwaya, axinnawe Yosefe yaahimwiiriha paapa aya Yakobe okupali wiira mwanawe amphenta awe vanceene, aahiiviwa ni enama ya mutakhwani. Masi ekeekhai ti yoowi, Yosefe aaroihiwe wExiitu. Ori ene elapo ele yoorakamela, Yosefe aahitumihiwa ntoko epottha, otumiheriwaka mulopwana aihaniwa Potifari, yoowo aari mukhulupale a ekuvernu ya Farawo.

Saahikhala itthu saarowa omwiiriha Yosefe ohikhalana nlipelelo. Masi owo aahilipa murima ni aahiimananiha vanceene ovara muteko. Biibiliya onihimya so: “Yehova aari ni Yosefe.” Yehova aahimureeliha vanceene, nto itthu sootheene Yosefe aapaka awe, saanimweettela saana. Eyo yaahimwiiriha Potifari onvahererya Yosefe miteko sootheene sa vatthokoni vawe wiira okhapeleleke.

Masi moohipisa, Yosefe aamukhalana muxankiho mukina. “Erutthu ya Yosefe yaari yomphwanela, ni aari ooreera.” Nto mwaarawe Potifari aahisuwela eyo. Nave mwaarawe Potifari khaavitha ele aaphavela awe, mpakha omwiirela Yosefe wiira: “Murupe ni miyo”. Nto Yosefe aarowa opaka exeeni? Amusi awe yaari ottaiwene. Owo aari epottha, nave ale yaamuthumme yaahikhalana etireitu yoomwiiriha khula etthu yaaphavela aya. Nave muthiyana ole aahikhalana owerya wa omukumiherya mixankiho Yosefe. Niireke Yosefe aahuupuwela opaka etthu muthiyana ole aaphavela awe? Niireke anwerya olipa murima wiira omukhootte muthiyana ole?

Biibiliya onaakhula so: “Yosefe aahikhootta”. Owo aahimuleela mwaarawe Potifari wiira khaarowa opaka etthu ele yoohiloka, okhala wiira aaniroromeliwa ni Potifari. Etthu yootepa okhala ya efaita, tiila: Yosefe aahimuleela muthiyana ole wiira: “Vaniweryaneya sai miyo opaka etthu ela yootakhala ni omutthekela Muluku?” Okhala wiira Yosefe aanimphenta vanceene Tiithi awe a wiirimu Yehova, ophenta iwo waahimukhaliherya okhala oolipa murima wiira omukhootte muthiyana ole. Masi mwaarawe Potifari khaahiyale onveka Yosefe. Nto nihiku nimosa, ohikhanle mutthu mukina vatthokoni vale, aahinvara Yosefe omuleela wiira: “Murupe ni miyo!” Yosefe aahisonyowa mmatatani mwa muthiyana ole, onatthyawa. Masi muthiyana ole aahihalana ikuwo sa Yosefe. Nuumala iyawe ophiya, aahimooniherya ikuwo iye onamuleela wiira Yosefe aaphavela omurupiha. Nto Potifari aahinanariwa vanceene ni aahiruma wiira Yosefe atthukweliwe mukhatteya.

Vano, Yosefe aari ekhatteya yooriipela vanceene. Aahiviriha okathi munceene otthukiwe ene ni ikwirinti mmettoni ni muxikoni. (Esal. 105:​17, 18) Nave okathi ola, vaamukhweya Yosefe ohikhalana nlipelelo, maana makhalelo a okumi awe yaamutepa oxankiha. Niireke Yehova aahimuliyala Yosefe? Nnaari! Yosefe nlelo aanimuroromela Muluku. Owo aaniimananiha vanceene ovara muteko okathi ole aari awe mukhatteya. Nto Yehova aahimureeliha vanceene mpakha omwiiriha mukhulupale a mukhatteya onvaha muritti Yosefe wiira aakhapeleleke apereso akina. Khula mwaakha aavira, Yosefe khaahiyale ovilela ni olipa murima.

Mwaha wa waamini ni olipa wawe murima, Yosefe khaahiyale okhaliheriwa ni orumeeliwa ni Yehova. Nuuvira okathi, Muluku aahimwiiriha Farawo oloha ikwaha piili, nto Yehova aahimuleela Yosefe sooloha iye ni etthu saataphulela aya. Yosefe aahimuleela Farawo wiira saamukhala iyaakha 7 sa oruwerya vanceene ni iyaakha 7 sa etala yuulupale. Nuumala oweha wiira Yosefe aanikhaliheriwa ni Muluku, Farawo aahimuthanla Yosefe wiira aakhaliheryeke atthu a elapo ele, mwaha wa etala yaarowa okhumelela. Maana Farawo aahimwiiriha okhala mulopwana aarina owerya wuulupale wExiitu. Nto mutthu aarina okhulupale onvikana Yosefe aari Farawo paahi. Yosefe aahiwerya owoopola ohiya paahi atthu a wExiitu, masi-tho amusi awe. Okathi axinnawe yaaronwe aya wExiitu, moohisuwela awo yaahuurama ohoolo wa Yosefe. Nto yooloha ooniheriwe awe ori ene mmiravo yaahiiraneya. Nave-tho, axinnawe ale yaahooniherya wiira yaari atthu ooreera murima ni ooloka. Munnaya yoole yaamunyokha aya vanceene, vano aahiwoopola mwaha wa etala. Ohiya paahi owoopola axinnawe, owo aahimoopola paapa awe ni nloko nootheene na aisarayeli naarowa okhumelela muhoolo. Itthu iyo sootheene saahiiraneya, mwaha woowi Yosefe aahooniherya olipa murima ni khaahiyale omwaamini Yehova.

Musome yoowiiraneya ela mbiibiliyani, soolepa sinittharelana:

• Maphattuwelo 37:​1-36; 39:​1-23; 41:1–45:28

Nikoho para ovaanela:

Yosefe oonihenrye sai olipa murima?

Mutokose itthu sikina

1. 1. Etthu xeeni enooniherya wiira itthu saamwiiranenle Yosefe ori ene wExiitu ti seekeekhai? (Nvenye! 11/2010 epaax. 15 etti. 2)

   Mwaakhule va

2. 2. Yosefe aasuwela sai wiira Yehova onnoona oraruwa okhala etthu yootakhala? (Maph. 39:9; Owehaweha 08/2022 epaax. 26 etti. 2)

   Mwaakhule va

3. 3. Xeeni Yehova eemerenrye awe wiira Yosefe okhalane muteko wa efaita yinceene ekuvernu ya wExiitu? (Owehaweha 01/05/1996 epaax. 11 etti. 4) A

   Mwaakhule va

   

4. 4. Etthu xeeni enooniherya wiira waamini wa Yosefe khiwaavukunwe, hata okathi aarina awe iyaakha 110? (Maph. 50:​25, 26; Owehaweha 01/06/2007 epaax. 28 itti. 10-11) B

   Mwaakhule va

   

Muupuwelele itthu mwiixuntte anyu

• Munrowa otthara sai ntakiheryo na Yosefe, akhala wiira munna aahiiso murokora onnoothokoreryani moohixariya? (Maph. 45:​4, 5; 50:​19-21)

  Mwaakhule va

• Hata okathi aari awe ottaiwene ni amusi awe, Yosefe khaahiyale ororomeleya wa Yehova. Ninrowa otthara sai ntakiheryo nawe, okathi . . .

  • ninkhala ahu oxikola? C

    Mwaakhule va

    

  • nneetta ahu mukwaha? D

    Mwaakhule va

    

  • nimmurumeela ahu telefoni aahiiso ekaruma ekina? E

    Mwaakhule va

    

• Munrowa otthara sai ntakiheryo na olipa murima wa Yosefe?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni yoolakela ya Yehova?

  Mwaakhule va

• Etthu xeeni kiniphavela aka omukoha Yosefe nuumala ohihimuxiwa?

  Mwaakhule va

Mwiixutte itthu sikina

Hata Yehova ahaamwaakihenrye Yosefe itthu sootheene soohiloka, owo aahimukhaliherya ovilela. Nwehe moota Yehova okhanle awe oowookhaliheryani, musomaka mwaha oni:

“Yehova onoonikhaliherya oxintta mixankiho sahu” (Owehaweha 01/2023 ipaax. 14-19)

Anamwane anrowa otthara sai ntakiheryo na Yosefe akhala wiira ookhala mwaana mukina onaahasula? Nwehe eviitiyu eni:

Nvileleke hata mukhapeleliwaka moohixariya (1:31)