7 YAKOBE
Aahikhapelela etthoko awe moolipa murima
OKATHI uuluvanle awe, Yakobe aahirumeela moolumo manli, ophavelaka otthokiherya iyaakha sa okumi awe. Owo aarumenle moolumo oowi: “vakhaani”, ni “mixankiho”. (Maph. 47:9) Tthiri Yakobe aahikhalana mixankiho sinceene! Mwa ntakiheryo, owo aahitthyawela elapo ya oHarani wiira ohiiviwe ni muulupale awe. Okhalaka elapo ele yaarakamenle owannyawe, Yakobe aahisiveliwa ni mwali aihaniwa Rakeli. Masi paapa awe Rakeli, yoowo aihaniwa Labano, aahinwoka Yakobe omwiirihaka opacerya omuthela muulupale awe Rakeli. Nto, eyo yaahimwiiriha Yakobe waathela athiyana anli; masi athiyana awo khiyaiwanana. Labano aamakela onwoka Yakobe oturukaka esalaario awe iyaakha sootheene aavirinhe awe onvarelaka muteko. Hata aarina mixankiho iyo sootheene, Yakobe oovaha ntakiheryo nooloka na olipa murima, waamini ni ovilela.
Nihiku nimosa, Yehova aahimuhimeerya Yakobe wiira okhume oHarani, otthikele oKanaani. Masi opaka eyo yaari etthu yoowoopiha, maana Labano aari nanrima ni uupuwela wiira itthu sootheene Yakobe aarina awe saari sawawe. Nto Yakobe aahivaanela ni axaarawe oowanli ni yaahiiwanana otthyawa. Awo yaahaakuxa anaaya, anarowa ahimulenle etthu Labano. Nuumala Labano osuwela wiira Yakobe aahitthyawa, owo aahaakuxa arumeyi awe onamutthimakela. Nuumala omphwanya Yakobe, Labano aahimulavuliha mwa enamuna yoohiloka, mwaha woowi Yakobe aahikhuma ohimuleelale. Nave Labano aahimoopopiha Yakobe oriki: “Miyo kookhalana owerya woowiirihani etthu yootakhala”. Masi moolipa murima, Yakobe aahimooniherya Labano wiira aapaka itthu soohiloka. Owo aahihimya wiira aahiviriha iyaakha sinceene ovilelaka opuheriwa ni itthu soohiloka Labano aapaka awe. Masi hata vaari siiso, Yakobe aaphavela okhaliha murettele. Tivonto, oowanli aya yaahipaka nivarihano, nto khula mutthu aahirowa opuro aaphavela awe.
Olipa murima wa Yakobe waahimukhaliherya owana ni nlaikha ni okhaliha murettele ni amusi awe
Masi mixankiho sa Yakobe khisaamanle. Owo aahaana okumana ni muulupale awe aihaniwa Esawu. Iyaakha sinceene saavinre, maama awe aihaniwa Rebeka, aahimuleela Yakobe wiira Esawu aaphavela omwiiva. Mwaha wa xeeni? Mwaha woowi Esawu aakupali wiira Yakobe aarimootha wiira omwiiyerye mareeliho a okhala mwaana oopacerya oyariwa. Masi vano, Yakobe aaphavela okhaliha murettele ni Esawu. Nto okathi Yakobe aasuwenle awe wiira Esawu aanirwa okumana ni yena, ori ene ni atthu a etthoko awe ni alopwana 400, “Yakobe aahoova vanceene ni aahixanka.” Owo aahaaruma arumeyi awe orowa okumana ni Esawu ni onvaha mireerelo. Niireke opaka eyo yammwiiriha Esawu ovukula onanariwa wawe? Okathi ole Yakobe khaasuwela etthu yaakela wiiraneya. Masi, yaahiiraneya etthu yootikiniha vanceene.
Oxaka, Yakobe aahinweha mulopwana mmosa. Mulopwana owo aari nlaikha na Yehova, nto nlaikha nle naahipacerya owana ni Yakobe. Okhala wiira aaphavela oreelihiwa, Yakobe aahiviriha iwoora sinceene owanaka ni nlaikha nle. Nnaamwi okathi ole Yakobe aarina iyaakha 97 ni ahaarowa owerya oxintta nlaikha nle, Yakobe khaahiyale owana. Owo aahiwana ni nlaikha orumeelaka ikuru sawe sootheene ni aahinla. (Hos. 12:4) Yakobe aanisuwela wiira aahaana wiimananiha vanceene wiira oreelihiwe ni Yehova. Nuumala nsuwa okhuma, nlaikha nle naahikwata etara ya Yakobe. Nto etara ya Yakobe yaahihiyana ni eyuunu awe. Nuumala-vo, nlaikha nle naahimureeliha ni naahituruka nsina nawe noowi Yakobe para Isarayeli. Nsina nlo nintaphulela, ole oniwana ni Muluku. Tthiri nsina nle naari noophwanelela okhala wiira Yakobe aahiwana wiira oreelihiwe ni Yehova.
Vano, Yakobe aahitthikela mweemusini mwawe otuthunyaka mwaha woowi etara awe yaahihiyana ni eyuunu. Ori ene ottaiwene, aahimoona Esawu orwaaka ni alopwana 400. Yakobe aahirowa ohoolo mekhawe, wiira akumane ni Esawu ni alopwana aarina awe. Okathi aamwaattamenle awe Esawu, Yakobe aahuurama ikwaha 7. Vano, Esawu aahitthimaka orowaka okumana ni Yakobe. Ohiya okumiha ekaruma emosa wiira owane, Esawu aahimukhupaarela Yakobe! Nto oowanli aya yaahipacerya wunla. Mireerelo aakunxe awe ni wiiyeviha Yakobe oonihenrye awe, waahimwiiriha Esawu ohiwana ekhotto. Nave, pooti wiira olipa murima wa Yakobe waahinvara murima vanceene Esawu. Yakobe aahoona enamuna yooreerela ya okhaliha murettele ni munnawe.
Okhuma okathi ole, Yakobe aawanne awe ni nlaikha, aamututhunya okumi awe wootheene. Nave aahikhalana mixankiho sikina. Masi khotonko othanana mwaha wa yoothanla awe ya omwiiwelela Yehova ni owana ni nlaikha nle. Nuuvira okathi, etthu yoovara murima Yehova aamuleihenrye awe Yakobe, yaahiiraneya. Maana osuulu awe waahikhala nloko nuulupale. (Maph. 28:14) Ikwaha sinceene mbiibiliyani, Yehova onnihimmwa okhala “Muluku a Yakobe”. (Okhu. 3:6) Nave Yesu aahirumeela moolumo awo. Masi, owo aahincererya ohimyaka wiira Yehova, “khahiyo Muluku aalipa-ookhwa, masi Muluku a atthu akumi”. (Luka 20:37, 38) Moolumo ala, anooniherya wiira Yakobe ookhalana nlipelelo na muhoolo, okhala wiira owo, mukumi vamaithoni va Yehova Muluku. Elapo esya, iyaakha iye “vakhaani” ni “soosareya mixankiho”, sinrowa okhala okumi woohimala ni ohakalala ohinimala!
Musome yoowiiraneya ela mbiibiliyani, soolepa sinittharelana:
Nikoho para ovaanela:
Yakobe oonihenrye sai olipa murima?
Mutokose itthu sikina
1. Xeeni Yehova aamureelinhe awe Yakobe onvahaka eparakha ya okhala mwaana oopacerya oyariwa, ohiya Esawu? (Owehaweha 15/10/2003 epaax. 29 etti. 2)
2. Etthu xeeni Yakobe aalonhe awe? Eyo yaamukhalihenrye okupali exeeni? (Owehaweha 15/10/2003 epaax. 28 etti. 3 mpakha epaax. 29 etti. 1) A
Eteseenyu A
3. Etthu xeeni yaamukupaliha Yakobe wiira aamureelihiwa ni nlaikha? (Owehaweha 15/10/2003 epaax. 31 etti. 1) B
Eteseenyu B
4. Etthu xeeni Yakobe aapanke awe wiira aakhapelele atthu a etthoko awe wiira ahihapuxiwe ni akanaani? (Owehaweha 15/09/1995 epaax. 21 etti. 4, enoota)
Muupuwelele itthu mwiixuntte anyu
Yakobe aahoona wiira aahaana okhapelela ipwittipwitthi sa Labano. (Maph. 31:38-40) Mwa inamuna xeeni amakampusi a olelo-va, anrowa aya wooniherya wiira annikhapelela ipwittipwitthi sa Yehova? C
Efootu C
Okathi Yakobe oova awe, owo aahinvekela Yehova. (Maph. 32:6-12) Ntakiheryo nawe ninwiixuttihani exeeni sa ovekela?
Munrowa otakiha sai olipa murima wa Yakobe?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Yakobe nuumala ohihimuxiwa?
Mwiixutte itthu sikina
Ninrowa opaka exeeni akhala wiira noopaka etthu ehimusivenle munna aahiiso murokora? Musome mwaha oni:
“Muhihiye owiriyana nsu na Yesu” (Owehaweha 12/2021 ipaax. 25-27 itti. 10-18)
Murumeele yoowiiraneya ela ya Yakobe, wiira nwiixuttihe atthu a etthoko anyu.
“Yakobe ni Esawu” (Matakiheryo a myaha sa mbiibiliyani mwaha 3)