“Mwaha wa waamini awo yaahimwiipithiha Moise”

SAAHIVIRA iyaakha 60 nuumala Yosefe okhwa. Atthu a wExiitu khiyaamupuwela-tho Yosefe nnaamwi aarumeeliwe ni Yehova wiira owoopole atthu a nloko nne, okathi wa etala. Vano elapo ya wExiitu yaalamuleliwa ni Farawo mukina. Owo aanaanyookha ni aaniwoova aisarayeli, yaawo yaasuweliwa ntoko aheeperi. Aisarayeli yaanitepa wuncerereya, okhala wiira Yehova aanaareeliha. Tivonto, atthu a wExiitu yaahaakhaliha ipottha, nave yaanaahaaxa vanceene. Hata vaari siiso, aisarayeli yaanitepa wuncerereya.

Nuumala-vo, mwene Farawo aahimpaka palano ootakhala. Owo aahiwiitthana athiyana anli yaakhaliherya athiyana aheeperi oyara, mmosa aihaniwa Xifra mukina Puwa, nave aahaavaha yooruma ela: Akhala wiira yaamwaakhaliherya athiyana aheeperi oyara, mwaana owo akhala mulopwana yaahaana omwiiva. Nkuupuwelani moota athiyana ale yaaxankale aya, nuumala ovahiwa yooruma ela yootakhala! Athiyana ale oolipa murima “yaanimoova Muluku eekeekhai.” Awo yaanisuwela wiira khaakhanle mutthu oowerya aakhanle oowaakhanyererya opaka etthu yoohiloka, ohoolo wa Muluku Oowerya sootheene. Mwaha wa omuttittimiha Muluku, eyo yaahaakhaliherya opaka etthu yaavekela olipa murima. Athiyana ale yaakhaliherya aheeperi oyara, “khiyaiwelenle ele mwene a wExiitu aarumme awe.” Ohiya-vo, awo yaahaakhapelela ni owoopola anamwane anceene. Nuumala Farawo oweha wiira anamwane axilopwana yaanitepa wuncerereya, owo aahinanariwa, nave aahiwiihana athiyana yaakhaliherya aheeperi oyara. Masi athiyana ale yaahikhalana ankhili ni khiyaamulenle mwene etthu yaapaka aya. Yehova aahiweha miteko saya sooloka. Nto “Muluku aahaareerela murima athiyana ale yaakhaliherya oyara.” Muhoolo mwaya, Yehova aaheemererya wiira athiyana ale akhalane itthoko saya.

Nuumala Farawo oweha wiira palano ampanke awe khaamweettenle saana, aahikumiherya nlamulo nikina nootepexa otakhala, naahimya wiira: Anamwane ootheene axilopwana yaarowa oyariwa, yaahaana oriheliwa omuro Nilo. Anamathelana Amurami ni Yokebedi, yaakhala okathi ene yoole naakumiheriwe aya nlamulo nootepa otakhala. Awo yiira yaayanre ene anamwane anli, Miriyamu ni Aroni. Masi okathi Yokebedi aarupanle awe wiira omuyare mwaana a neeraru, yaahixankiheya vanceene mwaha woowi yamuyara mulopwana aamwiiviwa. Nuumala omuyara mwaana owo, yaahipaka khula etthu yaawerya aya wiira amwiipithihe. Masi khivaakhweyale omwiipithiha mwaana ole. Yaarowa opaka exeeni? Okathi mwaana ole aarina awe miyeeri miraru, Yokebedi aahimuhela musestuni yoomariwa ni onyoma. Owo aahivitha esestu eyo muttheereni mwa muro Nilo. Nuumala-vo, murokorawe Moise aihaniwa Miriyamu, aahiipitha wiira oweheke etthu yaarowa omwiiraneela murokorawe.

Ohivinre okathi munceene, mwaana mwaamuthiyana a Farawo, aahirowa orapa omuro Nilo. Ori ene ottaiwene, owo aahiweha esestu, nto aahimuruma murumeyi awe mmosa wiira orowele. Okathi mwaana mwaamuthiyana a Farawo aakhununle awe esestu ele, aahinweha mwaana ooreera inlaka ni aahimoonela othunku. Owo aahilakela omukuxa mwaana owo wiira amuhuweke ntoko mwanawe oomuyara. Mwaana mwaamuthiyana a Farawo, aanisuwela wiira tthiri mwaana owo, aamurowa opirisari muthiyana wiira omwaamwiheke. Miriyamu yoowo aarina ankhili, aahilipa murima khurowa wa mwaana mwaamuthiyana a Farawo. Owo aahiivahererya omuruuha muthiyana mmosa wiira omwaamwiheke mwaana ole. Mwaana a Farawo aaheemererya. Nuumala-vo, Miriyamu aahimuruuha maama awe. Yokebedi aahihakalala nuumala osuwela wiira taarowa omwaamwihaka, omukhapelela ni oliviwa musurukhu mwaha woovara muteko owo! Moohaanyiherya, Amurami ni Yokebedi yaahipaka sootheene yaawerya aya wiira amwiixuttihe mwaana owo sa Yehova. Nto waahiphiya okathi yaarowa aya onvahererya mwaana ole mmatatani mwa mwaana mwaamuthiyana a Farawo. Mwaana ole aihaniwa Moise, nsina nenno aavahiwe awe ni mwaana mwaamuthiyana a Farawo.

Niireke Yehova aahimureeliha Amurami, Yokebedi ni Miriyamu mwaha wa wooniherya waamini ni olipa murima? Moohaanyiherya, aahipaka eyo! Amurami ni Yokebedi yaahiwiixuttiha anaaya, Miriyamu ni Aroni omphenta Yehova ni omwiiwelela. Awo yaahaaweha anaaya akhalaka arumeyi oororomeleya. Nave yaahiweha moota Yehova aamukhalihenrye awe Moise. Niireke awo yaahikhala okathi munceene wiira awehe itthu Moise apanke awe nuumala wunnuwa? Biibiliya khonihimya eyo. (Okhu. 6:20) Masi Miriyamu ni Aroni, moohaanyiherya yaahiweha itthu sootikiniha Yehova aapanke awe omurumeela Moise. Ootheene aya yaahinnuwa ni yaahooniherya waamini ni olipa murima. Muru onittharelana, nnimwiixutta moota Moise aathanlale awe omurumeela Yehova nuumala wunnuwa.

Musome yoowiiraneya ela mbiibiliyani, soolepa sinittharelana:

• Okhuma 1:6–2:10

• Miteko 7:​17-21

• Aheeperi 11:23

Nikoho para ovaanela:

Athiyana yaakhaliherya aheeperi oyara ni emusi ya Moise, yoonihenrye sai olipa murima?

Mutokose itthu sikina

1. 1. Itthu xeeni sinooniherya wiira aisarayeli yaahitoko okhala wExiitu? (Nvenye! 08/04/2004 epaax. 4 etti. 4 mpakha epaax. 5 etti. 1)

   Mwaakhule va

2. 2. Itthu xeeni sinooniherya wiira Biibiliya teekeekhai, okathi onilavula awe (1) sa esestu yaapakiwe ni ipapiru ni (2) yooruma ya Farawo ya owiiva anamwane axilopwana aheeperi? (Nvenye! 08/04/2004 epaax. 6 itti. 1-2) A

   Mwaakhule va

   

   Christine Osborne Pictures/Alamy Stock Photo

3. 3. Etthu xeeni ninsuwela ahu sa athiyana yaakhaliherya aheeperi oyara, nave moota xeeni yaareelihiwe aya? (Owehaweha 01/11/2003 epaax. 8 itti. 3-4; Perspicaz vol. 2 “Parteera”) B

   Mwaakhule va

   

4. 4. Moota xeeni Miriyamu oonihenrye awe waamini okumi awe wootheene, hata uuluvanle vanceene? (Mutakiheke waamini waya muru 7 itti. 14-18)

   Mwaakhule va

Muupuwelele itthu mwiixuntte anyu

• Anamuyari aniixutta exeeni ni ntakiheryo na Amurami ni Yokebedi?

  Mwaakhule va

• Akhala wiira mookhalana axihima anyu, muniixutta exeeni ni etthu aapanke awe Miriyamu okathi aari awe mwaana? C

  Mwaakhule va

  

• Munrowa otakiha sai olipa murima wa Xifra ni Puwa?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni yoolakela ya Yehova?

  Mwaakhule va

• Etthu xeeni kiniphavela aka omukoha Puwa, Xifra, Amurami, Yokebedi ni Miriyamu nuumala ohihimuxiwa?

  Mwaakhule va

Mwiixutte itthu sikina

Nwehe etthu nniixutta ahu ni ntakiheryo na athiyana ale yahaamwiiwelenle Farawo.

“Athiyana yaahakalalinhe murima wa Yehova” (Owehaweha 01/11/2003 ipaax. 8-9 itti. 3-5)

Nwehe moota Yehova onaakhapelela awe atthu yaale anooniherya olipa murima ni animwiiwelela ntoko namalamulela waavikana apinaatamu. Nwehe eviitiyu eni:

Hiyo na atthu a Yehova (6:55)