6 REBEKA
Owo aaheemererya orowa elapo yoorakamela
REBEKA aahikuxa murinki onarowa omuro. Vaahipacerya wiila, nto waahiphiya okathi wa Rebeka orowela maasi, owo aahilimalela opaka eyo khula nihiku. Masi aahiweha wiira waattamela omuro, yaahikhala ekurupu ya alopwana yaari ni ikamelo. Nnaamwi ahaasuwela saana alopwana ale, owo aahilipa murima ni aahirowa orikelela murinki awe.
Okathi aatthikela awe owaani okunxe ene murinki awe ni olemeliwe ene, mulopwana mmosa oowuuluvala a ekurupu ele, aahimutthimakela, onamuhimeerya wiira: “Xontte mukivahe maasi vakhaani ari mmurinkini mwanyu”. Rebeka aahooniherya wiira aaniwaakhela saana aletto. Owo aahiira: “Nwuryeke pwiyaka”. Nuumala-vo, aahitheteya murinki awe, aahinvaha maasi mulopwana ole, mpakha omphiyerya.
Etthu aapanke awe moottharelana, yaahooniherya-tho wiira aaniwaakhela saana aletto. Owo aahiivahererya orika maasi wiira ovahe ikamelo 10 sa alopwana ale. Nto otikinihiwe ene vanceene mulopwana ole, owo aaninweha mwali ole ahaareere oreera, okathi aarika awe maasi wiira ovahe inama iye. Owo aahirikelela maasi ikwaha sinceene, mpakha inama sootheene owurya. Nuumala-vo, mulopwana ole aahimukoha wiira: “Nyuwo mwa mwaana awani? Niireke vatthokoni va apapinyu wookhala opuro wiira nirupe ohiyu ola?” Rebeka khuupuwenle ikwaha piili, voohipisa owo aahaavaha alopwana ale opuro woomaka ni yoolya para inama saya.
Rebeka khaasuwela etthu, masi Yehova tiirihale itthu iye wiiraneya. Mulopwana ole oowuuluvala, woonasa wene aari Eliyeezeri, murumeyi oororomeleya a Abrahamu. Isumana vakhaani saavinre, Abrahamu aahinvekela murumeyi awe wiira orowe elapo yoottaivela wiira amwaavye muthiyana para mwanawe aitthaniwa Isaakhi, yoowo aarowa ohalana mireerelo sa paapa awe. Abrahamu aahinvekela Eliyeezeri wiira amwaavye mwali a mweemusini mwawe, yoowo aamukokhorela Yehova. Mwaha waivaavo, Eliyeezeri aahinvekela Yehova wiira omukhaliherye. Owo aavekenle wiira muthiyana owo aarowa awe omwaavya para Isaakhi, okhale muthiyana aarowa wooniherya wiira onniwaakhela aletto. Nto Rebeka aahooniherya oratteene, enamuna eyo ya owaakhela aletto!
Etthu yootikiniha, okhala wiira Rebeka aahikhaliherya ekurupu ya alopwana ahaasuwela awe. Ekeekhai wiira okathi ole, itthu saari soovirikana ni mahiku ala. Olelo-va, atthu anceene toowali, ni anninyokha itthu sooreera. (2 Tim. 3:1, 3) Hata okathi ole, opaka ele aapanke awe Rebeka, vaapirisari olipa murima vanceene. Olipa murima Rebeka oonihenrye awe, khiwaamalenle vaavo.
Moohipisa, owo aahisuwela etthu yaawiirinhe alopwana ale okhuma ottaiwene. Paapa awe Rebeka aitthaniwa Betuweli ni murokorawe Rebeka aitthaniwa Labano, yaahimulattula Eliyeezeri wiira yalye hoothe. Ohinatthi olya, murumeyi ole oowuuluvala, aahaavekela wiira aaleele etthu yaamwiirinhe okhala opuro ole. Owo aahaaleela moota Yehova aamukhalihenrye awe wiira omphwanye Rebeka. Betuweli ni Labano yaahaakhula wiira: “Mwaha ola onikhuma wa Yehova.”
Yoolakela ya Muluku, yaari para Rebeka othaama muttetthe aakhala awe orowaka ottaiwene wiira atheliwe ni mulopwana ahaatonko awe onweha. Nto Rebeka aarowa opaka exeeni?
Exeeni Rebeka aarowa awe opaka? Woonasa wene, Abrahamu aanuupuwela wiira mwali aarowa ophwanyiwa ni Eliyeezeri, khaarowa weemererya orowa oKanaani. Nihiku naattharelana, Betuweli ni Labano yaahimukoha Rebeka akhala wiira aamweemererya orowa aahiiso nnaari. Okathi aakohiwa awe, Rebeka aahaakhula mooluluwanya: “Aayo kinniphavela”. Rebeka aahilakela ohiya empa awe, amusi awe, ohisuwelaka akhala wiira aamutthikela waaweha amusi awe. Etthu xeeni yaamukhalihenrye olipa murima? Woonasa wene, yena aahisuwela wiira ele yaari etthu Yehova aaphavela awe.
Nuuvira isumana vakhaani yeettaka ni ikamelo, ekurupu ele yaahiphiya vapacenrye ene wiila owannyawe Abrahamu, elapo ya oKanaani. Rebeka aahinweha mulopwana mmosa eettaka mmatta mekhawe. Isaakhi aaronwe opuro ole wiira uupuwelele. Vaasuwenle awe wiira aari Isaakhi, Rebeka aahiikhuneela ni eveewu ooniheryaka wiira aanimuttittimiha ni aanimweemererya wiira okhale iyawe. Isaakhi aarina iyaakha 40, ni aari mulopwana oophenta vanceene. Nnaamwi vaari siiso, yena aaniriipiwa murima mwaha wookhweliwa maama awe aihaniwa Sara. Rebeka aahivahiwa muteko waakhuma wa Muluku. Muteko owo, waavekela wiira yena okhale muthiyana oophenta, aarowa omukhaliheryaka Isaakhi okhapelelaka etthoko. Niireke Rebeka anwerya ovara muteko owo? Biibiliya onnooniherya wiira yena aahiwerya, maana onnilavula moolumo ooreera, yaawo anihimya wiira: “Owo aanimphenta vanceene Rebeka, tivo aahiphwanya nimaaliho mwaha woowi aahikhweliwa amamawe.”
Musome yoowiiraneya ela mbiibiliyani, soolepa sinittharelana:
Nikoho para ovaanela:
Rebeka oonihenrye sai awe olipa murima?
Mutokose itthu sikina
1. Mookumini mwa Eliyeezeri, exeeni yaaturukeyale nuumala Abrahamu okhalana anamwane? Nave etthu exeeni enooniherya wiira yena khaananariwe? (Maph. 15:2-4; 24:12; Owehaweha 01/01/1997 epaax. 30 etti. 2)
2. Xeeni Abrahamu aaphavela awe wiira mwali aarowa otheliwa ni Isaakhi othaamele oKanaani, ohiya Isaakhi othaamela muttetthe wa mwali owo? (Owehaweha 01/01/1997 epaax. 30 etti. 3)
3. Xeeni Eliyeezeri anvahale awe ipresenti Rebeka ni emusi awe? (Perspicaz vol. 2 “Rebeka” etti. 4)
4. Woonasa wene, Rebeka eettale sai mukwaha awe okhumaka oHarani orowaka oNegebi, muttetthe aakhala awe Isaakhi? (Owehaweha a Atthu Ootheene N.o 3 2016 epaax. 15 etti. 1) A
www.LifeintheHolyLand.com
Eteseenyu A: Khalai, muttetthe wa oNegebi yaahikhala atthu anceene ni opuro munceene wa olyiha inama sinceene sa Abrahamu
Muupuwelele itthu mwiixuntte anyu
Ntakiheryo na Abrahamu, Rebeka ni Isaakhi, ninrowa wookhaliheryani sai omuthanla iyanyu aahiiso mwaarinyu? (Maph. 24:2, 3; 27:46–28:1)
Rebeka aari muthiyana aavara muteko, oovaha ni oottittimiheya. Moota xeeni arokora akhanle aya ootthara ntakiheryo na Rebeka mahiku ala? B
Efootu B
Munrowa otakiha sai olipa murima wa Rebeka?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Rebeka nuumala ohihimuxiwa?
Mwiixutte itthu sikina
Nwehe moota Rebeka oonihenrye awe olipa murima wiira okhale muthiyana ootheliwa ni maama.
“Rebeka — muthiyana oovara muteko ni aamoova muluku” (Owehaweha 15/04/2004 ipaax. 8-11)
Itthu xeeni anamwane akhanle aya oowiixutta ni ntakiheryo na Rebeka?
“Mikhalelo soovara murima sa Rebeka” (Nwehe mpantta oni: “Atividades com figuras”, ori va jw.org)