Daghe valor ala varietà che ghen’è nela to congregassion

PROA imaginar una riunion par ndar ala predicassion. Due fradei i ze metesti laorar insieme. Un de lori l’è bravo de parlar cole persone nela predicassion e quelaltro l’è un pastor tanto bondoso. Dopo dela orassion, el fradel che l’è un bravo predicador el va drito fin la porta parché el vol scominsiar a predicar presto. Ma quelaltro fradel, che l’è un pastor tanto bondoso, el se senta do nela so carega e el scomìnsia a parlar con una sorela de pi età.

Quela matina de predicassion la podarà esser tanto bela o tanto bruta. Come cossita? Sarà che el primo fradel el ndarà veder quelaltro come un fradel pegro che l’è drio guastar el tempo che el gavaria de doperar nela predicassion? E sarà che el secondo fradel el ndarà veder quelaltro come una persona che no la se importa coi sentimenti dei altri o con quei che i ga de bisogno?

Tuti noantri ghemo maniere difarente de pensar e de far le robe. Jessica, che la se ga batesà fà de pi de 20 ani, la ga dito: “Podemo restar tanto costumadi cola nostra maniera de pensar o de comportarse che, fin sensa nicorderse, podemo scominsiar a creder che la nostra maniera de pensar o far le robe la ze la ùnica maniera giusta.”

Come che podemo imparar a veder le robe de maniere difarente? E come che far cossita ndarà giutarne a darghe valor ale difarente qualità e maniere de pensar dei nostri fradei e sorele? Prima, ndemo imparar cossa che Geovà el pensa sora la varietà.

GEOVÀ EL GHE PIASE DE VARIETÀ

Tuti noantri savemo che Geovà el ghe piase de union. Lu el vol che noantri semo “del tuto in union nel medèsimo pensamento e nela medèsima maniera de rassiossinar”. (1 Cor. 1:10) Anca, lu el vol che tuti noantri ndemo drio a “un sol pastor”, quel che el ga scoliesto, e che vivemo de acordo col medèsimo libro, la so Parola, la Bìblia. — Gio. 10:16.

Ma anca savemo che Geovà el ama la varietà. Podemo veder questo nela so creassion. Arquante bèstie le core, intanto che altre le se strassina, le zola o le nada. Arquante piante le vien grande e forte, intanto che altre le resta pìcole e no le ze tanto forte. Quando Geovà el ga vardà la varietà che el ga creà, el ga dito che “tuto l’era tanto bon”. — Gén. 1:30, 31.

Geovà el ghe piase de veder anca la varietà che ghen’è intrà i so adoradori. Par esémpio, varda una dele professie de Isaia. Lu el ga parlà sora bèstie difarente che le vive insieme e in pace. (Isa. 11:6) Ancoi, questa professia la ze drio realisarse nel pòpolo de Geovà parché i so servi i vive in pace un col altro. Sarà che ghen’è questa pace parché tuti lori i ze compagni? Nò. Compagno ale bèstie dela professia, i servi de Geovà i ze tanto difarenti. Lori i vien de posti e culture difarente e i ga maniere difarente de pensar e de far le robe. Ghen’è quei che i parla tanto e fà le robe svelto, intanto che altri i fà le robe con calma e no i parla mia tanto. Ancora cossita, tuti lori i vive in pace parché tuti i ga una roba compagna, o sia, “la cognossensa sora Geovà”, che la ze la roba pi importante. — Isa. 11:9.

Geovà l’è contento de assar che ghen sìpia difarense intrà i so adoradori e lu no’l ne obriga a esser tuti compagni. Alora, no ghemo de restar disgustadi parché semo difarente un del altro. Podemo pensar che queste difarense le ze presenti che i ne giuta a veder la sabedoria, la generosità e el poder che Geovà el ga de crear robe difarente.

COME DARGHE DE PI VALOR ALA VARIETÀ

L’è fàcile dir che ne piase dele difarense che ghen’è intrà i fradei e sorele. Ma quando qualchedun el ne fà una roba che no ne piase mia, pol esser fadiga noantri darghe valor ala maniera difarente de pensar e de far le robe de quela persona. Alora cossa che pol giutarne?

Pensa che i fradei e le sorele i ze drio far le robe cola motivassion giusta. (1 Cor. 13:4, 7) Par Geovà, lori i ze pressiosi, par quela che lu li ga convidadi par esser ‘òspedi nela so tenda’. (Sal. 15:1, 2) Quando se ricordemo che i nostri fradei e sorele i ze drio sforsarse par seitar a esser amighi de Geovà, l’è pi fàcile par noantri darghene fora cole difarense e tratar a tuti con bontà. — Efe. 4:32; Col. 3:13.
Ricòrdate che ghen’è tante maniere difarente de far le robe. Sicuro che ne piase dela nostra maniera de far le robe, ma questo no vol dir che la nostra la ze la ùnica maniera giusta. Noantri semo stati slevadi in posti difarenti, par quela semo difarenti nela maniera de discorer, in quel che magnemo e nele robe che catemo pi importante. Alora, se no ne piase mia quando una persona la pensa de una maniera difarente dela nostra, podemo domandarse: ‘Come che mi ndaria pensar e sentirme se mi fusse stà slevà nte un posto difarente, nte una època difarente o una fameia difarente?’
Sfòrsate par veder le bele qualità dei altri. Pénsaghe sora nela situassion che ghemo parlà nel scomìnsio de questo artìcolo. E se quei due fradei i ghe desse valor ale qualità un del altro? Proa imaginar se quel fradel che l’è un bravo predicador el vedesse quelaltro come tanto bondoso, invesse de come prego. E se quel fradel bondoso el vedesse quel altro come un fradel zeloso, invesse de come un che no ga mia passiensa. Cossita, lori no i ndaria mia voler cambiar la maniera de comportarse un del altro, no i ndaria mia restar disgustadi e i saria boni de laorar in pace e union. — Rom. 12:10.

Volemo far el nostro meio par darghe valor ala varietà intrà i nostri fradei e sorele. (Fil. 2:2-4) Se femo cossita, ndaremo sentirse in pace. (Sal. 119:165) Restaremo pi darente dei nostri fradei e, el pi importante, gavaremo una amicìssia pi forte con Geovà, quel che ne ga giutà a esser unidi con “tuta la nostra fameia de fradei”. — 1 Pie. 2:17.