Par contentar a Geovà, seita trenar la to cossiensa

1. (a) Cossa la ze la cossiensa? (b) Come che la nostra cossiensa la pol giutarne a contentar a Geovà?

COSSA che la ze la cossiensa? La ze la capacità che Geovà ne ga dato de saver se quel che pensemo e femo l’è giusto o sbalià. Questo l’è un bel presente che Geovà ne ga dato. (Rom. 2:14, 15) Quando imparemo a doperarla ben, ela la pol giutarne a far dessision che ghe piase a Geovà. Ma ghemo de ricordarse che le nostre voie sbaliade o quel che i altri i dise che l’è giusto o sbalià pol intrigar la nostra cossiensa de laorar ben.

2. De che maniera la nostra cossiensa la pol giutarne?

² La cossiensa che la ze ben trenada la pol giutarne a capir se una roba che ghemo fato la ze giusta o sbaliada. Ma anca la pol giutarne a no far quel che l’è sbalià e a ‘tegnerse a quel che l’è bon’. (Rom. 12:9) In questo stùdio, ndaremo veder come che la nostra cossiensa la pol protegerne e come che podemo doperarla dela meio maniera.

LA COSSIENSA LA POL PROTEGERTE

3-4. (a) Parché che podemo dir che la nostra cossiensa la ze compagno a un alarme contra fumassa, e parché podemo dir che la ze anca difarente? (Varda anca la stampa.) (b) Parla de un esémpio che mostra come che la nostra cossiensa la pol protegerne.

³ Podemo far una comparassion intrà la nostra cossiensa e un alarme contra fumassa. Questo alarme el avisa sol dopo che la fumassa la vien fora. Alora, pol esser che qualcossa se ga belche brusà. La nostra cossiensa trenada par la Bìblia la ze cossita, parché ela la ne avisa. Ma la ze tanto meio che questo alarme, parché la pol avisarne vanti che noantri femo qualcossa de sbalià e de rovinar la nostra amicìssia con Geovà. La cossiensa la pol avisarne contra el perìcolo de far una roba sbaliada e cossita protegerne de far un bruto pecato.

⁴ Par capir meio, femo un esémpio. Metemo dir che un fradel gióveno l’è ndato de star in nantra cità. Sicuro che el ga caro de gaver amighi in questo novo posto. Arquanti gióveni dela so congregassion i lo convida par passar tempo insieme, e lu el aceta. Ma quando i ze insieme, lu el vede che arquanti i parla robe imorai e i beve massa. Sarà che lu el seitarà a esser amigo de questi gióveni? Sicuro che nò. La so cossiensa lo ga avisà, e lu el se nicorde che ghen’è qualcossa de sbalià. La so cossiensa lo protege de far un bruto pecato. — Tia. 1:14, 15.

5-6. Cossa che Adon e Eva i podaria gaver fato par no desobedir a Geovà?

⁵ Tante volte, Geovà el ne dise de maniera ciara quel che ghemo e quel che no ghemo de far. (Isa. 33:22) Varda, par esémpio, quel che ga sucedesto con Adon e Eva. Geovà el ghe gavea dito che no i gavea de magnar dela pianta dela cognossensa del ben e del mal. (Gén. 2:17) Geovà el ga dito che no l’era gnanca par tocar nela pianta. (Gén. 3:3) Ma quando la serpente la ga dito a Eva che la saria pi felice se no la scoltesse a Geovà, ela la ga scoliesto no badar la so cossiensa. Ela la savea che l’era sbalià magnar del fruto, ma lo ga magnà stesso. Ela no la gavaria de ver scoltà la serpente. Eva no la ga mia badà quel che Geovà el gavea dito e la ga pecà contra Lu.

⁶ E cossa podemo dir sora Adon? “Adon l’è mia stà imbroià” par la serpente. (1 Tim. 2:14) Quando el ga savesto che Eva la gavea magnà el fruto, lu el gavea de obedir a Geovà, e nò far el medèsimo sbàlio che ela. Ma invesse, lu no’l ga scoltà la so cossiensa e el ga magnà del fruto. Qual che l’è stà el resultà? “El pecato l’è vegnesto al mondo, . . . cossita la morte la se ga spalià a tuti, parché tuti i gavea pecà.” (Rom. 5:12) Cossa che imparemo con Adon e Eva? Se no volemo far pecati, ghemo de scoltar la nostra cossiensa.

SFÒRSATE PAR CAPIR LA VOLONTÀ DE GEOVÀ

7. Cossa che imparemo del consìlio de Efesi 5:15-17?

⁷ Compagno ga sucedesto con Adon e Eva, tante volte Geovà ne dise quel che ghemo e quel che no ghemo de far. Ma altre volte, no ghen’è una lege che dise quel che ghemo de far. Alora, ghemo de seitar a “capir quala che la ze la volontà de Geovà”. (Ledi Efesi 5:15-17.a) La nostra cossiensa la ne giutarà a capir quel che Geovà el vol che femo, e cossita saremo boni de far dessision che ghe piase a lu.

8. Parché che due fradei i pol far dessision difarente nela medèsima situassion e ancora cossita contentar a Geovà?

⁸ Cossa pol giutarne a dessider cossa far quando no ghen’è una lege ciara dela Bìblia? Se doperemo la Bìblia par trenar la nostra cossiensa, savaremo quel che l’è el giusto de far. Ma due fradei i pol far dessision difarente nela medèsima situassion. Parché? Parché par dessider cossa far, i ga de pensar anca parché che i vol far qualcossa e i costumi del posto ndove i ze de star. Alora, se i fà dessision de acordo coi prinsipi dela Bìblia, tuti i due i pol restar cola cossiensa tranquila e i pol contentar a Geovà.

9. Spiega come due fradei i mete in pràtica Gàlati 6:4 par far una dessision. (Varda anca la stampa.)

⁹ Parlemo de due situassion. Due fradei che i ama a Geovà e che i ze de star in paesi difarenti i ze convidadi par senar cada un col so paron e coleghi de laoro. In tuti i due posti, i ga el costume de far el brinde. I fradei i sa che in questa sena lori i ndarà drio questo costume. Un fradel el desside partissipar del brinde parché el vede che l’è sol par selebrar che la firma la ze drio ndar ben. Quelaltro fradel el desside no partissipar del brinde. Parché? Parché, nel discorso, el so paron el parla dela so nassion come se la fusse meio che quele altre, e el fradel el vol esser neutro in questo assunto. La dessision dei fradei la ze stata difarente, ma tuti i due i ga contentà a Geovà. — Ledi Gàlati 6:4.b

IMPARA A FAR BONE DESSISION

10-11. Come che el “alimento sòlido” ne giutarà a trenar la nostra cossiensa? (Ebrei 5:13, 14)

¹⁰ Ebrei 5:13, 14c mostra che ghemo de trenar la nostra cossiensa. (Ledi.) Anca se in questi versìcoli no ghen’è la parola “cossiensa”, capimo che i vol dir che ghemo de imparar la difarensa intrà quel che l’è giusto e sbalià. Par noantri esser boni de trenar la nostra cossiensa, ghemo bisogno del “alimento sòlido”. Cossa che questo vol dir?

¹¹ Ndar in serca del “alimento sòlido” vol dir che no ghemo sol de cognosser i assunti prinsipai dela Bìblia, ma anca ne ocore imparar tante altre robe che le ne giuta a pensar come Geovà. Alora, ndaremo doperar la Bìblia par capir quel che Geovà el pensa sora un assunto. (1 Cor. 2:14, 15) In questo “alimento sòlido”, ghen’è anca i prinsipi bìblichi. Quando no ghen’è una lege che ne dise cossa far, noantri ghemo de studiar i prinsipi bìblichi par far una dessision che ghe piase a Geovà. — Pro. 2:4, 5.

12. In Ebrei 5:14, cossa che vol dir le parole “persone maure” e “trenade par meso dela pràtica”?

¹² In Ebrei 5:14, chi che le ze le “persone maure”? Le ze le persone che le cognosse tanto ben a Geovà e che le capisse come che lu el pensa. Lore le stùdia i prinsipi dela Bìblia e, vanti de far una dessision, le ze bone de capir se la ndarà contentar a Geovà o nò. E cossa che vol dir le parole “trenade par meso dela pràtica”? Vol dir che queste persone, vanti de far una dessision, le ga el costume de veder quel che la Bìblia la dise par capir cossa che Geovà el pensa sora el assunto. Cossita, le impara cada volta de pi a far bone dessision.

NO STÀ ASSAR GNENTE INTRIGARTE DE TRENAR LA TO COSSIENSA

13. Cossa pol suceder se no trenemo ben la nostra cossiensa?

¹³ L’è tanto importante trenar la nostra cossiensa par ela giutarne a saver quel che l’è giusto e sbalià. Femo cossita quando sempre pensemo in quel che Geovà el pensa sora i assunti. Ma se no trenemo la nostra cossiensa, ndaremo drio ale nostre voie o a quel che i altri i dise sora quel che l’è giusto e sbalià. (1 Tim. 4:1, 2) Robe come insegnamenti falsi, preconceto o le nostre voie sbaliade pol farne trenar mal la nostra cossiensa. (Isa. 5:20) Altre robe che le pol intrigarne le ze voler cada volta de pi soldi e altre robe, catar che semo pi importanti che i altri o pensar sol in quel che ne piase a noantri. Se ndemo drio a queste robe, no saremo drio trenar ben la nostra cossiensa, e ela no la podarà giutarne a far bone dessision.

14. (a) Parché che Adon e Eva i ga fato quel che l’è sbalià anca se i savea quel che l’è giusto? (b) Parla de esempi de altre persone che no le ze state bone de trenar la cossiensa par contentar a Geovà. (Varda el quadro “Lori no i ga trenà la so cossiensa”.)

¹⁴ Pensa in quel che Eva la ga fato. Ela no la era contenta con quel che Geovà ghe gavea dato, par quela la volea sempre de pi. La ze deventada orgoliosa e la volea esser come Dio. Ela la ga pensà che Dio no’l gavea mia el dirito de dirghe quel che l’è giusto o sbalià. Pensa anca in Adon. Lu el pensea sol in lu stesso, par quela, el ga catà pi importante star con Eva che contentar a Geovà. Nela Bìblia, catemo tanti altri esempi de persone che le savea cossa che ghe piasea a Geovà, ma col tempo, le ga scominsià a far robe che no ghe piasea mia a lu. Parché? Parché le ga assà che la ganànsia e el orgòlio trenesse la so cossiensa.

15. Cossa che pol trenar mal la nostra cossiensa, e cossa che la Bìblia ne incoraia a far?

¹⁵ Se stemo insieme con persone che no le rispeta a Geovà, fursi scominsiaremo a far robe che savemo che le ze sbaliade. (1 Cor. 15:33) Le persone che no le ama a Geovà no le se importa con quel che la Bìblia la dise che l’è giusto o sbalià. E, se stemo insieme con lore, podaremo scominsiar a pensar compagno. La Bìblia la dise che no ghemo de star con persone che “le ga un cuor che no’l sente pi gnente” e che “no le sa pi quel che l’è sbalià”. (Efe. 4:17-19) Par quela che ghemo de star “lontan de lore”. — 2 Tim. 3:1-5.

ASSA GEOVÀ TRENAR LA TO COSSIENSA

16. Quando che la nostra cossiensa la pol giutarne ancora de pi a far quel che ghe piase a Geovà? (Varda el quadro “Come doperar la cossiensa de maniera giusta”.)

¹⁶ Anca se semo imperfeti, la nostra cossiensa la pol giutarne a far quel che ghe piase a Geovà. La pol giutarne ancora de pi quando no ghen’è una lege nela Bìblia sora una dessision che ghemo de far. (1 Cor. 10:31) Ma la nostra cossiensa sol la ndarà laorar ben se seitemo trenarla de acordo coi prinsipi dela Bìblia. Cossita, la podarà giutarne a far quel che l’è giusto e contentar a Geovà.

17. Come che Geovà el ne insegna a pensar come lu, e come che questo ne giuta? (Romani 12:2)

¹⁷ Se semo disposti a imparar con Geovà, lu el pol giutarne a pensar dela medèsima maniera che lu. (Isa. 64:8; ledi Romani 12:2.d) La Bìblia la ne giuta a imparar a pensar come Geovà, parché la ga una mùcia de esempi che i mostra come lu el ga trenà e el ga dissiplinà i so servi. (2 Tim. 3:16) E podemo imparar de pi ancora sora la maniera de pensar de Geovà quando studiemo sora i insegnamenti e el bel esémpio de Gesù. — 1 Cor. 2:16.

18. Cossa che ghemo de far par gaver una vita felice e servir a Geovà con una cossiensa tranquila?

¹⁸ Alora, come che podemo far la nostra cossiensa laorar ben? Noantri no ghemo de ndar drio ale nostre voie sbaliade e de quel che i altri i dise. Ghemo de studiar ben la Bìblia par capir come che Geovà el pensa. (Sal. 1:1-3) Cossita, gavaremo una vita felice e podaremo servir a Geovà “con una cossiensa pura” e tranquila. — 2 Tim. 1:3.