Te sì bon de vinser la guera contra Sàtana e i so demoni!

1. De acordo con Efesi 6:11, 12, noantri semo nte una guera contra chi?

NOANTRI savemo che i servi de Geovà no i va ale guere. (Isa. 2:4; Gio. 18:36) Ma la Bìblia la dise che tuti noantri semo nte una guera contra Sàtana e i so demoni. (Ledi Efesi 6:11, 12.a) Ma sol saremo boni de vinser questa guera se se fidemo nel aiuto de Geovà. Anca l’è importante saver cossa che Sàtana e i so demoni i fà par ndar contra i servi de Geovà.

2. Cossa che ndaremo veder in questo stùdio?

² Nel stùdio passà, ghemo visto che Sàtana el vol che assemo de fidarse in Geovà e in Gesù. In questo stùdio, ndaremo veder due robe che Sàtana el fà par proar intrigarne de servir a Geovà. Prima, lu el vol che vegna fora problemi intrà noantri e i nostri cari fradei e sorele. Seconda, lu el proa far che le persone le vegna contra noantri parché el vol che restemo con paura e che se fermemo de predicar.

SÀTANA EL VOL ROVINAR LA NOSTRA AMICÌSSIA COI FRADEI

3. Cossa che Sàtana el vol che noantri femo?

³ Sàtana el vol che ndemo un contra el altro invesse de ndar contra lu. Lu el vol che femo compagno le persone del mondo, che no le ga amor e gnanca le se fida una nel’altra. Sàtana el vol che ndemo contra i fradei e che sbrontolemo contra lori e contra la organisassion de Geovà. — Rom. 16:17.

4. Parché che el rè Saul l’è ndato contra Davi? (Varda anca la stampa.)

⁴ Par esémpio, pensa quando el rè Saul el ga scominsià a odiar Davi. Prima, Saul el amea a Davi parché lu l’era un bravo soldà. (1 Sam. 18:5) Ma quando Saul el ga visto che le persone le ghe volea pi ben a Davi che a lu, el ga tacà a odiarlo e el ga proà coparlo tante volte. (1 Sam. 18:9-11) Parché che Sàtana el volea che Davi el fusse copà? Parché Geovà el gavea dito che Davi el saria el pròssimo rè. (1 Sam. 16:13) Alora, lu el restaria tanto contento se no sucedesse quel che Geovà el gavea dito. Sàtana ghe ga piasesto de veder che Saul l’era drio restar cada volta pi cativo con Davi e che el ga proà copar el rè che Geovà el gavea scoliesto.

5. Parché che Sàtana el vol che ghemo invìdia dei fradei? (Tiago 3:14-16)

⁵ Sàtana el sa che, quando mostremo amor par i nostri fradei e sorele, Geovà el ne giuta e el ne benedisse. (Sal. 133:1) Ma Sàtana no’l vol che questo suceda. Par quela, el proa far che vegna fora problemi nela congregassion. Se noantri ghemo invìdia dei fradei, come Saul el ga bio de Davi, saria fadiga mostrarghe amor. (Mar. 12:30, 31) Se fessino cossita, Geovà no’l ndaria acetar la nostra adorassion. Par quela, el dissìpolo Tiago el ga parlà del perìcolo de esser invidiosi dei altri. — Ledi Tiago 3:14-16.b

6. Cossa che te ghè imparà col bel esémpio de Gionatan? (Varda anca la stampa.)

⁶ Se amemo i nostri fradei e sorele, no gavaremo invìdia de lori. Invesse, saremo amighi leai. Varda el esémpio de Gionatan, fiol de Saul. Gionatan no’l gavea invìdia de Davi compagno a Saul. Invesse, lu l’era ùmile, el vedea a Davi come so amigo e lo ga giutà. Gionatan el gavea acetà che Geovà el volea che Davi el fusse el pròssimo rè. Lu el ga dito a Davi: “Ti te sarè el rè de Israel.” — 1 Sam. 23:16, 17.

7. Cossa che podemo far par no assar che Sàtana el rovine la union dela congregassion? (Efesi 4:25-27)

⁷ Ghen’è nantra maniera che Sàtana el proa far che vegna fora problemi intrà de noantri. I servi de Geovà i ga culture e costumi difarenti e ghe piase robe difarente. Alora, Sàtana el vol che no ndemo intesi e che restemo cativi un colaltro par causa de queste difarense. Ma cossa che podemo far par no assar che Sàtana el rovine la union dela congregassion? Se vien fora un problema con un fradel o sorela, ghemo de far presto risolverlo. (Ledi Efesi 4:25-27.c) Ghemo de far pi forte el amor par i fradei. L’è importante ricordarse che Geovà el vol ben a tuti noantri e che ghemo bisogno un del altro, cossita come le parte de un corpo. (1 Cor. 12:12) Ghemo de ricordarse anca che tuti noantri semo insieme nte una guera contra Sàtana e i so demoni. — 1 Pie. 5:8, 9.

8. Cossa ghemo de far se un fradel o una sorela ne disgusta?

⁸ Quando un fradel o una sorela parla o fà qualcossa che ne disgusta, ghemo de ricordarse che anca noantri sbaliemo. Tuti noantri semo imperfeti. Alora, come passemo tanto tempo insieme nela predicassion e in altri laori dela organisassion, l’è sicuro che ndaremo disgustar un al altro. (Ecl. 7:20) Ma quando questo sucede, ghemo de portar passiensa un colaltro, far presto meter a posto le robe intrà de noantri e suito perdonarse. (Col. 3:12-14) Volemo sforsarse par amar un al altro e par seitar a esser amighi, parché Geovà e Gesù i vol che femo cossita. — Gio. 17:20, 21.

SÀTANA EL PROA DESANIMARNE PAR MESO DELA PERSEGHISSION

9. Come che Sàtana el dopera la perseghission par proar desanimarne?

⁹ Nantra maniera che Sàtana el proa desanimarne la ze par meso dela perseghission. El apòstolo Paolo el ga dito che tuti i dissìpoli de Gesù i saria perseghidi. (2 Tim. 3:12) Se pensessino sol in come l’è ingiusto esser perseghidi, ne vegnaria voia de vingarse. Ma se fessino cossita, no ndarissino pi consentrarse nel nostro laoro pi importante, che l’è predicar sora el Regno. — Rom. 12:19-21.

10. Cossa che Isache el ga fato quando i filistei i ga fato una ingiustìssia contra lu?

¹⁰ Pensemo sora el esémpio de Isache, fiol de Abraon. Isache l’era pròpio sior. Lu el gavea una mùcia de bèstie e el gavea bisogno de tanta àqua par tenderle. Ma i so visini filistei i gavea invìdia de lu e i ga impienio de tera tuti i possi che i servi de Abraon i gavea verto. (Gén. 26:12-18) Cossa che Isache el ga fato? Isache el se ga cambià par nantro posto e el ga verto altri possi. Ma i filistei i ga dito che anca quela àqua la era soa e i ga scominsià a barufar coi pastori de Isache. Isache el podaria esser sentio desanimà con quela ingiustìssia, ma lu no’l volea che i barufesse. Par quela, lu el se ga cambià par nantro posto e Geovà lo ga benedio. (Gén. 26:19-25) Alora, cossa che imparemo? Quando noantri semo maltratadi, ghemo de portar passiensa e far la pace cossita come Isache el ga fato.

11. Cossa che Gesù el fea quando altri i lo tratea mal?

¹¹ Quando Gesù l’è vegnesto ala Tera, lu el ga infrontà tante dificoltà. Par esémpio, quei dela so fameia i ga dito che lu l’era vegnesto mato. (Mar. 3:21) Lìderi religiosi i disea che lu no’l gavea el dirito de insegnar ale persone sora Dio. (Luc. 11:15, 16) Un dei so apòstoli lo ga fin tradio. (Mat. 26:14-16) Arquanti lìderi religiosi i se ga metesti insieme dele autorità del governo par copar Gesù come se el fusse un criminoso. (Mar. 15:1, 13-15) Ma Gesù no l’è restà desanimà gnanca el ga proà vingarse. Quando soldadi i ze vegnesti par meter Gesù in preson, el apòstolo Piero el ga proà difenderlo. Lu el ga taià la récia del schiavo del sasserdote prinsipal. Ma Gesù no l’era de acordo con quel che Piero el gavea fato e el ga curà la récia del omo. (Luc. 22:50, 51) In tute queste situassion, Gesù no’l ga mai proà vingarse de quei che i lo tratea mal. Invesse, el pi importante par lu l’era seitar a far quel che Geovà el volea.

12. De acordo con Mateo 5:43, 44, come ghemo de tratar quei che i ne vien contra?

¹² Anca noantri infrontemo tante dificoltà parché Sàtana el vol che se fermemo de predicar le bone notìssie. Par esémpio, pol esser che arquanti dela nostra fameia che no i serve a Geovà o altre persone i ne vegna contra. Ancora cossita, Gesù el ga dito che ghemo de amar e tratar ben i nostri nemighi, e mai proar vingarse de lori. (Ledi Mateo 5:43, 44.d) Ghemo de obedir a quel che Gesù el ga dito e sempre mostrar bontà, amor e passiensa con tuti, anca a quei che ne vien contra. — 1 Cor. 13:4.

13. Parché che ghemo de rispetar i governi anca se lori i ne vien contra? (Varda anca la stampa.)

¹³ Noantri ghemo de rispetar i governi anca se lori i fà lege che pol intrigar la nostra predicassion o adorassion a Geovà. Parché? Parché Geovà el ga dito che ghemo de far cossita. (Rom. 13:1, 2) Sàtana no l’è par de drio de tute le lege che i governi i fà. Ma lu el vol che restemo cativi con queste autorità e che ghe ndemo contra. Ancoi, tante persone nel mondo le fà protesti contra el governo o contra le dessision che i fà. Ma i servi de Geovà mai i fà cossita. (Pro. 24:21, 22; Ecl. 8:2, 3) Sàtana el restaria contento se proessino far cambiamenti nel governo e se se fermessino de fidarse nel Regno de Dio. — Gio. 15:19.

14. Cossa che ghemo de ricordarse sora quei che i vien contra i servi de Dio?

¹⁴ Arquanti de quei che prima ndea contra le Testimònie de Geovà, adesso, i ze nostri fradei e sorele. (1 Tim. 1:12, 13) Par quela, ricordate che, anca se le persone ‘le te dise su, le te trata mal e le dise busie’, lore le pol cambiar. (Mat. 5:11) Nantra roba che te pol far la ze pregar a Geovà par domandar che i governi i se ferme de vegnerne contra. (1 Tim. 2:1, 2) Prega anca par quei dela to fameia e i to coleghi de laoro o de scola. Domanda a Geovà che el te giute a saver come tocar el so cuor e porta passiensa con lori. Una dona che vanti la ndea contra so omo che el studiea la Bìblia, ma dopo la ze deventada una Testimònia de Geovà, la ga dito: “Podemo giutar i altri a cambiar la so maniera de pensar se seitemo a portar passiensa con lori.”

15. Parché che no ghemo de pensar che semo boni de finir cole robe ingiuste?

¹⁵ Geovà el sa de tuti i problemi che semo drio infrontar e el sa che l’è fadiga ndar avanti par causa de tute le robe ingiuste che sucede. (Sal. 37:18) Savemo che no saremo mai boni de finir con tute le ingiustìssie che ghen’è ancoi. (Ecl. 1:15) Ma Geovà el sarà bon de finirle. Lu el ga prometesto che el finirà con tuto el sofrimento che vien par causa de Sàtana e de quei che i ze dela so banda. (1 Gio. 3:8; Apo. 21:5) Ma fin che questo no suceda, ghemo de portar passiensa e mostrar amor par tute le persone. Ghemo de doperar ben el nostro tempo e la nostra forsa par giutar tute le persone che podemo a deventar amighe de Geovà.

PODEMO VINSER LA GUERA CONTRA SÀTANA!

16. Cossa che ne giutarà a vinser la guera contra Sàtana? (Varda anca la stampa.)

¹⁶ La Bìblia la ne dise che semo boni de vinser la guera contra Sàtana e i so demoni. (Tia. 4:7; 1 Gio. 5:4, 5) Gaver una forte fede in Geovà e in Gesù ndarà giutarne a vinser questa guera, a seitar a amar i nostri fradei e a esser unidi. (Efe. 6:16) Alora, seita a far pi forte la to fede in Geovà e in Gesù.

17. Cossa che no volemo mai far?

¹⁷ No volemo mai assar che Sàtana el vinsa la guera contra noantri. Lu el seitarà a proar farne ndar contra i nostri fradei e a desanimarne de predicar. Ma Geovà e Gesù i ga prometesto che i ndarà giutarne in questa guera se seitemo a esser leai a lori. Anca i nostri fradei e sorele i ze insieme de noantri in questa guera. Quando i altri ne vien contra, ghemo de sforsarse par far quel che Gesù el ga dito e tratarli con bontà. (Luc. 6:27, 28) Alora, no stà desister de lotar contra Sàtana. Te pol esser sicuro che te sarè bon de vinser questa guera!