No stà mia creder nele busie de Sàtana!

1. Come che Sàtana el proa fermarne de servir a Geovà?

DOPO che ghemo dessidio servir a Geovà, Sàtana e i so demoni i ze restadi pròpio cativi. Lori no i vol che amemo e servimo a Geovà. Ma Sàtana el sa che no’l sarà bon de far questo se ghemo una forte amicìssia con Geovà e ricevemo el So aiuto. Alora, Sàtana el proa intrigar la nostra amicìssia con Geovà. Una dele maniere che el fà questo la ze farne creder che Geovà e Gesù no i ne ama. — 2 Cor. 11:14; Tia. 1:6.

2. Parché che l’è importante fidarse in Geovà e in Gesù?

² I soldadi che i ze nte una guera i ga de fidarse del tuto nel so comandante. Se no i fà questo, pol esser che i scomìnsie a far quel che i vol lori. Questo pol esser tanto pericoloso parché i podaria fin morir. Noantri podemo dir che semo nte una guera contra Sàtana e i so demoni. (Efe. 6:12) E, se no se fidemo in Geovà e in Gesù, pol esser che no volaremo pi obedirghe o ricever el so aiuto. Par quela, Sàtana el vol che se fermemo de fidarse in lori. Come che Sàtana el ga fato questo nel passà e come lo fà anca ancoi? Cossa pol giutarne a no creder nele busie de Sàtana? Questo stùdio el ndarà giutarne a capir la risposta a queste domande. E, nel pròssimo stùdio, ndaremo veder de che altre due maniere Sàtana el proa intrigarne de servir a Geovà.a

SÀTANA EL GA CONTÀ BUSIE SORA GEOVÀ E GESÙ

3. Cossa che Sàtana el ga dito a Eva?

³ Pena dopo che Adon e Eva i ze stati creadi, Sàtana el ga proà far che Adon e Eva i desobedisse a Geovà. Sàtana el ga dito a Eva: “L’è stà pròpio cossita che Dio el ga dito, che no gavé de magnar de tute le piante del giardin?” (Gén. 3:1-5) Lu el volea che Eva la pensesse che Geovà no l’era drio darghe tuto quel che i gavea de bisogno. Anca se questa la era una bruta de una busia, Adon e Eva i ga credesto in Sàtana e i ga fato quel che lu el volea. Geovà el ghe gavea dato la vita e tuto quel che i gavea de bisogno, ma i ga dessidio desobedirghe. — Gén. 3:6.

4. In che busie Sàtana el volea che Giò el credesse?

⁴ Anca dopo de Adon e Eva, Sàtana el ga seità contar busie. Par esémpio, lu el ga doperà tre falsi amighi de Giò par parlar robe brute sora Geovà. Lu el volea che Giò el pensesse che Geovà no lo amea e no’l ghe dea valor. (Giò 22:1-3) Lu anca el ga fato Giò sofrir tanto parché el volea che el ghe desse la colpa a Geovà e che el se fermesse de amarlo e servirlo. Ma Giò el ga seità leal. — Giò 27:1, 5.

5. Come che Sàtana el ga proà intrigar le persone de deventar dissìpoli? (Mateo 11:19)

⁵ Sàtana anca el ga proà intrigar le persone de deventar dissìpoli. Par esémpio, lu el ga doperà lìderi religiosi par contar busie sora Gesù. Tanti i ga credesto in queste busie e i ga fin copà Gesù. — Ledi Mateo 11:19;b 27:27-31; Mar. 14:55, 56; Gio. 8:41-45.

6-7. Come che Sàtana el ga proà fermar i dissìpoli de predicar?

⁶ Dopo che Gesù l’è morto, Sàtana el ga proà desanimar i dissìpoli de Gesù de predicar le bone notìssie. Prima, lu no’l volea che le persone le credesse che Dio el gavea ressussità Gesù. Par quela, Sàtana el ga doperà arquante persone par dir che i dissìpoli de Gesù i gavea ciavà el so corpo. (Mat. 28:11-15) Dopo, Sàtana anca el ga doperà lìderi religiosi e governanti par perseghir i dissìpoli. Lu el pensea che lori i gavaria paura de seitar a far el laoro che Gesù el ghe gavea dato. — Ati 7:57–8:1; 12:1-3; 28:22.

⁷ L’è vera che arquanti dissìpoli i ze restadi spauradi e i se ga fermà de predicar. Ma quasi tuti i ga seità leai e no i se ga fermà de parlar sora Gesù ai altri. Lori i ga capio che Sàtana e i so demoni i era so nemighi e che i volea intrigarli de servir a Geovà. (Ati 4:18-20; 1 Pie. 5:8) Anca ancoi Sàtana el proa desanimarne de servir a Geovà. Adesso, ndaremo veder come che lu el proa far questo.

SÀTANA EL SEITA A DIR BUSIE SORA GEOVÀ E GESÙ

8. Come che Sàtana el dopera le religion false par contar busie sora Geovà e Gesù?

⁸ Ancoi, Sàtana el proa sconder dele persone la verità sora Geovà e Gesù. Lu el dopera le religion false par contar busie sora lori. (Gio. 8:44; 2 Cor. 4:3, 4) Par esémpio, arquanti lìderi religiosi i insegna che Geovà e Gesù i ze la medèsima persona. Cossita, tanti no i sa che el nome de Dio l’è Geovà e i adora a Gesù. (Mat. 4:10; Gio. 4:23) Tante de queste persone le se fida del tuto in quel che le ga imparà. Par quela, lore no le vol scoltarne quando ghe predichemo le bone notìssie e le pol fin vegnerne contra.

9. Come che Sàtana l’è drio doperar le religion false par intrigar le persone de cognosser a Dio? (Geremia 23:26, 27)

⁹ Se volemo esser amighi de una persona, una dele prime robe che ne ocore saver la ze el so nome. La Bìblia la dise che, se cognossemo el nome de Dio e se fidemo in lu, gavaremo la so protession. (Pro. 18:10) Ma, par tanto tempo, Sàtana l’è drio doperar le religion false par intrigar le persone de cognosser el nome de Dio e de esser So amighe. (Ledi Geremia 23:26, 27.c) Par esémpio, lu el ga doperà arquanti tradutori dela Bìblia par cavar via el nome de Dio de arquante dele so tradussion. Sàtana anca el dise che Geovà el fà le persone sofrir. Par quela, tanti i ga paura de Dio e no i vol esser so amighi. (Tia. 4:8) Sàtana el vol che anca noantri scominsiemo a gaver dubi sora Geovà.

10. Parché che fursi qualchedun el podaria restar cativo con Geovà?

¹⁰ Quando semo drio tribolar, Sàtana el vol che pensemo che Geovà no’l se preocupa con noantri. Lu el vol che restemo cativi con Geovà parché lu no’l finisse el nostro sofrimento. (Pro. 19:3) Podemo fin scominsiar a pensar: ‘Se Geovà no’l me giuta, parché go de far quel che lu el dise?’ Ma se pensemo cossita, ndaremo contentar a Sàtana e nò a Geovà.

11. Cossa che Sàtana el dopera par intrigarne de fidarse in Geovà? (Varda anca la stampa.)

¹¹ Sàtana no’l vol che se fidemo in quel che Geovà el dise che l’è giusto o sbalià. Una dele robe che lu el dopera par intrigarne de fidarse in Geovà la ze la internet. In arquanti site, le persone le fà de manco quel che l’è scrito nela Bìblia e le dise che no ghemo bisogno de Dio par saver quel che l’è giusto o sbalià. Noantri vedemo che Sàtana, “el governante del mondo”, l’è drio esser bon de imbroiar tante persone. — Gio. 14:30; Isa. 5:20; 1 Tim. 4:1, 2.

12. Parché che no ghemo de ndar drio a quel che le persone del mondo le dise che l’è giusto o sbalià?

¹² Se scoltessino quel che le persone le dise sora quel che l’è giusto o sbalià, podarissino scominsiar a pensar che quel che Geovà el ne dise no l’è mia giusto. Una gióvena che la ga nome Sarad la ga dito: “Go scominsià a cambiar la me maniera de pensar par causa de quel che ero drio imparar nela scola e dele persone che mi stea insieme. Me ga scominsià a piaserme le robe che Geovà el dise che le ze sbaliade. Go passà massa tempo su par la internet e go ledesto tanto sora quel che le persone le disea. Alora, go scominsià a pensar compagno a lore e no ero pi contenta de servir a Geovà gnanca de star insieme cola me fameia e coi fradei dela congregassion.” Dopo de un tempo, Sara la ga cambià la so maniera de pensar e la ga fato pi forte la so amicìssia con Geovà. Cossita, no la ga assà che Sàtana la imbroiesse. Cossa che la ga giutada?

13. Cossa gheto imparà con Sara?

¹³ Sara la ga capio che la gavea de far tanti cambiamenti par seitar a esser amiga de Geovà e de Gesù. Ela la ga dito: “Mi go domandà che Geovà el me giutesse a far boni amighi, e go anca studià le nostre publicassion. El vìdeo Os Jovens Perguntam — Como Fazer Verdadeiros Amigos? me ga giutà tanto.e In questo vìdeo, la sorela la ga infrontà i medèsimi problemi che mi, ma la ze stata ùmile e la ga domandà aiuto ai so genitori. Mi go fato la medèsima roba. Cossita, i me genitori, i ansiani e brave sorele dela congregassion i me ga giutà a assar indrio i me bruti amighi. Mi go capio che, par servir a Geovà, me ocore far de pi che sol ndar ale riunion o obedirghe ai me genitori. Me ocore gaver una forte amicìssia con Geovà e capir ben parché che credo in quel che lu el dise.”

SÌPIA SICURO CHE GEOVÀ E GESÙ I VOL ESSER TO AMIGHI

14. Cossa ghemo de far par no assar che Sàtana el ne imbroie? (Varda anca la stampa.)

¹⁴ Par seitar a esser amighi de Geovà, ne ocore scòlier boni amighi. (Tia. 4:4) Anca ne ocore star atenti par no creder in tuto quel che ledemo e scoltemo. Par esémpio, ancoi ghen’è tante brute busie e informassion che no se pol saver se le ze pròpio vere o nò. Se no stemo atenti, podemo scominsiar ndarghe drio a queste busie. Ma se studiemo la Bìblia e le nostre publicassion e stemo insieme de bravi fradei, no saremo mia imbroiadi. Se cognossemo ben la Bìblia, saremo boni de capir quel che l’è vero o nò e no assaremo che Sàtana el ne fae gaver dubi sora Geovà. — Pro. 13:20; Ati 17:11.

15. Come che podemo esser ancora pi sicuri che Geovà e Gesù i vol che semo felici?

¹⁵ Quando studiemo ben la Bìblia e cognossemo ben a Geovà e a Gesù, restemo ancora pi sicuri che lori i vol che semo felici. (Pro. 22:19) La Bìblia la parla de tanti òmini e done che i se ga fidà in Geovà e Gesù. E, quando pensemo in come che i se preocupea con queste persone, se fidemo ancora de pi in lori. La Bìblia anca la parla de tante bele robe che Geovà e Gesù i ga dito che ne assa sicuri che lori i ne ama. Par esémpio, Geovà el ga dito che el ama i so servi de pi che una mare la ama el so bambin. (Isa. 49:15) Lu anca el ga dito che le persone che le ama el so nome le ga tanto valor par lu. (Mal. 3:16, 17) E la Bìblia anca la mostra che Gesù el ne ama tanto, parché el ga dato la so vita come sacrifìssio par noantri. — Gio. 15:12, 13.

16. Parché che l’è bon pensar in come Geovà el ga belche giutà noantri e altri fradei e sorele? (Salmo 118:5, 6)

¹⁶ Se pensemo in come che Geovà e Gesù i ne ga belche giutà, restaremo ancora pi sicuri che lori i ne ama. Par esémpio, podemo pensar nele orassion che Geovà el ga belche rispondesto o nte un colpo che lu el ne ga dato forsa par ndar avanti. Cossita, saremo sicuri che lu el seitarà a tenderne. Noantri anca podemo domandar ai nostri fradei e sorele come che Geovà li ga belche giutadi. (Pro. 22:17) Se femo cossita, saremo pròpio sicuri che Geovà e Gesù sempre i ne darà la forsa che ne ocore no importa quel che infrontemo. — Ledi Salmo 118:5, 6.f

17. De acordo con Gioani 10:29, de cossa podemo esser sicuri se seitemo leai a Geovà?

¹⁷ Tuti noantri volemo seitar a esser amighi de Geovà e Gesù. Ma Sàtana el vol che se fermemo de fidarse in lori. Lu el seitarà a far cossita fin che Geovà lo finissa fora par sempre. (Apo. 20:1-3, 10) Alora, par seitar leai, ne ocore far pi forte la nostra amicìssia con Geovà e fidarse che lu e Gesù i ne tende. Se femo cossita, saremo sicuri che Geovà el seitarà protegerne e che nissuni i pol intrigarlo de tenderne. — Ledi Gioani 10:29;g Tia. 4:7.

18. Cossa che vederemo nel pròssimo stùdio?

¹⁸ Nel pròssimo stùdio, ndaremo veder altre due robe che Sàtana el fà par proar finir cola nostra amicìssia con Geovà. Prima, lu el proa rovinar la pace intrà nostri fradei e sorele. Seconda, lu el dopera i nostri nemighi par vegnerne contra. E anca vederemo come che podemo darghene fora con queste tràpole de Sàtana e seitar leai a Geovà.