8-14 DE GIUGNO DE 2026
CÀNTICO 8 Geovà l’è el refùgio
El “Dio dela verità” sempre el fà quel che el promete
“Te me ghè salvà, ò Geovà, Dio dela verità.” — SAL. 31:5.
COSSA CHE NDAREMO IMPARAR?
In questo stùdio, vederemo parché che podemo fidarse che Geovà el ndarà far sempre quel che el promete. Anca ndaremo veder che lu el ndarà finir fora con Sàtana e con tute le so busie.
1. De acordo col Salmo 31:2-5, parché che podemo fidarse in Geovà?
IN QUESTO mondo de Sàtana, le persone le conta tante busie, le imbroia e le tradisse una al’altra. Tanti i pensa che no i pol fidarse in nissuni. Par esémpio, tanti paroni de negossi i proa imbroiar i altri. Tanti de quei che i vende robe i imbroia i altri par far che le compre. E tanti i ga visto che no i pol gnanca fidarse nei so amighi. Ma l’è tanto bel saver che podemo fidarse in Geovà parché lu l’è el “Dio dela verità”. (Ledi Salmo 31:2-5.a) Podemo esser sicuri che Geovà el fà tute le robe giuste e che mai el conta busie.
2. Cossa che vederemo in questo stùdio?
2 In questo stùdio, vederemo parché podemo fidarse in Geovà de tuto el cuor e come che lu el finirà col mondo de Sàtana. Vederemo anca quel che Geovà l’è drio far adesso par realisar la promessa che el ga fato par i umani e par la Tera. Questo stùdio ndarà giutarne a gaver ancora de pi coraio de parlar sora Geovà ai altri.
PARCHÉ CHE PODEMO FIDARSE IN GEOVÀ?
3. Parché che podemo fidarse in Geovà?
3 Noantri podemo fidarse in Geovà parché lu l’è el Creador. Geovà el ga creà el Universo, la Tera, i umani e tute le altre robe. (Gén. 1:1; Sal. 36:9; Apo. 4:11) Lu el ga anca creà tuto quel che ne ocore par seitar vivi, come la ària e la àqua. Geovà anca el ga el poder par controlar tuto quel che sucede nel Universo e sempre lo gavarà. Alora, podemo fidarse del tuto nele so promesse e esser sicuri che quel che el ne domanda de far l’è par el nostro ben.
4. Come che savemo che Geovà el ne ama?
4 Noantri podemo fidarse in Geovà parché lu el ne ama. Geovà el ga creà i umani parché el volea che i fusse felici e i gavesse una bela vita. Lu el ne ga creà con qualità compagno a lu, come el amor e la bontà. (Gén. 1:26) Geovà anca el ne ga dato la libertà de far le nostre dessision e el ne ga dato la Tera, che l’è un bel posto par viver. (Sal. 115:16) Lu anca el ga dato ai primi umani, Adon e Eva, el bel laoro de tender dela Tera e farla deventar un paradiso. (Gén. 1:28; 2:15) Geovà el ga dato a lori tante robe de magnar, piante, bèstie e cossita via. Questo mostra che Geovà el ne ama tanto. — Sal. 103:17.
5. (a) Cossa che Geovà el ga fato dopo che Adon e Eva i ghe ga desobedio? (b) Che promesse de Geovà le se ga belche realisà? (Varda el quadro “Geovà sempre el parla la verità”.)
5 Noantri podemo fidarse in Geovà parché lu sempre el fà quel che el promete. Geovà no’l ga creà la Tera “par gnente ma par le persone viver nela”. (Isa. 45:18, 19) Quando Adon e Eva i ga desobedio a Dio, lori i ga scominsià a vegner veci e i ze morti. Fursi parea che Sàtana l’era stà bon de intrigar Geovà de far la So volontà. Ma Dio sempre el fà quel che el promete. (Isa. 46:10, 11) Lu ancora el vol che la Tera la devente un paradiso e che le persone le viva par sempre. L’è par quela che lu el ga assà che Adon e Eva i gavesse fioi e el ga mandà el so Fiol par dar la so vita come sacrifìssio par salvarne. Cossita, ghemo la speransa de viver par sempre nte un paradiso nela Tera. — Gio. 3:16.
GEOVÀ SEMPRE EL FÀ QUEL CHE EL PROMETE
6. Cossa che Geovà el ga dito che sucederia con Sàtana dopo che Adon e Eva i ga desobedio?
6 Adon e Eva i ga desobedio a Geovà par causa de quel che la “serpente original” la ghe ga dito. La Bìblia la ciama questa serpente de “Diaol e Sàtana”.b (Apo. 12:9; Gén. 3:4, 5; Gio. 8:44) Dopo de quel che ga sucedesto nel giardin del Èden, Geovà el ga dito che Sàtana el saria finio fora. (Gén. 3:15) Vanti che questo sucedesse, tanti i ndaria drio a Sàtana e i saria come lu. Ma tanti anca i seitaria leai a Geovà.
7. Chi che va drio a Sàtana, e cossa che ndarà suceder con lori?
7 Ancoi, tanti i va drio a Sàtana, come àngeli rugni e persone che no le vol obedir a Dio. Par quela, lori i ze deventadi parte dela dissendensa de Sàtana. Ma Geovà el ga belche dessidio el giorno che el ndarà finir fora con Sàtana e con tuti quei che i ghe va drio. — Dan. 2:44; Rom. 16:20.
8. Cossa che Gesù el ga fato in 1914? (Varda anca la stampa.)
8 Parché che podemo esser sicuri che Geovà el ndarà pròpio finir con Sàtana e con tuti quei che i ghe va drio? In 1914, Gesù el ga fato guera contra Sàtana e i demoni e li ga paradi via par la Tera. (Apo. 12:7-9) Anca se questa guera la ze stata nel cielo, tuti noantri semo drio sofrir. La Bìblia la dise: “Guai dela tera e del mar parché el Diaol l’è vegnesto do con granda ràbia parché el sa che el ga sol una scianta de tempo.” (Apo. 12:12) Dopo de 1914, Sàtana l’è drio far tuto quel che el pol par far le persone ndarghe drio. Par quela che ghen’è tanti problemi nel mondo ancoi. Ma suito Gesù el ndarà vinser Sàtana del tuto, e el ndarà finir fora con lu e con tuti quei che i ghe va drio. (Apo. 6:2) Gesù anca el ndarà mostrar che Sàtana l’è rugno e che tuto quel che el ga dito sora Geovà l’è una busia. (Sal . 45:4-6) Tuti i saverà che Geovà l’è el Dio dela verità! — Eze. 38:23.
Prima Guera Mondial: U.S. National Archives photo; bomba: USAF photo; pandemia: blvdone/stock.adobe.com; protesto: inhauscreative/E+ via Getty Images
De 1914 in qua, ghen’è sempre de pi problemi nel mondo (Varda el paràgrafo 8.)
GEOVÀ L’È DRIO RIUNIR QUEI CHE I AMA LA VERITÀ
9. Chi che Geovà l’è drio riunir ancoi?
9 Ancoi, Geovà l’è drio “riunir tute le robe par meso de Cristo, le robe nel cielo e nela tera”. (Efe. 1:10) Ma cossa che questo vol dir? “Le robe nel cielo” vol dir i untadi che Geovà el ga scoliesto par governar insieme de Gesù nel cielo. E “le robe nela tera” vol dir i servi de Geovà che i viverà par sempre in Paradiso nela Tera. Questi servi fedeli i ze drio sforsarse par parlar sora Geovà ai altri e par mostrar che Sàtana l’è un busier.
10. De acordo con Apocalisse 14:6, 7, come che Geovà l’è drio giutar le persone a cognosser la verità?
10 Geovà l’è drio meter insieme quei che i vol cognosser la verità par meso del laoro pi grando de predicassion che ga belche sucedesto. (Ledi Apocalisse 14:6, 7.c) Geovà anca l’è drio doperar i àngeli par giutar so pòpolo a insegnar la verità a queste persone. Par meso del laoro de predicassion, lu l’è drio mostrar che Sàtana el dopera le religion false par contar busie sora lu. (Apo. 18:2, 4) Suito, Geovà el ndarà finir fora cole religion false, e tuti i so servi leai i ndarà darghe la glòria che lu el mèrita. — Apo. 17:16.
11. Come che podemo saver chi che l’è drio adorar a Geovà dela maniera giusta?
11 Geovà el vol che tuti i cognossa la verità, no importa la so cultura, el posto ndove i ze de star o se i ze siori o poareti. (Apo. 7:9, 10) Quando lori i scolta “le bone notìssie”, suito i capisse che quel che i ze drio imparar l’è la verità e i ga voia de servir a Geovà insieme del so pòpolo. (Mar. 13:10) Ancoi, l’è fàcile veder chi che l’è drio servir a Geovà dela maniera giusta e chi che no l’è mia. El profeta Malachia el ga dito: “Valtri ndaré veder nantra volta la difarensa intrà la persona giusta e la persona rugna, intrà quel che el serve a Dio e quel che no lo serve mia.” (Mal. 3:18) Alora, par meso de quel che i fà e del laoro de predicassion, i servi de Geovà i mostra che i ze drio adorar el Dio dela verità.
12. Cossa che sucede par via del laoro de predicassion?
12 Quando predichemo le “bone notìssie”, noantri semo drio obedir al comandamento de Gesù e anca semo drio giutar a realisar professie. (Mat. 24:14; 28:18-20) Par causa dela predicassion, tanti i deventa dissìpoli de Gesù e i scomìnsia a gaver la speransa de adorar a Geovà par sempre. L’è tanto bel saver che Geovà l’è drio doperarne par realisar la so volontà!
GEOVÀ EL NDARÀ FAR QUEL CHE EL GA PROMETESTO
13. Chi che Sàtana l’è drio perseghir, e parché?
13 Sàtana l’è pròpio cativo parché “el sa che el ga sol una scianta de tempo” vanti che lu e questo mondo bruto i sìpia finidi fora. (Apo. 12:12, 13) Par quela, lu l’è drio meterghela tuta par perseghir i untadi, che i ze quei che Geovà el ga scoliesto par governar insieme de Gesù nel cielo. (Apo. 12:17; 14:12) Lu anca l’è drio perseghir tuti quei che i giuta i untadi a far el laoro de predicassion.
14. Cossa che sucederà quando Sàtana el proarà finir fora col pòpolo de Dio? (Varda anca la stampa.)
14 Dopo che le religion false le sarà finide fora, quei che i va drio a Sàtana i volarà finir fora coi servi de Geovà. Cossita, scominsiarà el Armagedon. (Apo. 16:13, 14, 16) Ma Gesù e i àngeli i ndarà proteger el pòpolo de Dio e i finirà fora con questo mondo de Sàtana. (Apo. 19:19-21) No ghen sarà pi persone rugne, gnanca busieri. (Apo. 21:8) Tuti nela Tera i saverà che Geovà sempre el fà quel che l’è giusto e che l’è pròpio de fidarse.
Gesù e i àngeli i ndarà finir coi nemighi de Dio nela guera del Armagedon (Varda el paràgrafo 14.)
15. Parché che podemo esser sicuri che Geovà el ndarà far quel che el ga prometesto? (Isaia 65:16, 17) (Varda anca la stampa.)
15 Ancoi, le persone in tuto el mondo le seita a barufar e a contar busie una al’altra. Ma col aiuto de Geovà, noantri semo unidi e tante persone che le ama la verità le ze drio vegner adorarlo insieme de noantri. Gnente pol intrigar Geovà de benedir el so pòpolo e el laoro che i fà par lu. (Ledi Isaia 65:16, 17.d) Podemo esser sicuri che Geovà sempre el fà quel che el promete. Quel che el apòstolo Paolo el ga scrito in Romani 8:38, 39 ne assa pròpio sicuri de questo. Lu el ga dito: “Gnanca la morte, gnanca la vita, gnanca àngeli, gnanca governi, gnanca cose adesso, gnanca cose par vegner, gnanca poderi, gnanca altessa, gnanca profondità, gnanca qualche altre creassion podarà spartirne del amor de Dio che l’è in Cristo Gesù, nostro Signor.”
Quando saremo in Paradiso, no ndaremo pi ricordarse dei problemi de ancoi (Varda el paràgrafo 15.)
16. Parché che podemo fidarse del tuto in Geovà?
16 Alora, podemo fidarse del tuto in Geovà, el Dio dela verità. Lu l’è el nostro Creador e el ne ama tanto. Lu anca l’è drio riunir persone de tuta la Tera par adorarlo. (Isa. 60:22; Zac. 8:23) Noantri anca savemo che lu sempre el fà quel che el promete e che suito el finirà fora con questo bruto mondo de Sàtana e con tute le busie. Alora, podemo pregar compagno a Davi, che el ga dito: ‘Che Geovà el sìpia lodà, Quel che el fà robe maraveiose. Che el so nome el sìpia lodà par sempre, e che la so glòria la sìpia in tuta la tera.’ — Sal. 72:18, 19.
CÀNTICO 2 El to nome l’è Geovà
a (Salmo 31:2-5) Scoltame con atension e vien suito giutarme. Sìpia par mi un posto de protession nela montagna e come un posto ben sicuro par salvarme. 3 Te sì la me protession. Te ndarè insegnarme ndove ndar par causa del to nome. 4 Te ndarè liberarme dela tràpola che i ga metesto par ciaparme, parché te sì la me protession. 5 Asso el me spìrito nele to man. Te me ghè salvà, ò Geovà, Dio dela verità.
b La Bìblia no la parla el nome de questo àngelo rugno. Ela lo ciama de “Diaol” (che vol dir Busier) e “Sàtana” (che vol dir Quel che va contra Dio).
c (Apocalisse 14:6, 7) E mi go visto nantro àngelo zolando in meso al cielo e el gavea bone notìssie eterne par proclamar a quei che i vive nela tera, a cada nassion, tribo, léngua e pòpolo. 7 Lu el disea con alta voce: “Temé a Dio e deghe glòria, parché l’è rivà la ora del so giulgamento. Cossita, gavé de adorar quel che el ga fato el cielo, la tera, el mar e le fontane de àque.”
d (Isaia 65:16, 17) El Dio dela verità el ndarà benedir a tuti quei nela tera che i se sforsa par ricever una benedission. Tuti quei nela tera che i fà una promessa i ndarà farla in nome del Dio dela verità. I problemi del passà i sarà desmentegadi e i sarà sconti dei me oci. 17 Parché vardé! Mi son drio crear un novo cielo e una nova tera, e le robe che ghen’era vanti no le sarà ricordade gnanca le tornarà al cuor.