29 DE GIUGNO – 5 DE LÙLIO DE 2026
CÀNTICO 131 Quei che Geovà unisse
Seité a far pi forte la vostra amicìssia nel matrimònio
“Ghen’è un amigo che se taca de pi che un fradel.”— PRO. 18:24.
COSSA CHE NDAREMO IMPARAR?
Un omo e una dona che i vol gaver un matrimònio felice i ga de amar a Geovà e esser amighi un del altro.
1. Parché che boni amighi i ze un presente de Geovà?
I NOSTRI amighi i ze un presente de Geovà. (Tia. 1:17) Parché? Parché lori i ama a Dio e i ne ama. Lori i resta contenti quando noantri semo contenti, i ne dà consolo quando semo tristi e i ne dà consili quando ghemo de bisogno. Boni amighi sempre i ne giuta e podemo fidarse in lori. Amighi cossita ‘i fà el nostro cuor contento’! — Pro. 27:9.
2. Parché che l’è importante che i maridadi i seite a far pi forte la amicìssia intrà de lori? (Mateo 19:6)
2 L’è tanto importante che un omo e una dona maridadi i se sforse par esser boni amighi. Cossita, lori i pol gaver una dele pi bele amicìssie che ghen’è intrà due persone. (Ledi Mateo 19:6.a) Ma se lori no i se sforsa par far cossita, i podaria scominsiar a sentirse soli, desanimadi o fin cativi. In questo stùdio, ndaremo veder come quei che i vol maridarse i pol scòlier una persona che sarà so amiga par tuta la vita. Ndaremo veder anca come quei che i ze belche maridadi i pol far ancora pi forte la amicìssia intrà de lori.
COME SCÒLIER UN AMIGO PAR TUTA LA VITA?
3-4. Cossa che pol giutarte a catar una bona persona par maridarte? (Proverbi 18:22)
3 Vanti de far una dessision importante, ghemo de pensar sora le bone robe e le brute robe che pol vegner fora. Parché? Parché quel che dessidimo pol cambiar la nostra vita del tuto. Par quela, ghemo de pensarghe sora vanti de far una dessision importante.
4 Scòlier una persona par maridarse l’è una dele dessision pi importante che podemo far. Geovà el ga creà el matrimònio e el sa quel che l’è meio par noantri. (Ledi Proverbi 18:22;b Isa. 48:17, 18) Lu el vol che te cati un bravo omo o una brava dona par maridarte. Par quela, lu el ga dato boni consili nela Bìblia par giutarte a catar la persona giusta.
5. Parché che l’è importante scòlier una persona batesada par maridarte?
5 Quando noantri se batesemo, deventemo amighi de Dio. (Sal. 25:14) Par quela, se te vol maridarte, scoli una persona che la ze amiga de Geovà e che la ze batesada. (1 Cor. 7:39) Se te fè cossita, te ndarè mostrar che te dè valor a quel che Geovà el vol. E te sarè bon de veder la persona che te vè maridarte come una benedission de Geovà. (Pro. 19:14) Cossita, no te gavarè i problemi che vien fora se te te maridi con una persona che no la ama a Geovà. (2 Cor. 6:14) Ma fursi no te ghè gnancora catà un fradel o una sorela par maridarte. Alora, no saria bon par ti ndar in serca de una persona che no la serve a Geovà. Gnanca saria bon pensar che, se te te maridi con ela, la ndarà imparar la verità nel futuro.
6-7. Che domande che te pol farte sora la persona che te vol maridarte?
6 Savemo che no l’è sol parché una persona la ze batesada che la sarà un bon omo o una bona dona par ti.c Par quela, se te vol maridarte con qualchedun, l’è bon domandarte: ‘Come che lu el trata la so fameia? Sarà che el trata le persone con rispeto e con bontà? Chi che i ze i so amighi? Cossa che lu el fà quando le persone le ga una idea difarente dela soa? Sarà che lu sempre el vol far le robe dela so maniera o lu el scolta la idea dei altri, se la ze de acordo cola Bìblia? Sarà che i soldi i ze la roba pi importante par lu?’
7 Te pol anca domandarte: ‘Sarà che lu el ga un grando amor par Geovà? Lu l’è drio sforsarse de far compagno ale qualità de Geovà? Lu el me giutarà a esser una serva de Geovà ancora meio? Sarà che noantri due volemo far de pi par Geovà dela stessa maniera? Sarà che ndaremo deventar meio amighi un del altro?’ (Col. 3:9, 10) Se te sì una sorela, sarà che el fradel che te sì drio smorosar sarà un bon amigo e el farà bone dessision par la vostra fameia? (1 Cor. 11:3) Se te sì un fradel, sarà che la sorela che te sì drio smorosar la ndarà rispetar le dessision che te fè anca se te ghè i to difeti? Ghe vol tempo par saver la risposta a queste domande. Par quela, doperé ben el tempo intanto che sì drio smorosar par cognosser ben un al altro.
8-9. Cossa che pol giutarte a dessider se te ndarè maridarte con qualchedun o nò? (Varda anca la stampa.)
8 Sarà pi fàcile che te scoli ben la persona che te ndarè maridarte se te proi cognosserla ben. Alora, una roba che te pol far la ze saver cossa che i altri i pensa de lu o de ela. Te pol domandar ai fradei dela so congregassion cossa che lori i pensa de lu e che qualità che el ga. Par esémpio, sarà che lu l’è ùmile, bondoso e el aceta la idea dei altri? Sara, una sorela dela Guiana Francesa, che la se ga maridà con un fradel de nome Daniel, la ga dito: “Mi go domandà ai altri cossa che lori i pensea sora Daniel. Par esémpio, mi go parlà col fradel che l’era de star con lu, con un ansiano dela so congregassion, con amighi che i ne cognossea ben e anca cole sorele dela so congregassion.” Nantra roba che te pol far la ze domandar ala persona che te vol maridarte se ghen’è qualcossa che ga sucedesto nel passà o l’è drio suceder adesso nela so vita che l’è importante che te sàpia. L’è bon saver de queste robe parché sarà pi fadiga che ghen sìpia qualcossa che podaria intrigar el vostro matrimònio nel futuro.
9 Fursi te ghè dubi se lu o ela saria un bon omo o una bona dona par ti. Pol esser anca che arquanti fradei e sorele che ga de pi speriensa i te parle de un per de robe brute sora la persona che te vol maridarte. Alora, pénsaghe sora quel che te ghè savesto par dessider se te ndarè seitar a smorosar cola persona o nò.d Adesso, ndaremo veder come quei che i ze maridadi i pol far pi forte la amicìssia intrà de lori.
Intanto che te sì drio smorosar, proa cognosser ben la persona (Varda i paràgrafi 8 e 9.)
PASSÉ PI TEMPO INSIEME PAR FAR PI FORTE LA VOSTRA AMICÌSSIA
10. Parché che l’è bon che el omo e la dona i se sforse de torse el tempo par star insieme?
10 Anca se el omo o la dona gàpia tanto de far, lori i pol torse el tempo par restar insieme. Cossita, i farà pi forte la so amicìssia e el so matrimònio. Quando i resta insieme, lori i pol parlar sora quel che ghe ga sucedesto nel giorno, sora quel che i sente e i pensa, i pol mostrar che i se vol ben e i pol divertirse.
11. Cossa che podaria rovinar la amicìssia intrà el omo e la dona?
11 Un omo e una dona che i ze pròpio amighi no i ghe piase de restar distanti un del altro. L’è vera che no i ze boni de restar sempre insieme, ma no sarà bon par lori restar distanti par tanto tempo. Par esémpio, ghen’è de quei che i ga acetà un laoro in nantro paese e i ze restadi distanti dela so fameia par tanti mesi. Pol esser che fin i ze boni de ciapar tanti soldi, ma restar tanto tempo distante dela fameia pol rovinar el matrimònio.
12-13. (a) Cossa che arquanti i fà par passar tempo insieme? (Varda anca la stampa.) (b) Quanto importante ga de esser la to amicìssia col to omo o cola to dona? (Varda anca el quadro “Quanto importante ga de esser la amicìssia nel matrimònio?”.)
12 Cossa che arquante persone le fà par passar tempo col so omo o cola so dona? Lea, che la ze de Guam, la ga dito: “Mi e me omo ne piase far robe difarente insieme. Sempre che ricevemo un convite, proemo ndar insieme e l’è fadiga che ndemo a spasso un sensa quelaltro.” Rosane, dei Stati Unidi, la ga dito: “Come noantri ghemo sempre tanto de far, proemo pensar prima cossa ndaremo far insieme.” (Varda anca Amòs 3:3.) Damian, dela Frància, el ga dito cossita: “Ghemo imparà a gaver interesse par quel che el altro el ghe piase far.” (Mat. 7:12) E Katia, che la ze dei Stati Unidi, la ga dito: “Dele volte, metemo via el selular par dar atension un al altro.”
13 Adorar a Geovà insieme l’è la roba pi importante che i maridadi i pol far. Miriam, che la ze dela Frància, la ga dito: “Noantri scominsiemo el giorno cola letura dela Bìblia e disemo un al altro cossa ghemo imparà e cossa che podemo meter in pràtica nela nostra vita. Ne piase tanto de questo tempo che passemo insieme. Mi me piase anca quando preghemo insieme e scolto quanto che me omo el ama a Geovà.” Katia, che ghemo parlà prima, la ga dito: “Restemo contenti de ndar in predicassion insieme. Quando scoltemo un al altro parlar sora Geovà, restemo sempre pi darente e imparemo tante robe bone un colaltro.” — Pro. 27:17.
Passé tempo insieme par far pi forte el vostro matrimònio (Varda i paràgrafi 12 e 13.)
SEITÉ A ESSER AMIGHI ANCA SE GHEN’È DIFICOLTÀ
14-15. Parché che i maridadi i ga de far el so meio par darghene fora cole dificoltà nel matrimònio? Parla de un esémpio.
14 La Bìblia la dise che i maridadi i gavarà ‘dificoltà nela vita’. (1 Cor. 7:28) Alora, par causa dela imperfession, tuti i maridadi i ndarà infrontar problemi nel matrimònio. Ma come che i pol far el so meio par darghene fora cole dificoltà e, ancora cossita, seitar a esser boni amighi?
15 Pénsaghe sora questo esémpio. Se una costrussion la ze rovinada, i so paroni ndarà sforsarse par rangiarla su. Par far questo laoro, pol esser che ghe volarà tanto tempo e soldi. Ma lori i se sforsa tanto parché questa costrussion la ze pressiosa par lori. Dela medèsima maniera, savemo che pol vegner fora problemi nel matrimònio e che gnanca un l’è perfeto. Ma tuti i matrimoni i ze pressiosi. E, cossita come una costrussion la pol esser rangiada su, anca i maridadi i pol tornar a esser amighi nantra volta. Far questo ghe vol tempo e tanto sforso, ma Geovà el restarà pròpio contento se i maridadi i laora insieme par darghene fora cole dificoltà e par far pi forte el so matrimònio. (Mal. 2:16) Se i fà cossita, i ze drio mostrar amor e rispeto un al altro e anca par Geovà, Quel che el ga creà el matrimònio.
16. De acordo con 1 Corinti 13:4-8a, cossa che pol giutar i maridadi a darghene fora con problemi nel so matrimònio? (Varda anca la stampa e el quadro “Come che podé far pi forte la vostra amicìssia?”)
16 Se vien fora problemi nel vostro matrimònio, no stà pensar suito in molar el to omo o la to dona. (1 Cor. 7:10, 11) Invesse, domandate: ‘Cossa che mi posso far par gaver una amicìssia pi forte intrà de noantri?’ Te pol anca studiar quel che la Bìblia la dise sora mostrar amor e pensar in come che te pol far meio quel che l’è scrito in 1 Corinti 13:4-8a. (Ledi.e) Invesse de pensar in molar el to omo o la to dona, pensa in come che ti te pol far pi forte la amicìssia intrà de valtri. Prega che Geovà el te giute e fà peschisa nele nostre publicassion e nei vìdei. Va in serca del aiuto dei ansiani e de altri fradei e sorele che i mete in pràtica i consili dela Bìblia sora el matrimònio. La Bìblia la dise che el matrimònio l’è come una “soga tripla”, e Geovà l’è la parte pi forte e pi importante del matrimònio. Alora, quando valtri fé le robe dela maniera che Geovà el vol, el vostro matrimònio el sarà forte. — Ecl. 4:12.
Sforseve de gaver una forte amicìssia anca quando ghen’è dificoltà (Varda el paràgrafo 16.)
17. Cossa che quei che i vol maridarse e quei che i ze maridadi i pol far par esser felici?
17 Geovà el vol che tuti i so servi i sìpia felici, anca quei che i vol scòlier una persona par maridarse e quei che i ze belche maridadi. Alora, se te vol maridarte, scoli qualchedun che sarà un amigo par ti. E se te sì belche maridà, seita a far pi forte la amicìssia col to omo o cola to dona. Sfòrsate de darghene fora cole dificoltà nel matrimònio e fìdate nel aiuto de Geovà. Se valtri fé cossita, ndaré goder la vita insieme! — Ecl. 9:9.
CÀNTICO 132 Semo una sol carne
a (Mateo 19:6) Cossita no i ze mia pi due, ma una sol carne. Alora, quei che Dio el ga unio, el omo no’l pol spartir.”
b (Proverbi 18:22) Quel che el cata una brava dona par maridarse, el cata un tesoro e anca la aprovassion de Geovà.
c Queste domande le ze par i òmini e par le done.
d Par saver de pi come cognosser meio un al altro, varda el artìcolo “Come smorosar de una maniera che ghe piase a Geovà?” nela Sentinela de maio de 2024, soto la parte “Gavé de cognosserve ben un al altro”.
e (1 Corinti 13:4-8a) El amor l’è passiente e bon. El amor no l’è geloso, no’l se fà veder, no l’è orgolioso. 5 No’l se comporta de maniera sbaliada, no’l va in serca dei so interessi, no’l resta suito cativo. No’l ghe bada el dano. 6 No’l resta contento cola ingiustìssia, ma el resta contento cola verità. 7 El soporta tute le robe, el crede in tute le robe, el ga speransa in tute le robe, el persevera in tute le robe. 8 El amor no’l se finisse mai.