Impara del “Dio de tuto el consolo”

1. Parché che ghemo de consolar i altri?

TUTI noantri infrontemo “diverse provassion”. Par quela, dele volte, ghemo bisogno de esser consoladi e incoraiadi. (1 Pie. 1:6) Ne fà tanto ben quando i altri i ne consola quando semo drio sofrir. Alora, anca noantri ghemo de far qualcossa suito par consolar i altri che i ze drio sofrir. (Mat. 7:12) Podemo far compagno a Geovà che l’è “el Dio de tuto el consolo”. Cossita come lu el ne consola in tute le situassion, anca noantri podemo consolar i altri. (2 Cor. 1:3, 4; 1 Tes. 4:18) Consolemo i nostri fradei e sorele parché li amemo, e nò parché ghemo la obrigassion de farlo. In questo stùdio, ndaremo veder (1) quel che la Bìblia la dise sora el consolo, (2) come che podemo consolar i altri, e (3) cossa che podemo far quando noantri ghemo bisogno de consolo.

COSSA CHE LA BÌBLIA LA DISE SORA EL CONSOLO?

2. Cossa che vol dir la parola “consolo” nela Bìblia?

² Nela Bìblia, la parola greca par “consolo” la vol dir tante robe. Come, par esémpio, “incoraiar” e “insentivar”. (Rom. 12:8; varda la nota “encorajar” nela Bìblia de Stùdio in portoghese.) Una tradussion de questa parola la pol esser “ciamar dela banda”. Par capir meio, proa pensar nte una persona che la va presto giutar el so amigo che l’è drio sofrir e che la ghe dà tuto quel che lu el ga de bisogno. La persona la pol consolar el so amigo de tante maniere, ma el ogetivo l’è sempre che el so amigo el se sinta meio.

3. Cossa che podemo imparar de Barnabè sora consolar i altri? (Varda anca la stampa.)

³ Pensaghe sora un esémpio dela Bìblia. Un dissìpolo de nome Giusepe sempre el consolea e el giutea i altri. Par quela, i apòstoli i ga scominsià a ciamarlo de Barnabè, che vol dir ‘fiol del consolo’. (Ati 4:36) De lì avanti, nela Bìblia, lu no l’è pi ciamà de Giusepe, ma sempre de Barnabè, parché lu l’era cognossesto come una persona che consolea i altri. In tante situassion, lu el ga giutà i so fradei quando lori i gavea de bisogno. Par esémpio, poco dopo che Saulo l’è deventà un dissìpolo de Gesù, lu l’è ndato a Gerusalen par cognosser i fradei de là. Questi fradei i gavea paura de lu, parché nel passà el gavea perseghio tanti fradei e sorele. Ma Barnabè el se fidea in Saulo e lo ga giutà a cognosser i apòstoli. — Ati 9:26-28.

COSSA CHE PODEMO FAR PAR CONSOLAR I ALTRI?

4. Quala che la ze una dele meio maniere par dar consolo ai altri? (Romani 1:11, 12)

⁴ Va catar i altri, se te pol. Geovà el dopera i so servi par dar consolo. Par esémpio, quando el profeta Elia l’era tanto triste, Geovà el ga doperà un àngelo par incoraiarlo. (1 Rè 19:4-7) Anca el apòstolo Paolo el savea che l’era importante ndar catar i fradei par incoraiarli. (Ledi Romani 1:11, 12.a) Quando te vè catar qualchedun che el ga bisogno de consolo, no stà gaver prèssia, ma tote el tempo che ghe vol par incoraiarlo. (1 Cor. 16:7) Se ti no te pol ndar catar qualchedun che el ga de bisogno, te pol ancora giutarlo tanto. Te pol farlo par meso del telèfono, de una carta, de un carton o de un messàgio. Geovà el vol doperarte par consolar i altri. Sito disposto a esser doperà par lu?

5. Parché che dele volte pol esser fadiga par noantri consolar i nostri fradei e sorele?

⁵ Come semo drio viver nei ùltimi giorni, l’è cada volta pi fadiga ndar catar i fradei e sorele par consolarli. Noantri podemo imparar tanto del esémpio de Onesìforo, un fradel de Èfeso. Quando Paolo l’era preso in Roma, Onesìforo el volea tanto consolarlo. Par quela, lu l’è ndato catar Paolo anca se el risciesse de esser preso o copà. (2 Tim. 1:16-18) Come Onesìforo, le Testimònie de Geovà dela Rùssia le consola i fradei che i ze drio infrontar perseghission. Quando un fradel el va al tribunal, i altri i va insieme par incoraiarlo, anca se i riscia de esser presi. Cossa che podemo far par pareciarse par consolar i nostri fradei? Noantri podemo imparar del esémpio dei servi del passà e de ancoi e proar capir come lori i ze stati boni de seitar contenti anca con perseghission.

6. Come che podemo far compagno a Geovà quando consolemo i altri? (Varda anca la stampa.)

⁶ Scoltali. Quando el profeta Elia el gavea paura che i lo copesse, lu el ga parlà a Geovà come l’era drio sentirse. Geovà belche el savea quel che Elia l’era drio infrontar e che lu l’era tanto ansioso. Stesso cossita, Geovà el ga scoltà Elia con tanta atension. Lu lo ga scoltà anca se el seitea a dir le medèsime robe. (1 Rè 19:9, 10, 14) Quando el profeta Abacuche el ga dito a Geovà come el se sentia de veder le ingiustìssie, Geovà lo ga scoltà con passiensa e no’l ga mia pensà che lu l’era drio mancarghe de rispeto. (Abac. 1:2, 3) Noantri podemo far compagno a Geovà e scoltar quando i nostri fradei e sorele i ne dise come i se sente. Ma come che ghemo de farlo? Noantri no ghemo mia de méterse in meso quando i altri i ze drio parlar con noantri. Se lori i ne dise qualcossa de sbalià, no ghemo de restar inrabiadi. E se lori i seita a dir le medèsime robe, ghemo de portar passiensa e scoltarli. — Tia. 1:19; Ecl. 7:9.

7. Come che podemo capir quel che una persona la ga de bisogno?

⁷ Va in serca de capir quel che la persona la ga de bisogno. Geovà el sa pròpio tuto quel che una persona la sente, ma noantri nò. Sol semo boni de capir quel che una persona la ga de bisogno se la scoltemo con atension. No stà pensar che belche te sè quel che la ga ghe ocore sol parché te sè quel che ti te volarissi se te fussi nela so situassion. Una persona la ze difarente de quel’altra. Alora, cossa che podarìssino far? Ghemo de torse el tempo par scoltarla con atension, mostrarghe bontà e farghe domande che ne giute a capir quel che ela la ga de bisogno. — Pro. 20:5.

8. Come che Gesù el ga consolà Marta e Maria? (Varda anca la stampa.)

⁸ Varda el esémpio de come Gesù el ga consolà Marta e Maria dopo che el so fradel Làsaro l’era morto. Le due done le era drio infrontar la stessa situassion, ma Gesù el ga consolà cada una de lore de maniera difarente. Par consolar Marta, Gesù el ghe ga parlà dela ressuression e la ga giutada a far pi forte la so fede. Ma, par consolar Maria, la Bìblia no la dise che Gesù el gàpia parlà dela ressuression. Invesse, lu el ga piandesto insieme con ela e el ghe ga domandà ndove che i gavea metesto Làsaro. (Gio. 11:20-35) Cossa che imparemo? Vanti de consolar una persona, ghemo de capir cossa che ela la ghe ocore, invesse de consolar tuti dela medèsima maniera.

9. Come che podemo doperar la Bìblia par consolar i altri? (Romani 15:4, 5)

⁹ Dopera la Bìblia. Quando noantri doperemo la Bìblia par consolar quei che i ze drio sofrir, li giutemo a far pi forte la so fede e la so speransa nele promesse de Geovà. (Ledi Romani 15:4, 5.b) Questa speransa la pol darghe consolo, parché li giuta a fidarse che Geovà li ama e che li tenderà. (Isa. 40:31) Ma come che podemo catar fora testi dela Bìblia par incoraiar i altri? Arquanti i scrive do i versìcoli che i cata par doperarli quando ghe ocore. Te pol ndar rento nel site jw.org, scriver la parola “consolo” e catar fora i versìcoli che te vol scriver do. Domanda anca a Geovà che el te giute a doperar la Bìblia par consolar i altri, e el so spìrito santo el pol giutarte a doperar el testo giusto nela ora giusta. — Gio. 14:26.

10. Parché che ghemo de mostrar bontà quando ndemo consolar qualchedun?

¹⁰ Parla con bontà. Tante volte, par noantri consolar una persona, ne ocorerà giutarla a cambiar la maniera che la vede el so problema. Par farlo, noantri ghemo de pensar ben vanti de parlar, parché volemo giutarla, e nò farla sentirse pi desanimada. (Pro. 12:18) Podemo far compagno a Geovà quando el ga giutà Elia. Elia el pensea che l’era lu sol drio servir a Geovà e che no l’era un bravo profeta. Ma Geovà lo ga giutà a cambiar la so maniera de pensar, sensa dirghe che lu l’era sbalià. (1 Rè 19:15-18) Anca noantri podemo giutar i nostri fradei se ghe mostremo bontà e pensemo ben vanti de parlar. Quando femo un discorso o femo un comentàrio nela riunion, ghemo sempre de parlar con bontà e parlar robe che incoraia e fà pi forte la fede dei nostri fradei e sorele.

11. De acordo con 1 Gioani 3:18, cossa che quei che i ze drio sofrir i ga de bisogno?

¹¹ Fà qualcossa par giutar. Quando qualchedun l’è drio sofrir noantri lo giutemo nò sol par meso de parole, ma anca par meso de quel che femo. (Ledi 1 Gioani 3:18.c) Varda el esémpio de Barnabè. Lu el ga vendesto un toco de tera e el ga dato i soldi ai apòstoli par lori giutar i fradei e sorele poareti che i era pena batesadi. (Ati 4:36, 37) Tanti fradei ancoi i fà compagno. Varda quel che ga sucedesto con Gabriela, dela Polònia. La so casa la ze stata quasi finida fora nte una inondassion. Ela la ga dito: “Mi e i me genitori, che i ze de star con mi, semo restadi spauradi e con tanta ansietà. Mi me domandea cossa farìssino par dàrghene fora con questa situassion. Ma i fradei dele congregassion qua darente i ze vegnesti giutar. Nte un giorno sol, lori i ga fato un bel poco de laori. Questo me ga assà sicura che Geovà el dopera i so servi par consolar quei che i ze drio sofrir.”

12. Come che podemo giutar i nostri fradei quando seitemo leai nele provassion?

¹² Seita leal a Geovà quando te infronti provassion. Paolo el gavea laorà tanto par giutar i tessalonissensi. Alora, quando el ga savesto che lori i seitea fedeli anca con perseghission, lu l’è restà tanto contento e incoraià. (1 Tes. 3:5-8) Paolo el savea che, se el seitesse leal a Geovà quando el infrontesse provassion, lu el podaria incoraiar i so fradei, anca quei che no i lo gavea cognossesto. (Col. 2:1, 2) La medèsima roba sucede con noantri. Quando i fradei i vede che seitemo leai anca con perseghission, lori i se sente incoraiadi. Questo li assa sicuri che, se Geovà ne ga giutà, lu el ndarà giutar anca a lori.

13. Che qualità pol giutarme a seitar a consolar qualchedun?

¹³ Porta passiensa. Quando un fradel l’è tanto desanimà e proemo consolarlo, fursi no’l va suito restar meio. La Bìblia la dise che ghemo de ‘seitar a darse coraio’. Questo vol dir che l’è una roba che no femo sol una volta e basta. (1 Tes. 5:11) Alora, ghemo de portar passiensa par seitar a consolar una persona che la ze desanimada. (1 Tes. 5:14) Ma tuti noantri ghemo bisogno de consolo. Alora cossa che mi posso far se me ocore esser consolà?

QUANDO TI TE OCORE DE CONSOLO

14-15. Cossa che pol giutarne quando semo tristi o ansiosi?

¹⁴ Prega a Geovà. Quando te sì triste o ansioso, dighe a Geovà che te ocore del so consolo. (Sal. 94:19) Nele to orassion, verdi el to cuor e parla pròpio quel che te sì drio sentir. (Sal. 62:8) L’è vera che Geovà el sa quel che sentimo anca se no parlemo. Ma se disemo a Geovà giusto quel che sentimo, mostremo che credemo che lu el ne ama e che l’è drio scoltarne. L’è sicuro che Geovà sempre el ndarà far qualcossa par giutar una persona che ga la fede in lu e che ghe domanda aiuto. (Mar. 11:24) In Filipensi 4:6, 7, Dio el ne dise: ‘Domandé el aiuto de Dio, e la so pace, che la ze pi granda de quel che podemo capir, la protegerà el vostro cuor e la vostra mente.’

¹⁵ Domanda aiuto ai altri. Parla sora quel che te senti a un caro amigo o a un ansiano che te te fidi. I fradei e sorele i pol giutarte a sentirte meio. Ma se ti no te disi mia pròpio quel che te sì drio sentir, sarà fadiga par lori saver come giutarte. (Pro. 14:10) Te pol domandar che i te scolte con atension, o che i te mostre un versìcolo dela Bìblia o una roba che i ga catà nele publicassion che pol consolarte.

16. (a) Cossa che pol suceder quando qualchedun vien consolarte? (b) Cossa che te ghè de ricordarte?

¹⁶ Porta passiensa e perdona. Quando i fradei e sorele i vien consolarte, i podaria dir o far una roba che fà sentirte pedo. Se una roba cossita sucede, porta passiensa. (1 Cor. 13:4, 7) Ricòrdate de quel che dise Tiago 3:2: “Se qualchedun no’l fà sbali quando el parla, l’è una persona perfeta.” To fradei e sorele i ga caro de giutarte, ma i ze imperfeti come ti e i podarà sbaliar. — Mat. 26:41.

17. Cossa che ghemo de seitar a far?

¹⁷ Tuti noantri ghemo bisogno de consolo parché vivemo nei ùltimi giorni, e sarà cada volta pi fadiga ndar avanti. I nemighi de Dio i sarà cada volta pi cativi e i seitarà a vegnerne contra. Alora, seita a far el meio che te pol par consolar i altri.