Imikpekpa re Vwo se “Oseri Vwọ kẹ Ẹgborho na Eje”

Omarẹ ẹgbukpe ihwe re wanre na, imikpekpa na rhe dia ẹbẹre ọvo rẹ aghwoghwo rẹ avwanre, rọ nẹrhẹ ihwo kerhọ. Vwẹ akpọneje, ihwo da mrẹ imikpekpa na, kẹ ayen ghwe vughe ihwo ri vworo. Ọ dia e ru imikpekpa na ro vwo siẹ ihwo urhuru ọvo-o, ẹkẹvuọvo ọ je pha lọlọhọ ra vwọ reyọ vwo ruiruo. Wọ sa rhọnvwephiyọ oborẹ Asenata, rọ dia oniọvo aye ọvo vwẹ Poland tare: “E bru okpona phiyọ imikpekpa na-a, dedena ọ pha yoyovwin. Ọ pha lọlọhọ ra vwọ reyọ vwo ruiruo ji muo nẹ asan kpo asan.”

Wo roro kpahen obo re ruẹ imikpekpa na wan jovwo re?

Ona ro Shephiyọ

Vwẹ 2001, Ẹko Rọvwẹrote na da rhọnvwe nẹ iniọvo ri France davwen ena sansan rẹ aghwoghwo rẹ azagba ni, ji te ọ ra vwẹ imikpekpa vwo ruẹ. Ayen davwen oka rẹ imikpekpa sansan. Kerẹ udje, ayen bru ona phiyọ ekpu re krun eghwa phiyọ vẹ obo re vwo ghorie emu vwẹ eki, rọ dia asan rẹ ayen cha rhuẹrẹ ẹbẹ na phiyọ je sẹro rayen. Ukuotọ rọyen, oghọn ukoko ri France da rhọnvwephiyọ ona ọvo, rọ dia oborẹ ighwoghwota reyọ vwo ruiruo ikpe buebun.

Oma vwerhen iniọvo rehẹ France fikirẹ obo ri nẹ obuko rẹ ona rẹ aghwoghwo rẹ azagba rẹ ayen davwenre na rhe. Ọtiọyena, vwẹ 2011, Ẹko Rọvwẹrote na da rhọnvwẹ kẹ iniọvo rehẹ New York City, U.S.A nẹ ayen sa davwen ona rẹ aghwoghwo rẹ azagba kpokpọ, ra reyọ imikpekpa vẹ emẹjẹ vwo ruẹ. Ekobaro ri vwobọ vwẹ ona rẹ aghwoghwo nana da mrẹvughe nẹ ọ rẹ imikpekpa na yen me yovwin, ọ je phẹrẹ emuo nẹ asan kpo asan. Ekobaro na da je vwẹ iroroẹjẹ sansan vwọphia kpahen obo re se vwo ru imikpekpa na yovwinphiyọ. E ra vwẹ irhe kanre vwẹ esosuọ ye, pha họhọhọ, kọ nẹrhẹ ọ bẹn e se vwo muo yerin kpo enu ji muo rhivwin rhe otọ. Ọtiọyena, a da rhoma ruo rọ vwọ pharhe emerha, ẹkẹvuọvo ọ dia ọ rẹ odju vwo muo kufia-a. Ọkpokpọ re ruru na vwo iwili rọ rhoro rọ je nabọ gan rọ sa nẹrhẹ e ghorie wan idjerhe re pha chohri chohri. Vwọba, e ji ru emekpeti ọvo phiyọ obuko rọyen ra sa vwọ sẹro rẹ ẹbe efa.

Ona kpokpọ na ghwa erhuvwu rhe! Ọtiọyena vwẹ 2012, Ẹko Rọvwẹrote na da rhọnvwe nẹ a sa reyọ imikpekpa na vwo ruiruo vwẹ akpọneje. Iniọvo na da mrẹ ohwo rọ cha vwẹ ekuakua re pha phapharhe re je cha tọn vwo ru ayen buebun.

Ọke vwọ yanran na, a da rhoma ru emewene phiyọ imikpekpa na. Kerẹ udje, vwẹ 2015, e de ru obo re se vwo rhuru imikpekpa na fikirẹ osio. Obo re ruro wan na je Dina rọ dia ẹkuotọ ri Georgia. Ọ da ta: “Imikpekpa na vwo ‘ewun rẹ osio’ rọ sa sẹro rẹ ẹbe na.” Vwẹ 2017, e de ru ẹbe ro vwo imagnẹti ra vwọ tamuẹ ophapha vwẹ ejajẹ evo. Tomasz rọ dia oniọvo ọshare ọvo vwẹ Poland da ta: “Ọ pha bẹnbẹn re vwo si oka ra vwọ tamuo jovwo na no. Ọ ra vwọ tamuo ro vwo imagnẹti na yen me yovwin.” Vwẹ 2019, a da rhoma ru ewene efa phiyọ erọnvwọn re vwo ru imikpekpa na vẹ obo re ruo wan rere ọ sa vwọ tọn vrẹ obo ri jovwo.

Eruo rẹ Imikpekpa Na

Ohwo ọvo yen ruẹ imikpekpa re muẹ vwo kpo ikoko rehẹ akpọneje. Asaọkiephana, imikpekpa ọvo ghanre te $43 rẹ igho rẹ America, ofan vẹ eghwaghwọrọ efa herọ-ọ. Enẹna, igho ra ghwọrọphiyọ imikpekpa re, bun vrẹ $16,000,000 rẹ igho rẹ America, e de rhe mu i ri bun vrẹ 420,000 vwo kpo ikoko rehẹ akpọneje.

A sa vwọ nabọ riẹn igho re torori ghwọrọ, ke durhie imikpekpa na buebun ẹsiẹvo. Vwọba, ikoko se durhie ẹbẹre sansan rẹ imikpekpa na asaọkiephana rere ayen sa vwọ rhuẹrẹ, ukperẹ a vwọ vwẹ ọkpokpọ wene.

Ra Vwọ Vwẹ Imikpekpa Vwo se Oseri

Oma vwerhen ighwoghwota rehẹ akpọneje rẹ ayen vwọ reyọ imikpekpa na vwo ruiruo. Martina ro nẹ Ghana rhe da ta: “Vwẹ ena rẹ aghwoghwo rẹ avwanre evo, avwanre yen brẹ ihwo ra. Ẹkẹvuọvo, obo ri me je vwẹ kpahen ọ rẹ imikpekpa na yen, ihwo yen bru avwanre cha. Ọ sa tobọ dia oseri kẹ ihwo re wanvrẹ.”

Vwẹ ẹkuotọ rẹ Africa ọfa, ọshare ọvo da yan kpo asan rẹ imikpekpa na hepha, ọ da reyọ ẹbe rẹ ejajẹ rọyen. Udughwrẹn ọvo vwọ wan nu, o de rhivwin rhe je tanẹ, “Mi se ẹbe na eje. Evuẹ rehẹ evun rọyen na pha ghanghanre mamọ. Mi de kpo orere mẹ, me cha vuẹ ihwo orua mẹ kpahọn,” orere rọyen na vwẹ iroko 500 vwo sheri. Emeranvwe ivẹ vwọ wan nu, ọ da rhoma rhivwin rhe, ọ da ta: “Ihwo rẹ orere mẹ se ẹbe na eje re, oma je vwerhen ayen kpahen ovuẹ na. Ayen guọnọ dia Iseri ri JIhova. Ẹkẹvuọvo ayen vwo enọ rẹ ayen guọnọ nọ. Kẹrẹ udje, ayen riẹnre nẹ omaebrophiyame mudiaphiyọ nẹ e che duvwun ekroma rẹ ohwo eje phiyame. Jẹ avwanre vwo urhie vwẹ ọko rẹ avwanre na-a. Avwanre gba rhe obonẹ vwọ kẹ omaebrophiyame?” Ighwoghwota na da vuẹ oniọvo ọshare ọvo rọ dia ọkobaro rọ jẹ ephẹrẹ rọyen, rere ọ vẹ ọyen vwọ ta ota. Vwo nẹ ọke yena rhe, ayen ihwo ivẹ nabọ riavwerhen rẹ otaẹtakuẹgbe rẹ ọkieje.

Ọ vwerhoma ra vwọ vwẹ imikpekpa na vwọ ghwoghwota vwẹ “akpọ na ejobi, rọ vwọ dia oseri vwọ kẹ ẹgborho na eje.” (Matiu 24:14) Mavọ yen a sa vwọ mrẹ igho re vwo ruẹ imikpekpa na? Womarẹ itetoro re ruẹ kẹ iruo rẹ akpọeje, e ruẹ buebun rayen womarẹ donate.jw.org. Wẹkobiruo vwọ kẹ okẹ ri ghwologhwolo wẹn.