Iruo rẹ Ukẹcha Vwẹ 2022​—Ẹguọnọ rẹ Iniọvo

Baibol na mraro rọyen phiyotọ nẹ vwẹ oba rẹ ẹdẹ na, ifovwin, etọ ri kpogho, ega, vẹ “uguegue rode” cha vwomaphia. (Luk 21:​10, 11) Eta rẹ aroẹmrẹ yena re ruẹgba vwẹ ukpe rẹ ẹga ri 2022 na.a Kerẹ udje, ofovwin ri Ukraine djobọte akpeyeren rẹ iduduru rẹ ihwo, jẹ ọga ri COVID-19 ji rhi nẹ otọ re-e. Vwọba, ihwo buebun rhiẹromrẹ oghwọrọ ri kpregede, kerẹ etọ ri kpoghori vwẹ Haiti vẹ odju ọgangan vwẹ Central America, Philippines, vẹ Southeast Africa. Mavọ yen Iseri ri Jihova vwọ vwẹ ukẹcha kẹ ihwo rẹ oghwọrọ na teri oma?

Vwẹ ukpe rẹ ẹga ri 2022, ukoko rẹ avwanre vwẹ ukẹcha vwọphia kẹ ihwo ọke rẹ oghwọrọ ri te omarẹ 200 vwọ vwomaphia! Avwanre ghwọrọ idọla rọ joma te iduduru 12 vwọ vwẹ ukẹcha kẹ ihwo rẹ oghwọrọ teri oma.b Roro kpahen oborẹ a vwẹ igho re torori vwọ vwẹ ukẹcha kẹ ihwo rẹ oghwọrọ teri oma vwẹ ẹkuotọ evo.

Otọ ro Kpoghori Vwẹ Haiti

Vwẹ August 14, 2021, otọ ro kpoghori rẹ ekpogho rọyen gan te magnitude 7.2 phiare vwẹ obọrhen ọnre ri Haiti. Ọ da ohwo mamọ nẹ iniọvo eya ivẹ vẹ oniọvo ọshare ọvo ghwuru. Ihwo ri se sivwinrhọ rhiẹromrẹ ebẹnbẹn rẹ otọ ro kpoghori na ghwa rhe. Oniọvo ọshare ọvo re se Stephane da ta: “Ihwo ri ghwuru vwẹ orere na bunru mamọ tẹdia rẹ kudughwrẹn kudughwrẹn vwẹ emeranvwe re vrẹ ivẹ kọyen e vwo ruẹ ughworivwin.” Oniọvo ọfa re se Éliézer da ta: “Iseri ri Jihova buebun vwo asan rẹ ayen cha dia-a, ayen rhe vwo iwun, isabato, vẹ erọnvwọn eghanghanre efa ra ayen guọnọre-e. Ihwo buebun diarọ vẹ oshọ vwẹ emeranvwe ibro fikirẹ otọ na ro ji kpoghọ nọke aruọke.”

Ukoko rẹ avwanre fobọ vwẹ ukẹcha phia. Oghọn ukoko ri Haiti mu emu re họhọ te 53 tons phiyotọ, ọtiọyen ji te itughẹ, itapolini, ifomu, kugbe ishaja rọ reyọ ẹgba ọnre vwọ shaji rẹ ifonu. Vwọba, vwẹ ukpe rẹ ẹga ri 2022 na, iwevwin re vrẹ 100 yen a rhoma bọn yẹrẹ rhuẹrẹ. Igho ra ghwọrọ phiyọ iruo rẹ ukẹcha nana bun vrẹ idọla oduduru ọvo.

Oma vwerhen iniọvo avwanre mamọ. Lorette da ta: “Otọ ro kpoghori na guọghọ uwevwin vẹ oborẹ avwanre ruẹ vwọ riemu totọ kare kare. Avwanre vwo emu vuọvo re avwanre cha re-e. Ẹkẹvuọvo ukoko ri Jihova bicha avwanre, ayen kẹ avwanre kemu kemu rẹ avwanre guọnọre.” Micheline da ta: “Otọ ro kpoghori na guọghọ asan rẹ mẹ vẹ emọ mẹ emeshare ivẹ dia. Me rha rien obo ri mi che ru vwọ vrẹ ọ re me vwọ nẹrhovwo vwọ kẹ ukẹcha-a, Jihova da vwẹ ukoko rọyen vwọ kpahen phiyọ ẹrhovwo mẹ na. Asaọkiephana avwanre vwo omamọ rẹ uwevwin rẹ avwanre cha dia. Mi brorhiẹn ri mi vwo ru kemu kemu ri mi se ru vwo dje ọdavwaro phia kẹ Jihova.”

Ihwo ri suẹn ekogho na vwo oniso rẹ owian rẹ ukẹcha rẹ avwanre vwọ phia na. Ohwo rọ vwẹrote ọguan rẹ orere ri L’Asile da ta: “Me kpẹvwẹ ovwan fikirẹ ukẹcha rẹ ovwan fobọ vwọ phia na. Mi jiri ovwan kidie ovwan nabọ muọghọ kẹ ihwo ri suẹn. Oma vwerhen ovwẹ nẹ ọ dia igho yen muẹ ovwan vwo ruo-o. Ukperẹ ọtiọyen, ovwan guọnọ vwẹ ukẹcha kẹ ihwo. Ẹguọnọ yen muẹ ovwan vwo ruo.”

Ogiribo Ọgangan re se Ana Djuru Vwẹ Malawi Kugbe Mozambique

Vwẹ January 24, 2022, Ogiribo Ọgangan ọvo re se Ana de dju vwẹ Mozambique je wan ẹbẹre ọnre shera ro Malawi. Ogiribo na nẹrhẹ okposio rhọ je so odju ọgangan​—rọ kpata te iroko 100 vwẹ unọke ọvo (62 mph). Ọ guọghọ ifi rẹ irhukpẹ, egbada rehẹ idjerhe, je so oghwe rode.

Ogiribo ọgangan na djobọte Iseri ri Jihova re vrẹ 30,000 vwẹ Malawi kugbe Mozambique. Oniọvo ọshare ọvo re se Charles ro vwobọ vwẹ iruo rẹ ukẹcha na da ta: “Me vwọ mrẹ oborẹ iniọvo na rioja kugbe erọnvwọn ri ghwru va ayen abọ, mi de muomaphiyọ.” Ma bra kparobọ, emu vẹ ekankọn rayen eje ghwọrọ kufia. Iwevwin rẹ ihwo buebun guọghọ totọ. Ọ da ohwo mamọ nẹ aye rẹ oniọvo ọvo vẹ emetẹ rọyen ivẹ varọ abọ, ayen divwin ghwu vwẹ ame ọke rẹ okọ re vwo mu ayen vwo shu.

Ogiribo na ganre mamọ. Vwẹ omarẹ ughọjọ 1 rẹ ason vwẹ Nchalo, Malawi, orua ri Sengeredo de nyo umri rẹ ame rọ djẹ ọkẹre vẹ edo ọgangan. Irhie ivẹ vọn muavwe ro orere na! Oniọvo Sengeredo de brorhiẹn rẹ ayen vwo vrẹn nẹ uwevwin na. Ọyen orhiẹn rẹ aghwanre kidie okriri-i oghwe na da nẹrhẹ uwevwin na she. Ekuakua rayen guọghọre yẹrẹ ghwru va ayen abọ. Orua na de brorhiẹn rẹ ayen vwo kpo Ọguan Ruvie, rọ dia asan rẹ ayen vwẹ ibrẹro 30 vwọ yan nẹ uwevwin rayen te jovwo. Ẹkẹvuọvo ọ rẹ udje na, inọke ivẹ yen ọ reyọ ayen. Oma rẹ ayen kpọrhọ totọ, oma ji bru ayen ku tavwen ayen ki te etiyin, ẹkẹvuọvo emu vuọvo ru aye-en.

Oghọn ukoko ri Malawi kugbe Mozambique da vwẹ ukẹcha phia kpakpata. Ayen ji iniruo okinriariẹ kugbe ekpako nẹ ayen ra fuẹrẹn oborẹ iniọvo rẹ oghwọrọ na teri oma ghene guọnọ, je bọn ayen gan. E ji Umẹ rẹ Ukẹcha buebun nẹ ayen ra vwẹrote iruo rẹ ukẹcha na, ayen da ton iruo na phiyọ ugege yena, rere iniovo avwanre se vwo vwo emu vẹ ekuakua efa rẹ ayen ghene guọnọ. A ghwọrọ igho re vrẹ $33,000 vwọ vwẹ ukẹcha kẹ ihwo, kugbe igho re vrẹ $300,000 vwọ rhuẹrẹ je rhoma bọn iwevwin.

Umẹ na rẹyọ igho vwo ruiruo vwẹ idjerhe rẹ aghwanre, rọ dia obo re ghanre kidie erọnvwọn ghanre mamọ. Kerẹ udje, vwẹ emeranvwe ighwrẹn rẹsosuọ ra vwọ ton iruo rẹ ukẹcha na phiyọ nu, uchunu rẹ igho ra vwọ dẹ eka ra nọre​—rọ dia emu rẹ ihwo ri Malawi​—da vwẹ ẹkẹn 70 vwọ ghanre vrẹ obo ri jovwo. Ipẹtro je ghwa ghanre. A sa vwọ riẹn igho ghwọrọ, iniọvo na da dẹ emu vẹ ekuakua ra vwọ bọn uwevwin buebun, vwẹ ekogho re riariẹ ayen phiyọ. Ọ da nẹrhẹ ayen dẹ erọnvwọn na ku, je kẹnoma kẹ igho obuebun ra cha vwọ fan ayen.

Iruo rẹ ukẹcha na te ẹwẹn rẹ ihwo ri Jihova. Felisberto, oniọvo ọshare ọvo vwẹ Mozambique da ta: “Me je rhe mrẹ ukoko rọ vwẹ ekuakua ra vwọ bọn iwevwin, ofan, ihwo re bọn iwevwin, emu, kugbe odjekẹ rẹ ẹguọnọ vwọ phia enẹ dẹvo-o. Ukẹcha na ghwe dje uvi rẹ ẹguọnọ ri Jesu djisẹ rọyen vwẹ Jọn 13:​34, 35.” Ester rọ dia ayeuku ọvo vwẹ Malawi rẹ uwevwin rọyen guọghọre da ta: “Ofu dje vwe hwe kidie mi vwo igho ro che te vwọ bọn uwevwin ọfa-a. Ọtiọyen na, iniọvo na rhe vwọ bọn uwevwin kẹ vwẹ, kọ ghwa họhọ nẹ Iparadaisi yen me hepha.”

Avwanre vwo siẹkẹrẹ akpọ kpokpọ na phiyọ na, avwanre rhẹro rọye nẹ e che rhiẹromrẹ oghwọrọ buebun. (Matiu 24:​7, 8) Jẹ, a kpẹvwẹ ovwan fikirẹ itetoro ri ghwologhwolo rẹ ovwan ruẹ, o mu avwanre ẹro nẹ ihwo ri Jihova cha mrẹ ukẹcha rẹ ayen guọnọre. E dje obo re ruẹ itetoro wan vwẹ donate.jw.org. Ovwan kobiruo vwọ kẹ ẹwẹn rẹ okẹ ri ghwologhwolo rẹ ovwan.