Ikpe Ujorin Revwo Ghwoghwo Uvie na Re!
1. Die yen e jiri kẹ ihwo ri Jihova nẹ ayen ru omarẹ ikpe 100 re wanre na?
1 “Nighere, Ovie na suẹn re! Ovwan ihwo rọ reyọ vwo ghwoghwo. Ọtiọyena, ghwoghwo, ghwoghwo, ghwoghwo Ovie na vẹ Uvie rọyen.” Womarẹ eta nana, Oniọvo Rutherford rhanriẹn ẹwẹn rẹ ihwo re kerhọ rọyen omarẹ ikpe 100 re wanre na ro vwo phiuduphiyọ ihwo ri Jihova awọ rere ayen vwo ghwoghwo ovuẹ rẹ Uvie na vwẹ akpọeje. Ọtiọyen avwanre ghini ru! Kerẹ Inene-ri-Kristi rẹ awanre, avwanre ghwoghwo iyẹnrẹn esiri rẹ Uvie na “kẹ akpọ na ejobi” (Kọl. 1:23) E de ni kpẹ ikpe 100 re wanre na, die yen avwanre ru re, re sa nẹrhẹ avwanre ghwoghwo Uvie Ọghẹnẹ na? Uvie na vwo siẹkẹrẹ ikpe 100 na, mavọ yẹn avwanre se vwo ghwoghwo ọkieje?
2. Idjerhe vọ yen ẹbe avwanre vwo ghwoghwo Uvie rẹ Ọghẹnẹ?
2 Revwo nẹ kpobuko: Ikpe buebun yen ẹbe avwanre vwo ghwoghwo Uvie rẹ Ọghẹnẹ re. Rhavwẹn 1939 yẹn odẹ rẹ ọbe ọkiọke avwanre na vwọ dia The Watchtower Announcing Jehovah’s Kingdom. Ọkieje yẹn ọbe ọkiọke nana vwọ tota kpahen Uvie na vẹ obo ro che ru. Ọrivẹ rọyen re se Awake! ji ghwoghwo nẹ Uvie Ọghẹnẹ ọvo yen iphiẹrophiyọ rẹ ihworakpọ vwori. Ọ vwerhoma a vwọ riẹn nẹ ẹbe ọkiọke rẹ avwanre na yen a ma fan kpẹ ejajẹ sansan re, eyen a je ma ghare vwẹ akpọeje!—Ẹvwọ. 14:6.
3. Ena vọ yen avwanre reyọ vwo ghwoghwo Uvie na re?
3 Ihwo ri Jihova vwẹ ena sansan vwo ghwoghwo Uvie na re. Vwẹ ọtonphiyọ, a reyọ imoto ro vwo agboro vwo ghwoghwo, ọtiọyen ji te iredio vẹ igramafonu. Ena nana vwẹ ukẹcha kẹ avwanre vwọ hẹre iyẹnrẹn esiri na vwo te ihwo buebun. Ọke yena, ihwo ri ghwoghwo iyẹnrẹn esiri na ghwe bu-un. (Une 19:4) O ji kri nọ na-a, avwanre phi evuẹ phiyọ jw.org, rọ nẹrhẹ ovuẹ rẹ Uvie na se te ihwo buebun obọ, ji te ihwo re dia asan ra da dobọ rẹ owian rẹ avwanre ji dede.
4. Owọẹjẹ oghẹresan vọ yen avwanre jẹ re?
4 Ihwo ri Jihova ji vwobọ vwẹ owọẹjẹ rẹ oghẹresan vwọ hẹre ovuẹ rẹ Uvie na. Kerẹ udje, vwẹ ọtonphiyọ rẹ 1995, avwanre hẹre iruo ri nuwevwin kpẹ uwevwin na phiyọ revwo ghwoghwo vwẹ asan rẹ ihwo da heha, igareji, asan rẹ iruo yẹrẹ afieki. O ji kri nọ na-a, avwanre ton aghwoghwo phiyọ vwẹ asan ra da ma mrẹ ihwo vwẹ irere ride. Vwọba, ikoko buebun ji vwobọ vwẹ aghwoghwo vwẹ asan ra da ma mrẹ ihwo vwẹ ibrotọ rẹ ayen de ghwoghwo womarẹ akpẹrẹ ra rhuẹrẹ ẹbe ọkiọke na phiyọ kugbe imẹjẹ re mu phiyọ asan rẹ ihwo wan mamọ. Vwọrẹ uyota, aghwoghwo ri nuwevwin kpẹ uwevwin na yen ona rọ ma ghare avwanre vwo ghwoghwo Uvie na.—Iruo 20:20.
5. Uphẹn vọ yen ukpe ẹga kpokpọ na che rhiephiyọ kẹ buebun rẹ avwanre?
5 Revwo nẹ kpobaro: Vwẹ ukpe rẹ ẹga kpokpọ rọ cha tonphiyọ vwẹ September na, ihwo buebun cha dia ekobaro ọkieje. Wọ sa dia ọvo usun rẹ ekobaro na? Gbanẹ wo che ruiruo ọchuko rẹ ọkobaro nọke ra ruọke? Wọ gare kerẹ ọkobaro ọkieje yẹrẹ wo se ru ọtiọyen dede-e, Jihova che bruba kẹ wẹ fikirẹ omaevwoze wẹn kẹ aghwoghwo rẹ Uvie na.—Mal. 3:10.
6. Diesorọ emeranvwe rẹ October rẹ ukpe nana cha vwọ dia ọrẹ oghẹresan?
6 Uvie na che te ukpe 100 vwẹ emeranvwe rẹ October 2014. Kọyen sorọ The Watchtower re che phi phiyẹ ada vwẹ emeranvwe yena cha vwọ kanrunumu Uvie rẹ Ọghẹnẹ. Wọ sa davwẹngba wo vwo phi buebun ri Watchtower yena phiyẹ ada? Avwanre vwo nẹ obaro na, e jẹ avwanre vwẹ ọkieje “vwo ghwoghwo iyẹnrẹn esiri re Uvie rẹ Ọghẹnẹ” na.—Iruo 8:12.