Iwevwin ri Brọghọ Phiyọ Ọghẹnẹ Avwanre Oma

O vwerhan Jihova oma ro vwo yono ihwo rọyen. Ọtiọyena, ukoko rọyen vwẹ isikuru sansan vwo mu ri yono ihwo vwo ruiruo ra kẹ ayen vwẹ ẹga ri Jihova. Ọvo usun rẹ isikuru ọtiọyena yen Isikuru rẹ Ihwo ri Ghwoghwo Uvie Na (SKE). Vwẹ ikpe evo rhire na, ọ dia iyono ra vwọphia vwẹ isikuru na ọvo yen ukoko ri Jihova tẹnrovi-i, ẹkẹvuọvo, ayen je tẹnrovi obo re se vwo ru iwevwin re de che ru isikuru ukoko na yovwinphiyọ. Ọdavwẹ ọvo kiriguo rọ sorọ yen ayen vwo ru iyono rẹ isikuru na lọlọhọ vwọ kẹ iyono kugbe emọ rẹ isikuru na. Mavọ yen itetoro rẹ ovwan vwọ cha avwanre uko vwọ yanmuẹ oborẹ avwanre tẹnrovi na?

Emọ rẹ Isikuru Buebun Vwẹ Ekogho Oyoyovwin

Vwẹ ikpe buebun rhire na, Eguan Ruvie vẹ Eguan rẹ Omẹvwa yen e de ruẹ isikuru ukoko na. Kẹ diesorọ a vwọ rhoma bọn yẹrẹ rhuẹrẹ iwevwin buebun ra reyọ vwo ruẹ isikuru rẹ Uvie na ọvo? Ja fuẹrẹn iroro erha re sorọ.

Obo ra ma guọnọ. Oniọvo Christopher Mavor, rọ dia ọvo usun rẹ Umẹ Rọvwẹrote Iruo rẹ Ẹga rẹ Ẹko Rọvwẹrote Na da ta: “Eghọn rẹ ukoko sansan vuẹ avwanre nẹ ayen guọnọ iniọvo rẹ eya vẹ eshare re sa vwẹ ukẹcha phia vwẹ iruo rẹ aghwoghwo na. Kerẹ udje, vwẹ 2019, oghọn ukoko ri Brazil tare nẹ ayen guọnọ iniọvo ri te omarẹ 7,600 ri wontọ vwo nẹ isikuru rẹ SKE, rere ayen vwọ vwẹ ukẹcha phia vwẹ ubrotọ rẹ oghọn ukoko rayen vwẹrote.” Oghọn ukoko ri United States guọnọ ekobaro ri muwan ri se yono ihwo efa phiyọ aghwoghwo azagba vwẹ irere ride, kugbe ọ rẹ unuerhuru vẹ ọ rẹ uwodin. A je guọnọ iniọvo ri che nene Akon Iruo rẹ Ebanbọn Vwẹ Oghọn Ukoko vẹ iniọvo rehẹ Umẹ Rọvwẹrote Omaesivwo wian kugbe. Ihwo ri wontọ vwo nẹ isikuru rẹ SKE sa vwẹ ukẹcha phia vwo ru eyena.

Iniọvo buebun ri si ifọmu. Ifọmu rẹ iniọvo buebun si rhe eghọn ukoko bun vrẹ oborẹ ayen se rhiabọreyọ enẹna. Kerẹ udje, vwẹ oghọn ukoko ri Brazil, iniọvo buebun si ifọmu rẹ SKE ri te omarẹ 2,500 vwẹ uvwre rẹ ẹgbukpe ọvo. Ẹkẹvuọvo, kidie nẹ ayen ghwe vwo asan obuebun rẹ ayen vwo ru isikuru na-a, emọ isikuru 950 ọvo kọyen oghọn ukoko na se durhie.

Emamọ rẹ iwevwin. Ọke re vwo ruẹ isikuru na vwẹ Eguan Ruvie yẹrẹ Eguan rẹ Omẹvwa, iwevwin rẹ iniọvo re dia ekogho na yen emọ isikuru na dia. Orhuẹrẹphiyotọ nana nabọ shephiyọ vwọ kẹ ẹkuotọ ro vwo iklasi obuebun kukpe kukpe-e. Ẹkẹvuọvo vwẹ ẹkuotọ ri vwo iklasi buebun, ọ sa bẹn vwọ kẹ ighwoghwota re dia ekogho na, rẹ ayen vwo phi emọ isikuru na phiyọ uwevwin kemeranvwe kemeranvwe vwẹ ẹgbukpe ọvo. Ọtiọyena, ayen de ru orhuẹrephiyotọ rẹ uwevwin ra nabọ rhuẹrẹ vwọ kẹ emọ isikuru na, rọ je kẹrẹ iklasi re de che yono ayen na.

Vwo nene oborẹ ekogho na hepha yẹrẹ erọnvwọn efa, uwevwin ro vwo iklasi ọvo, kugbe uvun rẹ iyono vẹ emọ isikuru ri te omarẹ 30 cha dia vẹ asan efa, sa reyọ te idọla oduduru buebun (U.S.).

Oborẹ Uwevwin rẹ Isikuru na Hepha

Asan rọ fọre ro sherabọ kẹ irere ride, rọ kẹrẹ asan ra da fobọ mrẹ imoto rua phẹrephẹre yen a bọn iwevwin rẹ isikuru na phiyọ. Obo re me nẹ ra vwọ riẹn asan ra cha bọn isikuru ukoko na phiyọ yen ekogho ri vwo ighwoghwota buebun, re sa vwẹ ukẹcha phia rere isikuru na vwọ nabọ riẹn wian, re je sa vwẹrote iwevwin rẹ isikuru na vẹ ekuakua re vwo ruiruo.

Iwevwin na vwo ilaibri sansan, asan re de yono ẹbe, ikọmputa, iprinta kugbe ekuakua efa. Ọke buebun na, o vwo asan ra rhuẹrẹphiyọ vwọ kẹ iyono vẹ emọ isikuru na rẹ ayen da sa riemu kugbe. A je rhuẹrẹ asan ra da sa sasa oma ji rovwoma.

Avwanre je nabọ frẹkotọ muegbe rẹ iklasi na. Oniọvo Troy, ro nene Akon Iruo Rọvwẹrote Ebanbọn Vwẹ Akpọeje wian kuẹgbe vwẹ Warwick, New York da ta: “Avwanre nokpẹn rẹ ukẹcha vwo mie Akon Iruo rẹ Isikuru Ukoko Na, rere ayen cha avwanre uko vwọ rhuẹrẹ iklasi na vwẹ idjerhe ọ da sa lọhọ vwọ kẹ iniọvo na ayen vwo yono. Iniọvo na vuẹ avwanre kpahen oborẹ iklasi na cha rho te, obo ra cha rhuẹrẹ wan, oka rẹ urhukpẹ re che phi phiyọ vẹ ekuakua rẹ uhworo vẹ ividio rẹ ayen guọnọre.” Vwọ kpahen ekuakua rẹ uhworo na, oniọvo Zoltán, rọ dia oyono rẹ SKE vwẹ Hungary da ta: “Ẹsosuọ, avwanre vwo imaikrofonu vuọvo-o, ọtiọyena kẹ avwanre karophiyọ iniọvo na nẹ ayen ta ota gan. Jẹ asaọkiephana, avwanre rhe vwo ebẹnbẹn yena-a, kidie avwanre vwo imaikrofonu vwẹ emẹjẹ ọvuọvo re!”

“Ihwo re Durhieri ri Jihova Niri Ghanghanre”

Idjerhe vọ yen iwevwin re ru yovwinphiyọ na vwo djobọte iyono vẹ emọ isikuru na? Angela ro kpo isikuru rẹ SKE vwẹ Palm Coast, Florida, U.S.A. da ta: “Ekogho na fuoma. A nabọ rhuẹrẹ erọnvwọn eje phiyọ, ji te iklasi vẹ ivun rẹ avwanre, rere avwanre sa vwọ nabọ tẹnrovi oborẹ avwanre yono.” Csaba rọ dia oyono vwẹ Hungary dje ọdavwaro phia kpahen uphẹn ọ vẹ emọ isikuru na vwọ riemu kugbe. Ọ tare nẹ vwẹ ọke tiọyena, “emọ isikuru na vuẹ avwanre kpahen oma rayen vẹ obo re phia kẹ ayen wanre. Ọnana nẹrhẹ avwanre riẹn emọ isikuru na phiyọ. Fikirẹ ọnana, kẹ avwanre sa rhuẹrẹ oborẹ ayen che yono vwo nene ọdavwẹ rayen.”

Emọ isikuru vẹ iyono na nẹ iwevwin rẹ isikuru ra nabọ rhuẹrẹphiyọ na kerẹ okẹ ro nẹ obọ rẹ “Oyono” avwanre Jihova rọ ma rho kparobọ na rhe. (Aizaya 30:​20, 21) Oniọvo aye ọvo vwẹ Philippines ro kpo SKE vwẹ uwevwin ọvo re wene hirhephiyọ isikuru da ta: “Ekogho rẹ isikuru na karophiyọ avwanre nẹ avwanre dia emọ isikuru ghevweghe-e, ẹkẹvuọvo ihwo re durhieri ri Jihova niri ghanghanre. Jihova guọnọre nẹ oma vwerhan avwanre ra vwọ frẹkotọ yono Ota rọyen na.”

Womarẹ itetoro rẹ ovwan yen avwanre sa vwọ bọn, rhuẹrẹ je vwẹrote iwevwin rẹ isikuru buebun na, a womarẹ donate.jw.org vwo ru buebun rẹ itetoro na. Ovwan kobiruo mamọ vwọ kẹ ọke ri ghwologhwolo rẹ ovwan.