JW Satellite te Asan rẹ Intanẹti Hepha-a

Kemeranvwe kemeranvwe yen avwanre vwọ rhẹro ọke re che vwo ni ọrhuẹrẹphiyotọ rẹ ividio sansan ra vwọphia vwẹ JW Broadcasting re nabọ phiuduphiyọ avwanre awọ. Ẹkẹvuọvo, iniọvo rẹ avwanre buebun vwẹ Africa se nẹ ọrhuẹrẹphiyotọ nana vwẹ intanẹti-i. Diesorọ?

Asan buebun vwẹ Africa ghwe vwo ugogo rẹ intanẹti-i. Ekogho ri vwori dede, intanẹti na ghwa ga-an, ọ je ghanre ra vwọ dẹ idata. Kerẹ udje, oniruo okinriariẹ ọvo vwẹ Madagascar kpo ushoghwa ra da hwosa vwọ danlodu erọnvwọn (Internet café) rere ọ sa vwọ danlodu rẹ JW Broadcasting rẹ emeranvwe ọvo. Osa rọ hware yen $16, rọ vrẹ igho ra hwa kẹ ihwo evo ọsoso rẹ udughwrẹn!a

Dede nẹ ebẹnbẹn nana herọ, iduduru rẹ ihwo vwẹ Africa sa riavwerhen rẹ ughe ri JW Broadcasting na enẹna ababọ rẹ intanẹti. Mavọ ayen ruo wan?

Vwo nẹ 2017 rhe, yen e vwo phi JW Broadcasting na phiyọ ishanẹ ọvo vwẹ satellite kẹ ihwo re dia sub-Saharan Africa. Ishanẹ nana hworo broadcast na ọphẹ kẹdẹ kẹdẹ vwẹ inọke 24 vwẹ ejajẹ 16.

E se vwo ru ọnana, Iseri ri Jihova da hwosa kẹ ihwo ri ruiruo vwẹ ishanẹ rẹ TV ọvo rere ayen se vwo hworo ọrhuẹrẹphiyotọ ri JW Broadcasting na vwẹ satellite. Satellite nana se te ẹkuotọ 35 vwẹ sub-Saharan Africa. Igho ra hwa phiyọ vrẹ $12,000 kemeranvwe kemeranvwe. Nọke ra ruọke, a je hwosa ọfa vwọ kẹ ishanẹ ọfa rere o se vwo hworo ọrhuẹrẹphiyotọ ri JW Broadcasting rẹ avwanre ruẹ ẹdẹdẹ yena. Ọnana nẹrhẹ ihwo uriorin buebun sa riavwerhen rẹ eghwẹkoko yẹrẹ irueru oghẹresan re ruẹ ọke rẹ ikiekin rẹ oghọn ukoko.

Ihwo buebun te ihwo re dia Iseri ri Jihova dede-e, ji nughe rẹ ishanẹ ri JW satellite na vwẹ TV vwẹ uwevwin rayen. Ẹkẹvuọvo, iniọvo rẹ avwanre buebun mrẹ igho vwọ dẹ ekuakua re vwo nughe vwẹ satellite na-a. A sa vwọ vwẹ ukẹcha kẹ ayen, a da dẹ ekuakua re vwo nughe vwẹ satellite na phiyọ Eguan Ruvie re vrẹ 3,670 rere iniọvo rẹ avwanre se vwo ni JW Broadcasting vwẹ etiyin. Igho ra vwọ dẹ ji muẹ ekuakua nana ghanre te omarẹ $70 ọ da dianẹ Ọguan Ruvie na vwo TV yẹrẹ iprojẹtọ jovwo re. Ọ rha dia ọtiọye-en, igho eje ra cha ghwọrọ se buẹn te $530.

Oma vwerhen iniọvo rẹ avwanre nana fikirẹ ishanẹ nana re ruru na. Ọkpako ọvo vwẹ Cameroon da ta: “Ọ ghwa họhọ mana vwẹ uherevie rẹ aton vwọ kẹ orua rẹ avwanre.” Oniọvo ọshare ọvo vwẹ Nigeria re se Odebode da ta: “Kerẹ orua, avwanre nughe ri ishanẹ nana abọ erha kudughwrẹn kudughwrẹn. Emọ mẹ rhẹro rẹ ọke rẹ avwanre vwo nughe nana. Vwẹ ọke efa, ayen tobọ tanẹ e wene kpo JW shanẹ na.” Rose rọ je dia Nigeria da ta: “Oma vwerhen ovwẹ mamọ nẹ ukperẹ mi vwo nẹ ishanẹ re ghwa iyẹnrẹn kọke kọke, ishanẹ ri JW na kọyen mi nughe rọyen enẹna. Ọke mi de nẹ iyẹnrẹn, evuẹ ra vwọphia na miovwo uvwe ivun, e je nẹrhẹ BP mẹ kpenu. Ẹkẹvuọvo, ughe ri JW Broadcasting na bọn ohwo gan, ọ je nẹrhẹ ẹwẹn rẹ ohwo totọ! Ọna yen ishanẹ ro me je vwe. Ọnana ebruphiyọ rode ro nẹ obọ ri Jihova rhe.”

Oniruo okinriariẹ ọvo vwẹ Mozambique tare nẹ a nabọ rhuẹrẹ ekuakua re vwo nughe ri satellite na phiyọ Eguan Ruvie rehẹ okinriariẹ rọyen. Iniọvo rehẹ ikoko nana se te Eguan Ruvie na omarẹ unọke ọvo yẹrẹ ọke rọ vrẹ ọtiọyen rere ayen se vwo koko ni JW Broadcasting.

Ọke re vwo ru ọghwẹkoko rẹ akpọeje ri 2019 vwẹ Johannesburg, South Africa, a reyọ ishanẹ na vwo hworo eta evo kiriguo kugbe eta rẹ oniọvo ọvo rọhẹ Ẹko Rọvwẹrote na vwọphia vwẹ asan irhirin efa. Oniọvo Sphumelele rọ wian vwẹ Akon Iruo rẹ Broadcasting rọhẹ oghọn ukoko ri South Africa da ta: “Jovwo, avwanre ke vwo vwẹ ẹwẹn ra vwọ vwẹ eta na phia vwẹ intanẹti. Ẹkẹvuọvo ọnana cha guọnọ intanẹti rọ ganre, iniọvo na me je dẹ idata. Ishanẹ ri JW satellite yen me ku, a je sa vwẹrosuọ.”

Ovwan kobiruo vwọ kẹ utoro ri ghwologhwolo rẹ ovwan toro vwọ kẹ iruo rẹ akpọeje na, womarẹ ọnana, iniọvo buebun vwẹ Africa ki se nughe ri JW Broadcasting vwẹ satellite. Ovwan kobiruo rẹ utoro rẹ ovwan ruẹ womarẹ ena sansan ra vwọphia vwẹ donate.jw.org.