Asan re de Ruiruo rẹ Efanfan ro Fierere kẹ Iduduru rẹ Ihwo Buebun

Ẹkẹn 60 rẹ ujorin rẹ ẹko rẹ iniọvo rẹ avwanre ri ruiruo rẹ efanfan na, dia evunrẹ eghọn ukoko-o, ẹkẹvuọvo ọfisi re de ruiruo efanfan (RTO) rehẹ asan sansan yen ayen hepha. Idjerhe vọ yen ọrhuẹrẹphiyotọ nana vwọ vọn vẹ erere? Ekuakua vọ yen efeta na guọnọre rere ayen sa vwọ nabọ ruiruo rayen vwẹ RTO? Mavọ yen asan sansan re mu efeta na ra na vwọ nẹrhẹ efanfan rayen na yovwinphiyọ?

Vwẹ RTO na, efeta na dia ohri rẹ ihwo buebun re jẹ ephẹrẹ na. Karin ọvo vwẹ usun rẹ efeta ri Low German da ta: “Rhanvwẹ ọke rẹ avwanre vwọ kua rhe RTO rọhẹ orere ri Cuauhtémoc vwẹ Chihuahua Mexico na, kọke kọke kọyen avwanre vwọ jẹ ephẹrẹ ri Low German​—⁠ọke rẹ avwanre vẹ efeta efa da ta ota, vwẹ iruo rẹ aghwoghwo na, ọtiọyen ji te ọke rẹ avwanre da dẹ erọnvwọn. Avwanre nabọ jẹ ephẹrẹ na mwoma. Avwanre nyo isẹ rẹ avwanre ji rhi nyo vwẹ ọke gronro-on, avwanre da je rhe riẹn ibieta rẹ ihwo me vwo ruiruo.”

James ro nene efeta rẹ ephẹrẹ ri Frafra wian kuẹgbe vwẹ Ghana tare nẹ, ọkievo, urhuru rẹ iniọvo rehẹ orua ri Bẹtẹl vwẹ oghọn ukoko ji siẹ ọyen. Ẹkẹvuọvo ọ da vwọba nẹ: “Obo ri mi ruẹ vwẹ RTO na vwerhen ovwẹ oma. Ra vwọ vwẹ ephẹrẹ rẹ ihwo na jẹ vwo ghwoghwo ota, je mrẹ oborẹ ayen rhiabọreyọ iyẹnrẹn esiri na kẹ vwẹ aghọghọ.”

Die yen iniọvo na nẹ vwo brorhiẹn rẹ asan re che phi RTO na phiyọ? Joseph rọ wian vwẹ Akon Iruo rẹ Ebabọn rẹ Akpọeje rọhẹ Warwick, New York, U.S.A. da tanẹ: “Ebẹnbẹn ọvo rẹ avwanre hirharokuẹ yen ekogho evo vwo urhukpẹ yẹrẹ ame-e, evo vwo intanẹti rẹ ayen cha vwọ danlodu rẹ ewian rẹ ayen cha fan na-a. Ọtiọyena, tavwen re ki phi RTO phiyọ asan, avwanre nabọ fuẹrẹn ekogho sansan ra da jẹ ephẹrẹ na tavwen.”

Tarhe takpo, asan rọ ma phẹre ro ji me ku re se phi RTO phiyọ yen Ọguan Omẹvwa, Ọguan Ruvie, yẹrẹ uwevwin ra bọn kẹ imishọnare, rẹ efeta na se rhe nẹ uwevwin ra kpo owian. Iwevwin tiọna rha herọ-ọ, iniọvo na sa rhọnvwe nẹ a dẹ uwevwin yẹrẹ ọfisi rẹ efeta na sa dia da je wian. Ọdavwẹ rẹ iruo rẹ efanfan na de wene, ka shẹ iwevwin tiọyena, a me vwẹ igho na vwọ choja rọhẹ otọ vwẹ ọke yena.

E Muegbe Rọyen Vwọ kẹ Iruo Na

Vwẹ ukpe rẹ ẹga ri 2020, avwanre ghwọrọ idọla oduduru 13 (U.S.) phiyọ iruo re ruẹ vwẹ RTO sansan, Ẹko rẹ iniọvo rehẹ RTO na guọnọ ikọmputa, ekuakua re vwo rekọdu, intanẹti kugbe erọnvwọn kerẹ ame vẹ urhukpẹ. Kerẹ udje, ikọmputa ọvo ghanre te idọla $750 (U.S.). Ikọmputa nana vwo iprogramu sansan ra dẹ phiyọ ayen kugbe iprogramu re se Watchtower Translation System rọ cha efeta na uko vwọ rhuẹrẹ iruo rayen phiyọ, je nẹrhẹ ọ lọhọ kẹ ayen rẹ ayen vwo ru ehiahiẹ.

A je kẹ efeta na ekuakua re vwo rekọdu rẹ eta rọ nẹrhẹ ayen se rekọdu rẹ eta vwevunrẹ ọfisi. A mrẹ ọghanrovwẹ rẹ ekuakua nana ọke rẹ ọga ri COVID-19 na vwọ tonphiyọ, kidie buebun rẹ efeta na se mu ekuakua na kpo uwevwin re vwo rekọdu rẹ ẹbe vẹ ividio.

Nọke ra ruọke, iniọvo re dia ekogho na je vwomakpahotọ ọphẹ vwọ kẹ iruo rẹ ẹroevwote rẹ RTO na, ayen je vwẹ ukẹcha phia vwọ fuẹrẹn ẹbe ra fanre na. Cirstin rọ ga vwẹ RTO ra da fan Afrikaans vwẹ Cape Town, South Africa da ta: “Ighwoghwota kugbe ekobaro buebun vwo uphẹn rẹ ayen vwọ wian vwẹ etinẹ.”

Iniọvo nana re vwomakpahotọ na riavwerhen rẹ uphẹn rẹ ẹga rayen. Oniọvo aye ọvo rọ vwẹ ukẹcha phia vwẹ RTO ọvo da tanẹ, owian rẹ ọyen wian vwẹ etiyin na “vwerhen ọyen oma gangan.” Iniọvo evo re dia ekogho na je vwẹ ukẹcha phia vwo rekọdu rẹ ẹbe vẹ ividio. Juana rọ dia ọvo vwẹ usun rẹ iniọvo re fan ephẹrẹ ri Totonac vwẹ Veracruz, Mexico da ta: “Enẹna rẹ avwanre vwọ kua kẹrẹ eko ra da jẹ ephẹrẹ rẹ avwanre re na, kọ pha lọlọhọ ra vwọ mrẹ iniọvo re vwẹ ukẹcha phia vwo rekọdu rẹ ẹbe vẹ ividio ra fanre na.”

Ẹkẹvuọvo RTO na nẹrhẹ efanfan na rhoma fiotọ phiyọ? Iduduru rẹ ihwo ri se ẹbe rẹ avwanre tare nẹ e. Cédric ro nene ẹko re fan ephẹrẹ ri Kongo wiankuẹgbe vwẹ Democratic Republic of Congo tare ne: “Ọke ri jovwo, iniọvo evo se efanfan rẹ avwanre na nẹ ọyena ‘Kongo ri Watch Tower,’ kidie ọ dia oborẹ ihwo jẹ ephẹrẹ na wan kẹdẹ kẹdẹ yen avwanre fan eta na nene-e. Ẹkẹvuọvo kẹ ayen ta enẹna nẹ, obo ra jẹ Kongo wan asaọkiephana kọyen a fan ẹbe rẹ avwanre na nene, oborẹ ihwo ghwa ta ota wan kẹdẹ kẹdẹ.”

Andile ro nene ẹko re fan ephẹrẹ ri Xhosa wian ji nyo oka rẹ iyẹnrẹn yena vwẹ South Africa. Ọ da ta: “Buebun rẹ ihwo vuẹ avwanre ewene sansan rẹ ayen mrẹre vwẹ efanfan rẹ avwanre na. Imitete ri se Uwevwin Orhẹrẹ na vwẹ ephẹrẹ Oyibo jovwo, ki se vwẹ ephẹrẹ ri Xhosa enẹna. Obo ri me je ayen vwẹ New World Translation ra rhoma si na yen, a fanrọ nene obo ra ta ota wan.”

Igho eje ra ghwọrọ phiyọ ebanbọn rẹ RTO, ẹroevwote rẹ iwevwin na kugbe ihwo re wian vwọ eje, itetoro rẹ ọphẹ re ru kẹ iruo rẹ akpọeje na, kugbe ọ re ru vwẹ donate.jw.org yen a vwọ hwosa na eje.