Ra Vwọ Chochọn rẹ Ugbomọphẹ rẹ Ẹga Vwẹ Orho Sansan rẹ Emotọ Ọvo ma Dia

Vwẹ usun rẹ ihwo oduduru ujorin buebun re dia Latin America, ihwo re kpahen oduduru yen emotọ ri jẹ ephẹrẹ robọ rayen, ri ji vwo ẹkuruemu rayen. Iniọvo rẹ avwanre buebun re vẹ avwanre gba ga Jihova kuẹgbe jehẹ usun rẹ ihwo nana ri vwẹ ẹro ọghanghanre vwo ni ẹkuruemu rayen na. Ra sa vwọ cha ihwo uko vwo yono kpahen uyota rọhẹ Baibol na, Iseri ri Jihova ke fan ẹbe vẹ ividio rayen kpo ephẹrẹ re vrẹ 130 ra jẹ vwẹ orho sansan rẹ emotọ ọvo ma dia vwẹ Latin America.a Dedena, e mukpahen buebun rayen kidie ayen jẹre nẹ ayen cha ga Jihova, je kẹnoma kẹ ẹkuruemu sansan rẹ Baibol na rhọnvwephiyọ-ọ, re ruẹ vwẹ ekogho rayen na. Ukẹcha vọ yen a vwọ kẹ ayen re, womarẹ utoro wẹn?

A Cha Ayen Uko Vwo Rhivwin Kpo

Vwẹ Mexico, iniọvo rẹ avwanre re dia orho rẹ ihwo rẹ Huichol, vwẹ enu rẹ igbenu rẹ Jalisco State senre vwẹ idjerhe rẹ ọghọ nẹ, ayen che vwobọ vwẹ irueru rẹ ẹga ri gbevwọso ẹwẹn obrorhiẹn raye-en.b Ọnana da nẹrhẹ ivun miovwo ihwo evo re dia ekogho na. Vwẹ December 4, 2017, ẹko rẹ inogbozighi da họrhọ ro ẹko rẹ iniọvo evo vẹ ihwo efa re vẹ ayen gba herọ. Inogbozighi na da guọghọ ekuakua rayen, tua ayen nẹ orho na, je djẹ uguegue mu ayen nẹ ayen che hwe iniọvo na siẹrẹ ayen de rhivwin rhe.

Iseri re dia eko re kẹrẹ ayen da reyọ iniọvo na phiyọ uwevwin je vwẹrote ayen. Ẹkẹvuọvo, die yen se ru rere iniọvo na se vwo rhivwin kpo? Oniọvo ọvo re se Agustín da tane: “Avwanre vwo igho ra sa vwọ reyọ ilọya-a, avwanre je riẹn ohwo re se bru ra nẹ o bru avwanre uche kpahen eta rẹ irhi-i.”

Kidie nẹ ọnana ẹvwọsuọ rẹ ugbomọphẹ rẹ ẹga rẹ avwanre, oghọn ukoko ri Central America da jowọ kpakpata. Ẹsosuọ, ayen da ka vuẹ ihwo re vwẹrote eta re irhi re dia ekogho na nẹ ayen zorọ otọ rẹ ota na. Ọyena vwọ wan nu, Umẹ rẹ Erevwẹrote rẹ Ẹko Rọvwẹrote rẹ Iseri ri Jihova da rhọnvwe nẹ, oghọn ukoko ri Central America vẹ Akon rẹ Iruo rọ Vwẹrote Eta ri Shekpahen Urhi rehẹ esiri ukoko mu ota rẹ iniọvo ri Huichol na kpo aguare. Ememerha na, ota na de rhi te Aguare Ro Me Kpenu ri Mexico.

Ẹko ri ilọya ri nẹ ẹkuotọ sansan rhe da nabọ muegbe rẹ iroro elọlọ vwo djephia nẹ, kirobo rẹ ihwo efa muọghọ kẹ ẹkuruemu rẹ emotọ rẹ orho na, ọtiọyen o ji fo nẹ orho na komobọ ji muọghọ kẹ uturhi rẹ ihwo re dia evun rọyen, je sẹro rẹ ihwo na. Ihwo eje vwo ugbomọphẹ, o toro asan rẹ ayen dia-a.

Vwẹ July 8, 2020, Aguare Ro Me Kpenu na de kuenu kugbe brorhiẹn kẹ Iseri ri Jihova. Ayen de jurhi nẹ a vwẹ uphẹn kẹ ihwo eje ra djẹ nẹ orho na rere ayen rhivwin kpo. Agustín re djunute siẹvure de dje ẹwẹn rẹ ọdavwaro rọyen vẹ ọ rẹ ihwo efa phia, rọ vwọ tanẹ: “Oma vwerhen avwanre mamọ, avwanre je kpẹvwẹ ovwan fikirẹ oborẹ iniọvo nana ru kẹ avwanre na. Kọ dianẹ ayen rhe cha avwanre uko jovwo-o, mane avwanre rhe se ru emuọvo-o.”

E “ru Ẹse Rode kẹ Imihwo Krẹn”

Dedena, iniọvo rẹ avwanre re dia San Juan de Ilumán rọ dia ọko ọvo vwẹ Ecuador rẹ emotọ rẹ Otavalo Valley dia, ji hirharokuẹ omukpahen ọtiọyena. Vwẹ 2014 rẹ iniọvo na vwọ reyọ ẹbe eje ra vwọ ghwobọphiyọ ebanbọn nu, ayen da ton ẹbọn rẹ Ọguan Ruvie ọvo phiyọ. Ẹkẹvuọvo, orherẹn ọvo de sun ẹko rẹ inogbozighi re vrẹ 100 rhe, ayen da dobọ rẹ iniọvo ri ruiruo rẹ ebanbọn na ji. Orho na de jurhi kẹ Iseri ri Jihova nẹ ayen rhe siomakoko ga Jihova-a.

Akon rẹ Iruo rọ Vwẹrote Eta ri Shekpahen Urhi vwẹ oghọn ukoko rẹ Ecuador kugbe ọ rẹ esiri ukoko de kuomakugbe chochọn rẹ iniọvo yena kidie ihwo na gbevwọso ugbomọphẹ rẹ ẹga rayen. Iniọvo rẹ avwanre de mu ẹdjọ na kpo aguare. Ọnana da nẹrhẹ ihwo na siobọ rẹ omukpahen rayen na tuko, je vwẹ uphẹn kẹ iniọvo rẹ avwanre vwọ ton uyono ẹra phiyọ, ayen da je rhe bọn Ọguan Ruvie na re. Rere a sa vwọ sẹro rẹ uturhi rẹ iniọvo na, re vwo jẹ ayen ekpokpo vwẹ ọke rọ cha, iniọvo rẹ avwanre ri mudia phiyọ edjọ na de si ẹbe kpo aguare ro kpenu nẹ, ayen brorhiẹn vwọ kpahenphiyọ onọ ọghanghanre nana: Ofori nẹ emotọ rẹ orho muọghọ kẹ ẹko rẹ irhi ri suẹn ihwo eje?

Vwẹ July 16, 2020, aguare ro me kpenu vwẹ Ecuador re se Constitutional Court of Ecuador, de chidia phiyọ ẹdjọ na. Iniọvo re dia ilọya vwẹ Ecuador de mudia kẹ ukoko na. Iniọvo eshare ẹne efa re dia ilọya re nabọ tona rẹ ẹdjọ rẹ ẹkuotọ sansan ta ota vwẹ aguare na. Fikirẹ urhi ri COVID-19, womarẹ vidiokọfrẹsin kọyen ilọya nana vwọ ta ota vwo nẹ ẹkuotọ rẹ ayen hepha rhe. Ọna yen abọ rẹsosuọ rẹ aguare vwọ rhọnvwe kẹ ilọya ri mudia kẹ Iseri ri Jihova nẹ ayen se vwobọ vwẹ ẹdjọ vwẹ idjerhe ọtiọna.c Ilọya rẹ ukoko na de djunute irhi sansan ri djerephia nẹ ọmotọ ke se ku uturhi rọyen kufia fikirẹ urhi ro suẹn orho rọ dia na-a.

Iniọvo rẹ dia Otavalo Valley hẹrhẹ orhiẹn-ebro rẹ aguare yena. Jẹ asaọkiephana, ukẹcha ra vwọ kẹ ayen na da ayen aaro mamọ. César rọ ga kerẹ ọkpako vwẹ ukoko ri Ilumán Quichua da tanẹ: “Jihova ọvo yen sa womarẹ ukoko rọyen vwo ruẹse rode nana kẹ imihwo krẹn.”

Ilọya eje ri vwobọ vwẹ ẹdjọ na, Iseri ri Jihova, oma vwerhen ayen rẹ ayen vwọ vwẹ erianriẹn rayen vwọ cha iniọvo na uko ọphẹ. Jẹ, e vwo si ẹbe rẹ ẹdjọ na, muegbe rọyen, ji guo vwẹ aguare reyọ ọke vẹ igho. Ilọya rẹ avwanre na vẹ iniọvo efa ghwọrọ inọke re kpahen 380 vwo muegbe rẹ ẹdjọ na, kugbe inọke ọfa rẹ vrẹ 240 vwọ fan ẹbe rẹ edjọ rẹ Mexico na. Omarẹ ilọya 40 ri nẹ ẹkuotọ sansan rhe ghwọrọ inọke ujorin buebun phiyọ ẹdjọ rẹ Ecuador na. Mavọ yen e ru mrẹ igho vwo guẹdjọ yena ra vwọ chochọn rẹ iniọvo rẹ avwanre na? Ọyen womarẹ utoro ru wo ruru womarẹ ena re djunute vwẹ donate.jw.org. Wẹ kobiruo rẹ utoro ri ghwologhwolo wẹn.