Die Yen Oka rẹ 666 na Mudiaphiyọ?

Ẹkpahọnphiyọ rẹ Baibol

Kirobo rẹ ọbe rọ koba rẹ Baibol na djere, 666 ọyen ukeri yẹrẹ odẹ rẹ eranvwe rọ djoma ro vwo uyovwin ighwrẹn vẹ idjo ihwe ro nẹ abadi rhe. (Ẹvwọphia 13:1, 17, 18) Eranvwe nana ọyen oka rẹ okugbe rẹ usuon rẹ akpọ na ro suẹn vwẹ enu rẹ “orua korua kugbe ihwo kugbe ephẹrẹ kugbe ẹgborho.” (Ẹvwọphia 13:7) Odẹ na 666 dje oborẹ usuon nana miovwin te vwẹ ẹro rẹ Ọghẹnẹ. Vwẹ idjerhe vọ?

Ọ vrẹ odẹ ghevweghe. Edẹ rẹ Ọghẹnẹ muẹ kẹ ihwo yẹrẹ erọnvwọn vwo obo ri mudiaphiyọ. Kerẹ udje, Ọghẹnẹ mu odẹ na Abram ro mudiaphiyọ “E Muọghọ yẹrẹ Titi Ọsẹ” kẹ ọshare yena. Ọyen ji mu odẹ na Ebraham ro mudiaphiyọ “Ọsẹ rẹ Urogho buebun,” vwọ kẹ ọshare yena ọke rẹ Ọghẹnẹ vwo ve kẹ nẹ ọ cha dia “ọsẹ rẹ ẹgborho buebun.” (Jẹnẹsis 17:5) Ọtiọyen Ọghẹnẹ ji mu odẹ rẹ 666 kẹ eranvwe yena ro vwo dje oka rẹ iruemu ro vwori.

Ukeri na esan mudiaphiyọ obo re gbare-e. A vwẹ, ukeri ru udje abọ buebun vwẹ Baibol na. Ukeri na ighwrẹn mudiaphiyọ obo re gbare yẹrẹ vọnre. Ọ vwọ dianẹ esan vwẹ ukeri ọvo vwọ hanvwe nọ ighwrẹn na, kọyen o mudiaphiyọ obo re gbare-e yẹrẹ obo ri vwo ekan vwẹ ẹro rẹ Ọghẹnẹ, e ji se vwo dje ivwighrẹn rẹ Ọghẹnẹ.—1 Ikun Rivie 20:6; Daniẹl 3:1.

A vwẹ ukeri erha vwọ kanrunumuẹ orọnvwọn. Ọkiọvo Baibol na se djunute orọnvwọn abọ erha ro vwo dje ọghanrovwẹ rọyen. (Ẹvwọphia 4:8; 8:13) Ọtiọyena odẹ na 666 nabọ djephia nẹ Jihova ni usuon rẹ akpọ na kerẹ obo ri shefia kare kare. Ayen je sa ghwa ufuoma vẹ ofuvwegbe rẹ rara re-e, Uvie rẹ Ọghẹnẹ ọvo yen che ru ọyena.

Oka rẹ eranvwe rọ djoma na

Baibol na tare nẹ ihwo vwo “oka rẹ eranvwe na” kidie ayen djẹ nene o de gbe ayen “ejobi unu” te edia rẹ ayen “da gọ.” (Ẹvwọphia 13:3, 4; 16:2) Ayen ruẹ ọnana womarẹ ayen vwo titi ẹkuotọ rayen, eka re vwo vughe vẹ ẹgba rẹ isodje rayen. Encyclopedia of Religion tare nẹ “Uruemu re vwo vwo ẹguọnọ ọgangan kpahen ẹkuotọ ohwo rhoma re dia ẹbẹre rẹ ẹga kpọna.”a

Mavọ yen e siẹ oka rẹ eranvwe na phiyọ arhare yẹrẹ obọrhen rẹ ohwo wan? (Ẹvwọphia 13:16) Vwẹ iji Ọghẹnẹ vwọ kẹ ihwo rẹ Izrẹl, ọ tare nẹ, “wa gba ayen hẹ obọ rẹ ovwan re dia oka, re wa gba mu arhare rẹ ovwan.”—Urhi Rivẹ 11:18. Ọ dia ọnana mudiaphiyọ nẹ ayen che si oka re rhiẹromrẹ phiyọ obọ yẹrẹ arhare raye-en, ẹkẹvuọvo o mudiaphiyọ nẹ ayen che nene odjekẹ rẹ Ọghẹnẹ vwọrẹ eta vẹ iruemu. Eriyin ọ je hepha nẹ ọ dia oka rẹ 666 re che si phiyọ oma yen a ta na-a, oka rẹ eranvwe na mudiaphiyọ ihwo re rhọnvwere nẹ ayen dia otọ rẹ usuon rẹ akpọ nana. Ihwo ri vwo oka nana reyọ oma rayen vwo ru ivwighrẹn rẹ Ọghẹnẹ.—Ẹvwọphia 14:9, 10; 19:19-21.