Die Yen Erhi Na?
Ẹkpahọnphiyọ ri Baibol
Ubiota na “erhi” rọhẹ Baibol na ọyen efanfan rẹ ubiota ri Hibru re se neʹphesh kugbe ubiota rẹ Grik re se psy·kheʹ. Ubiota ri Hibru ghwe mudiaphiyọ “emama rọ wẹn,” ubiota rẹ Grik na de rhe mudiaphiyọ “emama ro vwo arhọ.”a Erhi na kọyen ugboma rọyen eje, ọ dia orọnvwọn ọfa ro yerẹn siẹrẹ ugboma na de ghwu nu-u. Fuẹrẹn oborẹ Baibol na vwo djephia nẹ erhi rẹ ohworakpọ yen ugboma na eje:
A vwẹ erhi vwọ kẹ Adamu-u—“erhi ọkpokpọ” yen ọ rhe dia.
Ọke rẹ Jihova vwọ ma ọshare rẹsosuọ, Adam, Baibol na tare nẹ “ohwo de hirhe erhi ọkpokpọ.” (Jẹnẹsis 2:7, King James Version) A vwẹ erhi vwọ kẹ Adamu-u—erhi ọkpokpọ, yẹrẹ ohwo yen ọ rhe dia.
Baibol na tare nẹ erhi se ruiruo, owẹnvwe se hwe, ọ re emu, ọ yọnrọn irhi, o ji djobọte orivwin. (Livitikọs 5:2; 7:20; 23:30; Urhi Rivẹ 12:20; Rom 13:1) Irueru nana eje churobọ si ugboma na eje.
Erhi na ghwẹ?
E, erhi na ghwẹ. Ẹkpo ri Baibol buebun rionbọ kpo erhi na nẹ o ghwẹ. Enana idje evo:
“Erhi ro ru umwemwu ko ghwu.”—Izikiẹl 18:4, 20, King James Version.
Vwẹ Izrẹl awanre, oja ra vwọ re ohwo ro ru umwemwu ọgangan yen a vwọ “nyavwe erhi yena” kufia. (Eyanno 12:15, 19; Livitikọs 7:20, 21, 27; 19:8, King James Version) “Ke hwe” ohwo na ghwu.—Eyanno 31:14, King James Version.
Ọke rẹ ohwo de ghwure, a reyọ ubiota na “ohwo ro ghwuru” vwo ruiruo vwẹ ẹdia rẹ orivwin na vwẹ ẹkpo ri Baibol evo. (Livitikọs 21:11; Ukeri 6:6) Dede nẹ efanfan ri Baibol evo reyọ ubiota na “ugboma ro ghwuru” yẹrẹ “ohwo ro ghwuru” vwo ruiruo vwẹ awọreta nana, ubiota ri Hibru rẹsosuọ re se neʹphesh, yẹrẹ “erhi” yen e vwo ruiruo.
“Erhi” se mudiaphiyọ “arhọ”
Baibol na je reyọ “erhi” vwo dje ubiota rọ họhọ ota na “arhọ.” Kerẹ udje, Job 33:22 reyọ ubiota ri Hibru re se “erhi” (neʹphesh) rọ pha kerẹ “arhọ” vwo ruiruo. Ọtiọyen ọ je hepha, Baibol na djerephia nẹ erhi yẹrẹ arhọ rẹ ohworakpọ je sa dia ẹdia rẹ imuoshọ yẹrẹ ghwu.—Eyanno 4:19; Iguẹdjọ 9:17; Filipae 2:30.
Ubiota na “erhi” re vwo ruiruo na sa chọn avwanre uko vwo vwo ẹruọ rẹ awọreta ra da tanẹ “vrẹn nẹ oma” yẹrẹ “kparoma.” (Jẹnẹsis 35:18; King James Version) Eta nana djerephia nẹ arhọ rẹ ohwo na vwoba. Efanfan evo fan eta nana vwẹ Jẹnẹsis 35:18 kerẹ “ọ wẹn ẹwẹn rọ koba.”—Good News Translation; New Jerusalem Bible.
Asan rẹ uyono rẹ erhi ghwẹ-ẹ nurhe
Imuẹro rẹ ihwo vwori nẹ erhi ghwẹ-ẹ nẹ evun ri Baibol na rhe-e, ẹkẹvuọvo uyono rẹ ihwo rẹ Grik rẹ awanre yen o nurhe. Encyclopædia Britannica tare nẹ, “Idjedje ri Baibol na vwọ rionbọ kpo erhi na churobọ si ẹwẹn, o phi ofẹnẹ vuọvo phiyọ uvwre rẹ erhi vẹ ugboma re rhiẹromrẹ na-a. Uyono rẹ ugboma rọ dia erhi rẹ Onenikristi ra hẹriẹ kpo ẹkẹn ivẹ na, Grik yen o nurhe.”
O vwo ọke vuọvo rẹ Ọghẹnẹ cha vwọ rhọnvwe nẹ e ku iyono rọyen vẹ iyono rẹ ihworakpọ kugbe-e, kerẹ imuẹro kpahen erhi ro ghwẹ-ẹ. Ukperẹ ọtiọyen, Baibol na de si avwanre orhọ: “Ovwan jomaotọ rere ihwo vwo jẹ ovwan ephiẹn fiki rẹ erianriẹn vẹ uyono rẹ efian rayen, kugbe uruemu rẹ awanre rẹ ayen yọnra.”—Kọlose 2:8.
a Ni The New Brown, Driver, and Briggs Hebrew and English Lexicon of the Old Testament, aruọbe 659, kugbe Lexicon in Veteris Testamenti Libros, aruọbe 627. Efanfan ri Baibol evo fan ubiota nana neʹphesh vẹ psy·kheʹ vwẹ idjerhe sansan vwo nene eta re riariẹ ubiota na, ayen vwọ reyọ eta kerẹ “erhi,” “arhọ,” “ohwo,” “emama,” yẹrẹ “ugboma” vwo ruiruo.