Die Yen Evrẹnushi Na?

Ẹkpahọnphiyọ ri Baibol na

Vwẹ Baibol na, ubiota ra fan kpo “evrẹnushi” nẹ ubiota ri Grik a·naʹsta·sis, ro mudiaphiyọ “kpare vrẹn” yẹrẹ “rhoma vrẹ mudia.” Ohwo ra rhọvwọn nushi vrẹn nẹ ẹdia rẹ ughwu je rhoma vwo arhọ ro ke vwo jovwo.—1 Kọrẹnt 15:12, 13.

Dede nẹ ubiota na “evrẹnushi” herọ vwẹ ẹbẹre ra vwẹ Hibru si vwẹ Baibol na-a, re se Ọphọ Awanre na, jẹ uyono na vwomaphia vwọ. Womarẹ ọmraro Hosia, kerẹ udje, Ọghẹnẹ veri: “Ke me tan ayen nẹ obọ rẹ ogangan rẹ Erivwi? Me tan ayen nẹ obọ rẹ Ughwu?”—Hosia 13:14; Job 14:13-15; Aizaya 26:19; Daniẹl 12:2, 13.

Tivọ yen a cha rhọvwọn ihwo ri ghwuru na ra? A cha rhọvwọn ihwo evo kpo odjuvwu re nene Jesu sun kerẹ ivie. (2 Kọrẹnt 5:1; Ẹvwọphia 5:9, 10) Baibol na se ọnana “evrẹnushi rẹsosuọ” kugbe “evrẹnushi rẹ ukaro,” eta nana djerephia nẹ evrẹnushi ọfa je cha vwọ kpahọn. (Ẹvwọphia 20:6; Filipae 3:11, NW) Evrẹnushi rọ vwọ kpahọn ọyen arhọ vwẹ otọrakpọ na, rọ dia oborẹ ihwo buebun ra cha rhọvwọn cha riavwerhen rọyen.—Une Rẹ Ejiro 37:29.

Mavọ yen a cha rhọvwọn ihwo nẹ ughwu wan? Ọghẹnẹ vwẹ ẹgba vwọ kẹ Jesu rọ vwọ rhọvwọn ihwo ri ghwuru. (Jọn 11:25) Jesu cha rhọvwọn “irivwi rẹ hẹ evun rẹ ishi ejobi” vwo kpo arhọ, a cha rhọvwọn ohwo vuọvo vẹ opharo, iroro kugbe iruemu ohwo vwori jovwo. (Jọn 5:28, 29) Ihwo ra cha rhọvwọn kpo odjuvwu cha dia ihwo rẹ ẹwẹn, ihwo ra cha rhọvwọn rhe otọrakpọ na che vwo ugboma rọ pha gbagba.—Aizaya 33:24; 35:5, 6; 1 Kọrẹnt 15:42-44, 50.

Amono yen a cha rhọvwọn nushi? Baibol na tare nẹ, “evrẹnushi herọ kẹ ihwo te ihwo ọsoso te i ri jẹ ọsoso ẹdia.” (Iruo Rẹ Iyinkọn Na 24:15) Ihwo ọsoso na churobọ si ihwo ri fuevun kerẹ Noa, Sera kugbe Ebraham. (Jẹnẹsis 6:9; Hibru 11:11; Jems 2:21) Ihwo re jẹ ọsoso ẹdia na eyen ihwo re yan mu iwan rẹ Ọghẹnẹ-ẹ, ẹkẹvuọvo ayen vwo uphẹn ayen vwo yono kpahọn je yan nene-e.

Ẹkẹvuọvo, a cha rhọvwọn ihwo re dia irumwemwu re rhọvwen kurhiẹriẹ-ẹ. Ihwo tiọyena de ghwu, ayen cha rioja rẹ oghwọrọ ri bẹdẹ, ayen vwo iphiẹrophiyọ rẹ arhọ ọfa-a.—Matiu 23:33; Hibru10:26, 27.

Ọke vọ yen a cha vwọ rhọvwọn ihwo ri ghwuru na? Baibol na tare nẹ evrẹnushi kpo odjuvwu cha vwomaphia vwẹ ẹcha ri Kristi rọ tonphiyọ vwẹ ukpe ri 1914. (1 Kọrẹnt 15:21-23) Evrẹnushi vwọ rhe otọrakpọ na cha phia vwẹ Usuon rẹ Ẹgbukpe Uriorin ri Jesu Kristi, ọke rẹ otọrakpọ na che vwo hirhephiyọ iparadaisi.—Luk 23:43; Ẹvwọphia 20:6, 12, 13.

Diesorọ o vwo fo nẹ e vwo imuẹro kpahen evrẹnushi na? Baibol na vuẹ avwanre kpahen evrẹnushi irhinrin, ihwo soseri rẹ evrẹnushi yena eje. (1 Ivie 17:17-24; 2 Ivie 4:32-37; 13:20, 21; Luk 7:11-17; 8:40-56; Jọn 11:38-44; Iruo Rẹ Iyinkọn Na 9:36-42; Iruo Rẹ Iyinkọn Na 20:7-12; 1 Kọrẹnt 15:3-6) Evrẹnushi ri Lazarọs ọyen evrẹnushi ra jokaphiyọ dẹn, kidie Lazarọs ghwuru ẹdẹ ẹne tavwen Jesu ki ru igbevwunu yena vwẹ irharo rẹ otu buebun. (Jọn 11:39, 42) Dede nẹ ihwo re vwọso Jesu sa sen uyota nana-a, jẹ ayen davwẹngba vwo hwe Jesu vẹ Lazarọs.—Jọn 11:47, 53; 12:9-11.

Baibol na djere phephẹn nẹ Ọghẹnẹ vwo ẹgba vẹ owenvwe rọ vwọ rhọvwọn ihwo ri ghwuru. Ọghẹnẹ serọ rẹ ikuegbe rẹ ohwo ọvuọvo rọ cha rhọvwọn womarẹ ẹgba rọyen. (Job 37:23; Matiu 10:30; Luk 20:37, 38) Ọghẹnẹ sa rhọvwọn ihwo ri ghwuru, o vwo owenvwe ro vwo ruo! E vwo djisẹ rẹ oborẹ evrẹnushi rọ cha na cha dia, Baibol na da kpahen Ọghẹnẹ: “Ku wo rhẹro rẹ iruo rẹ abọ wẹn.”—Job 14:15.

Ororochọ kpahen evrẹnushi na

Efian: Evrẹnushi na ọyen e vwo kuẹ erhi na vẹ ugboma na kuẹgbe.

Uyota: Baibol na yonori nẹ erhi na yen ugboma rẹ ohwo ejobi, ọ dia ẹbẹre ọvo ro yerẹn siẹrẹ ohwo de ghwu nu-u. (Jẹnẹsis 2:7; Izikiẹl 18:4) Ohwo ra rhọvwọn nushi rhoma kuomakugbe erhi rọye-en; a rhoma ma ohwo na kerẹ erhi kpokpọ.

Efian: A rhọvwọn ihwo evo, a da rhoma ghwọrọ ayen siẹvuọvo.

Uyota: Baibol na tare nẹ, “otu ri ru umwemwu” che “vrẹn kpo ẹdjọeguo.” (Jọn 5:29) Ẹkẹvuọvo, ẹdjọeguo nana shekpahen oborẹ ayen ruru ọke a vwọ rhọvwọn ayen nushi, ọ dia oborẹ ayen ruru jovwo-o, Jesu tare nẹ, “irivwi de che nyo urhuru rẹ Ọmọ rẹ Ọghẹnẹ, otu ri nyori ke rhọ.” (Jọn 5:25) E che si edẹ rẹ ihwo re ‘kerhọ’ kẹ yẹrẹ ru nene oborẹ ayen yonori ọke rẹ ayen vwo vrẹnushi nu phiyọ “ọbe rẹ arhọ.”—Ẹvwọphia 20:12, 13.

Efian: Ọke ohwo de vrẹnushi nu, oka rẹ ugboma rẹ ohwo na vwori jovwo o ki ghwu yen ji re.

Uyota: Ohwo de ghwu nu, ọhọhọre nẹ ugboma na guọghọ totọ ji bru ibribro.—Aghwoghwo 3:19, 20.