Die Yen Phia kẹ Ọghọ Emuo?​—Die Yen Baibol na Tare?

Ọghọ emuo rhoma shekpotọ mamọ vrẹ obo ri jovwo. Ihwo ri kpo omaesivwon vwẹ họspito van kuẹ idọktọ; e re riemu vwẹ asan ra da shẹ emu muọghọ kẹ ihwo re she emu kẹ ayeen; ihwo re ro aropleni kpo asan nyẹmee, ayen je vwọso ihwo re vwẹrote ihwo vwẹ aropleni na, emọ muẹ ruẹ vwẹ isikuru, rẹ ayen vwọ vwẹ iyono rayen vwọ jehwẹ, djuguegue muẹ ayen je vwọso ayen; evo usun rẹ ihwo rẹ igọmẹti dje uruemu ri je fo vwophia, jẹ efa davwẹngba vwo dje oma rayen phia kerẹ ihwo ri dje ọghọ phia.

Baibol na vwo odjekẹ ra sa vwẹroso vwọ kpahen ọghọ emuo. Ọ je ta ota kpahen oboresorọ ọghọ emuo vwọ kanre akpọ na nonẹna.

Die yen phia kẹ ọghọ emuo?

Vwẹ akpọ na eje, a rhe mrẹvughe nẹ uruemu rẹ ọghọ emuo rhoma shekpotọ mamọ vrẹ obo ri jovwo.

• Iyẹnrẹn kpokpọ ọvo vwẹ Gallup djerephia nẹ ihwo rẹ America vwo imuẹro nẹ vwẹ United States, uruemu rẹ ọghọ emuo rhi shekpotọ mamọ asaọkiephana vrẹ obo rọ hepha jovwo vwẹ ikpe 22 re wanre na.

• Ehiahiẹ ọvo re ruru vwẹ ẹkuotọ ri te 28, a mrẹvughe nẹ ihwo re vrẹ 32,000, rẹ ẹkẹn 65 rẹ 100 rayen tare nẹ uruemu ri jẹ ọghọ evwo ri nonẹna rhe bra mamọ vrẹ obo ra mrẹre jovwo re.

Baibol na mraro rẹ iruemu ra mrẹ nonẹna phiyotọ jovwo re.

• “Ọke ọgangan cha dia vwẹ ẹdẹ re koba na. Ihwo cha dia ivwurhuru, phuoma, ji vwo ẹguọnọ rẹ oma rayen ọvo; ayen che yinvwaro, ayen che nyẹme rẹ esẹ vẹ inii, ayen cha kpẹvwẹ ẹsee, . . . che dje uruemuesiri phiaa, [ji] gbe ozighi.”​—2 Timoti 3:​1-3, Good News Translation.

Wọ vwọ mrẹ evuẹ efa vwọ kpahen oborẹ aroẹmrẹ nana vwo ruẹgba, se uyovwinrota na “Baibol Mraro Oborẹ Ihwo Roro Emu Wan vẹ Oborẹ Ayen Ruẹ Nonẹna?”

Odjekẹ ra sa vwẹroso vwọ kpahen ọghọ emuo

Vwẹ akpọ rẹ ọghọ emuo de shekpotọ na, iduduru rẹ ihwo buebun rhe mrẹvughe nẹ Baibol na vwo uvi rẹ odjekẹ rọ sa nẹrhẹ e vwo omamọ rẹ uruemu. A sa vwẹroso uchebro rọyen ọkieje, “a vwẹ ayen mu bẹdẹ bẹdẹ.” (Une rẹ Ejiro 111:8) Enana idje evo:

• Obo ri Baibol na tare: “Erọnvwọn eje rẹ ovwan guọnọre nẹ ihwo ru kẹ ovwan, ovwan ji ru ọtiọyen kẹ ayen.”​—Matiu 7:12.

  Obo ro mudiaphiyọ: Nene ihwo efa yerin dẹndẹn vẹ ọghọ.

• Obo ri Baibol na tare: “Rẹ ovwan vwo siobọnẹ ophiẹnvwe re na, e jẹ ohwo ọvuọvo ta uyota kẹ ọrivẹ rọyen.”​—Ẹfesọs 4:25.

  Obo ro mudiaphiyọ: E jẹ avwanre dia ihwo re ta uyota vwẹ oborẹ avwanre ruẹ vẹ oborẹ avwanre ta.

Vwọ kẹ evuẹ efa ri shekpahen uyovwinrota nana, biko se:

• Uwevwin Orhẹrẹ ro vwo uyovwinrota na “Obo ri Yoma vẹ Obo re Chọre​​​—Odjekẹ Wọ sa Vwẹroso.”

• Uyovwinrota na “Obo ri Baibol na sa Vwọ Chọn Avwanre Uko Vwo Chirakon rẹ Ohwohwo.”