Chọn Ihwo Efa Uko Vwo Chirakon Ọke Ayen de Hirharoku Ebẹnbẹn

1. Idjerhe vọ yen Jihova vwọ kpahanphiyọ ẹrhovwo rẹ idibo rọyen ọkieje?

WỌ RIẸNRE nẹ Jihova sa reyọ owẹ vwọ kpahenphiyọ ẹrhovwo rẹ ohwo ọvo? Wọ sa vwẹ ukẹcha phia, owenẹ owẹ ọkpako, odibo rowian, ọkobaro yẹrẹ oghwoghwota. Wọ sa vwẹ ukẹcha phia wọ da dia omotete yẹrẹ wọ ghwanrire, ọ da tobọ dianẹ wẹwẹ oniọvo ọshare yẹrẹ aye. Ohwo ro vwo ẹguọnọ rẹ Jihova de kperi se vwọ kẹ ukẹcha, ọkieje yen Ọghẹnẹ vwọ reyọ ekpako na vẹ idibo rọyen re fuevun vwọ “dia ivwiroro” vwọ kẹ ohwo tiọyena. (Kọl. 4:11) Mavọ yen ọ vwerhen oma te ra vwọ reyọ oma vwo ze vwọ kẹ Jihova vẹ iniọvo rẹ avwanre vwẹ idjerhe ọtiọyen! Ọkiọvo, a sa vwẹ ukẹcha vẹ ọbọngan vwọ kẹ iniọvo rẹ avwanre ọke rẹ ọga da hra nene asan eje, oghwọrọ ri kpregede yẹrẹ omukpahen da vwomaphia.

CHỌN IHWO EFA UKO ỌKE RẸ ỌGA DA HRA NENE ASAN EJE

2. Diesorọ ọ sa vwọ dia bẹnbẹn ra vwọ chọn ihwo efa uko siẹrẹ ọga da hra nene asan eje?

² Ọga rọ hra nene asan eje sa nẹrhẹ ọ bẹn a vwọ vwẹ ukẹcha vwọ kẹ ohwohwo. Kerẹ udje, ọ sa dianẹ a guọnọ kọn bru igbeyan ra, ẹkẹvuọvo, ọyen emu imuoshọ re vwo ru ọtiọyen. Ọkiọvo, a guọnọ durhie ihwo rẹ obọ ghwe yovwi-in rhe udemu vwẹ uwevwin rẹ avwanre, jẹ, ọ pha bẹnbẹn re vwo ru ọtiọyen. Ọfa, ọ sa dianẹ a guọnọ vwẹ ukẹcha kẹ ihwo efa, ẹkẹvuọvo, a sa mrẹ bẹnbẹn ọ da dianẹ ihwo rẹ orua avwanre je rioja. Vwẹ ẹdia nana eje, a je guọnọ vwẹ ukẹcha kẹ iniọvo rẹ avwanre, oma vwerhen Jihova siẹrẹ e de ruẹ asan rẹ ẹgba avwanre muru vwọ chọn ayen uko. (Isẹ 3:27; 19:17) Kẹ, die yen e se ru?

3. Die yen avwanre yono mie ekpako rehẹ ukoko rẹ Desi hepha? (Jerimaya 23:4)

³ Oborẹ ekpako se ru. Wọ da dia ọkpako, nabọ vughe ichuru na. (Se Jerimaya 23:4.) Desi rọ dia oniọvo aye re djunute vwẹ uyono rọ wanre na da ta: “Ekpako rehẹ ẹko ri mi de ghwoghwo nene uvwe vẹ iniọvo efa ghwọrọ ọke kugbe vwẹ aghwoghwo ji kpo akpọẹriọ vwẹ ọke rọ wanre.”b Ẹgbaẹdavwọn rẹ ekpako na nẹrhẹ ọ lọhọ ayen vwọ chọn Desi uko ọke rẹ ọga ri COVID-19 vwọ vwomaphia ji hwe ihwo rẹ orua rọyen evo.

4. Die yen nẹrhẹ ekpako na sa vwẹ ukẹcha kẹ Desi, kẹ die yen e yono no rhe?

⁴ Desi da je ta: “Kidie nẹ ekpako na igbeyan mẹ, ọ rha bẹn me vwọ vuẹ ayen oborẹ oma ru vwe vẹ ọdavwẹ mẹ-ẹ.” Oborẹ ekpako se yono. Rha kọn brẹ iniọvo na ra a ke mrẹ nẹ ebẹnbẹn vwomaphia. Vwẹ ugbeyan mu ayen. Ọ da dianẹ wọ rha sa kọn bru ayen ra-a fikirẹ ọga rọ hra nene asan eje, guọnọ idjerhe efa wo vwo nyo mie ayen. Desi da ta: “Ekpako sansan se se vwe yẹrẹ si ovuẹ rhe vwe vwẹ ẹdẹ vuọvo. Ẹkpo ri Baibol rẹ ayen se kẹ vwẹ te vwe ẹwẹn dede nẹ me riẹn ayen jovwo.”

5. Mavọ yen ekpako na sa vwọ riẹn oborẹ iniọvo na guọnọre, je vwẹ ukẹcha kẹ ayen?

⁵ Idjerhe ọvo ra sa vwọ riẹn oborẹ iniọvo avwanre guọnọre yen, ra vwọ reyọ aghwanre vwọ nọ ayen enọ. (Isẹ 20:5) Ayen vwo emu, ihuvwun vẹ erọnvwọn efa rẹ ayen guọnọre? Ẹdia rẹ ayen hepha sa nẹrhẹ iruo rẹ ayen va ayen abọ yẹrẹ jẹ igho ẹmrẹ vwọ hwosa rẹ uwevwin? Ọ da dianẹ igọmẹti ru ọrhuẹrẹphiyotọ rẹ ayen vwọ vwẹ ukẹcha rẹ igho yẹrẹ erọnvwọn efa vwọphia, a sa chọn iniọvo na uko rere o se vwo te ayen obọ? Iniọvo na reyọ erọnvwọn buebun vwọ chọn Desi uko. Ẹkẹvuọvo, ẹguọnọ vẹ ọbọngan rẹ ekpako na djephia yen obo re ma vwẹ ukẹcha kẹ. Ọ da ta: “Ekpako na nene uvwe nẹrhovwo. Dede nẹ me ghwa sa karophiyọ oborẹ ayen tare vwẹ ẹrhovwo na-a, jẹ me karophiyọ oborẹ oma ru vwe. Ọnana ghwa idjerhe ọvo rẹ Jihova vwọ vuẹ vwẹ nẹ, ‘me vẹ owẹ herọ.’”—Aiz. 41:10, 13.

6. Die yen iniọvo buebun vwevunrẹ ukoko na se ru vwọ chọn ihwo efa uko? (Ni uhoho na.)

⁶ Oborẹ ihwo efa se ru. Avwanre rhẹro nẹ ekpako na cha vwẹrote iniọvo rẹ ukoko na. Jihova guọnọre nẹ avwanre vwẹ ukẹcha vẹ ọbọngan vwọ kẹ ohwohwo. (Gal. 6:10) Ọ da tobọ dianẹ omorọnvwọn re ni fiemu-u yen e ru vwọ kẹ ihwo re mwọga, ọnana sa bọn ayen gan. Omotete se si ọbe rẹ uyeren yẹrẹ uhoho vwo rhe oniọvo rẹ oma rọyen ganre-e. Emeghene se kpo eki ra dẹ erọnvwọn kẹ oniọvo aye rẹ oma rọyen ganre-e. Iniọvo rehẹ ukoko na se chere emu rhe oniọvo aye rẹ oma rọyen ganre-e ji muo bro ra vwẹ uwevwin. Vwọrẹ uyota, ọ da dianẹ ọga rọ hra nene asan eje vwomaphia, kohwo kohwo vwevunrẹ ukoko na guọnọ ọbọngan. Ọkiọvo a sa domaji emerha uyono de kuphiyọ nu rere a vẹ iniọvo na sa vwọ ta ota yẹrẹ womarẹ ividio kọnfrẹsin. Ekpako na je guọnọ ọbọngan. Iniọvo evo si ovuẹ rẹ uyeren rhe ekpako na, ri vwo ewian buebun rẹ ayen ruẹ ọkieje ọke rẹ ọga vwọ hra nene asan eje. Mavọ yen o yovwin te, e de ru ẹkẹn ro te avwanre vwo “bru ohwohwo uche” je bọn ohwohwo gan!—1 Tẹsa. 5:11.

VWẸ UKẸCHA KẸ IHWO RẸ OGHWỌRỌ RI KPREGEDE TE OMA

7. Ebẹnbẹn vọ yen oghwọrọ ri kpregede sa ghwa rhe?

⁷ Oghwọrọ ri kpregede se wene akpeyeren ohwo siẹvuọvo. Ekuakua rẹ akpeyeren, uwevwin yẹrẹ ihwo re vwo ẹguọnọ kpahen sa va ihwo evo abọ. Oghwọrọ tiọyena ji te iniọvo rẹ avwanre oma. Die yen e se ru vwọ chọn ayen uko?

8. Die yen ekpako vẹ igbuyovwin rẹ orua se ru tavwen oghwọrọ ri kpregede ke vwomaphia?

⁸ Oborẹ ekpako se ru. Ekpako, ovwan chọn iniọvo ovwan uko vwo muegbe phiyotọ tavwen oghwọrọ ri kpregede ke vwomaphia. Davwen rere kohwo kohwo vwevunrẹ ukoko na vwọ riẹn oborẹ ayen che ru vwọ sẹro oma rayen ji nene ekpako na ta ota kugbe. Margaret, re djunute vwẹ uyono rọ wanre na da ta: “Vwẹ ọdavwẹ rẹ ukoko rẹ ekpako avwanre vwọphia, ayen de si avwanre orhọ nẹ uvwre ọke erhanre na vwọ ruẹ ekogho rẹ avwanre na ji rhi nẹ otọ-ọ. Ayen vuẹ avwanre nẹ ọ da dianẹ ẹdia na rhoma braphiyọ yẹrẹ ihwo ri suẹn vuẹ avwanre nẹ a kua, avwanre kparoma kpatakpata.” Ọyena ghini ovuẹ ro fo aruọke kidie ẹdijana iyorin vwọ wan nu, erhanre ro muoshọ da ro asan eje. Igbuyovwin rẹ orua sa ta ota kpahen oborẹ ohwo vuọvo che ru vwẹ ẹga rẹ orua rayen. Ọ da dianẹ wẹ vẹ emọ wẹn muegbe phiyotọ, ọ sa nẹrhẹ ovwan vwo ẹwẹn ri dọe ọke rẹ oghwọrọ ri kpregede da vwomaphia.

9. Ọrhuẹrẹphiyotọ vọ yen ekpako se ru tavwen oghwọrọ ri kpregede ke vwomaphia yẹrẹ ọ da phia nu?

⁹ Wọ da dia oniruo rọ vwẹrote ẹko iruo rẹ aghwoghwo, wọ hẹrhẹ ọke rẹ oghwọrọ ri kpregede vwọ phia tavwen wọ ke reyọ adrẹsi yẹrẹ ukeri rẹ ifonu rẹ iniọvo eje rehẹ ẹko wẹ-ẹn. Si evuẹ na eje phiyọ ọbe rere wọ fuẹrẹn ayen nọke ra ruọke sẹ e je gba. Ọnana sa nẹrhẹ wo se oghwoghwota ọvuọvo vwọ riẹn obo rẹ ayen guọnọre, ọ da dianẹ oghwọrọ ri kpregede vwomaphia. Vwẹ evuẹ nana eje vwo rhe ọ rọ vwẹrote iruo rẹ ekpako, rere o se vwo se oniruo okinriariẹ. Ẹgbaẹdavwọn rẹ ihwo nana eje na sa nẹrhẹ a vwẹ ukẹcha ro fori vwọ kẹ iniọvo na. E vwo fu erhanre na nu, oniruo okinriariẹ ri Margaret da gha ovwerhẹn inọke 36 soso, rọ vwọ vwẹrote iruo re ekpako na ayen se vwo se je vwẹrote iniọvo 450 re djẹ nẹ iwevwin rayen. (2 Kọr. 11:27) Ọtiọyena, ayen da guọnọ iwevwin kẹ ihwo eje ri vwo asan rayen cha dia-a.

10. Diesorọ o vwo fo nẹ ekpako ni owian ra vwọ kọn bru iniọvo ra ghanghanre? (Jọn 21:15)

¹⁰ A vwọ vwẹ Baibol na bọn iniọvo gan ji bru ayen uche, ọyen oghwa ro te ekpako na. (1 Pita 5:2) Oghwọrọ ri kpregede da vwomaphia, e jẹ ekpako na mrẹvughe nẹ oniọvo ọvuọvo vrabọ rẹ imuoshọ, vwo emu rọ cha re, vwo iwun ro che kuphiyọ kugbe asan rọ cha dia. Ẹkẹvuọvo, emeranvwe evo da wan nu, ofori nẹ a vwẹ obicha vẹ ọbọngan vwọ kẹ iniọvo re vrabọ rẹ oghwọrọ na. (Se Jọn 21:15.) Oniọvo Harold rọ ga vwẹ Umẹ Rọvwẹrote Oghọn Ukoko rọ vẹ iniọvo buebun rẹ oghwọrọ phia kẹ gba vwoma re, da ta: “Ọ reyọ ọke uguegue rẹ obo re phiare na ki nẹ ohwo oma. Ayen vwọ davwẹngba ayen vwọ kpairoro vrẹ obo re phiare na, jẹ iroro rẹ ohwo re vwo ẹguọnọ kpahen ro ghwuru, orọnvwọn ọghanghanre rọ va ayen abọ yẹrẹ ẹdia ro dino reyọ arhọ rẹ ayen sa dia otọ ọke grongron. Iroro tiọyena sa rhoma so omaemuophiyọ vwọ kẹ ayen. Ọyena ghwa dia obo re brare-e, ọ dia ọyen o ji vwo mudiaphiyọ nẹ ayen jẹ esegbuyota evwo-o.”

11. Ọdavwẹ vọ yen erua se vwo ọke vwọ yanran na?

¹¹ Ekpako na reyọ uchebro rẹ “otu re viẹ nene ayen viẹ” vwo ruiruo. (Rom 12:15) Ofori nẹ ekpako vwo imuẹro kẹ ihwo rẹ oghwọrọ phia kẹ nẹ Jihova vẹ iniọvo na vwo ẹguọnọ rayen. A je guọnọ nẹ ekpako vwẹ ukẹcha vwọ kẹ erua vwo vwobọ vwẹ uyono ẹra, ẹrhovwo ẹnẹ, ẹga rẹ orua, kugbe iruo aghwoghwo na. Ekpako ji se jiro kẹ emiọvwọn nẹ ayen chọn emọ rayen uko vwọ tẹnrovi erọnvwọn rẹ oghwọrọ ri kpregede sa ghwọrọ-ọ. Emiọvwọn, ovwan karophiyọ emọ ovwan nẹ ọkieje yen Jihova cha vwọ dia ugbeyan rayen, nẹ ọ je cha yanjẹ ayen vwo-o. Dje fiotọ kẹ ayen nẹ ayen ẹbẹre ọvo rẹ orua rẹ akpọeje ri muegbe re vwọ vwẹ ukẹcha kẹ ayen.—1 Pita 2:17.

12. Die yen ihwo efa se ru vwo bicha ihwo rẹ emu phia kẹ? (Ni uhoho na.)

¹² Oborẹ ihwo efa se ru. Oghwọrọ ri kpregede da phia kẹrẹ asan ru wọ hepha, nọ mie ekpako na ukẹcha ru wọ sa vwọphia. Ọkiọvo wo se phi uwevwin wẹn phiyotọ kẹ iniọvo re kua nẹ iwevwin rayen yẹrẹ e re vwomakpahotọ kẹ iruo rẹ ebanbọn nẹ ayen dia ọmọke. Wo se mu emu vẹ ekuakua efa rhe iniọvo re guọnọ ukẹcha. Siẹrẹ oghwọrọ ri kpregede da phia vwẹ asan ro sheri kẹ wẹ, wọ je sa vwẹ ukẹcha phia. Vwe idjerhe vọ? Womarẹ wọ vwọ nẹrhovwo kẹ ihwo rọ phia kẹ. (2 Kọr. 1:8-11) Wọ je sa vwẹ ukẹcha kẹ ihwo rẹ emu phia kẹ womarẹ wo vwo toro igho vwo biẹcha iruo rẹ akpọeje. (2 Kọr. 8:2-5) Ọ da dianẹ wo se kpo asan rẹ oghwọrọ da vwomaphia, nọ ekpako obo wo se ru vwọ vwẹ ukẹcha phia. E de durhie uwe, e se yono uwe ena evo re cha chọn wẹ uko vwo ruiruo vwẹ ọke vẹ asan ra da guọnọ owẹ.

VWẸ UKẸCHA KẸ INIỌVO VWO CHIRAKON RẸ OMUKPAHEN

13. Egbabọse vọ yen iniọvo rẹ avwanre hirharokuẹ vwẹ ẹkuotọ ra da dobọ rẹ iruo avwanre ji?

¹³ Vwẹ ẹkuotọ ra da dobọ rẹ iruo rẹ avwanre ji, omukpahen nẹrhẹ akpeyeren ganphiyọ. Iniọvo rehẹ ẹkuotọ tiọyen hirharokuẹ ebẹnbẹn rẹ igho, muọga, ihwo rẹ ayen vwo ẹguọnọ kpahen ji ghwẹ va ayen abọ. Ẹkẹvuọvo, fikirẹ obọ ẹdajo na, ọ bẹn ekpako vwọ kọn bru ayen ra yẹrẹ nene ihwo re guọnọ ọbọngan ta ota kugbe. Ọnana yen obo re phia kẹ Andrei, re djunute vwẹ uyono rọ wanre na. Oniọvo aye ọvo rọhẹ ẹko rọyen vwo ebẹnbẹn rẹ igho. O de rhe vwo asidẹnti. Ofori nẹ a bẹrẹ abọ buebun, jẹ o vwo iruo ro ruẹ-ẹ. Dede nẹ obọ ẹdajo kugbe ọga rẹ akpọeje jehẹ otọ, iniọvo na davwẹngba rayen eje vwọ vwẹ ukẹcha phia, Jihova je mrẹ obo re phia.

14. Mavọ yen ekpako sa vwọ dia udje siẹrẹ ayen da vwẹroso Jihova?

¹⁴ Oborẹ ekpako se ru. Andrei nẹrhovwo ji ruẹ asan rẹ ẹgba rọyen teri. Kẹ, die yen Jihova ruru? Ọ da reyọ iniọvo sansan vwevunrẹ ukoko na ri vwo ugbomọphẹ rẹ oyan vwọ chọn oniọvo na uko. Iniọvo evo da vwẹ ukẹcha vwọ kẹ vwo muo kpo họsipito rere ọ sa vwo yanmu ọke re se kẹ. Efa kẹrẹ igho. Jihova yen mu iniọvo na vwo ru asan rẹ ẹgba rayen teri, ji bruba ẹgbaẹdavwọn rayen eje vwo ru obo rẹ oniọvo na guọnọre vwọ kẹ. (Hib. 13:16) Ekpako, ọke ra da dobọ rẹ owian ji, vuẹ ihwo efa nẹ ayen vwẹ ukẹcha phia. (Jer. 36:5, 6) Vwọ vrẹ enana eje, vwẹroso Jihova. Ọ cha chọn wẹ uko vwọ vwẹrote ọdavwẹ rẹ iniọvo na.

15. Mavọ yen e se vwo toroba oyerinkugbe rọhẹ uvwre avwanre siẹrẹ e de hirharoku omukpahen?

¹⁵ Oborẹ ihwo efa se ru. A da dobọ rẹ iruo rẹ avwanre ji, ọ sa nẹrhẹ avwanre vwoma ẹkuẹko. Ọtiọyena, ọyen obo re ghanre mamọ a vẹ iniọvo na vwo yerin kugbe vwọrẹ ufuoma enẹna. Họnre vwọso Idẹbono, ọ dia iniọvo na-a. Kpairoro vrẹ oruchọ rẹ iniọvo wẹn yẹrẹ davwẹngba vwọ rhuẹrẹ ẹghwọ re vwomaphia phiyọ kpakpata. (Isẹ 19:11; Ẹfe. 4:26) Jẹ owọ ovwan chọn ohwohwo uko. (Tai. 3:14) Ukẹcha ra vwọ kẹ oniọvo aye na, ghwa erhuvwu rhe ẹko ro de ghwoghwo na. Iniọvo na ke rhe kpẹkpẹ phiyọ kerẹ orua ọvo.—Une 133:1.

16. Vwo nene obo rehẹ Kọlose 4:3, 18, idjerhe vọ yen a sa vwọ vwẹ ukẹcha kẹ iniọvo avwanre re muẹkpahan?

¹⁶ Dede nẹ ihwo ri suẹn siobọ rẹ iruo avwanre kpotọ vwẹ ẹkuotọ evo, iniọvo avwanre uriorin buebun je vwẹ ẹga kẹ Jihova vwẹ ẹkuotọ tiọyena. E mu evo phiyọ uwodi fikirẹ esegbuyota rayen. A sa nẹrhovwo kẹ ayen vẹ orua rayen, ji te iniọvo re vwẹ obo rẹ ayen guọnọre vwọ kẹ ayen, e re bọn ayen gan ji nene ayen kpo aguare, dede nẹ imuoshọ herọ nẹ e ji se mu ayen phiyọ uwodi.c (Se Kọlose 4:3, 18.) Wọ nama vwẹ ẹro okueku vwo nẹ oborẹ ẹrhovwo wẹn se ru kẹ aye-en!—2 Tẹsa. 3:1, 2; 1 Tim. 2:1, 2.

17. Mavọ wo se vwo muegbe hẹrhẹ omukpahen asaọkiephana?

¹⁷ Wọ vẹ orua wẹn se muegbe hẹrhẹ omukpahen enẹna. (Iruo 14:22) Wo ghwe mu ẹwẹn kpahen erọnvwọn ebrabra re sa phia-a. Ukpẹrẹ ọtiọyen, ru oyerinkugbe wẹn vẹ ọ ri Jihova gan, wọ je chọn emọ wẹn uko vwo ru ọtiọyen. Ọ da dianẹ ẹnwan mu we rọ ọkiọvo, ta ọdavwẹ wẹn kẹ Ọghẹnẹ. (Une 62:7, 8) Kerẹ orua, ovwan ta ota kpahen oboresorọ ovwan sa vwọ vwẹrosuọ.d Ọ da dianẹ oghwọrọ ri kpregede vwomaphia, egbemuo wẹn komobọ vẹ ẹroẹvwọsuọ wo vwo kpahen Jihova cha nẹrhẹ emọ wẹn fiudugberi ji vwo ẹwẹn re dọe.

18. Akpeyeren vọ yen hẹrhẹ avwanre vwẹ obaro na?

¹⁸ Ufuoma rẹ Ọghẹnẹ nẹrhẹ ẹwẹn avwanre totọ. (Fil. 4:6, 7) Womarẹ ufuoma rọyen na, Jihova nẹrhẹ ubiudu avwanre dia dọe dede nẹ ega, oghwọrọ ri kpregede, vẹ omukpahen te avwanre oma. Ọ reyọ ekpako re dia egbowian vwọ vwẹrote avwanre. Ọ kẹ avwanre eje uphẹn ra vwọ chọn ohwohwo uko. Ufuoma ra riavwerhen rọyen enẹna, sa chọn avwanre uko vwo muegbe hẹrhẹ edavwini ride re cha vwẹ obaro ji te “ukpokpogho” rode na. (Mat. 24:21) Vwẹ ọke yena, o fori nẹ a sẹro rẹ ufuoma avwanre je chọn ihwo efa uko vwo ru ọtiọyen. Ẹkẹvuọvo, ukpokpogho rode na da wan nu, e gbi che hirharoku ebẹnbẹn re cha so ẹnwan kẹ avwanre-e. Ukuotọ rọyen, ka cha riavwerhen ro obo ri Jihova guọnọ kẹ avwanre nẹ otọ rhe, rọ dia uvi rẹ ufuoma ri bẹdẹ.—Aiz. 26:3, 4.