Wo se Vwo Ufuoma Vwẹ Ọke rẹ Ebẹnbẹn

1. Die yen “ufuoma rẹ Ọghẹnẹ,” kẹ erere vọ yen a cha mrẹ e de vwo? (Filipae 4:​6, 7)

OKA rẹ ufuoma ọvo herọ rẹ akpọ nana riẹn emu vuọvo kpahe-en. Ọnana yen “ufuoma rẹ Ọghẹnẹ” rọ nẹrhẹ e vwo ẹwẹn re dọe kidie a vẹ Ọsẹ avwanre rọhẹ Odjuvwu vwo oyerinkugbe ọghanghanre. E de vwo ufuoma rẹ Ọghẹnẹ na, ẹwẹn rẹ avwanre ko se te otọ. (Se Filipae 4:​6, 7.) Avwanre ke riavwerhen rẹ oyerinkugbe rọ kpẹkpẹre vẹ ihwo ri vwo ẹguọnọ rọyen. Avwanre vẹ “Ọghẹnẹ rẹ ufuoma” na ki ji vwo oyerinkugbe rọ kpẹkpẹre komobọ. (1 Tẹsa. 5:23) A da riẹn, vwẹroso, ji nyupho rẹ Ọsẹ rẹ avwanre, ufuoma rẹ Ọghẹnẹ kọ sa nẹrhẹ ẹwẹn rẹ avwanre dia dọe ọke re de hirharokuẹ ebẹnbẹn egangan.

2. Die nẹrhẹ o mu avwanre ẹro nẹ e se vwo ufuoma rẹ Ọghẹnẹ?

² E ghini se vwo ufuoma ro nẹ obọ rẹ Ọghẹnẹ cha ọke e de hirharoku ebẹnbẹn kerẹ ọga rọ hra nene asan eje, oghwọrọ ri kpregede, ozighi rọ sa vwomaphia yẹrẹ omukpahen? Ọvo usun rẹ ebẹnbẹn nana dede sa nẹrhẹ oshọ mu ohwo. Ẹkẹvuọvo, Jesu da vwẹ uchebro kẹ idibo rọyen nẹ, “we jẹn udu bru ovwa-an, eyẹ we jẹn oshọ mu ovwa-an.” (Jọn 14:27) Ọ vwerhoma nẹ iniọvo na ruẹ nene uchebro ri Jesu. Womarẹ ukẹcha ri Jihova, kẹ ayen se rhi vwo ufuoma ọke rẹ ayen vwo yerin ghene ebẹnbẹn egangan.

OBO RE SE VWO VWO UFUOMA ỌKE RẸ ỌGA DA HRA NENE ASAN EJE

3. Mavọ yen ọga rọ hra nene ekogho yẹrẹ akpọeje se vwo gbowọphiyọ ufuoma rẹ avwanre?

³ Ọga rọ hra nene ekogho yẹrẹ ọ rẹ akpọeje sa so ewene rode vwẹ akpeyeren. Kerẹ udje, roro kpahen oborẹ ọga ri COVID-19 na so vwọ kẹ ihwo buebun. Vwẹ ehiahiẹ ọvo re ruru, ihwo buebun tare nẹ ayen mrẹ bẹnbẹn ayen vwọ vwerhẹn vwẹ uvwre rẹ ọke rẹ ọga akpọeje na. Nẹ ọke yena rhe, ihwo re ro ẹnwan, ri she okuọnrọn, re da idi vrẹ oma, re reyọ ihuvwun egangan, ri gbozighi vwẹ uwevwin kugbe e re davwẹngba ayen vwo churu ghwu ke rhoma rhi bunphiyọ vrẹ obo ri jovwo. Ọ da dianẹ ọga hra ro ekogho ru wọ dia, mavọ wọ sa vwọ kẹnoma kẹ ẹnwan rẹ ọkamuka je riavwerhen ufuoma rẹ Ọghẹnẹ?

4. Diesorọ e se vwo vwo ufuoma kidie nẹ a riẹn kpahen aroẹmrẹ ri Jesu ro shekpahen ọke rẹ oba na?

⁴ Jesu mraro rọyen phiyotọ nẹ vwẹ ẹdẹ re koba na a cha mrẹ ọtiekọ yẹrẹ ega sansan “vwẹ asan buebu.” (Luk 21:11) Mavọ yen aroẹmrẹ yena vwọ kẹ avwanre ufuoma? O rhe gbe avwanre unu siẹrẹ ega da hra nene asan eje-e. Avwanre mrẹ nẹ erọnvwọn phia kirobo rẹ Jesu mraro rọyen phiyotọ. Ọtiọyena, ke se nene uchebro ri Jesu vwọ kẹ ihwo ri yerẹn vwẹ ọke rẹ oba na: “We jen udu bru ovwa-an.”​—Mat. 24:6.

5. (a) Vwo nene obo rehẹ Filipae 4:​8, 9, die yen ofori nẹ eroro kpahen siẹrẹ ọga rọ hra nene asan eje da vwomaphia? (b) Erere vọ yen wọ cha mrẹ siẹrẹ wọ da kerhọ rẹ isese ri Baibol re ru phiyọ uhworo?

⁵ Ọga rọ hra nene asan eje sa ghwa ẹnwan kugbe oshọ rhe. Ọnana yen obo re phia kẹ oniọvo ayen ọvo re se Desi.b Ọke rẹ ọga ri COVID-19 vwo hwe oniọvo rẹ ọsẹ rọyen, ọmọ oniọvo rẹ ọsẹ rọyen vẹ idọktọ rọyen nu, oshọ de muo nẹ ọga na che mu ọyen o mi ji vwo mu oni rọyen rọ ghwore. Fikirẹ ọga na, oshọ de rhi muo nẹ iruo rọyen sa vabọ, ọnana da nẹrhẹ ọ ro ẹnwan kpahen obo rọ sa vwọ mrẹ emu re kugbe obo rọ sa vwọ hwosa rẹ uwevwin. Ẹnwan nana de rhi muo rọ, ọ gbe sa vwerhẹn vwẹ aso-on. Ẹkẹvuọvo ẹwẹn ri Desi de rhi totọ. Vwẹ idjerhe vọ? Ọ nerhovwo kiriguo vwo rhe Jihova nẹ ọ chọn ọyen uko vwo vwo ẹwẹn ri dọe ji vwo iroro rọ gbare. (Se Filipae 4:​8, 9.) Ọ kerhọ rẹ oborẹ Jihova “ta” kẹ womarẹ isese ri Baibol re ru phiyọ uhworo. Ọ da ta: “Upho ri bọrọbọrọ rẹ ihwo ri se isese na da nẹrhẹ ẹnwan mẹ shekpotọ je nẹrhẹ ovwẹ karophiyọ nẹ Jihova vwo ọdavwẹ mẹ.”​—Une 94:19.

6. Mavọ yen uyono romobọ kugbe emẹvwa sa vwọ vwẹ ukẹcha kẹ wẹ?

⁶ Aphro herọ-ọ nẹ siẹrẹ ọga rọ hra nene asan eje da vwomaphia, ọ bẹn re vwo ru erọnvwọn evo re ruẹ jovwo, ẹkẹvuọvo vwo jẹ o gbowọphiyọ emẹvwa yẹrẹ uyono romobọ wẹ-ẹn. Ikuegbe rẹ obo re rhiẹromrẹ re vwomaphia vwẹ ẹbe vẹ ividio rẹ avwanre cha karophiyọ owẹ nẹ iniọvo wẹn je fuevun ga Jihova dede nẹ ayen ji hirharokuẹ oka rẹ egbabọse tiọyena. (1 Pita 5:9) Emẹvwa sa chọn wẹ uko vwo roro kpahen erọnvwọn evo vwẹ Baibol na re sa vwẹ ukẹcha kẹ wẹ. Emẹvwa tiọyena se rhie uphẹn phiyọ wọ vwọ mrẹ ọbọngan je vwẹ ọbọngan vwọ kẹ ihwo efa. (Rom 1:​11, 12) Wo vwo roro kpahen oborẹ Jihova bicha idibo rọyen ọke rẹ ayen vwọ muọga, oshọ vwo mu ayen yẹrẹ ayen vwọ hẹ ẹdia rẹ ọruvwohwo, esegbuyota wẹn kọ cha ganphiyọ, ku wo che vwo imuẹro nẹ o ji che bicha wẹ.

7. Die yen wo se yono mie ọyinkọn Jọn?

⁷ Davwẹngba wẹ vẹ iniọvo wẹn vwọ ta ota kugbe. Ọga rọ hra nene asan eje da vwomaphia, a sa guọnọ nẹ avwanre tephe kẹ ohwohwo ọ da tobọ dianẹ avwanre vẹ iniọvo rẹ avwanre gba hẹ asan ọvo. Vwẹ ọke tiọyena, oma se ru avwanre kerẹ ọyinkọn Jọn. Ọ guọnọre nẹ ọyen vẹ ugbeyan rọyen Gayọs mrẹ ohwohwo. (3 Jọn 13, 14) Dedena, Jọn riẹnre nẹ ọyen cha sa mrẹ Gayọs uvwre rẹ ọke evo-o. Ọtiọyena, Jọn de ru obo ro se ru; o de si ileta vwo rhe Gayọs. Ọ da dianẹ wọ rha sa kọn brẹ iniọvo wẹn ra-a, davwẹngba wo vwo se ayen vwẹ ifonu, use ra da mrẹ ohwohwo vwẹ itanẹti, yẹrẹ si ovuẹ rhe ayen vwẹ ifonu. Wẹ vẹ iniọvo na da nabọ ta ota kuẹgbe ọkieje, ẹwẹn wẹn ko che totọ wo rhe che roro nẹ wẹwẹ ọvo yen herọ-ọ. Se ekpako na ọ da dianẹ ẹnwan mu we rọ, wo mi ji rhiabọreyọ uchebro rẹ ayen vwọ kẹ wẹ.​—Aiz. 32:​1, 2.

OBO RE SE VWO VWO UFUOMA SIẸRẸ E DE HIRHAROKUẸ OGHWỌRỌ RI KPREGEDE

8. Idjerhe vọ yen oghwọrọ ri kpregede se vwo gbowọphiyọ ufuoma wẹn?

⁸ Ọ da dianẹ oghwe kuru, otọ bẹre yẹrẹ erhanre torhẹ ekuakua vwẹ asan ru wọ hepha jovwore, ọnana sa so ẹnwan kẹ wẹ vwẹ ọke grongron rọ vwọ phia nu. O da dianẹ ohwo ru wo vwo ẹguọnọ kpahen ghwuru yẹrẹ ekuakua wẹn guọghọre, ọ sa so ofudjevwe, ivunmiovwe yẹrẹ uvweri kẹ wẹ. Ọ dia ọyen ọnana vwo mudiaphiyọ nẹ wẹwẹ ohwo ro nenesi rẹ ekuakua rẹ akpeyeren yẹrẹ wo vwo esegbuyota-a. Ihwo evo se rhẹro rọyen nẹ ivun che miovwo uwe fikirẹ obo re phiare na. (Job 1:11) Jẹ, ọ da dianẹ wo hirharoku ẹdia ọbrabra tiọyen, wo ji se vwo ufuoma. Vwẹ idjerhe vọ?

9. Idjerhe vọ yen Jesu vwo muegbe rẹ avwanre hẹrhẹ ukpokpogho re sa vwomaphia?

⁹ Karophiyọ obo ri Jesu mraro kpahen. Vwọ fẹnẹ ihwo evo vwẹ akpọ na ri roro nẹ oghwọrọ ri kpregede che se te ayen oma-a, avwanre rhẹro rọyen nẹ i che bunphiyọ vwẹ ọke rẹ avwanre na, evo rayen ji se te avwanre oma. Jesu vuẹ idibo rọyen nẹ “otọ che mu kpogho” nẹ oghwọrọ ri kpregede efa cha vwomaphia tavwen oba na ke rhe. (Luk 21:11) Vwọba, Jesu je mraro nẹ ihwo che ru umwemwu “buebu,” ọnana ghwa obo ra mrẹ nonẹna kerẹ jẹ urhi ẹyọnrọn, ozighi kugbe ohwekufia. (Mat. 24:12) O vwo ọke vuọvo rẹ Jesu vwọ tanẹ ihwo rẹ Jihova senre ọvo yen cha rioja rẹ okpetu nana-a. Vwọrẹ uyota oghwọrọ ri kpregede tiọyena ji te idibo ri Jihova buebun re fuevun oma. (Aiz. 57:1; 2 Kọr. 11:25) Ọ dia ọkieje yen Jihova che vwo sivwin avwanre vrabọ rẹ oghwọrọ ri kpregede vwẹ idjerhe rẹ igbevwunu-u, ẹkẹvuọvo ọ cha kẹ avwanre obo ra guọnọre eje e se vwo vwo ufuoma vẹ ẹwẹn ri dọe.

10. Diesorọ e vwo muegbe hẹrhẹ oghwọrọ ri kpregede asaọkiephana vwo djephia nẹ avwanre ihwo ri vwo esegbuyota? (Isẹ 22:3)

¹⁰ Siẹrẹ emu ri kpregede da vwomaphia avwanre cha mrẹ lọlọhọ re vwo vwo ẹwẹn ri dọe ọ da dianẹ e muegbe phiyotọ. Kẹ, egbemuo tiọyena ọyen odjephia nẹ avwanre vwo esegbuyota kpahen Jihova-a? Ẹjo kakaka. Vwọrẹ uyota egbemuo tiọyena djephia nẹ avwanre vwo esegbuyota nẹ O vwo ẹgba ọ sa vwọ vwẹrote avwanre. Vwẹ idjerhe vọ? Ota rẹ Ọghẹnẹ vwẹ uchebro kẹ avwanre nẹ e muegbe hẹrhẹ oghwọrọ re sa vwomaphia. (Se Isẹ 22:3.) Ọkieje yen ukoko rẹ Ọghẹnẹ vwo siẹ avwanre orhọ womarẹ iyovwinreta re vwomaphia vwẹ imagazini, emẹvwa rẹ ukoko kugbe aghwoghwo ri fo aruọke nẹ e muegbe phiyotọ hẹrhẹ emu ri kpregede.c A sa vwẹroso Jihova? Ọ da dia ọtiọyen, e gbe je ru nene uchebro yena asaọkiephana​— tavwen oghwọrọ ri kpregede ke vwomaphia.

11. Die wo yono nẹ udje ri Margaret rhe?

¹¹ Roro kpahen udje rẹ oniọvo rẹ aye ọvo re se Margaret. A vuẹ rẹ nẹ o vrẹn nẹ uwevwin rọyen fikirẹ erhanre rọ ro ekogho rọ hepha. Kidie nẹ ihwo buebun davwẹngba rẹ ayen vwọ djẹ ẹsiẹvo, asan eje da rhe magbe vẹ imoto. Asan eje da rhe vọn vẹ ivwirhi ibiebi, Margaret gbi se vrẹn nẹ imoto rọye-en. Ẹkẹvuọvo, o de sivwin rhọ kidie o muegbe phiyotọ. Vwevunrẹ ekpu rọyen, o phi imapu phiyọ rọ sa vwẹ ukẹcha kẹ vwọ guọnọ idjerhe ọfa rọ sa wan djẹ nẹ ekogho na. Ọ tobọ vwẹ imoto vwọ djẹ idjerhe na phiyotọ rere ọ sa vwọ riẹn asan rọ cha wan ọ da dianẹ emu ri kpregede phiare. Kidie nẹ o muegbe phiyotọ, o de sivwin arhọ rọyen.

12. Diesorọ o vwo fo nẹ e nene odjekẹ re sa sẹro rẹ arhọ avwanre?

¹² Rere a sa vwọ sẹro rẹ arhọ avwanre vẹ ọ rẹ ihwo efa, ihwo ri suẹn se gbere ughwru phiyọ ọke ra vwọ yan, vuẹ avwanre nẹ a kua nẹ asan yẹrẹ nene odjekẹ efa. Ihwo evo gbe eghẹrẹ yẹrẹ bibe kidie ayen guọnọ yanjẹ oborẹ ayen vwori vwo-o. Die yen e che ru vwẹ ẹdia tiọyena? Baibol na vuẹ avwanre: “Vwẹ oma kpotọ vwi fiki rẹ Ọrovwohwo vwọ kẹ ukoko rẹ ohwo rẹ akpọ vwo mu, owenẹ ọ dia ovie ro kpenu, eyẹ osun re jiri.” (1 Pita 2:​13, 14) Ukoko rẹ Ọghẹnẹ je vwẹ odjekẹ vwọ kẹ avwanre re sa sẹro rẹ arhọ avwanre. Ọkieje yen a vwọ karophiyọ avwanre nẹ a vwẹ ukeri rẹ ifonu vẹ adrẹsi rẹ avwanre vwọ kẹ ekpako na rere ayen se vwo se avwanre ọke rẹ emu ri kpregede da vwomaphia. Wo ru ọtiọyen re? Ọkiọvo a je sa vwẹ odjekẹ vwọ kẹ avwanre kpahen asan ra djẹ ra, asan ra vwẹ oma da vẹ oborẹ erọnvwọn ra guọnọre se vwo te avwanre obọ yẹrẹ ọke kugbe obo ra sa vwọ vwẹ ukẹcha vwọ kẹ ihwo efa. E rhe nyẹme-e, e se phi arhọ avwanre kugbe ọ rẹ ekpako na phiyọ ẹdia rẹ imuoshọ. Karophiyọ nẹ eshare nana re fuevun na eyen vwẹrote avwanre. (Hib. 13:17) Margaret da ta: “O muvwẹro dẹn nẹ odjekẹ rẹ ekpako na vẹ ukoko na ri mi neneri yen sivwin arhọ mẹ.”

13. Die yen nẹrhẹ Inenikristi buebun ri vrẹn nẹ iwewin rayen se vwo aghọghọ vẹ ufuoma?

¹³ Iniọvo avwanre buebun ri vrẹn nẹ iwevwin rayen fikirẹ oghwọrọ ri kpregede, ofovwin yẹrẹ ozighi davwẹngba rayen eje vwo yerin ghene ẹdia kpokpọ rẹ ayen hepha na ji vwobọ vwẹ ẹga rẹ Jihova vọnvọn. Kerẹ Inenikristi ẹgbukpe ujorin rẹsosuọ re hrabọ ro asan eje fikirẹ omukpahen, ayen muẹro phiyọ “ghwoghwo ota na” ọkieje. (Iruo Rẹ Iyinkọn Na 8:4) Iruo aghwoghwo na chọn ayen uko vwọ tẹnrovi Uvie na ukperẹ ẹdia ọgangan rẹ ayen hepha. Ọnana da nẹrhẹ ayen sa sẹro rẹ aghọghọ vẹ ufuoma rayen.

OBO RE SE VWO VWO UFUOMA ỌKE RE DE MUẸKPAHAN AVWANRE

14. Mavọ yen omukpahen se vwo gbowọphiyọ ufuoma avwanre?

¹⁴ Omukpahen se gbowọphiyọ erọnvwọn buebun re kẹ avwanre ufuoma. Avwanre vwo omavwerhovwẹn vẹ evunvọnvwẹ siẹrẹ e de kuomakuẹgbe, ghwoghwo vwẹ azagba, ji ruẹ erọnvwọn odedede ababọ rẹ oshọ nẹ e che mu avwanre. Siẹrẹ e de mie avwanre ugbomọphẹ tiọyena, ọnana sa nẹrhẹ a ro ẹnwan je djoshọ rẹ obo re cha phia vwẹ obaro na. Oshọ de mu avwanre ọ dia obo re chọre-e. Ẹkẹvuọvo, e jẹ a jomaotọ. Jesu tare nẹ omukpahen tiọyena sa nẹrhẹ idibo rọyen she. (Jọn 16:​1, 2) Kẹ, mavọ yen a sa vwọ sẹro rẹ ufuoma ọke re de muẹkpahan avwanre.

15. Diesorọ oshọ rẹ omukpahen vwo jẹ avwanre e muo? (Jọn 15:20; 16:33)

¹⁵ Baibol na vuẹ avwanre: “Ihwo ejobi re guọnọ yere akpọ ọfuanfon rọ herọ vwi Kristi Jesu ke kpokpo.” (2 Tim. 3:12) Ọke ra vwọ dobọ rẹ iruo na ji vwẹ ẹkuotọ rẹ oniọvo ọvo re se Andrei, o muro ẹro nẹ e ji che mukpahen idibo ri Jihova eje-e. Kẹ o roro: ‘Iseri ri Jihova rehẹ ẹkuotọ na pha buebun. Mavọ yen igọmẹti se vwo mu avwanre eje?’ Jẹ, ukperẹ ẹwẹn ri Andrei vwo totọ, iroro nana kọ nẹrhẹ ọ ro ẹnwan ọkieje. Iniọvo efa da vwẹroso Jihova ayen nama roro nẹ e che se mu aye-en. Ayen riẹnre nẹ e se mu ayen, ẹkẹvuọvo, ayen ro ẹnwan ọgangan kerẹ Andrei-i. Ọtiọyena o de brevun kpo iroro vwẹrokere iniọvo ichekọ na vwọ vwẹroso Ọghẹnẹ. O rhe kri-i ẹwẹn rọyen de rhi totọ, enẹna o rhi vwo aghọghọ dede nẹ ebẹnbẹn buebun je herọ. Emu ọtiọyen je sa phia kẹ avwanre. Dede nẹ Jesu vuẹ avwanre nẹ e rhẹro rẹ omukpahen, ọ je vwẹ imuẹro kẹ avwanre nẹ a sa fuevun.​—Se Jọn 15:20; 16:33.

16. Odjekẹ vọ yen ofori nẹ e nene vwẹ ọke rẹ omukpahen?

¹⁶ Ọke ra da dobọ re iruo avwanre ji yẹrẹ siokpotọ, oghọn ukoko vẹ ekpako na sa vwẹ odjekẹ vwọ kẹ avwanre. Odjekẹ tiọyena sẹro rẹ avwanre, nẹrhẹ ayen sa vwẹ Ota rẹ Ọghẹnẹ ghẹrẹ avwanre je chọn avwanre uko vwo vwobọ vwẹ iruo aghwoghwo na ọkieje te asan rẹ ẹgba avwanre muru. Davwẹngba wẹn eje vwo ru nene odjekẹ ra vwọ kẹ wẹ, ọ da tobọ dianẹ wo ghwe vwo ẹruọ rẹ oboresorọ ra vwọ reyọ vwọphia-a. (Jems 3:17) Vwọba, wọ vwẹ evuẹ ri shekpahen iniọvo avwanre yẹrẹ irueru rẹ ukoko na vwọ kẹ ihwo ri fori nẹ e riẹn kpahọ-ọn.​—Aghwo. 3:7.

17. Kerẹ iyinkọn rẹ ẹgbukpe ujorin rẹsosuọ, die yen avwanre brorhiẹn re vwo ru?

¹⁷ Iroro ọvo kiriguo rọ sorọ Eshu vwo nene ihwo rẹ Ọghẹnẹ phi ofovwin yen, ayen vwo iruo rẹ ayen vwọ dia “iseri ri Jesu.” (Ẹvwọ. 12:17) Wo jẹ Eshu vẹ akpọ rọyen djuguegue mu we-e. Iruo aghwoghwo na vẹ eyono ghwa aghọghọ vẹ ufuoma rhe avwanre ọ da tobọ dianẹ a vwọsua avwanre. Vwẹ ẹgbukpe ujorin rẹsosuọ, ihwo ri Ju ri vwo ogangan rẹ usuon vwọ vuẹ iyinkọn na nẹ ayen dobọ rẹ aghwoghwo na ji, eshare yena re fuevun na brorhiẹn rẹ ayen vwọ nyo upho rẹ Ọghẹnẹ. Ayen muomaphiyọ iruo rẹ aghwoghwo na, ọyena da kẹ ayen omavwerhovwẹn. (Iruo Rẹ Iyinkọn Na 5:​27-29, 41, 42) Ọ da dianẹ e si obọ rẹ iruo re aghwoghwo avwanre kpotọ, ofori nẹ a jomaotọ ọke re de ghwoghwo. (Mat. 10:16) Jẹ, e de ru asan ẹgba avwanre teri, e che vwo ufuoma ro no cha siẹrẹ e de ghwoghwo ovuẹ rẹ arhọ na.

“ỌGHẸNẸ RẸ UFUOMA KỌ VẸ OVWAN DIA.”

18. Die yen ofori nẹ a karophiyọ kpahen ohwo rọ sa kẹ avwanre obọdẹn rẹ ufuoma?

¹⁸ Jẹ o muwẹro nẹ ọke rẹ erọnvwọn ma vwọ tobọ gan, e se vwo ufuoma. Vwẹ ọke ọtiọyena, e jẹ a karophiyọ nẹ ufuoma ra guọnọre ọyen ufuoma rẹ Ọghẹnẹ, kọyen ufuoma rẹ Jihova ọvo sa vwọ kẹ avwanre. Vwẹrosuọ ọke wo de hirharokuẹ ọga rọ hra nene asan eje, oghwọrọ ri kpregede yẹrẹ omukpahen. Tinkamu ukoko rọyen. Tẹnrovi uvi rẹ akpeyeren rọhẹ obaro hẹrhẹ owẹ. Ovwan de ru ọtiọyen, “Ọghẹnẹ rẹ ufuoma kọ vẹ ovwan dia.” (Fil. 4:9) Vwẹ uyono rọ cha na, a cha ta ota kpahen obo ra sa vwọ chọn iniọvo avwanre ri hirharoku ebẹnbẹn uko vwo vwo ufuoma rẹ Ọghẹnẹ.