Jihova Sẹro rẹ Ihwo Rọyen

1. Diesorọ Jesu vwọ rẹ Jihova nẹ ọ sẹro rẹ idibo rọyen?

VWẸ ason rọ koba tavwen Jesu ki ghwu, ọ da yare emu ọvo rọ pha ghanghanre vwo mie Ọsẹ rọyen rọhẹ odjuvwu. Ọ da rẹ Jihova nẹ ọ sẹro rẹ idibo rọyen. (Jọn 17:​15, 20) Vwọrẹ uyota, ọkieje yen Jihova vwọ vwẹrote ihwo rọyen, je sẹro rayen. Ẹkẹvuọvo, Jesu riẹnre nẹ Eshu cha vwọso ihwo rọyen gangan. Jesu je riẹn nẹ idibo rọyen cha guọnọ ukẹcha ri Jihova rere ayen se vwo yerin ghene ẹvwọsuọ rẹ Idẹbono.

2. Vwo nene obo rehẹ Une Rẹ Ejiro 33:​18-20, diesorọ oshọ rẹ irhevwa vwo jẹ avwanre emuo?

² Akpọ nana rẹ Eshu suẹn na sua ebẹnbẹn buebun vwọ kẹ Inenikristi rẹ uyota nonẹna. Avwanre hirharokuẹ irhevwa sansan re sa nẹrhẹ ofu dje avwanre, je tobọ nẹrhẹ ọyọnregan rẹ avwanre dogho. Ẹkẹvuọvo, kirobo ra cha mrẹ vwẹ uyono nana, o rhe fo nẹ oshọ rẹ emu vuọvo vwo mu avwanre-e. Ẹro ri Jihova nẹ avwanre​—⁠ọ mrẹ ebẹnbẹn rẹ avwanre hirharokuẹ, o ji muegbe rọ vwọ chọn avwanre uko vwo yerin ghene ayen. E gbe ja fuẹrẹn idje ivẹ vwẹ Baibol na ri dje oborẹ Jihova wan sẹro rẹ “otu re djẹ oshọ rọye.”​—⁠Se Une Rẹ Ejiro 33:​18-20.

JIHOVA CHỌN AVWANRE UKO ỌKE RA DA HẸ ẸDIA RẸ ỌRUVWOHWO

3. Ọke vọ yen a sa vwọ mrẹ oma rẹ avwanre vwẹ ẹdia rẹ ọruvwohwo?

³ Dede nẹ avwanre vwo iniọvo rẹ eya vẹ eshare vwẹ ukoko na, jẹ ọkiọvo a je sa mrẹ oma rẹ avwanre vwẹ ẹdia rẹ ọruvwohwo. Kerẹ udje, ighene sa mrẹ oma rayen vwẹ ẹdia rẹ ọruvwohwo ọke rẹ ayen da chochọn rẹ esegbuyota rayen vwẹ obaro rẹ emọ ri iklasi rayen vwẹ isikuru yẹrẹ ọke rẹ ayen de kpo ukoko kpokpọ. Ofu se dje avwanre yẹrẹ e se nene erharhe iroro muabọ siẹrẹ e de roro nẹ avwanre ọvo yen che chirakon rẹ ebẹnbẹn na komobọ. E se siomauko ra vwọ ta oborẹ oma ruẹ avwanre vwọ kẹ ihwo efa kidie e se roro nẹ ayen che se vwo ẹruọ rẹ avwanre-e. Ọkiọvo, e se roro sẹ o vwo ohwo rọ ghene davwerhọn rẹ avwanre. O toro obo re ghwarọ rhe-e, ẹdia rẹ ọruvwohwo sa nẹrhẹ a ro enwan ji no nẹ e vwo ọchuko-o. Jihova guọnọre nẹ e vwo oka rẹ iroro ọtiọyena-a. Die yen sa nẹrhẹ a ta ọtiọyen?

4. Diesorọ ọmraro Ilaija vwọ tanẹ “mẹvwẹ ọvo kpoi ri chekọ”?

⁴ Roro kpahen udje rẹ Ilaija rọ dia ohwo rọ fuevun. Ọ vrẹ ẹdẹ 40 re rọ vwọ djẹ kẹ arhọ rọyen kidie Jezibẹl guọnọ teyọn hwe. (1 Ivie 19:​1-9) Ukuotọ rọyen, rẹ ọyen ọvo vwọ herọ vwẹ unu rẹ ukuta, ọ da vuẹ Jihova: “mẹvwẹ ọvo kpoi, [yen ọmraro ro] chekọ.” (1 Ivie 19:10) Emraro efa ji chekọ vwẹ otọ na; kerẹ udje, Obadaya si emraro 100 nu rere Jezibẹl vwo jẹ ayen ehwe. (1 Ivie 18:​7, 13) Kẹ, diesorọ Ilaija vwo roro nẹ ọyen ọvo yen chekọ? O roro nẹ emraro eje rẹ Obadaya sinu na ghwu re re? O roro nẹ ọyen hẹ ẹdia rẹ ọruvwohwo kidie nẹ ihwo efa vwomaba ọyen vwẹ ẹga ri Jihova-a, tobọ vwẹ ọke rẹ Jihova vwo dje oma rọyen phia kerẹ Ọghẹnẹ rẹ uyota na nu vwẹ Ugbenu ri Kamẹl? O roro nẹ o vwo ohwo vuọvo rọ tobọ vwo oniso rẹ obo ro hirharokuẹ na-a, yẹrẹ vwo ọdavwẹ rọye-en? Baibol na ghwa vuẹ avwanre erọnvwọn eje re nẹrhẹ Ilaija mrẹ oma rọyen vwẹ ẹdia rẹ ọruvwohwo-o. Ẹkẹvuọvo emu ọvo ro mu avwanre ẹro kọna, Jihova nabọ vwo ẹruọ rẹ obo re phia kẹ Ilaija, ọ je riẹn obo ro che ru dẹn vwọ vwẹ ukẹcha vwọ kẹ.

5. Idjerhe vọ yen Jihova vwọ vwẹ imuẹro kẹ Ilaija nẹ ọ dia ọyen ọvo yen herọ-ọ?

⁵ Jihova vwẹ ukẹcha kẹ Ilaija vwẹ idjerhe buebun. Jihova vwẹ uphẹn vwọ kẹ nẹ ọ ta ẹwẹn rọyen. Abọ ivẹ soso yen Ọ nọ Ilaija: “Die wo ruẹ vwẹ etinẹ?” (1 Ivie 19:​9, 13) Kọke kọke rẹ Ilaija vwọ ta ẹwẹn rọyen, Jihova nabọ kerhọ vwọ kẹ. Jihova kpahen kẹ Ilaija rọ vwọ vwẹ oma nẹ ji dje ẹgba rọyen phia kẹ mrẹ. Ọ je vwẹ imuẹro kẹ Ilaija nẹ idibo rọyen efa je herọ re vwẹ ẹga kọyen. (1 Ivie 19:​11, 12, 18) Aphro herọ-ọ nẹ ẹwẹn rẹ Ilaija nabọ totọ ọke rọ vwọ ta ẹwẹn rọyen eje kẹ Jihova, ro ji vwo nyo oborẹ Jihova kpahen kẹ. Jihova vwẹ iruo eghanghanre buebun vwọ kẹ Ilaija nẹ o ru. Jihova vuẹ Ilaija nẹ ọ vwẹ Hazael vwo mu ovie ri Siria, Jehu ovie rẹ Izrẹl, je reyọ Ilaesha vwo mu ọmraro. (1 Ivie 19:​15, 16) Jihova rẹyọ iruo nana rọ vwọ kẹ Ilaija na vwọ chọn uko vwọ tẹnroviẹ omamọ erọnvwọn. Ọghẹnẹ je reyọ Ilaesha vwo ru uvi rẹ ugbeyan vwọ kẹ. Wo de no nẹ owẹ hẹ ẹdia rẹ ọruvwohwo, mavọ yen wo se vwo rhiabọreyọ ukẹcha rẹ Jihova vwọ kẹ wẹ?

6. Die wọ sa nẹrhovwo kpahen ọke wọ da mrẹ oma wẹn vwẹ ẹdia rẹ ọruvwohwo? (Une Rẹ Ejiro 62:⁠8)

⁶ Jihova durhie uwe nẹ wọ nẹrhovwo rhe ọyen. Ọ mrẹ oborẹ wo hirharokuẹ, ọ je kẹ wẹ imuẹro nẹ o che nyo ẹrhovwo wẹn o toro ọke wọ vwọ nẹ-ẹ. (1 Tẹsa. 5:17) Oma vwerhọn siẹrẹ ọ da kerhọ rẹ ẹrhovwo rẹ idibo rọyen. (Isẹ 15:⁠8) Die wọ sa nẹrhovwo kpahen ọke wọ da mrẹ oma wẹn vwẹ ẹdia rẹ ọruvwohwo? Ta ẹwẹn wẹn kẹ Jihova kirobo rẹ Ilaija ruru. (Se Une Rẹ Ejiro 62:⁠8.) Vuẹ kpahen obo ri kpokpo uwe ẹwẹn kugbe oborẹ oma ru we. Vuẹ nẹ ọ chọn wẹ uko vwọ riẹn obo ro fori nẹ wo ru ọke wọ da hẹ ẹdia rẹ ọruvwohwo yẹrẹ wo de muomaphiyọ. Kerẹ udje, wọ sa rẹ Jihova nẹ ọ kẹ wẹ uduoyivwin wo se vwo soseri vwẹ isikuru ọke rẹ oshọ de mu we, wo de ji no nẹ wẹ hẹ ẹdia rẹ ọruvwohwo. Wọ je sa rẹ nẹ ọ kẹ wẹ aghwanre wọ sa vwọ nabọ reyọ ona vwo dje oborẹ wo segbuyota fiotọ. (Luk 21:​14, 15) Wo de nene erharhe iroro muabọ, rẹ Jihova nẹ ọ chọn wẹ uko rere wọ vẹ oniọvo ro tedje sa vwọ ta ota kpahọn. Wọ sa rẹ Jihova nẹ ọ vwẹ ukẹcha vwọ kẹ ohwo ru wọ cha ta ẹwẹn wẹn kẹ na nẹ ọ kerhọ ji vwo ẹruọ wẹn. Wọ da ta ẹwẹn wẹn kẹ Jihova, gbe vwo oniso ro obo rọ kpahanphiyọ ẹrhovwo wẹn wan, wo mi ji rhiabọreyọ ukẹcha rẹ ihwo efa, wo de ru ọtiọyen wo rhe che no nẹ wọ hẹ ẹdia rẹ ọruvwohwo-o.

7. Die yen udje ri Mauricio yono uwe?

⁷ Jihova kẹ avwanre eje iruo ọghanghanre ọvo. Wo se vwo imuẹro nẹ oma vwerhọn rọ vwọ mrẹ obo ru wo ruẹ te vwẹ ukoko na, kugbe iruo aghwoghwo na. (Une 110:⁠3) Idjerhe vọ yen iruo nana ru wo muomaphiyọ na sa vwọ chọn wẹ uko ọke wọ da mrẹ oma wẹn vwẹ ẹdia rẹ ọruvwohwo? Roro kpahen udje rẹ oniọvo ọshare ọvo rọ dia eghene re se Mauricio.b Ọmọke vwọ wan rẹ Mauricio vwo bromaphiyame nu, ọvo vwẹ usun rẹ igbeyan rọyen re ma kẹrẹ ko bo ghwrẹ nẹ ukoko na. Mauricio da ta: “Me vwọ mrẹvughe nẹ ọ yanjẹ Jihova vwo, ofu de dje vwe hwe. Ki mi roro sẹ mi se ru ive rẹ omaẹvwọkpahotọ mẹ na gba je daji ukoko na. Me da rhe mrẹ oma mẹ vwẹ ẹdia rẹ ọruvwohwo ji roro nẹ o vwo ohwo vuọvo ro che vwo ẹruọ rẹ oborẹ oma ru vwe-e.” Die yen vwẹ ukẹcha kẹ Mauricio? Ọ da ta: “Me da hẹrẹ iruo rẹ aghwoghwo mẹ phiyọ. Ọnana nẹrhẹ me kẹnoma kẹ erharhe iroro vẹ uruemu ri mi vwo roro kpahen oma mẹ ganọ. Mi vwo nene iniọvo efa wian kuẹgbe vwẹ iruo rẹ aghwoghwo na, ọnana da rhe nẹrhẹ oma vwerhen ovwẹ ji no nẹ me rha hẹ ẹdia rẹ ọruvwohwo-o.” Dede nẹ avwanre vẹ iniọvo na rha sa wian kuẹgbe vwẹ iruo aghwoghwo na kirobo ri jovwo-o, jẹ avwanre je mrẹ ọbọngan siẹrẹ e de nene ayen vwobọ vwẹ iruo rẹ aghwoghwo na womarẹ ileta esio vẹ ọ re ruẹ vwẹ ifonu. Die ọfa yen vwẹ ukẹcha kẹ Mauricio? Ọ da je ta: “Mi de ji vwo owian buebun ri mi ruẹ vwẹ ukoko na. Me davwẹngba vwo muegbe rẹ eta ra ghare kẹ vwẹ je vwẹ ayen phia vwẹ uyono. Iruo nana nẹrhẹ me riẹn nẹ Jihova vẹ iniọvo na ni vwe ghanghanre.”

JIHOVA CHỌN AVWANRE UKO ỌKE RẸ OFU DE DJE AVWANRE

8. Mavọ yen oma ruẹ avwanre siẹrẹ edavwini egangan de te avwanre oma?

⁸ Avwanre rhẹro rẹ edavwini vwẹ oba rẹ ẹdẹ nana. (2 Tim. 3:⁠1) Ẹkẹvuọvo, o gbe avwanre unu ọke re de hirharokuẹ oka rẹ edavwini evo. Ọ sa dianẹ ohwo re vwo ẹguọnọ kpahen ghwuru, idọktọ jẹ avwanre riẹn nẹ e vwo okpọga ọvo yẹrẹ uwenre ọgangan rọ vwomaphia kpregede. Ọke yena, e se muomaphiyọ ofu mi ji dje avwanre, ma rho ọ da dianẹ ebẹnbẹn na phia kpahen ohwohwo yẹrẹ e da vwomaphia ẹsiẹvo. Ẹkẹvuọvo karophiyọ nẹ Jihova mrẹ avwanre, womarẹ ukẹcha rọyen ke se fiudugberi chirakon rẹ kọdavwini kọdavwini.

9. Djisẹ rẹ edavwini evo rẹ Job hirharoku?

⁹ Roro kpahen oborẹ Jihova vwọ vwẹ ukẹcha vwọ kẹ Job rọ dia ohwo rọ fuevun. Vwẹ uvwre rẹ ọke ọvo, o de rhiẹromrẹ edavwini sansan re pha gangan. Job nyo iyẹnrẹn sansan ri muekpahen vwẹ ẹdẹ ọvuọvo, a vuẹrẹ nẹ e cho eranvwe rọyen ji hwe evo, e ji hwe idibo rọyen, ma bra kparobọ emọ rọyen eje ji ghwu. (Job 1:​13-19) Ọmọke vwọ wan rẹ Job ji vwo vwere uvweri rẹ obo re phia kẹ na, o de rhi shephiyọ okpọga ọvo rọ guọghọ oma rọyen totọ. (Job 2:⁠7) Ẹdia rẹ Job hepha na bra te asan rọ da tanẹ: “Arhọ mẹ ko tu vwe oma; me rha dia bẹdẹ-ẹ.”​—⁠Job 7:⁠16.

10. Die yen Jihova ruru rere Job se vwo chirakon rẹ edavwini rọyen na? (Ni uhoho rọhẹ opharo ọbe na.)

¹⁰ Jihova mrẹ obo re phia vwọ kẹ Job. Kidie nẹ Jihova vwo ẹguọnọ ri Job, Ọ da vwẹ ukẹcha kẹ vwo chirakon rẹ edavwini ri tere oma na. Jihova ta ota kẹ Job vwọ karophiyọ kpahen aghwanre rọyen ro vwo oba-a kugbe obo rọ nabọ vwẹrote emama rọyen wan. Ọ ta ota kpahen eranvwe buebun ri muoshọ. (Job 38:​1, 2; 39:​9, 13, 19, 27; 40:15; 41:​1, 2) Jihova je reyọ eghene rẹ ọshare ọvo rọ fuevun re se Elihu vwọ bọn Job gan. Elihu vwẹ imuẹro kẹ nẹ ọkieje yen Jihova vwọ hwosa kẹ idibo rọyen fikirẹ akoechiro rayen. Ẹkẹvuọvo, Jihova je womarẹ Elihu vwọ vwẹ ọghwọku vwọ kẹ Job vwẹ idjerhe rẹ ẹguọnọ. Elihu vwẹ ukẹcha vwọ kẹ Job vwọ kẹnoma kẹ ro vwo roro kpahan oma rọyen gan nọ, womarẹ ọ vwọ karophiyọ nẹ avwanre pha hanhanvwe siẹrẹ a da vwẹ avwanre vwọ vwanvwe Jihova rọ dia Ọmemama rẹ odjuvwu vẹ akpọ. (Job 37:14) Jihova je vwẹ owian kẹ Job; ọyen rọ vwọ nẹrhovwo kẹ igbeyan rọyen erha ri ru umwemwu na. (Job 42:​8-10) Idjerhe vọ yen Jihova vwọ chọn avwanre uko nonẹna siẹrẹ e de hirharokuẹ edavwini egangan?

11. Uchebro vọ yen Baibol na kẹ avwanre ọke re de hirharoku edavwini?

¹¹ Jihova rha ta ota kẹ avwanre phiọngun kirobo rọ vẹ Job ruru-u, ẹkẹvuọvo Ọ ta ota kẹ avwanre womarẹ Ota Rọyen rọ dia Baibol na. (Rom 15:⁠4) Ọ vwẹ uchebro kẹ avwanre womarẹ iphiẹrophiyọ re vwo kpahen obaro na. Roro kpahen ikuegbe ri Baibol evo re sa vwẹ uchebro kẹ avwanre ọke re de hirharokuẹ edavwini. Vwẹ Baibol na, Jihova kẹ avwanre imuẹro nẹ, o vwo emu vuọvo tobọ ji te edavwini egangan dede re cha “sa hẹriẹ avwanre nẹ ẹguọnọ” rọye-en. (Rom 8:​38, 39) Ọ je kẹ avwanre imuẹro nẹ ọyen “si kẹrẹ otu ri sere ejobi” vwẹ ẹrhovwo. (Une 145:18) Jihova vuẹ avwanre nẹ a da tobọ rioja dede, e ji se vwo omavwerhovwẹn, ji chirakon rẹ kọdavwini kọdavwini siẹrẹ a da vwẹrosuọ. (1 Kọr. 10:13; Jems 1:​2, 12) Ota rẹ Ọghẹnẹ je karophiyọ avwanre nẹ edavwini re hirharokuẹ, eyen ọ rọ ọmọke siẹrẹ a da reyọ vwọ vwanvwe osaẹhwa rẹ arhọ ri bẹdẹ rọ cha vwọ kẹ avwanre. (2 Kọr. 4:​16-18) Jihova kẹ avwanre uvi rẹ iphiẹrophiyọ nẹ ọyen cha ghwọrọ Eshu rọ dia Idẹbono rọ sua ebẹnbẹn rẹ avwanre eje kugbe ihwo umwemwu re vwẹrokere no. (Une 37:10) O vwo ẹkpo ri Baibol evo ru wọ riẹn kuyovwin re sa chọn wẹ uko vwo chirakon rẹ edavwini re cha vwẹ obaro na?

12. Die yen Jihova guọnọre nẹ avwanre ru rere a sa vwọ mrẹ erere vọnvọn vwo nẹ Ota rọyen rhe?

¹² Jihova guọnọre nẹ avwanre rhuẹrẹ ọke phiyọ vwo yono Baibol na ọkieje ji roro kokodo kpahen obo re seri. A da reyọ obo re yonori vwo ruiruo, esegbuyota rẹ avwanre kọ cha gan, ọnana kọ cha nẹrhẹ e sikẹrẹ Ọsẹ rẹ avwanre rọhẹ odjuvwu phiyọ. Ukuotọ rọyen, ka cha mrẹ ẹgba vwo chirakon rẹ edavwini. Jihova je vwẹ ẹwẹn ọfuanfon rọyen vwọ kẹ ihwo re vwẹroso Ota rọyen. Ẹwẹn ọfuanfon yena je sa kẹ avwanre ẹgba “rọ basa-an” re se vwo chirakon rẹ kọdavwini kọdavwini.​—⁠2 Kọr. 4:​7-10.

13. Mavọ yen Ota rẹ Ọghẹnẹ rẹ “omamọ rẹ odibo esiri na” vwọphia vwọ chọn avwanre uko vwo chirakon rẹ edavwini?

¹³ Womarẹ ukẹcha ri Jihova, “omamọ rẹ odibo esiri na” kọ sa teyen ẹbe, ruẹ ividio vẹ uhworo re nẹrhẹ esegbuyota rẹ avwanre gan ji siẹkẹrẹ Jihova phiyọ. (Mat. 24:45) Ofori nẹ avwanre nabọ reyọ erọnvwọn nana rẹ Jihova vwọ kẹ avwanre na vwo ruiruo vọnvọn. Oniọvo aye ọvo ro nẹ United States rhe dje ọdavwaro phia kpahen erọnvwọn nana eje rẹ Jihova vwọ kẹ avwanre na. Ọ da ta: “Me mrẹ obo re davwen ọyọnregan mẹ ni abọ buebun vwẹ uvwre rẹ ẹgbukpe 40 re me vwọ ga Jihova cha re na.” O rhiẹromrẹ edavwini buebun​—⁠idriva ọvo rọ da udi vroma djẹ ro ọsẹ rọyen rode, o de ghwu, ọga ọgangan ọvo hwe ọsẹ vẹ oni rọyen, ọ da rha mwọga rẹ ikansa abọ ivẹ. Die yen chọn rọ uko vwo chirakon? Ọ da ta: “Ọkieje yen Jihova vwọ vwẹrote vwe. Ota rọyen rọ vwọphia womarẹ odibo rọ fuevun na chọn vwẹ uko vwo chirakon. Eriyin na, ke me sa vwẹrokere Job vwọ ta: ‘Rhiri bẹsiẹ mi vwo ghwu mi se ku ase mẹ fia-a!’ ”​—⁠Job 27:⁠5.

14. Idjerhe vọ yen Jihova vwọ reyọ iniọvo rẹ ukoko na vwo biẹcha avwanre vwẹ ọke rẹ edavwini? (1 Tẹsalonaika 4:⁠9)

¹⁴ Jihova yono ihwo rọyen oborẹ ayen se vwo dje ẹguọnọ je bọn ohwohwo gan vwẹ ọke rẹ edavwini. (2 Kọr. 1:​3, 4; se 1 Tẹsalonaika 4:⁠9.) Kerẹ Elihu, iniọvo rẹ avwanre vwo owenvwe rẹ ayen vwọ chọn avwanre uko vwọ fuevun ọke re de hirharoku ebẹnbẹn. (Iruo 14:22) Kerẹ udje, roro kpahen oborẹ iniọvo rehẹ ukoko ri Diane hepha vwọ vwẹ ukẹcha vẹ ọbọngan vwọ kẹ vwo sikẹrẹ Jihova, ọke rẹ ọshare rọyen vwọ mwa okpọga. Ọ da ta: “Ọ lọhọre-e. Ẹkẹvuọvo avwanre mrẹ ẹroevwote vẹ ukẹcha ri Jihova vwẹ uvwre rẹ emeranvwe yena re pha gangan na. Iniọvo rehẹ ukoko rẹ avwanre ru erọnvwọn buebun vwọ vwẹ ukẹcha kẹ avwanre. Iniọvo na kọ bru avwanre rhe, gbanẹ avwanre, je reyọ ifonu vwo se avwanre. Enana eje na chọn avwanre uko vwo chirakon. Kidie nẹ mi riẹn obo ra gua imoto-o, iniọvo na ke davwẹngba vwo mu vwe kpo uyono, ji te iruo rẹ aghwoghwo na siẹrẹ uphẹn re me vwọ ra de rhiephiyọ.” Mavọ yen ọ vwerhoma te re vwo vwo iniọvo tiọna vwevunrẹ ukoko na!

DJE ỌDAVWARO PHIA KPAHEN ẸROEVWOTE RI JIHOVA

15. Diesorọ e vwo vwo imuẹro nẹ e se chirakon rẹ edavwini?

¹⁵ Dohwo vẹ ọdavwini rọyen yen che hirharoku. Jẹ, kirobo re yono re na, Jihova cha yanjẹ avwanre vwo-o. Kerẹ ọsẹ ro vwo ẹguọnọ, ọ cha vwẹrote avwanre ọkieje. Ọ vẹ avwanre herọ, o muegbe ro vwo nyo oyare rẹ avwanre vwọ kẹ ukẹcha ji bicha avwanre. (Aiz. 43:⁠2) O mu avwanre ẹro nẹ e se yerin ghene edavwini kidie ọ kẹ avwanre erọnvwọn eje ra ghene guọnọ re se vwo chirakon. Ọ kẹ avwanre okẹ rẹ ẹrhovwo, Baibol na, evuẹ ri Baibol ra vwọphia vwẹ idjerhe sansan, kugbe iniọvo rẹ akpọeje ri biẹcha avwanre vwẹ ọke ọgangan.

16. Mavọ yen a sa vwọ dia otọ rẹ ẹroevwote ri Jihova ọkieje?

¹⁶ Mavọ yen ọ vwerhoma te re vwo vwo Ọsẹ vwẹ odjuvwu rọ vwẹrote avwanre! “Udu rẹ avwanre ghọghọ vwẹ oma rọye.” (Une 33:21) Avwanre se djephia nẹ e vwo ọdavwaro kpahen ẹroevwote ri Jihova, siẹrẹ a da reyọ erọnvwọn sansan rọ vwọ kẹ avwanre na vwo ruiruo vọnvọn. Avwanre je cha davwẹngba rere a sa vwọ dia otọ rẹ ẹroevwote rẹ Ọghẹnẹ. Eriyina, avwanre da vwẹ ọkieje vwo nyo upho ri Jihova ji ru obo ri je, kọ cha vwẹrote avwanre bẹdẹ bẹdẹ!​—⁠1 Pita 3:⁠12.