MARCH 30–APRIL 5, 2026
UNE 76 Mavọ Yen Oma Ru We?
Ta Eta Avwerhen Kpahen Uyota Na
“ Ọrovwohwo, Ọghẹnẹ rẹ uyota.”—UNE 31:5.
ỌDAVWẸ RẸ UYONO NANA
Obo ra ta uyota na wan rere o se vwo fierere kẹ ihwo.
1. Die yen ofori nẹ e ru vwọ dia evunrẹ orua ri Jihova?
Onọ ọvo avwanre ka nọ iniọvo avwanre siẹrẹ a da mrẹ ayen yen, “Mavọ yen wọ vwọ mrẹ uyota na vughe?” Iniọvo avwanre evo cha vuẹ wẹ nẹ “e vwiẹ ayen vwẹ uyota na.” Efa sa tanẹ o ji rhi kri ayen “mrẹ uyota na vughee.” Avwanre kpahanphiyọ enọ yena vwẹ idjerhe ọtiọyen kidie uyota ri Baibol na yen avwanre mu akpeyeren rẹ avwanre eje kpahen. Diesorọ? Kidie nẹ avwanre riẹnre nẹ a ke sa dia evunrẹ orua rẹ Ọghẹnẹ, e ke djephia nẹ e vwo ẹguọnọ rẹ uyota na ji yeren akpọ nene. Ọnana ji churobọ siẹ ra vwọ dia ohwo rẹ uyota vwọrẹ ota vẹ uruemu.—Une 15:1-3.
2. (a) Oka rẹ ohwo vọ yen Jesu hepha? (b) Die yen uyota ri Jesu yono ihwo na che ru vwẹ oma rayen?
2 Ọkieje yen Jesu vwọ ta uyota na. Ivwighrẹn rọyen riẹnre nẹ ọ da tobọ dianẹ obo rọ ta na vwọso ayen dede, ọ je cha ta uyota na. (Mat. 22:16) Vwọ kpahen oborẹ uyota rọ vuẹ ayen na che ru vwẹ oma rayen, ọ da ta: “Me rhere rhe so ohẹriẹ, ọshare vwọso ọsẹ rọyen, ọmọtẹ vwọso oni rọyen, aye vwọso oni orọnvwe rọyen.” (Mat. 10:35) Jesu guọnọrẹ nẹ ihwo vwọso ovuẹ rẹ ọyen vẹ idibo rọyen ghwoghwo naa, dedena ọ je vuẹ ayen uyota na ghene. (Mat. 23:37) Ọ riẹnre nẹ ovuẹ rọyen na cha hẹriẹ ihworakpọ phiyọ ẹko ivẹ—ihwo ri vwo ẹguọnọ rẹ uyota ri Baibol na vẹ i ri vwo ẹguọnọ rọyeen.—2 Tẹsa. 2:9-11.
3. Die yen a cha ta ota kpahen vwẹ uyono nana?
3 Kerẹ Jesu, e jẹ a davwẹngba vwọ dia ihwo rẹ uyota ọ da tobọ dianẹ ihwo cha vwọso avwanre, e jẹ a ta uyota ọkieje. Ọtiọyen ọ je hepha nẹ iruo rẹ aghwoghwo vẹ eyono rẹ avwanre ruẹ na, ivun che miovwon ihwo evo kpahọn. Kẹ ọnana mudiaphiyọ nẹ e rhe che roro kpahen ọke ra vwọ ta uyota na vẹ obo ra ta wan? Ẹjo kakaka! Ẹsosuọ a cha kpahenphiyọ onọ ọghanghanre ọvo vwẹ uyono nana: Tivọ yen avwanre da sa mrẹ uyota na? A je cha kpahenphiyọ onọ kerẹ: Diesorọ, mavọ, kugbe ọke vọ yen avwanre vwọ ta uyota na? Ẹkpahọnphiyọ rẹ enọ yena cha vwẹ ukẹcha kẹ avwanre vwo ru yovwinphiyọ womarẹ a vwọ ta eta avwerhen kpahen uyota na vwẹ iruo rẹ aghwoghwo na, ọnana mudiaphiyọ nẹ a cha ta vẹ ọghọ kugbe ọke ro fori.
TIVỌ YEN AVWANRE DA SA MRẸ UYOTA NA?
4. Diesorọ a sa vwọ tanẹ Jihova yen Esiri rẹ uyota?
4 Jihova yen Esiri rẹ uyota. Obo rọ tare eje uyota. Kerẹ udje, kemu kemu rọ tare nẹ ọ gbare yẹrẹ chọre uyota. (Une 19:9; 119:142, 151) Obo rọ tare nẹ e cha phia vwẹ obaro na eje rugba. (Aiz. 55:10, 11) Ọkieje yen o vwo ruẹ obo rọ tare. (Ukeri 23:19) Vwọrẹ uyota, Jihova che se gun efiaan! (Hib. 6:18) Ọnana yen sorọ Jihova vwọ dia “Ọghẹnẹ rẹ uyota.”—Une 31:5.
5. Diesorọ a rha mrẹ bẹnbẹn ra vwọ riẹn “Ọghẹnẹ rẹ uyota” naa? Djekpahọn. (Iruo 17:27)
5 Ihwo evo tanẹ ọ bẹnre ra vwọ riẹn “Ọghẹnẹ rẹ uyota” na, ẹkẹvuọvo ọyena dia uyotaa. Erọnvwọn eje rọ mare re riariẹ avwanre phiyọ djerephia nẹ ọ herọ. (Rom 1:20) Ọke rẹ ọyinkọn Pọl vwọ ta ota kẹ ẹko ihwo ri Grik ri yono ẹbe kodo vwẹ Atẹns, ọ da vuẹ ayen nẹ Ọghẹnẹ guọnọre nẹ avwanre riẹn ọyen, nẹ “o sherabọ kẹ avwanre ohwo ọvuọvo-o.” (Se Iruo 17:27.) Vwọrẹ uyota, ihwo re vwomakpotọ re hiẹ guọnọ uyota na yen Jihova siẹ te oma.—Jọn 6:44.
6. Erhọ yen uyota evo rehẹ Baibol na, kẹ diesorọ oma vwọ vwerhen owẹ nẹ wọ riẹn uyota yena?
6 Idjerhe ọvo a sa vwọ riẹn Jihova yen e vwo yono Baibol na. Ẹwẹn ọfuanfon rẹ Ọghẹnẹ yen mu ihwo vwo si Baibol na. (2 Pita 1:20, 21) Ọtiọyena, kemu kemu rọhẹ Baibol na uyota, a sa vwẹrosuọ. Kerẹ udje, avwanre sa vwẹroso obo rọ ta kpahen oborẹ idjuvwu vẹ akpọ kugbe arhọ tonphiyọ wan. (Jẹn. 1:1, 26) Avwanre se vwo imuẹro rẹ obo rọ ta kpahen oboresorọ avwanre eje vwo ru imwemwu vẹ oboresorọ ojaẹriọ vẹ ughwu vwọ vọn asan eje. (Rom 5:12; 6:23) Avwanre sa vwẹroso Baibol na karekare rọ tare nẹ Jihova cha womarẹ Ọmọ rọyen vwo phioba phiyọ ebẹnbẹn eje rẹ Eshu rọ dia “ọsẹ rẹ efian na” so kẹ avwanre no. (Jọn 8:44; Rom 16:20) A je sa vwẹroso ive ri Baibol na rọ tare nẹ Jesu cha ghwọrọ irumwemwu no, rhọvwọn ihwo ri ghwuru nushi, rhuẹrẹ otọrakpọ na, je nẹrhẹ avwanre dia ihwo re gbare. (Jọn 11:25, 26; 1 Jọn 3:8) Ọnana okpuphẹn ri Jihova vwọ kẹ avwanre na! O yono avwanre uyota na je vwẹ uphẹn kẹ avwanre nẹ e yono ihwo efa kpahọn.—Mat. 28:19, 20.
OBORESORỌ AVWANRE VWỌ TA UYOTA NA
7-8. Obo ri mu avwanre vwọ ta uyota na ghanre? Djudje rọyen. (Mak 3:11, 12) (Ni ihoho na.)
7 Kirobo re djunute siẹvure, e jẹ a ta uyota ọkieje a da guọnọ dia evunrẹ orua ri Jihova. Ẹkẹvuọvo, avwanre da guọnọ ru obo re cha nẹrhẹ oma vwerhen Jihova, e che ru vrẹ a de vwọ ta uyota. Oboresorọ avwanre vwọ ta uyota ghanre kẹ Jihova. Roro kpahen obo re phiare ọke rẹ Jesu vwo ruiruo rẹ aghwoghwo rọyen vwẹ otọrakpọ na. (Se Mak 3:11, 12.) Ọke ri Jesu vwo ghwoghwo kẹrẹ Abadi ri Galili, otu buebun da gba riariẹ phiyọ. Evo usun rayen rẹ ẹwẹn rẹ Idẹbono kpokpo de she bọvwọn opharo rhuotọ vwẹ obaro ri Jesu, ayen de kperi phia nẹ: “Wẹwẹ yen Ọmọ rẹ Ọghẹnẹ na.” Diesorọ emekashe rẹ Idẹbono vwọ ta ọtiọyen? Ọ sa dianẹ ayen guọnọre nẹ ihwo re kerhọ rayen na vwẹroso ayen, je riẹriẹ ayen vwọ dobọ rẹ ẹga rẹ ayen vwọ kẹ Jihova ji. Emekashe rẹ Idẹbono yena ta uyota, ẹkẹvuọvo ojevwe romobọ rayen yen ayen guọnọ. Oma vwerhen Jesuu kidie ọ riẹn oboresorọ ayen vwo ruẹ ọtiọyen. Jesu tobọ vuẹ ayen nẹ ayen ta ota kpahen ọyeen.
8 Die yen avwanre se yono vwo nẹ ikuegbe nana rhe? Obo ri mu avwanre vwọ ta uyota na ghanre kẹ Jihova. Ọtiọyena, ọyen obo re ghanre mamọ re vwo yono ihwo efa uyota na fikirẹ ẹguọnọ re vwo kpahen Jihova, je vwẹ ujiri eje ra vwọ kẹ avwanre vwo rhe!—Mat. 5:16; ni Iruo 14:12-15.
Ono yen wọ tẹnroviẹ wo de yono ihwo uyota na? (Ni ẹkoreta 7-8)
9. Die yen o fori nẹ a kẹnoma kẹ, kẹ diesorọ?
9 Roro kpahen ẹdia ọfa ro de fo nẹ a kẹnoma kẹ uruemu re vwo titi oma rọ nẹrhẹ ihwo efa jiri avwanre. Vwẹ ẹwẹn roro nẹ oniọvo ọshare ọvo vuẹ avwanre ota rẹ odjahọn, avwanre da vuẹ ihwo efa kpahen ota na. Ihwo ra vuẹre na da mrẹvughe nẹ obo ra vuẹ ayen na uyota, o che gbe ayen unu nẹ avwanre riẹn erọnvwọn nana, ayen ji che roro nẹ avwanre riẹn evuẹ rẹ odjahọn buebun. Ọnana sa nẹrhẹ ayen vwẹ okpẹro vwo ni avwanre, ẹkẹvuọvo ọ dia ọtiọyen yen Jihova che ni avwanree. (Isẹ 11:13) Diesorọ? Ọ ghwa dia kidie nẹ a vuẹ ihwo ovuẹ rẹ odjahọọn, ẹkẹvuọvo avwanre vuẹ ayen uyota na fikirẹ ojevwe romobọ rẹ avwanre.
OBO RA SA VWỌ TA UYOTA NA
10. Die yen otọ rẹ eta ‘avwerhen’? (Kọlose 4:6)
10 Se Kọlose 4:6. Ọyinkọn Pọl karophiyọ iniọvo ri Kọlose nẹ e jẹ eta rayen dia eta rẹ ‘avwerhen ọkieje.’ Die yen otọ rẹ ota rọyen na? Eta ri Grik re vwo ruiruo vwẹ etinẹ na djisẹ rọyen nẹ ofori eta avwanre dia eta rẹ ọbọngan, je ta ota vwẹ idjerhe rẹ ọghọ, o mi ji te ubiudu rẹ ihwo.
11-12. Diesorọ a vwọ jomaotọ siẹrẹ e de nene ihwo ta ota kpahen Ota rẹ Ọghẹnẹ? Djudje rọyen. (Ni ihoho na.)
11 Ofori nẹ a reyọ uchebro ri Pọl ro shekpahen eta rẹ avwerhen vwo ruiruo siẹrẹ e de ghwoghwo uyota na kẹ ihwo efa. Baibol na reyọ uyota rọhẹ evun rọyen vwo dje ọlọkọ rọ pha dandan rọ sa ghare erhi vẹ ẹwẹn rẹ avwanre. Kọyen o se dje obo rehẹ evunrẹ ubiudu avwanre phia kugbe obo ri mu avwanre vwo ru oborẹ avwanre ruẹ. (Hib. 4:12) Jẹ a rha reyọ ona vwọ reyọ Baibol na vwo ruiruoo, e se nene ayen phraphro ọkamuka yẹrẹ nẹrhẹ ivun miovwon ayen. Mavọ yen ọyena sa vwọ phia?
12 Vwẹ ẹwẹn roro ẹdia nana nẹ wọ vwọ hẹ iruo rẹ aghwoghwo na, wọ mrẹ ọshare ọvo rọ nẹrhovwo rhe ema ọkieje, rẹ oma je vwerhan siẹrẹ ọ vẹ orua rọyen da re orẹ ri Krismasi vẹ Ista. Avwanre sa reyọ Baibol na vwo dje kẹ ọshare na obo rọ dia emu rẹ ẹkpa te ra vwọ nẹrhovwo rhe ema ri vwo arhọọ, ji dje kẹ nẹ Krismasi vẹ Ista eyẹn erẹ rẹ egedjọ. (Aiz. 44:14-20; 2 Kọr. 6:14-17) Aphro herọọ nẹ uyota yen avwanre vuẹrẹ e vwo nene ọshare na ta ota, ẹkẹvuọvo avwanre reyọ Ota rẹ Ọghẹnẹ vwo ruiruo vwẹ idjerhe onaa.
Mavọ wọ sa vwọ reyọ ona vwọ vuẹ ihwo kpahen uyota na? (Ni ẹkoreta 11-12)a
13. Idjerhe vọ yen eta avwanre sa vwọ dia vwevwerhen kirobo re phi ughwanka phiyọ?
13 Pọl je vuẹ avwanre nẹ e jẹ eta avwanre dia vwevwerhen kirobo re phi ughwanka phiyọ. Ọ dia Pọl tanẹ e rhurhu uyota na yẹrẹ sionuu. Ukperẹ ọtiọyen, ọ vuẹ avwanre nẹ e jẹ eta avwanre dia “vwevwerhen” rere oma sa vwerhen ihwo re “davwan” erhọ rẹ eta rẹ avwanre ni. (Job 12:11) Ọnana sa bẹn eruo ọkievo. Vwọ kpahen emu ra ria, e se roro nẹ emu rọ vwerhen avwanre je cha vwerhen ihwo efa. Ọtiọyen ọ je hepha nẹ e ji se no nẹ oborẹ avwanre ta ota wan che je ihwo efa. Ọ dia ọtiọyen yen ọ hephaa. Kerẹ udje, o vwo oborẹ ihwo evo ri nẹ ẹkuruemu evo rhe ta ota wan, ọ da tobọ dianẹ ayen ta ota kẹ ihwo ri vie ayen. Ihwo rẹ ẹkuotọ efa rhọnvwaphiyọ ẹkuruemu tiọyenaa kidie ayen no nẹ ọyena aroeyivwon. Pọl tare nẹ ofori a vwọ riẹn obo ra “kpahen [ota] vwọ kẹ ohwo ọvuọvo.” Ọnana mudiaphiyọ nẹ avwanre cha ta eta avwerhen, ọ diẹ vwo nene obo ri je avwanre yẹrẹ ẹkuruemu asan re nurhee, ẹkẹvuọvo vwo nene obo ri je ihwo rẹ avwanre ta ota kẹ na.
ỌKE RO FORI RA VWỌ TA UYOTA NA
14. Jesu yono idibo rọyen erọnvwọn eje rọ riẹnre ọke rọ vwọ hẹ otọrakpọ na? Djekpahọn.
14 Kọke kọke yen Jesu vwọ ta eta avwerhen kẹ idibo rọyen ji yono ayen erọnvwọn buebun. (Mak 6:34) Ẹkẹvuọvo, o ji vwo erọnvwọn buebun re ayen cha riẹn. Jesu yono ayen erọnvwọn eje rọ riẹnree. O dje erorokẹ kẹ ayen kidie ọ riẹn asan ẹgba rayen muru. Ọ riẹnre nẹ ọyena dia ọke ro fori ro vwo yono ayen iyota evoo. Vwọrẹ uyota, ọ vuẹ ayen nẹ ayen che se vwo ẹruọ rẹ iyota evoo. (Jọn 16:12) Die yen ọnana yono avwanre?
15. Ofori a vwọ vuẹ ihwo ra vwẹ Baibol yono erọnvwọn eje rẹ avwanre riẹnre ẹsiẹvo? Djekpahọn. (Isẹ 25:11) (Ni uhoho na.)
15 Udje ri Jesu djerephia nẹ ọ dia uyota eje ra riẹnre yen a cha vuẹ ihwo kpahen ẹsiẹvoo. Mavọ yen e se vwo nene udje rọyen? Ofori nẹ e dje erorokẹ vwọ kẹ ayen ji vwo oniso ẹdia rẹ ayen hepha. Rhoma roro kpahen udje rẹ ọshare yena rẹ oma vwerhan ọke rọ vẹ ọrua rọyen da re orẹ ri Krismasi vẹ Ista. Avwanre riẹnre nẹ enana erẹ rẹ egedjọ rẹ Ọghẹnẹ rhọnvwephiyọọ. Jẹ vwẹ ẹwẹn roro nẹ wọ ton uyono ri Baibol phiyọ vẹ ọshare yena vwẹ udughwrẹn ọvo yẹrẹ ivẹ tavwen e ki ru orẹ ri Krismasi. A sa tanẹ eta wẹn vọnre vẹ avwerhen siẹrẹ wọ da vuẹ oborẹ Baibol na ta kpahen erẹ rẹ egedjọ, je rhẹro nẹ ọ cha dobọ ri Krismasi ji ugege yena? Vwọrẹ uyota, o krẹ ihwo evo ra vwẹ Baibol yono ke reyọ obo re yono ayen vwo ruiruoo. Jẹ vwọ kẹ efa, ọ reyọ ọke grongron ayen ki se wene iroro vẹ iruemu rayen. A sa vwẹ ukẹcha kẹ ihwo ra vwẹ Baibol yono vwọ yanphiaro a da vuẹ ayen obo ro fori nẹ ayen riẹn vẹ ọke ro fori rẹ ayen vwọ riẹn, kọyen ọke rẹ ayen vwo vwo ẹruọ obo re yono ayen na.—Se Isẹ 25:11.
Nene udje ri Jesu siẹrẹ wo de brorhiẹn rẹ ọke ro fori wọ vwọ ta uyota na vẹ uche rẹ wọ cha ta (Ni ẹkorota 15)
16. Mavọ yen wọ sa vwọ vwẹ ukẹcha kẹ ihwo wọ vwẹ Baibol yono vwọ “yan vwevunrẹ uyota na”?
16 Emerọnvwọn evo re ma kẹ avwanre aghọghọ ra vrẹ a vwọ vwẹ ukẹcha kẹ ihwo efa vwo yono uyota ro shekpahen Jihovaa. Avwanre sa vwẹ ukẹcha kẹ ayen vwọ “yan vwevunrẹ uyota na” siẹrẹ e de ru erọnvwọn nana: Vwẹ ọkieje vwo phi omamọ udje phiyotọ kẹ ayen. (3 Jọn 3, 4) Davwẹngba vwo djephia nẹ wo vwo imuẹro kpahen ive ri Baibol na. Vwo imuẹro nẹ ẹguọnọ wo vwo kpahen Jihova yen mu we vwọ ta uyota na. Ta eta avwerhen, womarẹ a vwọ ta bọrọbọrọ vẹ ọghọ vwẹ ọke ro fori siẹrẹ e de yono ihwo uyota na. Wọ je vwẹ ujiri eje ra vwọ kẹ wẹ vwo rhe Jihova. Wo de ru enana, jẹ wo djephia nẹ wọ ka ẹbẹre ri Jihova rọ dia Ọghẹnẹ rẹ uyota na.
UNE 160 “Iyẹnrẹn Esiri”!
a IDJEDJE RẸ UHOHO: Vwẹ uhoho rẹsosuọ na, oniọvo ọshare na mrẹ urhe rẹ Krismasi vwẹ uwevwin rẹ ohwo rọ guọnọ ghwoghwota kẹ na, oniọvo na de dje uyovwinrota rọ ta ota kpahen ọtonphiyọ ri Krismasi rọ dia orẹ rẹ egedjọ vwọ kẹ. Vwẹ uhoho rivẹ na, oniọvo ọshare na de dje uyovwinrota rọ ta kpahen obo ra sa vwọ dia omamọ ọsẹ vwọ kẹ. Vwẹ idje ivẹ na, ọvọ yen me yovwin?