A Vwọ Vwẹrote Eguan Ruvie rẹ Avwanre

“Mi vwo ẹguọnọ rẹ Ọguan Ruvie rẹ avwanre mamọ” ọtiọyen eghene aye ọvo vwẹ Colombia tare. “Ọnana asan me vẹ iniọvo mẹ re dia Inenikristi da vwoma ga Ọghẹnẹ.” Ọtiọyen oma ji ru we?

Vwẹ akpọ na eje, Iseri ri Jihova vwoma vwẹ Eguan Ruvie ri bun te 63,000. Iwevwin nana asan ro fuoma rẹ avwanre da ga Ọghẹnẹ. Jẹ ọ dia ọyena ọvoo. David rọ dia ọkobaro ọkieje vwẹ Colombia da ta: “Ọguan Ruvie rẹ avwanre na brọghọ phiyọ uyono rẹ avwanre. Erhorha buebun ri bru avwanre rhe da mrẹ erhuvwu rẹ Ọguan Ruvie rẹ avwanre na, ko gba ayen unu.” Ọ dia ọnana de muẹ phiaa. Avwanre wian gangan vwo ruẹ Eguan Ruvie rẹ avwanre na fuan je vwẹrote. Kẹ, mavọ yen e ru ọnana wan?

Mavọ yen avwanre vwẹrote Eguan Ruvie rẹ avwanre wan?

Ihwo re vwoma vwẹ Eguan Ruvie sansan yen vwo oghwa rẹ ayen vwọ vwẹrote. Ayen se vwo ru ọyena, iniọvo buebun ki vwobọ vwẹ orufon rẹ Ọguan Ruvie na ọkieje. Ayen vwẹrote je rhuẹrẹ erọnvwọn rehẹ Ọguan Ruvie na rere ayen sa vwọ tọn.

Akon Iruo rẹ Ebanbọn Vwẹ Oghọn Ukoko (LDC) vwẹ iniọvo evo vwo muẹ rere ayen yono iniọvo rehẹ Eguan Ruvie sansan kpahen oborẹ ayen sa vwọ vwẹrote Eguan Ruvie rayen. Omarẹ Eguan Ruvie esan fiẹ ihwe yen a ghara vwọ kẹ iniọvo ri yono ihwo efa kpahan iruo rẹ ẹroevwote. Oniọvo na kpo Ọguan Ruvie ọvuọvo ji yono ighwoghwota rehẹ ukoko na kpahen oborẹ ayen sa vwọ vwẹrote. Ẹgbukpe erherha, kọ fuẹrẹn iwevwin na ọvuọvo rere ọ sa vwọ rien asan ra cha rhuẹrẹ je vwẹrote.

Iniọvo rehẹ ukoko na nẹ uyono nana ghanghanre. Indhumathi, oniọvo aye ọvo vwẹ India da ta: “A mrẹ vwo dje uyono naa. Oma vwerhen ovwẹ e vwo yono avwanre oborẹ avwanre sa vwọ vwẹrote Ọguan Ruvie avwanre rọ vwọ dia yoyovwin.” Evans, oniọvo ọshare ọvo vwẹ Kenya da ta: “Avwanre yono obo ra sa vwọ sẹro rẹ igho buebun womarẹ a fobọ rhuẹrẹ erọnvwọn itete ri miovwirin rere i vwo jẹ emiovwẹnphiyọ.”

Obo ra Ghwọrọ Igho Phiyọ

Kukpe kukpe, igho ra ghwọrọ vwọ vwẹrote Ọguan Ruvie ọvo se buẹn te idọla ujorin yẹrẹ uriorin buebun,a vwo nene asan ra bọnrọ phiyọ, obo rọ tọn te re yẹrẹ uche ukoko re reyọ vwo ruiruo. Kẹ, tivọ yen a da mrẹ igho vwọ hwosa rẹ eghwaghwọrọ na?

Itetoro yen avwanre vwọ vwẹrote Eguan Ruvie rẹ avwanre. Alexander, oniọvo ọshare ọvo vwẹ Kazakhstan da ta: “A reyọ igho evo vwọ dẹ idata, hwosa rẹ urhukpẹ ẹlẹtriki, ame vẹ erọnvwọn efa tiọyena. A je dẹ erọnvwọn efa kerẹ erọnvwọn re vwo rien abọ, hand glovu, odja, aghan kugbe ọda.” Itoro efa ri chekọ ka vwọ ba itoro rẹ akpọeje rere e vwo ruiruo rẹ ebanbọn vẹ ẹrhuẹrẹ rẹ iwevwin ride re ruẹ vwẹ akpọeje.

Iruo rẹ Ẹrhuẹrẹ Ride

Ọ da dianẹ igho ra cha vwọ rhuẹrẹ Ọguan Ruvie ọvo bun vrẹ igho ra ghwọrọ phiyọ vwẹ emeranvwe ivẹ yẹrẹ erha, ekpako na ke cha vuẹ iniọvo ri yono ihwo efa kpahan iruo rẹ ẹroevwote rẹ LDC ji rhe. Ọ da dianẹ LDC rhọnvwephiyọ iruo na, itetoro re ruẹ vwọ kẹ iruo akpọeje kọyen e che vwo ruiruo na. Vwẹ uvwre rẹ ukpe rẹ ẹga ri 2023, ewian etiọyen ri bun te 8,793 yen e ruru vwẹ akpọeje, ọ reyọ igho ro te oduduru rẹ idọla $76.6. Jẹ a fuẹrẹn ivẹ vwẹ usun rẹ iruo nana.

Vwẹ Angola, Ọguan Ruvie ọvo rọ tọn te ẹgbukpe 15 re, vwo asan sansan ra cha rhuẹrẹ vwọ. Urhukpẹ rẹ ẹlẹtriki rayen miovwirin, igbẹhẹ na vare, ihwo re dia ekogho na je tanẹ ọke osio da rhọ, ame ruẹ iwevwin rayen. LDC de ru ọrhuẹrẹphiyotọ rẹ ayen vwọ rhuẹrẹ Ọguan Ruvie na. Owian nana reyọ idọla $9,285. Oma vwerhen ihwo ri dia ekogho na, ayen vwọ mrẹ obo re ruiruo na wan.

Vwẹ Poland, Ọguan Ruvie ọvo fiẹ, ikapẹti rọyen je miovwin mamọ re. LDC da rhọnvwephiyọ nẹ a rhuẹrẹ asan ro fiẹ na ji wene ikapẹti na. Owian nana reyọ idọla $9,757. Ọtiọyena, ọ cha reyọ ikpe buebun tavwen a ke rhoma rhuẹrẹ Ọguan Ruvie na.

Iruo Ẹrhuẹrẹ ri jiri Jihova

Ọ dia iruo tiọna de sẹro rẹ igho re torori ọvoo, ọ je ghwa ujiri rhe Jihova. Shaun, oniọvo ọshare ọvo vwẹ Tonga, da ta: “Kidie nẹ avwanre nabọ vwẹrote Ọguan Ruvie na, kẹ avwanre sa vwẹ ẹga kẹ Jihova vwẹ asan rọ fonro, rẹ ekuakua rọyen eje je riẹn wian. Ọtiọyena kọ nẹrhẹ ihwo rehẹ ekogho na jiri Jihova. Oma vwerhen avwanre siẹrẹ avwanre de durhie ihwo cha Ọguan Ruvie rẹ avwanre.”

Mavọ Yen Wọ Sa Vwọ Vwo Ukẹcha Phia?

Avwanre eje sa vwo ukẹcha phia vwo ru Ọguan Ruvie rẹ avwanre fon ji vwẹrote. Marino, ọvo usun rẹ iniọvo ri yono ihwo efa kpahan iruo rẹ ẹroevwote vwẹ Australia da ta: “Avwanre eje se vwobọ vwẹ ẹroevwote rẹ Eguan Ruvie. E de ru ọtiọyen, a cha sẹro rẹ igho buebun re torori, e me ji vwo ruiruo vwẹ asan ra da ma guọnọ.”

Joel, oniọvo ọshare ọvo vwẹ India da vwẹrote Ọguan Ruvie rayen, oma nabọ vwerhọn. Ọ da ta: “Me vẹ iniọvo mẹ da wian kuẹgbe, ọnana nẹrhẹ mi roro kpahan oborẹ akpọ kpokpọ na cha dia.” Nicole re djunute siẹvore da ta: “O krinọ naa, iniọvo na vwọ rhuẹrẹ enu rẹ Ọguan Ruvie ro fiẹ na ji mi rien otọ na. Dede nẹ, ọ dia omẹvwẹ yen rhuẹrẹ asan ro fiẹ naa, jẹ obo mi ruru na nẹrhẹ iniọvo na vrabọ rẹ omaẹwan.”

Wọ da guọnọ vwomakpahotọ vwọ vwẹrote Ọguan Ruvie wẹn, biko vuẹ ekpako rẹ ukoko wẹn. Vwọba, ọ dia Ọguan Ruvie wẹn ọvo yen a vwẹ utoro wẹn vwọ vwerotee, a je reyọ Eguan Ruvie efa vwẹ akpọ na eje. E se ru itetoro na womarẹ ekpeti rehẹ Ọguan Ruvie wẹn yẹrẹ womarẹ donate.jw.org. Wẹ kobiruo wọ kẹ itetoro ru vwo ruẹ na.