Asan ra da Ga Ẹga

A VWẸ iji vwọ kẹ idibo ri Jihova nẹ ayen siomakoko vwo rhiabọreyọ uyono je bọn ohwohwo gan. (Hib. 10:23-25) Asan rẹsosuọ rẹ ihwo rẹ Izrẹl da ga ẹga yen “ọgarivi na . . . , utughẹ ra da vwa oma na.” (Eyan. 39:32, 40) Ọke vwọ yanran na, ọmọ ri Devid re se Solomọn da bọn uwevwin ẹga vwọ kẹ urinrin rẹ Ọghẹnẹ. (1 Ivie 9:3) A vwọ ghwọrọ uwevwin ẹga yena vwẹ 607 B.C.E., ihwo ri Ju de vwo ọrhuẹrẹphiyotọ rẹ ayen vwọ vwoma vwẹ asan rẹ ayen da ga Ọghẹnẹ re se sinagọg. Ọke vwọ yanran na, a da rhoma bọn uwevwin ẹga ra ghwọrọre na, etiyin kọyen asan ra da ga ẹga rẹ uyota. Jesu yonori vwẹ sinagọg vẹ uwevwin ẹga ra rhoma bọn na. (Luk 4:16; Jọn 18:20) Jesu tobọ yono ihwo vwẹ enu rẹ ugbenu.—Mat. 5:1–7:29.

² Jesu vwo ghwu nu, Inenikristi ke vwoma vwẹ iwevwin rẹ ihwo vẹ asan efa rẹ ayen vwo yono ọbe ọfuanfon na, je riavwerhen rẹ oyerinkugbe rẹ iniọvo. (Iruo 19:8, 9; Rom 16:3, 5; Kọl. 4:15; Filim. 2) Ọkiọvo, Inenikristi rẹsosuọ vwoma vwẹ asan rẹ odjahọn rere ihwo ri muẹkpahen ayen vwo jẹ ayen ẹmrẹ. Vwọrẹ uyota, idibo rẹ Ọghẹnẹ rẹ awanre vwo owenvwe rẹ ayen vwo siomakoko vwẹ asan ra da ga ẹga rere “Ọrovwohwo [vwo] yono ayen.”—Aiz. 54:13.

³ Nonẹna, Inenikristi je vwoma vwẹ iwevwin rẹ ihwo vẹ asan efa. Ọke buebun, iwevwin rẹ iniọvo yen e de ru omẹvwa rẹ aghwoghwo na. Ihwo re vwẹ iwevwin rẹ ayen kpahotọ vwọ kẹ emẹvwa tiọyena vwẹ ẹro ọghanghanre vwo ni uphẹn nana. Iniọvo buebun mrẹ erere gbidiki kidie nẹ ayen vwẹ uwevwin rayen kpahotọ.

ỌGUAN RUVIE

⁴ Asan rẹ Iseri ri Jihova da ga ẹga kiriguo yen Ọguan Ruvie. Ọke buebun ayen dẹ otọ yẹrẹ uwevwin, ayen me bọn Ọguan Ruvie kpokpọ phiyọ yẹrẹ rhuẹrẹ uwevwin rẹ ayen dẹre na. Ọ da dia obo re se ru, ikoko sansan sa vwoma vwẹ Ọguan Ruvie vuọvo rere a sa vwọ sẹro rẹ igho, a me je vwẹ Ọguan Ruvie na vwo ruiruo vọnvọn. Vwẹ asan evo, a sa hwosa phiyọ ọguan ọvo a me reyọ vwo ru uyono. Ofori nẹ a reyọ Eguan Ruvie kpokpọ yẹrẹ e ra rhuẹrẹre mamọ vwọ kpahotọ. Ẹkẹvuọvo, ọ da dianẹ emerọnvwọn yen e ruru vwẹ ẹrhuẹrẹ na, o rhe fo nẹ a reyọ vwọ kpahotọ-ọ.

⁵ O ghwe fo nẹ Ọguan Ruvie na dia rhuarho gidigbo ọ me nẹrhẹ ihwo mu ẹwẹn rayen kpahen uwevwin na-a. Dede nẹ obo ra bọn Eguan Ruvie wan fẹnẹre vwẹ asan sansan, jẹ ọdavwẹ vuọvo yen a vwọ bọn ayen. (Iruo 17:24) Vwo nene ẹdia rẹ ekogho na, ofori nẹ Ọguan Ruvie na dia asan ro fuoma ro ji shephiyọ.

⁶ Iniọvo rehẹ ukoko na eje yen toro igho vwọ kpahen ẹreyọvworuiruo kugbe ẹrhuẹrẹ rẹ Eguan Ruvie rẹ ayen de ru uyono. E mu imize vwọ yare igho-o; e ji bru arhọghọ kẹ ohwo-o. E mu ekpeti rẹ itetoro phiyọ Ọguan Ruvie na rere ihwo se vwo toro igho ra guọnọre vwọ kẹ eghwaghwọrọ ri churobọ si Ọguan na. Ayen ru itetoro ro nẹ otọ rẹ ubiudu rhe.—2 Kọr. 9:7.

⁷ Iniọvo na eje niro nẹ ọyen okpuphẹn rẹ ayen vwo toro igho vwọ kẹ ẹreyọvworuiruo rẹ Ọguan Ruvie na, je vwomakpahotọ vwọ kẹ orufon vẹ ẹroevwote rọyen. Ọkpako yẹrẹ odibo rowian yen vwẹrote ọrhuẹrẹphiyotọ rẹ iruo nana. Ọke buebun, ẹko aghwoghwo ọvuọvo yen vwẹrote orufon na, oniruo rẹ ẹko na yẹrẹ ọ rọ vwẹ ukẹcha kẹ yen kobaro rẹ iruo nana. E jẹ obevun vẹ otafe rẹ Ọguan Ruvie na brọghọphiyọ Jihova oma ji titi ukoko rọyen.

⁸ Ọ da dianẹ ikoko re vwoma vwẹ Ọguan Ruvie na vrẹ ọvo, ekpako rẹ ikoko na ke cha vwẹ Umẹ Rọvwẹrote Ọguan Ruvie vwo mu, umẹ nana kọyen cha vwẹrote eta ri shekpahen ọguan na vẹ asan rọ hepha na. Ekpako na yen cha vwẹ oniọvo ọvo vwo mu rọ cha dia ọrọvwẹrote iruo rẹ umẹ nana. Umẹ nana rọ wian vwẹ otọ rẹ odjekẹ rẹ ekpako rẹ ikoko na yen vwẹ odjekẹ phia kpahen orufon rẹ ọguan na, ayen ji vwo imuẹro nẹ a nabọ vwẹrote ọguan na, ekuakua ra guọnọre vwọ kẹ orufon vẹ ẹroevwote rọyen je herọ. Ọnana guọnọ ọwiankugbe vwẹ uvwre rẹ ikoko na.

⁹ Ikoko re vwoma vwẹ Ọguan Ruvie na da vrẹ ọvo, e se wene ọke rẹ ikoko na vwo ru uyono nọke ra ruọke. Ofori nẹ ekpako na ru ọrhuẹrẹphiyotọ nana vwẹ ẹwẹn rẹ ẹguọnọ vẹ erorokẹ. (Fil. 2:2-4; 1 Pita 3:8) E jẹ ukoko vuọvo brorhiẹn vwọ kẹ ikoko ri chekọ-ọ. Oniruo okinriariẹ de kin ukoko ọvo, ofori nẹ ikoko ri chekọ wene ọke rayen vwẹ udughwrẹn na vwo nene oborẹ ẹdia rayen hepha.

¹⁰ E se ru irueru rẹ orọnvwe yẹrẹ ughworivwin vwevunrẹ Ọguan Ruvie na siẹrẹ Umẹ Rọvwẹrote Iruo rẹ Ẹga rẹ Ukoko na da rhọnvwephiyọ. Ekpako na cha nabọ fuẹrẹn oborẹ ayen guọnọ reyọ ọguan na vwo ruẹ na, kẹ ayen che mu orhiẹn-ebro rayen kpahen odjekẹ rẹ oghọn ukoko na.

¹¹ Ofori nẹ ihwo ra rhọnvwe kẹ nẹ e vwẹ Ọguan Ruvie vwo ru irueru orọnvwe yẹrẹ ughworivwin nabọ ghwa oma rayen kirobo ra guọnọ mie Inenikristi rẹ uyota. E jẹ e ru emu vuọvo vwẹ Ọguan Ruvie na ro che miovwo iniọvo na ivun yẹrẹ rọ cha ghwa ekan vwo rhe Jihova vẹ ukoko na-a. (Fil. 2:14, 15) Oghọn ukoko na se brorhiẹn nẹ a vwẹ Ọguan Ruvie na vwo ru irueru efa kerẹ Isikuru rẹ Ekpako vẹ Idibo Rowian kugbe Isikuru rẹ Ekobaro.

¹² Ofori nẹ iniọvo rẹ ukoko na nabọ muọghọ kẹ asan ra da vwoma na. O ji fo nẹ irhuon, osẹnvwe vẹ oborẹ avwanre ghwa oma avwanre wan djephia nẹ avwanre ihwo re ga Jihova. (Aghwo. 5:1; 1 Tim. 2:9, 10) E de nene uchebro ri shekpahen ẹdia nana, jẹ avwanre dje ọdavwaro phia kpahen emẹvwa rẹ avwanre.

¹³ Ọyen obo re ghanre re vwo hwomamu vwẹ emẹvwa. E jiriro nẹ emọ chidia kẹrẹ esẹ vẹ ini rayen. A sa vuẹ emiọvwọn nẹ ayen chidia asan rẹ ayen de jẹ ihwo efa ekpokpo ọ da dianẹ ayen guọnọ mu emọ na phia ra ghwọku yẹrẹ vwẹrote ayen vwẹ ẹdia efa.

¹⁴ A vwẹ iniọvo ri tedje vwo muẹ re cha vwẹrote echidiotọ na ọke re de ru uyono vwẹ Ọguan Ruvie. Ofori nẹ ayen gbẹrophiyotọ, dje uruemu rẹ ugbeyan phia, ji vwo iroro abavo. Iruo rayen churobọ si re vwo dede ihwo kpokpọ, ra vwọ guọnọ asan rẹ ihwo ri kruko che chidia vwọ kẹ ayen, kugbe re vwo kere ihwo; ayen ji vwo imuẹro nẹ ọguan na riẹn djiro yẹrẹ ọ riẹn tuabọ. Iniọvo re vwẹrote echidiotọ na cha karophiyọ emiọvwọn nẹ ayen nabọ vwẹrote emọ rayen, e jẹ ayen muẹdjẹ tavwen uyono ke tonphiyọ yẹrẹ o de kuphiyọ nu-u, ayen je heha vwẹ enu rẹ umukpe na-a. Ọvo usun rẹ iniọvo re vwẹrote echidiotọ na sa vwẹ ona vẹ aghẹnghẹn vwọ vuẹ ọmiọvwọn rẹ ọmọ rọyen ruẹ yanghan yanghan nẹ o mu ọmọ na kpo otafe o vwo jẹ ihwo ekpokpo. Iruo rẹ iniọvo re vwẹrote echidiotọ na ruẹ nẹrhẹ ihwo ejobi riavwerhen rẹ uyono na. O che yovwin siẹrẹ iniọvo re vwẹrote echidiotọ na da dia ekpako vẹ idibo rowian.

EBABỌN RẸ ỌGUAN RUVIE

¹⁵ Vwẹ ẹgbukpe ujorin rẹsosuọ, Inenikristi evo vwo igho vwọ vrẹ efa, kọyensorọ ọyinkọn Pọl vwo si: “Rere emu na ejobi vwọ dia abavo siobọ nẹ obo ru wo vwori buebu vwẹ ọke nana kẹ ayen otu re guọnọ, rere ayen je sa kẹ wẹ obuebu rẹ obo rẹ ayen vwori, rere ọ vwọ sa dia ẹrhẹnrhẹnre.” (2 Kọr. 8:14) Nonẹna, e ji ru obo re sa nẹrhẹ a dia “ẹrhẹnrhẹnre.” A reyọ igho rẹ ikoko na torori vwọ bọn Eguan Ruvie jẹ rhuẹrẹ ayen. Oma nabọ vwerhen ukoko na kpahen okẹ ri ghwologhwolo rẹ iniọvo rehẹ akpọeje, ọtiọyen oma je vwerhen ikoko re mrẹ erere vwo nẹ itetoro nana.

¹⁶ Oghọn ukoko rhuẹrẹ ikoko sansan phiyọ Ọguan Ruvie rẹ ayen che vwo ru uyono, ayen roro kpahen oborẹ ekogho na hepha tavwen ayen ki ru ọnana. Oghọn ukoko na yen ji brorhiẹn rẹ asan vẹ ọke ra cha vwọ bọn Eguan Ruvie kpokpọ vẹ e ra cha rhuẹrẹ vwẹ ekogho rẹ oghọn na vwẹrote. Oghwọrọ da vwomaphia, ke vwo ọrhuẹrẹphiyotọ ra vwọ rhuẹrẹ Eguan Ruvie re guọghọre, ọkiọvo dede a je rhuẹrẹ iwevwin rẹ iniọvo na.

¹⁷ Oghọn ukoko na yen vwo ọrhuẹrẹphiyotọ rẹ iniọvo re vwomakpahotọ re sa vwẹ ukẹcha phia vwọ dẹ asan, vwo si oborẹ Ọguan Ruvie na cha dia, vwọ yan oyan rẹ ẹbe rẹ otọ na, vwọ bọn je vwẹrote. A guọnọ ihwo buebun re cha vwomakpahotọ kidie a guọnọ Eguan Ruvie buebun vwẹ ẹkuotọ buebun. E jiriro kẹ ighwoghwota ri bromaphiyame re, re je guọnọ vwẹ ukẹcha phia nẹ ayen fili ifọmu, ayen me vwọ kẹ Umẹ Rọvwẹrote Iruo rẹ Ẹga rẹ Ukoko rayen. Ighwoghwota ri ji bromaphiyame-e dede je sa vwẹ ukẹcha phia vwọ bọn Ọguan Ruvie rayen yẹrẹ ẹrhuẹrẹ rọyen.

EGUAN ROMẸVWA

¹⁸ Ọke buebun, Inenikristi rẹsosuọ vwoma ẹkuẹko. Ẹkẹvuọvo, ọke evo “ihwo buebu” koko vwẹ asan ọvo. (Iruo 11:26) Vwẹ idjerhe vuọvo na, nonẹna ihwo ri Jihova buebun je vwoma vwẹ isikoko vẹ eghwẹkoko. Ọke buebun a hwosa phiyọ asan rọ pha rhuarho a me reyọ vwo ru omẹvwa, ẹkẹvuọvo a rha sa mrẹ asan ọtiọye-en, a sa bọn asan ra da ga ẹga tiọyen re se Ọguan Romẹvwa.

¹⁹ Ọkiọvo, a sa dẹ uwevwin je rhuẹrẹ, a me reyọ kerẹ Ọguan Romẹvwa. Dedena, vwẹ ọke buebun, a dẹ otọ, a me bọn ọguan kpokpọ phiyọ. Vwo nene ẹdia rẹ ekogho na, Eguan Romẹvwa evo rho vrẹ efa. Oghọn ukoko na da nabọ fuẹrẹn oborẹ igho na muru nu, kẹ ayen brorhiẹn ra vwọ dẹ yẹrẹ bọn uwevwin tiọyen.

²⁰ Oghọn ukoko na yen vwẹ iniọvo re cha vwẹrote Ọguan Romẹvwa na vwo muẹ. E ru ọrhuẹrẹphiyotọ rẹ ikinriariẹ vwo ru orufon rẹ ọguan na kọke kọke, ọ rẹ abọ ivẹ ẹgbukpe, kugbe ẹroevwote rẹ ọkieje. Erere herọ siẹrẹ iniọvo da vwomakpahotọ vwo ruiruo nana. Ọtiọyena, e jiriro kẹ ikoko eje nẹ ayen nabọ bicha ọrhuẹrẹphiyotọ nana.—Une 110:3; Mal. 1:10.

²¹ Ọkiọvo, a sa vwẹ Ọguan Romẹvwa vwo ru irueru rẹ ikoko na efa kerẹ isikuru rẹ ukoko na vẹ omẹvwa rẹ oghẹresan rẹ iniruo okinriariẹ ruẹ. Kirobo ra vwẹ Ọguan Ruvie vwọ kpahotọ na, ọtiọyen a je vwẹ Ọguan Romẹvwa vwọ kpahotọ. Avwanre de kpo Ọguan Romẹvwa, ofori nẹ uruemu, irhuon vẹ osẹnvwe rẹ avwanre shephiyọ kirobo rọ je hepha siẹrẹ e de kpo Ọguan Ruvie.

²² Ihwo buebun rhurie ro ukoko rẹ Ọghẹnẹ vwẹ ẹdẹ re koba nana. Ọnana odjephia rẹ ebruphiyọ ri Jihova. (Aiz. 60:8, 10, 11, 22) Ọtiọyena, e jẹ e bicha ọrhuẹrẹphiyotọ ra vwọ dẹ je vwẹrote asan rẹ avwanre da ga ẹga. E de ru ọtiọyen, jẹ avwanre dje ọdavwaro phia kpahen obo ra vwẹ iwevwin nana vwo ruẹ ra vwọ bọn ohwohwo gan ma rho kẹ ọke nana rẹ ẹdẹ ri Jihova vwo siẹkẹrẹ na.